ཆོས་བརྒྱུད་ཁག་གི་རྡོ་རྗེ་གདན་གྱི་སྨོན་ལམ་ཆེན་མོ་ཚོགས་ཐུབ་ཀྱི་མེད་འདུག

ཏོག་དབྱིབས་གཉན་རིམས་འགོས་ཁྱབ་ཀྱི་དཀའ་ངལ་འོག་རྡོར་གདན་དུ་ཚོགས་སྲོལ་ཡོད་པའི་ཆོས་བརྒྱུད་ཁག་གི་སྨོན་ལམ་ཆེན་མོ་དགོན་པ་སོ་སོར་འཚོག་གཏན་འཁེལ་ཡོད་འདུག

ད་ལྟའི་ཆར་འཛམ་གླིང་ནང་ཕྱི་ལོ་ ༢༠༡༩ ལོར་རྒྱ་ནག་ཝོ་ཧན་ནས་མཆེད་པའི་ཏོག་དབྱིབས་གཉན་རིམས་འགོས་ཁྱབ་ཀྱིས་དཀའ་ངལ་འཕྲད་མུས་ཡིན་པའི་གནས་སྟངས་འོག ལོ་ལྟར་གནས་མཆོག་རྡོ་རྗེ་གདན་དུ་ཚོགས་སྲོལ་ཡོད་པའི་བོད་ཀྱི་ཆོས་བརྒྱུད་ཁག་གི་སྨོན་ལམ་དང་དགུན་ཆོས་ཆེན་མོ་འཚོགས་ཐུབ་པར་བརྟེན། ད་ལྟ་དཔལ་ས་སྐྱ་བ་དང་བཀའ་བརྒྱུད། དེ་བཞིན་རྙིང་མ་བ་སོགས་ཀྱིས། ཕྱི་ལོ་ ༢༠༢༢ ལོའི་སྨོན་ལམ་ཆེན་མོ་དེ་བཞིན་ཆོས་བརྒྱུད་སོ་སོའི་ཁྱབ་ཁོངས་དགོན་པ་རང་ནས་འཚོགས་དགོས་པའི་ཡོངས་ཁྱབ་གསལ་བསྒྲགས་སྤེལ་འདུག

འདི་གའི་གསར་འགོད་པས་ཁ་པར་བརྒྱུད་ཆོས་བརྒྱུད་ཁག་སོ་སོའི་འབྲེལ་ཡོད་དགེ་འདུན་པ་ཁག་ཅིག་ལ་བཀའ་འདྲི་ཞུས་ཏེ་རྒྱུས་ལོན་བྱུང་བ་ལྟར་ན། ཟླ་འདིའི་ཕྱི་ཚེས་ ༢༤ ནས་ཉིན་ལྔའི་རིང་འདི་ལོའི་དཔལ་ས་སྐྱའི་འཇིག་རྟེན་ཞི་བདེའི་སྨོན་ལམ་ཆེན་མོ་དྲ་ལམ་ཐད་གཏོང་བརྒྱུད་འཚོག་འཆར་ཡོད་པ་དང་། ཚོགས་མགོན་དུ་དཔལ་ས་སྐྱ་བའི་འཁོན་གདུང་རྣམ་པ་དབུས་ཁྲི་བ་རྣམ་པ་དབུ་བཞུགས་ཐོག ཆོས་སྡེ་ཁག་ ༤༧ གྱི་དགེ་འདུན་པ་ ༣༨༠༠ ལྷག་རང་དགོན་ནས་མཉམ་ཞུགས་གནང་གི་ཡོད་པ་དང་། དམིགས་བསལ་སྨོན་ལམ་ཉིན་ ༣ པར་སྐྱབས་རྗེ་༧ཀླུ་ལྡིང་མཁན་རིན་པོ་ཆེ་མཆོག་དབུ་བཞུགས་ཐོག སྦྱིན་བདག་དང་འབྲེལ་ཡོད་རྣམས་ཀྱི་ཚོགས་བསག་སྒྲིབ་སྦྱང་སླད། གནམ་མཆོག་རྡོ་རྗེ་གདན་གྱི་སྟོན་པ་རིན་པོ་ཆེར་སྐུ་གསེར་དང་ན་བཟའ་ལྷུང་བཟེད་འབུལ་གཏན་འཁེལ་ཡོད་འདུག

བཀའ་བརྒྱུད་དགུན་ཆོས་གོ་སྒྲིག་ཚོགས་ཆུང་གིས།  དཔལ་༧རྒྱལ་དབང་ཀརྨ་པ་མཆོག་དང་བཤད་གྲྭ་ཁག་གི་མཁན་སློབ་རྣམ་པ་ཞལ་གྲོས་མཛད་ནས། ཕྱི་ ༢༠༢༢ ཟླ་ ༡ ཚེས་ ༢༣ ནས་ཟླ་ ༢ ཚེས་ ༨ བར་ཉིན་ ༡༧ རིང་བཀའ་བརྒྱུད་དགུན་ཆོས་འཕར་མ་ཞིག་བཤད་གྲྭ་ཁག་སོ་སོར་འཚོག་གཏན་འཁེལ་ཡོད་པ་དང་། དམིགས་བསལ། ད་རེས་དཔལ་༧རྒྱལ་དབང་ཀརྨ་པ་མཆོག་ནས་དགུན་ཆོས་ཀྱི་ཉིན་ ༡༧ རིང་དྲ་ལམ་ཐད་གཏོང་བརྒྱུད་སེམས་ཙམ་སུམ་ཅུ་པའི་གསུང་ཆོས་སྩལ་གནང་མཛད་གཏན་འཁེལ་ཡོད་སྐོར་བརྗོད་འདུག

དེ་བཞིན། ཕྱི་ལོ་ ༢༠༢༢ ཟླ་ ༢ ཚེས་ ༢ ནས་ ༡༡ བར་རྡོར་གདན་རྣམ་གྲོལ་གླིང་དགོན་པ་དང་ཞེ་ཆེན་དགོན་པའི་དགེ་འདུན་པ་རྣམས་ཀྱི་གཙོས་གཉུག་མར་གནས་པའི་རྙིང་མའི་ཆོས་བརྒྱུད་འཛིན་པའི་གྲྭ་བཙུན་སྔགས་གསུམ་གྱིས། གནས་མཆོག་རྡོ་རྗེ་གདན་གྱི་ནུབ་ཕྱོགས་བྱང་ཆུབ་ལྗོན་ཤིང་གི་མདུན་དུ་མཆོད་སྤྲིན་རྒྱས་བཤམ་གནང་རྒྱུ་དང་། དམིགས་བསལ་ཕྱི་ཟླ་ ༢ ཚེས་ ༩ ནས་ ༡༡ བར་སྔ་འགྱུར་རྙིང་མའི་དགོན་སྡེ་སོ་སོས་རང་དགོན་ནས་ས་གནས་ཏོག་དབྱིབས་གཉན་རིམས་སྔོན་འགོག་གི་ལམ་སྟོན་གཞིར་བཟུང་སྨོན་ལམ་འཚོག་རྒྱུ་ཡིན་འདུག

གསར་འགོད་པ། སྐལ་བཟང་སྦྱིན་པ།