རྒྱ་གཞུང་གིས་ནད་ཡམས་ལ་ཁ་གཡར་ཏེ་ཕྱི་ལོ་ ༢༠༡༩ ནས་བཟུང་བོད་ནང་གི་བཙོན་ཁང་ཆེ་ཁག་ནང་གི་ཆབ་སྲིད་བཙོན་པ་ཚོར་ནང་མི་ཐུག་ཕྲད་བྱེད་རྒྱུ་བཀག་ཏེ་བཙོན་པ་ཚོའི་གནས་སྟངས་ཤེས་རྟོག་མེད་པ་གྱུར་འདུག
བོད་སེར་ཤུལ་རྫོང་ཁོངས་ནས་ཡིན་པའི་ཆབ་སྲིད་བཙོན་པ་དབང་ཆེན་ལགས་ཀྱི་ཨ་ཅག་སྒྲོལ་དཀར་ལགས་ཕྱི་ལོ་ ༢༠༢༠ ཟླ་ ༠༨ ཚེས་ ༡༥ ཉིན་བཙོན་འཇུག་དུས་ཡུན་ལོ་གཅིག་དང་ཟླ་ ༣ ཚང་ནས་བཙོན་གྲོལ་བཏང་ཡོད་ཀྱང་། བཙོན་ཁང་དུ་ས་རྡོ་དབོར་འདྲེན་སོགས་ཀྱི་ངལ་རྩོལ་ཤུགས་ཆེན་པོར་བཀོལ་བ་དང་སྡུག་སྦྱོང་མནར་གཅོད་བཏང་བ། ནད་མནར་སྐབས་དུས་ཐོག་སྨན་བཅོས་མ་བྱུང་བར་བརྟེན། ཁོང་མོའི་དཔྱི་མགོ་གཉིས་ནད་པར་གྱུར་ཏེ་རྐང་ལག་བཞི་འགུལ་སྐྱོད་ཡག་པོ་མ་ཐུབ་པའི་དཀའ་ངལ་བྱུང་སྟེ་ལོ་གཅིག་ལྷག་ལ་སྨན་པར་བསྟེན་གཏུག་བྱས་ཡོད་ཀྱང་། ཉེ་བའི་ཟླ་བ་བཞི་ཙམ་ནས་བཟུང་འགྲོ་སྐྱོད་གཏན་ནས་མ་ཐུབ་པར་ཉལ་སར་ལྷུང་བསྡད་ཡོད་འདུག་ལ། ཁོང་མོ་ངན་པར་ལག་འབྲེལ་བྱས་པའི་དོགས་གཞིའི་འོག་ཕྱི་ལོ་ ༢༠༡༩ ཟླ་ ༥ ཚེས་ ༣ ཉིན་ཉེན་རྟོག་པས་འཛིན་བཟུང་བཙན་འཁྲིད་བྱས་པ་ཞིག་ཡིན་འདུག
སྒྲོལ་དཀར་ལགས་ཀྱི་ཚ་བོ་དབང་ཆེན་གྱི་སྤུན་མཆེད་རྒྱ་གར་ལྷོ་ཕྱོགས་སུ་ཡོད་པ་ཞིག་གིས་འདི་གའི་གསར་འགོད་པར། ཕྱི་ལོ་ ༢༠༡༩ ཟླ་ ༥ ཚེས་ ༨ ཉིན་སེར་ཤུལ་རྫོང་འབྲིང་རིམ་མི་མང་ཁྲིམས་ཁང་གིས་དབང་ཆེན་ལགས་ལ་ལོ་ ༤ དང་ཕྱེད་ཀ་ཡི་ཁྲིམས་ཐག་བཅད་རྗེས་ཐེངས་གཅིག་མ་གཏོགས་ཐུག་འཕྲད་བྱེད་དུ་བཅུག་མེད་སྟབས། ཡུན་རིང་ཁོང་གི་གནས་སྟངས་གང་ཡང་ཤེས་རྟོགས་མ་ཐུབ་པའི་རྐྱེན་གྱིས་སེམས་ཁྲལ་ཆེན་པོ་ཡོད་ལ། གང་མགྱོགས་བསྐྱར་དུ་ཐུག་ཐུབ་པའི་རེ་སྒུག་བྱེད་བཞིན་སྐོར་དང་། ཁོང་གིས་འབྲེལ་ཡོད་མི་སྣར་སྐད་ཆ་དྲིས་ཏེ་རྒྱུས་ལོན་བྱེད་སྐབས། ཏོག་དབྱིབས་གཉན་རིམས་འགོས་ཁྱབ་ཏུ་འགྲོ་ཚུལ་བཤད་དེ་ས་གནས་ཀྱི་བཙོན་ཁང་ཆེ་ཁག་གི་ཆབ་སྲིད་བཙོན་པ་གཞན་མང་པོ་ཞིག་ལའང་ལོ་གཉིས་རིང་ཁྱིམ་མི་སྤུན་མཆེད་ཐུག་ཏུ་བཅུག་མེད་པ་ཤེས་རྟོགས་བྱུང་སྐོར་བརྗོད་བྱུང་།
ཕྱི་ལོ་ ༢༠༡༩ ཟླ་ ༤ ཚེས་ ༢༩ ཉིན་རང་ལོ་ ༢༠ ཙམ་ཡིན་པའི་དབང་ཆེན་ལགས་ཀྱིས་ཁོ་རང་གི་གྲོགས་པོ་བློ་བཟང་དང་ཡོན་ཏན། ཡང་རོགས་པ་གཞན་ལྐུགས་པ་ཞིག་བཅས་སེར་ཤུལ་དགོན་གྱི་རྒྱབ་རིའི་སྒང་དུ་ལབ་རྩེ་ཞིག་ཡོད་པ་དེར་གསང་གསོལ་གཏོང་བར་ཕྱིན་ཏེ། ཕྱིར་ཁྱིམ་དུ་ལོག་སྐབས་གློ་བུར་དུ་རྒྱ་གཞུང་ཉེན་རྟོག་པས་ལྐུགས་པ་དེ་མ་གཏོགས་གཞན་གསུམ་འཛིན་བཟུང་བྱས་ཡོད་པ་མ་ཟད། བསང་གསོལ་གཏོང་སྐབས་༧ཀུན་གཟིགས་པན་ཆེན་རིན་པོ་ཆེ་འཕྲལ་དུ་ཀློད་གྲོལ་གཏོང་དགོས་པ་དང་༧རྒྱལ་བ་པན་ཆེན་གཉིས་བོད་དུ་ཞལ་འཛོམས་དགོས་པའི་སྐད་འབོད་བྱས་ཏེ། མངོན་གསལ་དོད་པོའི་ཐོག་ནས་རྒྱལ་ཁབ་ཀྱི་ཁྲིམས་ལ་ངོ་རྒོལ་གྱེན་ལངས་བྱེད་པར་རྩ་འཛུགས་དང་སྣེ་འཁྲིད་བྱས་པའི་ཉེས་མིང་འོག ཕྱི་ལོ་ ༢༠༡༩ ཟླ་ ༥ ཚེས་ ༨ ཉིན་སེར་ཤུལ་རྫོང་མི་མང་ཁྲིམས་ཁང་གིས་དབང་ཆེན་ལགས་ལ་ལོ་ ༤ དང་ཕྱེད། ཁོང་གི་ཨ་ཅག་སྒྲོལ་དཀར་ལགས་ལ་ངན་པར་ལག་འབྲེལ་བྱས་ཏེ་རྒྱལ་ཁབ་ཀྱི་རྩ་དོན་དང་། ས་གནས་ཀྱི་བདེ་འཇགས་ལ་གནོད་པའི་གསང་བ་ཕྱིར་བསྒྲགས་བྱས་པའི་ཉེས་མིང་འོག་ལོ ༡ དང་ཟླ ༣། དེ་བཞིན་དབང་ཆེན་ལགས་ཀྱི་རོགས་པ་གཉིས་ལ་རྒྱ་སྒོར ༡༥༠༠༠ རེ་ཡི་ཉེས་ཆད་བཅད་ནས་ཟླ་དྲུག་རིང་རྒྱལ་སྤྱིའི་བདེ་འཇགས་སློབ་གསོ་ཟབ་སྦྱོང་འཛིན་གྲྭ་ཞེས་པར་བཏང་རྗེས་ཀློད་ཡོད་འདུག
