རྒྱ་གར་གཞུང་གིས་ཏོག་དབྱིབས་གཉན་རིམས་ཀྱི་ཛ་དྲག་གནས་སྟངས་སྐབས་གཙོས་པའི་འབྲུག་གཞུང་ལ་རྒྱབ་སྐྱོར་དང་རོགས་རམ་གནང་བར་ཆེ་བསྟོད་ངོས་འཛིན་བྱེད་སླད་དུ་འབྲུག་རྒྱལ་ཁབ་ཀྱི་ཆེས་མཐོ་བའི་སྤྱི་དམངས་གཟེངས་རྟགས་མངའ་བདག་དཔལ་གྱི་འཁོར་ལོ་ཞེས་པ་ཕུལ་ཡོད་འདུག
ལོ་རེའི་རྒྱལ་སྟོན་དུས་ཆེན་སྐབས་འབྲུག་རྒྱལ་པོས་མངའ་བདག་དཔལ་གྱི་འཁོར་ལོ་ཞེས་པའི་ཚད་མཐོའི་གཟེངས་རྟགས་ཤིག་སྤྲོད་སྲོལ་ཡོད་པ་ལྟར། དེ་རིང་འབྲུག་ཁབ་དབུ་བརྙེས་ནས་ལོ་ངོ་ ༡༡༤ འཁོར་བའི་རྒྱལ་སྟོན་དུས་ཆེན་དང་བསྟུན། འབྲུག་རྒྱལ་པོ་འཇིགས་མེད་ཁེ་སར་རྣམ་རྒྱལ་དབང་ཕྱུག་མཆོག་གིས། འབྲུག་རྒྱལ་ཁབ་ཀྱི་ཆེས་མཐོ་བའི་སྤྱི་དམངས་གཟེངས་རྟགས་མངའ་བདག་དཔལ་གྱི་འཁོར་ལོ་ཞེས་པ་རྒྱ་གར་གྱི་སྲིད་བློན་མུ་དྷི་མཆོག་ལ་ཕུལ་རྒྱུ་ཡིན་པ་ཡོངས་བསྒྲགས་གནང་ཡོད་འདུག
དེ་འབྲེལ་ཐད། འབྲུག་རྒྱལ་ཁབ་ཀྱི་སྲིད་བློན་བློ་བཀྲ་ཚེ་རིང་ལགས་ཀྱིས་སྲིད་བློན་མུ་དྷི་མཆོག་ལ་བརྗོད་དོན། བཀུར་འོས་པའི་རྒྱལ་པོ་མཆོག་ནས་སྐུ་ཉིད་ལ་ཆེས་མཐོ་བའི་དམངས་ཀྱི་གཟེངས་རྟགས་འཐོབ་པའི་མཚན་བྱང་བསྒྲགས་པ་ཐོས་པར་ང་ལ་དགའ་ཚོར་དཔག་མེད་བྱུང་། གཟེངས་རྟགས་དེ་སྐུ་ཉིད་དང་རྒྱལ་པོ་མཆོག་གི་གྲོགས་པོའི་མཛའ་བརྩེ་དང་ལྷག་པར་དུ་ཁྱེད་ནས་འདས་པའི་ལོ་མང་རིང་དང་དམིགས་བསལ་ཏོག་དབྱིབས་གཉན་རིམས་ཀྱི་དཀའ་སྡུག་གི་སྐབས་སུ་འབྲུག་གཞུང་ལ་རྒྱབ་སྐྱོར་གནང་བ་སོགས་ལ་ངོས་འཛིན་གྱིས་གནང་བ་ཞིག་ཡིན་སྟབས། འབྲུག་གི་མི་མང་ནས་ཁྱེད་ལ་འཚམས་འདྲི་ཞུ། ང་ཚོ་འབྲེལ་འདྲིས་བྱུང་བའི་བརྒྱུད་རིམ་ཁྲོད། ཁྱེད་ཉིད་ཧ་ཅང་རླབས་ཆེ་ཞིང་བསམ་བློ་ལྡན་པའི་མི་ཞིག་ཡིན་པ་ཚོར་བྱུང་། ངས་ཁྱེད་ནས་གཟེངས་རྟགས་དེ་སྐུ་དངོས་སུ་བཞེས་པར་རེ་སྒུག་བྱེད་ཀྱི་ཡོད། ཅེས་བརྗོད་ཡོད་འདུག
རྒྱ་གར་གྱི་བརྒྱུད་ལམ་ཁག་གི་གནས་ཚུལ་ནང་། འབྲུག་རྒྱལ་ཁབ་ནི་རྒྱ་གར་གྱི་སྲིན་བློན་མཆོག་ལ་གཟེངས་རྟགས་འབུལ་མཁན་ཁྱིམ་མཚེས་རྒྱལ་ཁབ་གསར་ཤོས་དེ་ཡིན་པ་དང་། དེ་སྔོན་སྲིད་བློན་མུ་དྷི་མཆོག་ལ་ཨབ་གྷན་ནེ་སི་ཐན་དང་། སོ་ཌའུ་ཨ་རབ་བྷི་ཡ་དང་ཨ་རབ་མཉམ་འབྲེལ་རྒྱལ་ཁབ་ (United Arab Emirates)། དེ་བཞིན་ཨུ་རུ་སུ་དང་པ་ལི་སི་ཐན་སོགས་ནས་གཟེངས་རྟགས་ཕུལ་མྱོང་སྐོར་བརྗོད་འདུག
མངའ་བདག་དཔལ་གྱི་འཁོར་ལོ་ཞེས་པའི་གཟེངས་རྟགས་དེ་ཉིད། ཕྱི་ལོ་ ༢༠༠༨ ཟླ་ ༡༡ ཚེས་ ༧ ཉིན་འབྲུག་གི་རྒྱལ་པོ་འཇིགས་མེད་ཁེ་སར་རྣམ་རྒྱལ་དབང་ཕྱུག་མཆོག་གིས་གསར་དུ་བཟོས་ཏེ། མི་ཚེ་ཧྲིལ་པོར་འབྲུག་རྒྱལ་ཁབ་དང་མི་མང་ལ་ཞབས་འདེགས་ཞུས་པར་ཆེ་བསྟོད་ངོས་འཛིན་བྱེད་སླད་དུ་ཕུལ་ཞིག་ཡིན་པ་མ་ཟད། ད་ཐེངས་རྒྱ་གར་གྱི་སྲིད་བློན་མུ་དྷི་མཆོག་ལ་ཕུལ་དོན་ནི་མུ་དྷི་མཆོག་གི་འཛིན་སྐྱོང་སྐབས། རྒྱ་གར་གྱིས་འབྲུག་རྒྱལ་ཁབ་ལ་རྒྱབ་སྐྱོར་དང་ཆབ་སྲིད་ཀྱི་ལྟ་ཕྱོགས་ཡག་པོ་ཡོད་པས་ཡིན་འདུག་ལ། ད་བར་ཏོག་དབྱིབས་གཉན་རིམས་ཀྱི་ཛ་དྲག་གནས་སྟངས་སྐབས། རྒྱ་གར་གཞུང་གིས་འབྲུག་རྒྱལ་ཁབ་ལ་ཏོག་དབྱིབས་སྔོན་འགོག་གི་ཁབ་ས་ཡ་གཅིག་ལྷག་སྤྲད་ཡོད་འདུག
གསར་འགོད་པ། སྐལ་བཟང་སྦྱིན་པ།
