བོད་མིའི་སྒྲིག་འཛུགས་ཀྱིས་འདས་པོ་དམ་པ་ཌེ་སི་མོན་ཊུ་ཊུ་མཆོག་གི་སླད་དུ་མཆོད་འབུལ་སྨོན་ལམ་ཞིག་འཚོགས་སོང་།

བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་སྲིད་སྐྱོང་སྤེན་པ་ཚེ་རིང་མཆོག་རྣམ་གཉིས་ནས་ཆོས་དཔོན་དམ་པ་ཌེ་སི་མོན་ཊུ་ཊུ་མཆོག་སྐུ་གྲོངས་པར་ཐུགས་གསོ་སྩལ་གནང་འདུག

དེ་རིང་ཉིན་རྒྱབ་ཆུ་ཚོད་ ༣ སྟེང་བོད་མིའི་སྒྲིག་འཛུགས་ཀྱི་སྲིད་སྐྱོང་ཚོགས་ཁང་དུ། ལྷོ་ཨ་ཧྥི་རི་ཁའི་ཡི་ཤུའི་ཆོས་དཔོན་ཌེ་སི་མོན་ཊུ་ཊུ་མཆོག་སྐུ་ཚེ་མ་བཞུགས་པའི་ཐད། བོད་མིའི་སྒྲིག་འཛུགས་ངོས་ནས་གཞུང་འབྲེལ་མཆོད་འབུལ་སྨོན་ལམ་ཞིག་ཚོགས་ཏེ། འདས་པོ་དམ་པ་ཁོང་གི་ནང་མི་རྣམས་ཀྱི་གཙོས་འབྲེལ་ཡོད་ཡོངས་ལ་ཐུགས་གསོ་དང་གདུང་སེམས་མཉམ་སྐྱེད་ཞུས་གནང་སོང་བ་དང་། མཆོད་འབུལ་སྨོན་ལམ་སྟེང་མང་གཙོ་ཀ་གསུམ་གྱི་མཛད་གཙོ་རྣམ་པ་གཙོ་བྱས་པའི་བོད་མིའི་སྒྲིག་འཛུགས་ཀྱི་ལྷན་ཁང་ཁག་གི་དྲུང་ཆེ་རྣམ་པ་དང་སྲི་ཞུའི་ལས་བྱེད་བཅས་འཛོམགས་འདུག

སྐབས་དེར་སྲིད་སྐྱོང་སྤེན་པ་ཚེ་རིང་མཆོག་གིས། མཆོད་འབུལ་སྨོན་ལམ་དེ་ཚོགས་དགོས་དོན་སྐོར་ལ་གསུང་བཤད་གནང་སྐབས། ད་རེས་ང་ཚོས་མཆོད་འབུལ་སྨོན་ལམ་ཞུ་དགོས་པའི་རྒྱུ་མཚན་གཙོ་བོ་ནི། ༧སྤྱི་ནོར་༧གོང་ས་རྒྱལ་བ་རིན་པོ་ཆེ་མཆོག་གི་སྐུ་ཚེའི་ནང་། གྲོགས་པོ་དང་ངོ་ཤེས་པ་མང་པོ་ཡོད་པའི་ཁྲོད། སྙིང་ཉེ་ཤོས་གཉིས་པ་ཡོད་པ་ལས། གཅིག་ནི་རྒྱ་གར་གྱི་སྲིད་འཛིན་དམ་པ་ཨབ་ཏུ་ཀ་ལིམ་མཆོག་རེད། གཞན་དེ་དམ་པ་ཌེ་སི་མོན་ཊུ་ཊུ་མཆོག་ཡིན་པས། དམ་པ་ཁོང་དགོངས་པ་རྫོགས་པར་བརྟེན། བོད་མིའི་སྒྲིག་འཛུགས་ངོས་ནས་མཆོད་འབུལ་སྨོན་ཚོགས་ཡིན། ཞེས་གསུངས་སོང་།

ཡང་དེ་རིང་བོད་མིའི་སྒྲིག་འཛུགས་ཀྱི་དྲ་རྒྱའི་སྟེང་སྲིད་འདས་པོ་དམ་པ་ཌེ་སི་མོན་ཊུ་ཊུ་མཆོག་གི་སྐུ་ཟླ་ལཱེ་ཧ་ཊུ་ཊུ་ (Leah Tutu)  ལགས་ཀྱི་མཚན་ཐོག་ཏུ་སྐྱོང་མཆོག་གིས་ཐུགས་གསོའི་གསུང་འཕྲིན་ཞིག་སྩལ་བའི་ནང་། ཨར་ཆི་བྷི་ཤོབ་ཌེ་སི་མོན་ཊུ་ཊུ་མཆོག་སྐུ་ཚེའི་འཕེན་པ་རྫོགས་པའི་ཡིད་སྐྱོའི་གནས་ཚུལ་ཐོན་པར་ཕྲན་རང་ཉིད་ཧ་ཅང་བློ་ཕམ་བྱུང་། ངས་བོད་མིའི་སྒྲིག་འཛུགས་དང་འཛམ་གླིང་ས་ཕྱོགས་གང་སར་གནས་པའི་བོད་མི་ཡོངས་ཀྱི་ཚབ་ཞུས་ཏེ་འདས་པོ་དམ་པ་དེ་ཉིད་ཀྱི་ཆེད་དུ་སྨོན་ལམ་གསོལ་འདེབས་དང་། དེ་བཞིན་སྐུ་ཉིད་ཀྱིས་གཙོས་ནང་མི་སྤུན་མཆེད་དང་ལྷོ་ཨཕ་རི་ཀའི་མི་མང་ཡོངས་ལ་སྙིང་ཐག་པ་ནས་ཐུགས་གསོ་ཞུ་རྒྱུ་ཡིན།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ཨར་ཆི་བྷི་ཤོབ་ཌེ་སི་མོན་ཊུ་ཊུ་མཆོག་གི་དབར་མཛའ་གྲོགས་ཀྱི་འབྲེལ་བ་དམིགས་བསལ་ཞིག་བྱུང་ཡོད་པ་དེས་བོད་མི་ཡོངས་ལ་སེམས་འགུལ་ཐེབས་བཅུག་ཡོད་པ་མ་ཟད། སེམས་ཤུགས་ཀྱང་བསྐྱེད་དུ་བཅུག་ཡོད་སྟབས་དམ་པ་ཁོང་འདས་གྲོངས་སུ་གྱུར་བ་ལ་བརྟེན་ནས་བོད་མི་རྣམས་ཧ་ཅང་བློ་ཕམ་བྱུང་ཡོད། དམ་པ་ཁོང་བཞུགས་སྒར་རྡ་སར་ཕེབས་པ་དང་། ལྷག་པར་ཕྱི་ལོ་ ༢༠༡༥ ལོར་དམ་པ་ཁོང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༨༠ ལ་ཕེབས་པའི་༧སྐུའི་འཁྲུངས་སྐར་དུས་ཆེན་སྔ་སྣུར་གྱིས་སྲུང་བརྩི་ཞུས་པའི་མཛད་སྒོར་ཕེབས་པ་དེ་ང་ཚོས་དགའ་སྤྲོའི་ངང་ནས་དྲན་སོས་ཀྱི་འདུག ཨར་ཆི་བྷི་ཤོབ་ཌེ་སི་མོན་ཊུ་ཊུ་མཆོག་གིས་འཛམ་གླིང་གི་མི་ས་ཡ་མང་པོ་ཚུད་པའི་བོད་མི་རྣམས་ལ་གདུང་སེམས་མཉམ་སྐྱེ་དང་རྒྱབ་སྐྱོར་གནང་ཡོད། དམ་པ་ཁོང་གིས་རང་གི་མི་མང་ལ་དྲང་བདེན་དང་རང་དབང་ཐོབ་བཅུག་པ་ནི་བོད་མི་ཚུད་པའི་འཛམ་གླིང་གི་སྐྱེ་བོ་མང་པོར་སེམས་ཤུགས་བསྐྱེད་དུ་བཅུག་ཡོད། ང་ཚོས་དམ་པ་ཁོང་ལ་བཀའ་དྲིན་ཤིན་ཏུ་ཆེ་ཞེས་ཞུ་རྒྱུ་ཡིན་ལ། དམ་པ་ཁོང་གི་མཛད་རྗེས་ཀྱིས་ང་ཚོར་སེམས་ཤུགས་བསྐྱེད་དུ་བཅུག་ཡོད། ད་ལྟ་དམ་པ་ཁོང་ང་ཚོ་དང་ལྷན་དུ་སྐུ་འཚོ་བཞུགས་མེད་ནའང་ཁོང་གི་མཛད་རྗེས་དེ་མུ་མཐུད་གསོན་པོར་གནས་ཀྱི་རེད།

དེ་རིང་ང་ཚོས་ནང་པའི་ལུགས་སྲོལ་ལྟར་དམ་པ་ཁོང་ལ་རྗེས་དྲན་སླད་མཆོད་འབུལ་སྨོན་ལམ་ཞིག་འཚོགས་རྒྱུ་ཡིན། དམ་པ་ཁོང་གི་གཞན་ཕན་གྱི་སྙིང་སྟོབས་ཀྱིས་ང་ཚོར་མུ་མཐུད་ལམ་སྟོན་གནང་རྒྱུའི་སྨོན་ལམ་འདེབས་རྒྱུ་ཡིན། སླར་ཡང་ངས་སྙིང་ཐག་པ་ནས་འདས་པོ་དམ་པ་དེ་ཉིད་ཀྱི་ཆེད་དུ་སྨོན་ལམ་གསོལ་འདེབས་དང་། དེ་བཞིན་སྐུ་ཉིད་ཀྱིས་གཙོས་ནང་མི་སྤུན་མཆེད་ཡོངས་ལ་ཐུགས་གསོ་ཞུ་རྒྱུ་ཡིན། ཞེས་བཀོད་འདུག

དེ་བཞིན། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམ་བསྟན་འཕེལ་མཆོག་གིས་དམ་པ་ཁོང་གི་སྲས་མོ་ལྕམ་སྐུ་མི་ཧྥོ་ཊུ་ཊུ་ (Rev. Mpho Tutu) ལགས་ཀྱི་མཚན་ཐོག་ཏུ་ཐུགས་གསོ་སྩལ་བའི་ནང་། ཕྱི་་ལོ་ ༢༠༢༡ ཟླ་ ༡༢ ཚེས་ ༢༦ ཉིན་མོ་དེ་ནི་འཛམ་གླིང་སྤྱི་ཡོངས་དང་། ལྷག་པར་དུ་བོད་མི་ཚོར་མཚོན་ན། ཧ་ཅང་གི་སེམས་སྐྱོ་དགོས་པའི་ཉིན་མོ་ཞིག་ཆགས་ཀྱི་ཡོད། སྐུ་གཤེགས་དམ་པ་ཨར་ཆི་བྷི་ཤོབ་ཌེ་སི་མོན་ཊུ་ཊུ་མཆོག་ནི་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དང་། བོད་མིའི་ཧ་ཅང་བློ་ཐག་ཉེ་བའི་མཛའ་གྲོགས་ཞིག་ཡིན་པ་མ་ཟད། འཛམ་གླིང་ཞི་བདེའི་མཚོན་རྟགས་ཤིག་ཀྱང་ཡིན། ང་རང་ལ་མཚོན་ན། ཕྱི་ལོ་ ༢༠༡༥ ལོར་དམ་པ་ཁོང་བཞུགས་སྒར་དུ་ཕེབས་སྐབས་སྐུ་དངོས་སུ་མཇལ་རྒྱུའི་གོ་སྐབས་བྱུང་། དམ་པ་ཁོང་ནི་༧གོང་ས་མཆོག་དང་དམ་ཚིག་ཟབ་ཅིང་། བོད་དོན་བདེན་པའི་འཐབ་རྩོད་ཐོག་རྒྱབ་སྐྱོར་ཤུགས་ཆེ་གནང་མཁན་ཞིག་ཡིན། ཁོང་སྐུ་འཚོ་བཞུགས་སྐབས་འགྲོ་བ་མིའི་གཞི་རྩའི་ཐོབ་ཐང་དང་། རིན་ཐང་། དེ་བཞིན་འཛམ་གླིང་ཞི་བདེ་ཡོང་ཐབས་སླད་ཕྱག་ལས་རྒྱ་ཆེ་གནང་ཡོད།

ཁོང་སྐུ་གཤེགས་པ་དེ་ང་ཚོ་ཚང་མ་བློ་ཕམ་དགོས་པའི་གནས་ཚུལ་ཞིག་ཡིན། ངས་དམ་པ་ཁོང་གི་ཤུལ་ལུས་ནང་མི་ཉེ་འབྲེལ་ལྟོས་བཅས་ཡོངས་ལ་ཐུགས་གསོ་ཞུ་རྒྱུ་དང་། དམ་པ་ཁོང་གི་བྱམས་བརྩེའི་བཀའ་སློབ་ལམ་སྟོན་དང་། ཁོང་གིས་བཞག་པའི་མཛད་རྗེས་རྣམས་ང་ཚོས་དུས་རྟག་ཏུ་དྲན་ངེས་ཡིན། ངས་སླར་ཡང་བོད་མི་མང་སྤྱི་འཐུས་ལྷན་ཚོགས་དང་། བོད་མི་ཡོངས་ཀྱི་ཚབ་ཞུས་ཏེ། དཀའ་ཚེགས་ཆེ་བའི་དུས་ཚོད་འདིར་ཁྱེད་ནང་མི་ཡོངས་ལ་ཐུགས་གསོ་ཞུ་རྒྱུ་ཡིན། ཞེས་བཀོད་འདུག

གསར་འགོད་པ། སྐལ་བཟང་སྦྱིན་པ།