འདེམས་སྒྲུག་ཙམ་དུ་གྱུར་བའི་ཧོང་ཀོང་གི་གྲོས་ཚོགས་འཐུས་མིའི་འོས་བསྡུ་བསླེབ་ལ་ཉེ།

ཟླ་འདིའི་ཕྱི་ཚེས་ ༡༩ ཉིན་རྒྱ་ནག་གཞུང་གི་བཙན་གནོན་འོག་ཡོད་པའི་ཧོང་ཀོང་གི་སྐབས་ ༧ པའི་གྲོས་ཚོགས་འཐུས་མི་འོས་བསྡུ་གནང་རྒྱུ་ཡིན་ཡང་འོས་མི་ ༡༥༣ ཁྲོད་དམངས་གཙོ་དོན་གཉེར་བར་ངོས་འཛིན་བྱེད་བཞིན་པའི་འོས་མི་ ༣ ཙམ་ལས་མེད་འདུག

འདས་ལོར་རྒྱ་ནག་གཞུང་གིས་རྒྱལ་ཁབ་གཅིག་དང་ལམ་ལུགས་གཉིས་འོག་ཕྱེད་རང་སྐྱོང་གི་ཚུལ་དུ་གནས་པའི་ཧོང་ཀོང་གྲོང་ཁྱེར་ནང་རྒྱལ་ཁབ་བདེ་འཇགས་ཁྲིམས་ཡིག་ཟེར་བ་དངོས་སུ་ལག་བསྟར་བྱས་ཏེ། སྤྱི་འབངས་ཀྱི་དམངས་གཙོའི་སྟོབས་ཤུགས་ཉམས་དམས་སུ་གཏོང་བཞིན་པ་དང་། དེའི་ཐོག་འདི་ལོའི་ལོ་མགོར་དམངས་གཙོའི་ཆ་ཕྲ་མོ་ཙམ་ལས་ལྷག་མེད་པའི་ཧོང་ཀོང་གི་གྲོས་ཚོགས་(LegCo)འཐུས་མིའི་སྒྲོམ་གཞི་དང་འོས་འདེམས་ཀྱི་སྒྲིག་གཞི་ལ་བསྐྱར་བཅོས་བྱས་པར་བརྟེན། ཉིན་གྲངས་གཉིས་ཀྱི་རྗེས་ཏེ་ཟླ་འདིའི་ཕྱི་ཚེས་ ༡༩ ཉིན་འཚོག་གཏན་འཁེལ་བའི་ཧོང་ཀོང་གི་སྐབས་ ༧ པའི་གྲོས་ཚོགས་འཐུས་མིའི་འོས་བསྡུའི་ནང་། མང་ཚོགས་ངོས་ནས་རྒྱ་ནག་རྒྱལ་ཁབ་དང་དམར་ཤོག་ཚོགས་པར་བློ་དཀར་བའི་འོས་མི་ལ་མ་གཏོགས་འོས་ལྡུག་པའི་གདམ་ཀ་མེད་པ་རེད།

རང་མིང་བརྗོད་འདོད་མེད་པའི་ཧོང་ཀོང་གི་བུད་མེད་ཅིག་གིས་ཨལ་ཇེ་ཛི་ར་གསར་ཁང་གི་གསར་འགོད་པར། འདི་ལོའི་གྲོས་ཚོགས་འཐུས་མིའི་འོས་བསྡུ་འདི་ནི་འདེམས་སྒྲུག་ཅིག་ཡིན་པ་ལས་འོས་འདེམས་ཤིག་མིན་སྐོར་བརྗོད་འདུག ཁོང་མོས་དེ་ལྟར་བརྗོད་དོན་ནི། འདི་ལོའི་ཕྱི་ཟླ་ ༣ པའི་ཚེས་ ༡༡ ཉིན་རྒྱ་ནག་རྒྱལ་ཡོངས་མི་མང་འཐུས་མིའི་ཚོགས་ཆེན་(National People’s Congress) ཟེར་བ་དེས། རྒྱལ་ཁབ་ལ་ངོ་ལོག་བྱེད་མཁན་དང་དམངས་གཙོ་དོན་གཉེར་བ་རྣམས་གྲོས་ཚོགས་ཀྱི་འཐུས་མིར་འོས་འདེམས་ཡོང་རྒྱུར་བཀག་འགོག་ཆེད། གྲོས་ཚོགས་འཐུས་མིའི་འོས་མི་རྣམས་ཧོང་ཀོང་བདེ་འཇགས་ལས་ཁུངས་ཀྱི་བསྐྱར་ཞིབ་མ་བརྒྱུད་པར་འོས་མིར་ལངས་མི་ཆོག་པའི་ཁྲིམས་སྒྲིག་གསར་པ་གཏན་འབེབ་བྱས་ཡོད་ཅིང་། དུས་རྒྱུན་རྒྱ་ནག་དམར་ཤོག་གཞུང་དང་ཧོང་ཀོང་གཞུང་ལ་སྐྱོན་བརྗོད་བྱེད་མཁན་གྱི་མི་ཞིག་ཁྲིམས་ཡིག་དེའི་འོག་ནས་གྲོས་ཚོགས་འཐུས་མིའི་འོས་མིར་ལངས་ཐུབ་ཐབས་མེད་པ་བཟོས་ཡོད། ཁྲིམས་ཡིག་དེའི་རྐྱེན་པས་འདི་ལོའི་གྲོས་ཚོགས་འཐུས་མིའི་འོས་མི་ ༡༥༣ ཁྲོད་ཡོངས་ཁྱབ་ཐོག་ནས་དམངས་གཙོ་དོན་གཉེར་བར་ངོས་འཛིན་བྱེད་ཀྱིན་པའི་འོས་མི་ ༣ མ་གཏོགས་མེད་པ་རེད།

སྤྱིར་འདས་ལོའི་ཕྱི་ཟླ་ ༩ པའི་ནང་བསྡུ་གཏན་འཁེལ་བའི་གྲོས་ཚོགས་འཐུས་མིའི་འོས་བསྡུ་དེ་ཉིད། ཏོག་དབྱིབས་གཉན་རིམས་ལ་བསྙད་བཏགས་ཏེ་ལོ་གཅིག་ལྷག་ཕར་འགྱངས་བྱས་ཡོད་ཅིང་། དེའི་བར་དུ་ཕྱི་ལོ་ ༢༠༢༠ ལོའི་ཟླ་ ༦ ཚེས་ ༣༠ ཉིན་ལག་བསྟར་བྱས་པའི་རྒྱལ་ཁབ་བདེ་འཇགས་ཁྲིམས་ཡིག་ཟེར་བའི་མིང་ཐོག་ནས། ཧོང་ཀོང་གི་རྒྱལ་ཁབ་བདེ་འཇགས་ལས་ཁུངས་ཀྱིས་ཧོང་ཀོང་གི་དམངས་གཙོའི་ཀ་བ་ལྟ་བུའི་ཚུལ་དུ་འགྲེང་བའི་དམངས་གཙོ་དོན་གཉེར་བའི་ལས་འགུལ་བ་དང་། ཆབ་སྲིད་ཚོགས་པ། ཐ་ན་རང་དབང་ཅན་གྱི་གསར་ཤོག་ཀུ་ཤུ་ཉིན་རེའི་ཚགས་པར་ཁང་སོགས་ཀྱིས་མཚོན་པའི་སྤྱི་སྒེར་རྩ་འཛུགས་ཡོད་ཚད་སྒོ་བརྒྱབ་ཏུ་བཅུག་སྟེ། ད་ལྟའི་ཆར་ཧོང་ཀོང་གི་དམངས་གཙོ་དོན་གཉེར་བའི་ཆབ་སྲིད་མི་སྣ་ཕལ་ཆེ་བ་རྒྱལ་ཁབ་ལ་ངོ་ལོག་བྱས་པའམ། སྲིད་དབང་མགོ་རྟིང་སློག་ཐབས་བྱས་པ། ཡང་ན་ཕྱིའི་རྩ་འཛུགས་དང་ངན་པ་ལག་སྦྲེལ་བྱས་པ་སོགས་ཉེས་མིང་འོག་འཛིན་བཟུང་བཀག་ཉར་བྱས་ཡོད་ལ། ཁ་ཤས་དབྱིན་ཡུལ་གྱིས་མཚོན་པའི་ནུབ་གླིང་རྒྱལ་ཁབ་ཁག་ཏུ་སྐྱབས་བཅོལ་དུ་ཕྱིན་ཟིན་པ་ཡིན།

རྒྱ་ནག་གཞུང་གི་དྲག་གནོན་དང་ཧོང་ཀོང་གཞུང་གི་འཇིགས་སྐུལ་བྱེད་ཀྱི་ཡོད་མིན་ལ་མ་ལྟོས་པར་ཕྱི་ལ་སྐྱབས་བཅོལ་དུ་བསླེབས་པའི་ཧོང་ཀོང་གི་དམངས་གཙོ་དོན་གཉེར་བ་རྣམས་ཀྱིས། འདི་ལོའི་འོས་བསྡུའི་ནང་མཉམ་ཞུགས་བྱ་རྒྱུ་མིན་པའི་བསྒྲགས་གཏམ་སྤེལ་ཡོད་ཅིང་། ད་བར་ཧོང་ཀོང་གི་ཉེན་རྟོག་པས་རྒྱལ་ཁབ་བདེ་འཇགས་ཁྲིམས་ཡིག་ཟེར་བའི་འོག་ནས་མི་གཞན་ལ་འོས་བསྡུའི་ནང་མཉམ་ཞུགས་བྱ་རྒྱུ་མེད་པའི་སྐུལ་སློང་བྱས་པའམ། རང་གི་སྤྱི་ཚོགས་དྲ་ལམ་སྟེང་དེ་འབྲེལ་གནས་ཚུལ་སྤེལ་མཁན་གྱི་མི་ ༦ འཛིན་བཟུང་བྱས་ཚར་ཡོད་པ་མ་ཟད། ད་ལྟ་ཧོང་ཀོང་གཞུང་གིས་དབྱིན་ཡུལ་དང་ཨོ་གླིང་དུ་སྐྱབས་བཅོལ་དུ་སོང་བའི་ཧོང་ཀོང་གི་གྲོས་ཚོགས་འཐུས་མི་ཟུར་པ་ཊེཌ་ཧུ་ (Ted Hui) དང་ཡོ་མན་ཆུན་ (Yau Man-chun) གཉིས་འཛིན་བཟུང་དགོས་པའི་བཀའ་ཁྱབ་ཅིག་ཀྱང་བཏང་ཡོད་འདུག

ཕྱི་ལོ་ ༢༠༡༦ ལོར་དམངས་གཙོ་དོན་གཉེར་བ་ནཱ་ཐན་ལོ་(Nathan Law) ཡིས་ཧོང་ཀོང་གྲོས་ཚོགས་འཐུས་མིའི་ལས་འཁུར་དམ་འབུལ་སྐབས། རྒྱ་ནག་གཞུང་གི་བཙན་གནོན་ལ་ངོ་རྒོལ་བྱས་པའི་རྐྱེན་གྱིས་གྲོས་ཚོགས་འཐུས་མིའི་ཁོངས་ནས་ཕྱིར་འབུད་བཏང་ཡོད་པ་དང་། ཁོང་ནི་ཕྱི་ལ་སྐྱབས་བཅོལ་དུ་ཕྱིན་པའི་ཧོང་ཀོང་གི་དམངས་གཙོ་དོན་གཉེར་བའི་ཚབ་མཚོན་མི་སྣ་ཞིག་ཡིན་ལ། ཁོང་གིས་ཀྱང་ད་ལན་གྲོས་ཚོགས་འཐུས་མི་འདེམས་སྒྲུག་གི་བརྒྱུད་རིམ་ཞིག་ཡིན་པ་ལས་འོས་བསྡུ་ཞིག་མིན་སྐོར་བརྗོད་ཡོད་པ་རེད།

འོས་མི་རྣམས་ལ་ཆབ་སྲིད་ཉེན་རྟོག་པས་བསྐྱར་ཞིབ་ནན་པོ་བྱ་དགོས་པ་མ་ཟད། ཁོ་ཚོར་རྒྱ་ནག་གཞུང་གི་ཕྱོགས་གཏོགས་ཆབ་སྲིད་པ་རྣམས་ཀྱི་རྒྱབ་སྐྱོར་ཡང་ཐོབ་དགོས་པ་ཡིན། ཅེས་དང་། མང་ཚོགས་ཀྱིས་ཐད་ཀར་འོས་འདེམས་ཆོག་པའི་འཐུས་མིའི་གྲངས་འབོར་དེ་ ༢༠ ལ་མར་ཕབ་ཡོད་པས། ང་ཚོས་འོས་ཤོག་འཕངས་པ་ཙམ་གྱིས་ད་ཐེངས་ཀྱི་འོས་བསྡུ་འདི་ཉིད་དག་ཐེར་བྱ་མི་ཐུབ། ཅེས་སྐྱོན་བརྗོད་བྱས་འདུག

འདས་ལོའི་ཕྱི་ཟླ་ ༧ པའི་ནང་རྒྱ་ནག་གཞུང་གིས་བཙན་བཀལ་བྱས་པའི་འོས་མིར་བསྐྱར་ཞིབ་ཀྱི་ཁྲིམས་ཡིག་དེའི་འོག ཧོང་ཀོང་གཞུང་གིས་ཇོ་ཧྲ་ཝོང་ (Joshua Wong) གིས་གཙོས་པའི་དམངས་གཙོ་དོན་གཉེར་བའི་མི་སྣ་ ༡༢ ད་ལན་གྱི་གྲོས་ཚོགས་ཀྱི་འོས་མིའི་ཁོངས་སུ་ཞུགས་མི་ཆོག་པའི་བཀའ་རྒྱ་བསྒྲགས་ཡོད་ཅིང་། དེར་མཚུངས་འདས་ལོའི་ཕྱི་ཟླ་ ༡༡ ནང་ཧོང་ཀོང་གཞུང་གིས་དམངས་གཙོ་དོན་གཉེར་བའི་གྲོས་ཚོགས་འཐུས་མི་ ༤ ཁྲིམས་ཡིག་དེའི་འོག་ནས་གྲོས་ཚོགས་འཐུས་མིའི་ཁོངས་ནས་ཕྱིར་ཕུད་བཏང་བར་བརྟེན། གྲོས་ཚོགས་ཀྱི་འཐུས་མི་དམངས་གཙོ་དོན་གཉེར་བ་ ༡༩ ཚང་མས་མཉམ་གཅིག་ཏུ་རྩ་དགོངས་ཞུས་ཡོད་སྟབས། འདས་པའི་ལོ་གཅིག་ནང་ཧོང་ཀོང་གི་གྲོས་ཚོགས་ནང་རྒྱ་ནག་གཞུང་གི་ཕྱོགས་གཏོགས་འཐུས་མི་ལས་ཕྱོགས་འགལ་མི་སྣ་གཅིག་ཀྱང་མེད་པ་རེད།

གྲོས་ཚོགས་འཐུས་མི་རྣམས་ངེས་པར་དུ་རྒྱལ་ཞེན་ཅན་ཞིག་ཡིན་དགོས་པའི་ཁྲིམས་ཡིག་དེའི་ཐོག ད་དུང་འདི་ལོའི་ཕྱི་ཟླ་ ༣ ཚེས་ ༣༠ ཉིན་རྒྱ་ནག་རྒྱལ་ཡོངས་མི་མང་འཐུས་མིའི་ཚོགས་ཆེན་གྱིས་ཧོང་ཀོང་གི་གཞི་རྩའི་བཅའ་ཁྲིམས་(The Basic Law of Hong Kong) ལ་བསྐྱར་བཅོས་བརྒྱུད། གྲོས་ཚོགས་འཐུས་མིའི་སྒྲོམ་གཞི་ལ་བསྒྱུར་བཅོས་ཆེན་པོ་བཏང་ཡོད་དེ། དེ་སྔ་གྲོས་ཚོགས་ནང་ཞབས་བཀྱག་ ༧༠ ཡོད་པ་དེ་ ༩༠ ལ་སྤར་ཡོད་ནའང་། མི་མང་གིས་ཐད་ཀར་འོས་འདེམས་བྱ་ཆོག་པའི་འཐུས་མིའི་ཞབས་བཀྱག་ ༣༥ དེ་ ༢༠ ལ་ཉུང་འཕྲི་བྱས། ཚོང་དོན་ཚན་པ་རྣམས་ལ་ཞབས་བཀྱག་ ༣༠ སོར་བཞག་ཐོག དེ་སྔ་ཡིན་ན་ཞབས་བཀྱག་ ༧༠ ཁྲོད་ནས་ལྷག་འཕྲོ་ ༥ དེ་ཧོང་ཀོང་གི་ས་གནས་གྲོང་སྡེ་ལྷན་ཚོགས་ (District Councillors) ཀྱི་ལག་ཏུ་ཡོད་ནའང་། ད་ལན་དེ་ཉིད་རྦད་དེ་མེད་པར་བཟོས་ཏེ། ཁྱོན་རྐུབ་བཀྱག་ ༩༠ ཁྲོད་ནས་ཕྱེད་ཀ་ལྷག་སྟེ་ ༤༠ རྣམས་རྒྱ་ནག་གཞུང་གི་སྟངས་འཛིན་འོག་ཡོད་པའི་ཚོགས་མི་ ༡༥༠༠ ལས་གྲུབ་པའི་འོས་བསྡུའི་ཚོགས་ཆུང་(Election Committee) གི་ལག་དུ་བཞག་ཡོད་པ་རེད།

གསར་འགོད་པ། པ་སངས་ཚེ་རིང་།