བོད་དོན་དམིགས་བསལ་འབྲེལ་མཐུད་པ་བསྐོ་བཞག་གནང་བར་རྒྱ་གཞུང་གིས་སྐྱོན་བརྗོད་བྱས།

རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ཀྲོ་ལི་ཅན་(Zhao lijian ) ཟེར་བ་དེས་ཨ་རིས་བོད་དོན་དམིགས་བསལ་འབྲེལ་མཐུད་པ་བསྐོ་བཞག་གནང་བ་དེ་གཏན་ནས་ངོས་ལེན་མེད་སྐོར་གྱི་སྐྱོན་བརྗོད་བྱས་འདུག

ཁ་སང་རྒྱ་ནག་གཞུང་གི་རྒྱུན་ལྡན་གསར་འགོད་གསལ་བསྒྲགས་ཤིག་གི་ཐོག་མགྲིན་པ་ཚབ་པ་ཀྲོ་ལི་ཅན་གྱིས།  རྒྱ་ནག་གཞུང་གིས་ཨ་རིའི་བོད་དོན་དམིགས་བསལ་མཐུད་པ་ཟེར་བ་ཞིག་བསྐོ་བཞག་བྱས་ཡོད་པ་དེར་ངོས་ལེན་གཏན་ནས་མེད།  ཨ་རིའི་གཞུང་གིས་བོད་དེ་རྒྱ་ནག་གི་ཆ་ཤས་ཤིག་ཡིན་པ་ངོས་ལེན་བྱས་ཡོད་པ་ལྟར། བོད་ཀྱི་གནད་དོན་ལ་ཁ་གཡར་ནས་རྒྱ་གཞུང་གི་ནང་སྲིད་ལ་ཐེ་ཇུས་བྱེད་མཚམས་འཇོག་དགོས་པ་དང་། རྒྱ་ནག་གཞུང་གིས་མུ་མཐུད་དུ་བོད་ཀྱི་མཐའ་མཚམས་སོགས་ལ་ལྟ་སྐྱོང་དང་། བོད་དུ་ཡར་རྒྱས་གཏོང་གི་ཡོད་སྐོར་བརྗོད་དེ་སྐྱོན་བརྗོད་བྱས་འདུག་ལ། ད་བར་ཨ་རིའི་གཞུང་ནས་ཨ་རིའི་བོད་དོན་དམིགས་བསལ་འབྲེལ་མཐུད་པ་བདུན་བསྐོ་བཞག་བྱུང་བ་རྣམས་ལའང་སྐྱོན་བརྗོད་མང་པོ་བྱས་ཡོད་འདུག

ཨ་རིའི་གཞུང་ནས་ཕྱི་ལོ་ ༡༩༩༧ ནས་བཟུང་བོད་དོན་ཆེད་བསྐོ་བཞག་གནང་བའི་དམིགས་བསལ་འབྲེལ་མཐུད་པ་རིམ་བྱུང་།

ཨ་རིའི་སྲིད་འཛིན་ཞེ་གཉིས་པ་བྷེལ་ཁི་ལིན་ཊོན་མཆོག་གི་སྐབས་སྟེ། ཕྱི་ལོ་ ༡༩༩༧ ཟླ་ ༡༠ ཚེས་ ༣༡ ཉིན་ཨ་རིའི་གཞུང་གི་སྲིད་ཇུས་འཆར་འགོད་ལྷན་ཁང་གི་འགན་འཛིན་སྐུ་ཞབས་གྷེ་རི་གྷོ་རི་ཁི་རེག་ (Gregory Craig) ལགས་ཆེས་ཐོག་མར་བོད་དོན་དམིགས་བསལ་འབྲེལ་མཐུད་པར་བསྐོ་བཞག་གནང་སྟེ་ཕྱི་ལོ་ ༡༩༩༧ ནས་ ༡༩༩༩བར་ཕྱག་ལས་གནང་།

ཡང་བྷེལ་ཁི་ལིན་ཊོན་མཆོག་གི་སྲིད་འཛིན་ལས་ཡུན་གཉིས་པའི་སྐབས། ཨ་རིའི་མི་འབོར་དང་སྐྱབས་བཅོལ་གནས་སྤོར་ལས་ཁུངས་ཀྱི་དྲུང་གཞོན་ལྕམ་སྐུ་དམ་པ་ཇུ་ལི་ཡ་ཊ་ཧྥིཌ་(Julia Taft)ལགས་ཕྱི་ལོ་ ༡༩༩༩ ནས་ ༢༠༠༡ བར་བོད་དོན་དམིགས་བསལ་འབྲེལ་མཐུད་པར་བསྐོས།

ཨ་རིའི་སྲིད་འཛིན་ཞེ་གསུམ་པ་རྗོར་ཇི་ཌ་བྷི་ལུ་བྷུ་ཞི་(George W Bush)སྐབས་སུ་ཨ་རིའི་ཕྱི་འབྲེལ་ལྷན་ཁང་གི་འཛམ་གླིང་ཕྱི་འབྲེལ་ཚན་པའི་དྲུང་ཆེ་གཞོན་པ་ལྕམ་ཕོ་ལཱ་དྷོ་བྷི་རི་ཡན་སི་ཀའེ་(Paula Dobriansky)ལགས་ལོ་ ༢༠༠༡ ནས་ ༢༠༠༩ བར་བོད་དོན་དམིགས་བསལ་འབྲེལ་མཐུད་པར་བསྐོ་བཞག་གནང་།

ཨ་རིའི་སྲིད་འཛིན་ཞེ་བཞི་པ་ཨོ་བྷ་མ་མཆོག་གི་སྲིད་འཛིན་ལས་ཡུན་དང་པོར། ཨ་རིའི་ཕྱི་སྲིད་ལྷན་ཁང་གི་དམངས་གཙོ་དང་། འགྲོ་བ་མིའི་ཐོབ་ཐང་། ངལ་རྩོལ་ལས་དོན་ཚན་པའི་དྲུང་ལས་ལྕམ་མཱ་རི་ཡ་ཨོ་ཊི་རོ་( Maria Otero) ལགས་བོད་དོན་དམིགས་བསལ་འབྲེལ་མཐུད་པར་བསྐོ་བཞག་གནང་ཏེ། ཕྱི་ལོ ༢༠༠༩ ནས་༢༠༡༣ བར་ཕྱག་ལས་གནང་།

དེ་བཞིན་ཨོ་བྷ་མ་མཆོག་གི་སྲིད་འཛིན་ལས་ཡུན་གཉིས་པའི་སྐབས། ཨ་རིའི་ཕྱི་སྲིད་ལྷན་ཁང་གི་དམངས་གཙོ་དང་། འགྲོ་བ་མིའི་ཐོབ་ཐང་། ངལ་རྩོལ་ལས་དོན་ཚན་པའི་དྲུང་ལས་ལྕམ་(Sara Sewall )ལགས་ཕྱི་ལོ་ ༢༠༡༤ ནས་ ༢༠༡༧ བར་དམིགས་བསལ་འབྲེལ་མཐུད་པར་བསྐོས།

ཨ་རིའི་སྲིད་འཛིན་ཞེ་ལྔ་པ་ཊོམ་ཕུ་མཆོག་གི་སྲིད་འཛིན་ལས་ཡུན་ལོ་བཞིའི་ནང་ལོ་གསུམ་ལྷག་རིང་བོད་དོན་དམིགས་བསལ་འབྲེལ་མཐུད་པ་བསྐོ་བཞག་བྱུང་མེད་ཀྱང་། ཕྱི་ལོ་ ༢༠༢༠ ཟླ་ ༡༠ ཚེས་ ༡༤ ཉིན་ཕྱི་སྲིད་ལྷན་ཁང་གི་དམངས་གཙོ་དང་། འགྲོ་བ་མིའི་ཐོབ་ཐང་། ངལ་རྩོལ་ལས་དོན་ཚན་པའི་དྲུང་ཆེའི་ལས་རོགས་སྐུ་ཞབས་རོ་བྷེར་ཊི་ཌེ་སི་ཊི་རོ་ (Robert A.Destro)ལགས་བསྐོ་བཞག་གནང་།

ཨ་རིའི་སྲིད་འཛིན་ཞེ་དྲུག་པ་རྗོ་བྷའེ་ཌིན་མཆོག་ནས་སྲིད་འཛིན་གྱི་ལས་འཁུར་ཞུས་ཏེ་ལོ་གཅིག་མ་ཟིན་ཙམ་གྱི་མཚམས་ཏེ། ཕྱི་ལོ་ ༢༠༢༡ ཟླ་ ༡༢ ཚེས་ ༢༠ ཉིན་ཨ་རིའི་ཕྱི་སྲིད་ལྷན་ཁང་གི་སྤྱི་དམངས་བདེ་འཇགས་དང་དམངས་གཙོ། འགྲོ་བ་མིའི་ཐོབ་ཐང་ཚན་པའི་དྲུང་ལས་ལྕམ་ཨུ་ཛི་ར་ཛེ་ཡ་(Uzra Zeya) ལགས་ཨ་རིའི་བོད་དོན་དམིགས་བསལ་འབྲེལ་མཐུད་པར་བསྐོ་བཞག་གནང་ཡོད་ལ། ཁོང་མོ་ནི་ཨ་རིའི་བོད་དོན་དམིགས་བསལ་འབྲེལ་མཐུད་པ་བདུན་པ་དེ་ཆགས་ཡོད་པ་རེད་འདུག

གསར་འགོད་པ། དཔལ་ལྡན།