ལྷོ་ཀོ་རི་ཡའི་གཞུང་གིས་དེ་སྔའི་སྲིད་འཛིན་ལྕམ་ཕཱག་ཅིན་ཧེ་ཡི་གཙོས་པའི་རྒྱལ་ཁབ་ཀྱི་འོས་བསྡུ་དང་འགྲིམས་འགྲུལ་སོགས་ཀྱི་ཁྲིམས་འགལ་ཉེས་ཆད་ཕོག་མི་གྲངས་འབུམ་བཅུ་མ་ཟིན་ཙམ་གྱི་ཉེས་ཆད་གུ་ཡངས་བཏང་སྟེ། ཀོ་རི་ཡའི་མི་མང་མཐུན་སྒྲིལ་དང་གཅིག་གྱུར་གྱི་མདུན་སྐྱོད་དགོས་པའི་རེ་འདུན་བཏོན་ཡོད་འདུག
དེ་རིང་ལྷོ་ཀོ་རི་ཡའི་སྲིད་འཛིན་མོན་ཇའེ་ཨིན་ (Moon Jae-in) གཞུང་གིས། ཕྱི་ལོ་ ༢༠༡༨ ལོར་དབང་ཆ་ལོག་སྤྱོད་དང་ལྐོག་ས་རུལ་སུངས་ཀྱི་ཉེས་མིང་འོག ལོ་ངོ་ ༢༢ རིང་བཙོན་འཇུག་ཁྲིམས་ཆད་ཕོག་པའི་སྲིད་འཛིན་ཟུར་བ་ལྕམ་ཕཱག་ཅིན་ཧེ་ལ་བཟོད་གསོལ་བཏང་སྟེ། འདས་པའི་འགལ་ཟླ་དང་ནོར་འཁྲུལ་ལ་ཆག་ཡང་གཏོང་བཞིན། ཀོ་རི་ཡའི་མི་མང་གཅིག་གྱུར་གྱིས་མ་འོངས་མདུན་ཕྱོགས་སུ་བསྐྱོད་རྒྱུ་གལ་ཆེན་ཡིན་སྐོར་བརྗོད་ཡོད་པ་རེད། དེ་འབྲེལ་ཐད་སྲིད་འཛིན་མོན་ཇའེ་ལགས་ཀྱིས། ངས་འདི་ལྟར་སྒྲུབ་དོན་ནི། ང་ཚོའི་བར་གྱི་འགལ་ཟླ་ལས་བརྒལ་ཏེ་གུ་ཡངས་ཤིང་གཅིག་གྱུར་དང་མཐུན་སྒྲིལ་གྱི་སྤྲས་པའི་དུས་སྐབས་གསར་པ་ཞིག་བསྐྲུན་ཐུབ་པའི་རེ་བ་བྱེད་ཀྱི་ཡོད། ཅེས་བརྗོད་ཡོད་པ་དང་། ད་རེས་སྲིད་འཛིན་ཟུར་བ་ལྕམ་ཕཱག་ཅིན་ཧེ་དང་ལྷན་དུ། ཁྲིམས་འགལ་གྱི་ཉེས་ཆད་ཕོག་པའི་མི་གྲངས་ ༣༠༩༤ ཡི་ཉེས་ཆད་བཟོད་གསོལ་གཏོང་གི་ཡོད་འདུག་ལ། ཁོ་ཚོ་ཚང་མ་ཟླ་འདིའི་ཕྱི་ཚེས་ ༣༡ ཉིན་ཀློད་གྲོལ་གཏང་རྒྱུ་ཡིན་པ་དང་། དམིགས་བསལ་ལྕམ་ཕཱག་ཅིན་ཧེ་ཡི་འཕྲོད་བསྟེན་གནས་སྟངས་ཇེ་སྡུག་ཏུ་ཕྱིན་ཡོད་སྐོར་ལ་རྒྱལ་སྤྱིའི་ཉེས་ཡངས་ཚོགས་པས་སེམས་འཚབ་ཡོད་པའི་རྣམ་འགྱུར་སྟོན་གྱི་ཡོད་པ་རེད།
རོའུ་ཊར་གསར་ཁང་གི་གནས་ཚུལ་ནང་། དེ་སྔ་སྲིད་འཛིན་མོན་ཇའེ་ལགས་ཀྱིས་སྲིད་འཛིན་ཟུར་བ་ལྕམ་ཕཱག་ཅིན་ཧེ་ཡི་ཉེས་ཆད་གུ་ཡངས་གཏོང་རྒྱུ་མིན་སྐོར་བརྗོད་ཡོད་ཀྱང་། ཁ་གཏད་སྲིད་དོན་ཚོགས་པས། སྲིད་འཛིན་ཟུར་བ་ཁོ་མོའི་འཕྲོད་བསྟེན་གནས་སྟངས་ཞན་པོ་ཡིན་པའི་རྒྱུ་མཚན་དྲངས་ཏེ། འབྱུང་འགྱུར་ཕྱི་ཟླ་ ༣ པའི་སྲིད་འཛིན་གྱི་འོས་བསྡུའི་སྔོན་ལ་ལྕམ་ཕཱག་ཅིན་ཧེ་ཀློད་གྲོལ་དང་ཉེས་ཆད་གུ་ཡངས་གཏོང་དགོས་པའི་འབོད་སྐུལ་ཞུས་པ་ལྟར། ད་རེས་དངོས་སུ་ཁོ་མོ་གུ་ཡངས་དུ་བཏང་བ་ཞིག་ཆགས་ཡོད་སྐོར་བརྗོད་འདུག
གཞན་ཡང་། ལྷོ་ཀོ་རི་ཡའི་དེ་སྔའི་སྲིད་བློན་ཟུར་བ་ལྕམ་ཧན་མེ་ཡོན་སུག་ (Han Myeong-sook) ལགས་ཀྱི་གཙོས་གཞུང་ལ་ངོ་རྒོལ་ལས་འགུལ་སྤེལ་མཁན་དང་འོས་བསྡུའི་སྒྲིག་ཁྲིམས་དང་འགལ་བའི་མི་གྲངས་ ༣༨༠ དང་། ད་དུང་འགྲིམས་འགྲིལ་དང་སྤྱིར་བཏང་གི་སྒྲིག་ཁྲིམས་དང་འགལ་བའི་མི་གྲངས་ ༩༨༣༠༠༠ ཙམ་གྱི་ཉེས་ཆད་དང་ནག་ཉེས་མེད་པ་བཟོ་རྒྱུའི་ཐག་བཅད་ཡོད་འདུག
ད་རེས་སྲིད་འཛིན་ཟུར་བ་ལྕམ་ཕཱག་ཅིན་ཧེ་ཡི་ནག་ཉེས་གུ་ཡངས་བཏང་བའི་ཐད། མོས་རང་གི་ཁྲིམས་རྩོད་པ་བརྒྱུད་སྲིད་འཛིན་མོན་ཇའེ་ལགས་སུ་ཐུགས་རྗེ་ཆེ་ཞུས་ཡོད་པ་དང་། ད་ལྟ་སྲིད་འཛིན་མོན་ཇའེ་གཞུང་གིས་ཉེས་ཅན་པ་མང་པོ་ཞིག་གི་ནག་ཉེས་མེད་པར་བཟོ་དོན་གཙོ་བོ་ནི། ལྕམ་ཕཱག་ཅིན་ཧེ་ཡི་གྱོད་དོན་དང་འབྲེལ་ནས། མང་ཚོགས་ཕྱོགས་གཉིས་སུ་འགོས་ཏེ་འགལ་ཟླ་བྱུང་ཡོད་པ་དང་། དམིགས་བསལ་སྲིད་འཛིན་མོན་ཇའེ་གཞུང་ལ་སྐྱོན་བརྗོད་མཁན་མང་པོ་བྱུང་བས་ཡིན་པ་རེད་ལ། ལྕམ་ཕཱག་ཅིན་ཧེ་ཀློད་གྲོལ་གཏོང་རྒྱུའི་གནད་དོན་དང་འབྲེལ་ནས་གཞུང་འཛིན་ཚོགས་པར་ལོ་རྗེས་མའི་འོས་བསྡུའི་སྐབས། གནོད་ཤུགས་ཐེབས་སྲིད་སྐོར་བརྗོད་ཀྱི་ཡོད་ཀྱང་། སྲིད་འཛིན་མོན་ཇའེ་གཞུང་གིས་ལྕམ་ཕཱག་ཅིན་ཧེ་ཀློད་གྲོལ་གཏོང་དོན་ནི། ཁོ་མོས་བསམ་ཚུལ་མཐུན་མིན་ལ་མ་ལྟོས་པར་ཀོ་རི་ཡའི་མང་ཚོགས་ཁྲོད་མཐུན་སྒྲིལ་བསྐྲུན་པའི་རེ་བ་རྒྱག་གི་ཡོད་པས་ཡིན་འདུག
ཕྱི་ལོ་ ༢༠༡༣ ནས་ ༢༠༡༧ བར་ལྷོ་ཀོ་རི་ཡའི་སྐབས་བཅུ་གཅིག་པའི་སྲིད་འཛིན་གནང་མྱོང་མཁན་ལྕམ་ཕཱག་ཅིན་ཧེ་ལ་ཕྱི་ལོ་ ༢༠༡༦ ནས་སྲིད་དབང་སྒེར་གཅོད་དང་ལྐོག་རྔན་བླངས་པའི་དོགས་གཞི་བྱས་ཏེ། སྲིད་འཛིན་གྱི་ལས་གནས་ནས་གནས་དབྱུང་བཏང་ཡོད་པ་དང་། ཕྱི་ལོ་ ༢༠༡༨ ཟླ་ ༤ ཚེས་ ༦ ཉིན་ཀོ་རི་ཡའི་ཁྲིམས་ཁང་ཞིག་གིས། ཁོ་མོས་རྒྱུ་ནོར་ལྐོག་ཟ་དང་ཆབ་སྲིད་མི་སྣའི་བར་ལ་ལྐོག་རྔན་སྤྲོད་རེས། དེ་བཞིན་རྒྱལ་ཁབ་ཀྱི་གསང་བའི་ཡིག་ཆ་ཕྱིར་གྱར་བ་དང་དབང་ཆ་ལོག་སྤྱོད་སོགས་ཀྱི་ཉེས་མིང་འོག སྐབས་དེར་ལོ་ ༢༤ བཙོན་འཇུག་ཁྲིམས་ཐག་བཅད་ཡོད་པ་རེད།
ལྕམ་ཕཱག་ཅིན་ཧེ་ནི་ཆབ་སྲིད་མཐོ་རིམ་མི་སྣའི་ཁྱིམ་རྒྱུད་ཅིག་ནས་ཡིན་ཞིང་། ཕྱི་ལོ་༢༠༡༣ ལོ་ནས་ལྷོ་ཀོ་རི་ཡའི་སྲིད་འཛིན་དུ་གདམས་ཐོན་བྱུང་སྟེ། ལྷོ་ཀོ་རི་ཡའི་སྲིད་འཛིན་ཐེངས་ ༡༡་པ་དང་བུད་མེད་སྲིད་འཛིན་ཐོག་མ་དེ་ཡིན་པ་མ་ཟད། མོ་ནི་ཨེ་ཤ་ཡའི་བྱང་ཤར་རྒྱལ་ཁབ་དག་ལས་བུད་མེད་སྲིད་འཛིན་ཐོག་མ་དེ་ཆགས་ཡོད་འདུག
གསར་འགོད་པ། སྐལ་བཟང་སྦྱིན་པ།
