ཕྱི་ལོ་ ༢༠༢༢ ལོའི་སློབ་དུས་གསར་པ་ནས་སམ་བྷོ་ཊའི་ཁྱབ་ཁོངས་སློབ་གྲྭ་ཆེ་ཤོས་སྤོན་ཊ་གཏན་སློབ་ཀྱི་འཛིན་རིམ་ལྔ་པ་རང་སོར་བཞག་སྟེ་འཛིན་རིམ་དྲུག་པ་ནས་མ་སུ་རི་དང་ཧ་སྤར་སྤུར་གཏན་སློབ་ཏུ་ཟླ་སྒྲིལ་གཏང་རྒྱུ་ཡིན་འདུག
ཕྱི་ལོ་ ༢༠༠༨ ཙམ་ནས་བཟུང་རྒྱ་ནག་གཞུང་གིས་བོད་ནང་དམ་དྲག་དོགས་ཟོན་ཤུགས་ཆེན་བྱེད་བཞིན་ཡོད་པའི་རྐྱེན་གྱིས་བོད་ནས་བཙན་བྱོལ་ནང་ཡོང་མཁན་ཧ་ཅང་ཉུང་དུ་ཕྱིན་པ་དང་། བཙན་བྱོལ་ནང་གི་བོད་མི་མང་པོ་ཞིག་ཕྱི་ཕྱོགས་སུ་གནས་སྤོར་བྱེད་བཞིན་ཡོད་པ་སོགས་ཕྱི་ནང་གི་རྒྱུ་རྐྱེན་དུ་མ་ཞིག་གི་དབང་གིས། འདས་པའི་ལོ་བཅུ་ཙམ་གྱི་ནང་བཙན་བྱོལ་སློབ་གྲྭ་དང་དགོན་སྡེ་ཁག དེ་བཞིན་བོད་མིའི་གཞིས་ཆགས་ཁག་ནང་མི་ཧ་ཅང་ཉུང་དུ་འགྲོ་བཞིན་ཡོད་སྟབས། བཀའ་ཤག་སྐབས་སྔོན་མ་དང་ད་ལྟའི་བཀའ་ཤག་ནས་བོད་པའི་སློབ་གྲྭ་ཁག་ཟླ་སྒྲིལ་གཏོང་བའི་སྲིད་ཇུས་ལག་བསྟར་གནང་བཞིན་ཡོད་པ་ལྟར། མི་འགྱངས་བར་བོད་པའི་སློབ་གྲྭ་ཁག་ཅིག་ལ་ཉུང་འཕྲི་དང་ཟླ་སྒྲིལ་གཏོང་འཆར་འདུག
ཟླ་འདིའི་ཕྱི་ཚེས་ ༡༩ ཉིན་སཾ་བྷོ་ཊ་སྤྱི་ཁྱབ་ཡིག་ཚང་ནས་སྤོན་ཊ་གཏན་སློབ་ཏུ་སློབ་མ་ཉུང་འཕྲི་བྱས་ནས་འཛིན་རིམ་ལྔ་པ་བར་གཅོག་རྒྱུ་ཡིན་ཞིང་། ༢༠༢༢ ལོའི་སློབ་དུས་གསར་པ་ནས་སྤོན་ཊ་གཏན་སློབ་ཀྱི་འཛིན་རིམ་དྲུག་པ་ཡན་གྱི་སློབ་མ་རྣམས་མ་སུ་རིར་ཟླ་སྒྲིལ་གཏང་རྒྱུ་ཡིན་པའི་སྐོར་ལ་འབྲེལ་ཡོད་ཕ་མ་རྣམས་ལ་བརྡ་ཁྱབ་ཅིག་གནང་གནང་བའི་ནང་། འདས་ལོའི་ནང་ཁྱབ་ཁོངས་སློབ་གྲྭ་ཁ་ཤས་ནང་གྲོས་ཆོད་དགོངས་དོན་ལག་བསྟར་ཞུས་ཡོད། ད་དུང་ཁྱབ་ཁོངས་སློབ་ཁག་དངོས་ཡོད་གནས་སྟངས་ལ་གཞིགས་པའི་ཟླ་སྒྲིལ་དང་ཁུ་བསྡུ་དགོས་རིགས་མ་འགོར་བར་ཞུ་འཆར་ཡོད་པའི་ཁོངས་ནས་སློབ་དུས་གསར་པ་ནས་སྤོན་ཊ་གཏན་སློབ་འཛིན་རིམ་ལྔ་པ་བར་གཅོག་རྒྱུ་དང་། དེའི་རྗེས་འཛིན་རིམ་དྲུག་པ་ཡན་གྱི་དགེ་ལས་སློབ་ཕྲུག་རྣམས་མ་སུ་རི་དང་ཧ་སྤར་སྤུར་སློབ་ཁག་གཉིས་ནང་སློབ་དུས་གསར་པ་ནས་ཟླ་སྒྲིལ་གནང་གཏན་འཁེལ་ཡོད་སྟབས། དེ་གའི་གཞིས་ལས་ཁོངས་སུ་སྤོན་ཊ་གཏན་སློབ་ཀྱི་སློབ་ཕྲུག་ཡོད་ཚེ་འབྲེལ་ཡོད་ཕ་མ་རྣམས་ལ་དེ་ལས་ནས་གསལ་བཤད་དང་ལམ་སྟོན་ཅི་ནས་གནང་དགོས་པའི་ལམ་སྟོན་གནང་འདུག
འདི་གའི་གསར་འགོད་པས་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་དྲུང་ཆེ་འཇིགས་མེད་རྣམ་རྒྱལ་ལགས་སུ་སློབ་གྲྭ་ཁག་ཟླ་སྒྲིལ་གཏོང་སྐབས་དཀའ་ངལ་དང་དགེ་ལས་བཀོད་སྒྲིག་བྱེད་ཕྱོགས་སྐོར་དྲིས་པར་ཁོང་གིས། སློབ་གྲྭ་ཁག་ཟླ་སྒྲིལ་གཏོང་དུས་ས་གནས་ཁག་ཏུ་ཡོད་པའི་ཕ་མ་དང་ས་གནས་ཁག་ཏུ་ཐུགས་འགན་བཞེས་མཁན་ཁ་ཤས་ཀྱིས་སྟབས་མ་བདེ་བའི་ངང་ཚུལ་ཞིག་གནང་གི་འདུག དེར་ཐུགས་ཁག་ཡོད་རྒྱུ་མ་རེད་བསམ་གྱི་འདུག ས་གནས་ཁག་གཅིག་ཏུ་ལོ་སུམ་ཅུ་བཞི་བཅུའི་རིང་སློབ་གྲྭ་བཙུགས་ནས་ཡུན་རིང་ཕྱིན་པའི་སྐབས་སུ། སློབ་གྲྭ་ཁག་ཟླ་སྒྲིལ་གཏོང་དུས་ཁོང་ཚོར་སེམས་འཚབ་ཡོང་ངེས་ཡིན་པས། དེ་སྔ་སློབ་གྲྭ་ཟླ་སྒྲིལ་མ་གཏང་རོགས་ཞུ་མཁན་མང་པོ་ཞིག་བྱུང་ཡང་། ད་ལན་དེ་འདྲའི་རིགས་རྩ་བ་ནས་མ་བྱུང་། སྤྱིར་སློབ་གྲྭ་ཁག་ཟླ་སྒྲིལ་གཏོང་དུས་འཆར་གཞི་དང་ལྡན་པའི་ཐོག་ནས་གནང་གི་ཡོད་པས། དམིགས་བསལ་གྱིས་དཀའ་ངལ་འཕྲད་མ་བྱུང་། དེ་བཞིན་སློབ་གྲྭ་ཟླ་སྒྲིལ་གྱི་ལས་རིམ་མགོ་མ་བཙུགས་གོང་ནས་གྲོས་བསྡུར་དང་བསམ་བློ་མང་པོ་ཞིག་བཏང་ནས་སློབ་གྲྭ་གཅིག་ནས་གཅིག་ཏུ་གཏོང་བའི་སྐབས་སུ། དགེ་རྒན་བཀོད་སྒྲིག་གནང་རྒྱུ་དང་། སམ་བྷོ་ཊའི་སྤྱི་ཁྱབ་ཡིག་ཚང་གི་ཚོགས་ཆུང་གིས་དགེ་རྒན་ཟླ་སྒྲིལ་གཏོང་སྐབས། དགེ་རྒན་རྣམས་གང་དུ་གནས་སྤོར་གཏང་དགོས་མིན་དང་། གལ་ཏེ་དགེ་རྒན་འཕར་མ་འདྲ་ཡོད་ན། གནས་སྐབས་རིང་ལ་སློབ་གྲྭ་གཞན་ཞིག་ཏུ་ལས་གནས་གནང་རྒྱུ། ཡང་ན་སྤྱི་ཁྱབ་ཡིག་ཚང་དུ་གནས་སྐབས་རིང་ལ་བཞག་ཏེ་རིམ་པས་ལས་གནས་བཀོད་སྒྲིག་བྱེད་ཀྱི་ཡོད་རེད། ཅེས་བརྗོད་བྱུང་།
ཡང་དབུས་བོད་སློབ་འཛིན་ཚོགས་ཀྱི་ཁྱབ་ཁོངས་གཏན་སློབ་ཁག་རྩིས་སྤྲོད་རྩིས་ལེན་གྱི་གནས་སྟངས་ག་འདྲ་ཆགས་ཡོད་དྲིས་པར་ཁོང་གིས། དབུས་བོད་སློབ་འཛིན་ཚོགས་ཀྱི་ཁྱབ་ཁོངས་ནས་བོད་པའི་གཏན་འཇགས་སློབ་གྲྭ་དྲུག་རྩིས་སྤྲོད་རྩིས་ལེན་གྱི་ལས་རིམ་དེ་འགྲོ་མུས་ཡིན་པ་མ་ཟད། སློབ་གྲྭ་ཁ་ཤས་རྩིས་བཞེས་ཚར་བ་རེད། ཡིན་ནའང་། ལས་དོན་གལ་ཆེན་འདི་འདྲའི་རིགས་བྱེད་དུས་དཀའ་ངལ་ཆུང་ངུའི་རིགས་ཡོང་གི་འདུག སློབ་གྲྭ་དེ་དག་རྩིས་བཞེས་པའི་སྐབས་ལོ་ངོ་མང་པོའི་རིང་ཕྱག་ལས་གནང་མཁན་གྱི་རྒྱ་གར་དགེ་རྒན་ལ་རང་བཞིན་གྱིས་མ་བདེ་བ་ཞིག་ཡོང་ཤག་ཤག་རེད། འོན་ཀྱང་། ཕན་ཚུན་གོ་བརྡ་སྤྲོད་རེས་བྱས་ནས་དཀའ་ངལ་བསལ་རྒྱུ་གལ་ཆེན་པོ་ཡིན་པ་རེད། རྒྱ་གར་སློབ་ཕྲུག་གི་ཕ་མ་ཁ་ཤས་ཀྱིས། མ་འོངས་པར་དབུས་བོད་སློབ་འཛོན་ཚོགས་ཀྱི་ཁྱབ་ཁོངས་བོད་པའི་སློབ་གྲྭ་རྣམས་བོད་པས་འཛིན་སྐྱོང་བྱས་པ་ཡིན་ན། རྒྱ་གར་སློབ་ཕྲུག་རྣམས་ཀྱི་སློབ་འཇུག་མུ་མཐུད་ཡོང་ཐུབ་མིན་དང་། དགེ་རྒན་བསྐོ་བཞག སློབ་ཡོན་སྤར་མིན་ཐད་ལ་སྐད་ཆ་འདྲི་སྐབས། ང་ཚོས་མ་འོངས་བོད་སློབ་འཛིན་ཚོགས་ཀྱི་ཁྱབ་ཁོངས་སློབ་གྲྭ་རྣམས་བོད་པས་འཛོན་སྐྱོང་གནང་བ་ཡིན་ན། རྒྱ་གར་ཕྲུ་གུ་རྣམས་ཀྱི་སློབ་འཇུག་མུ་མཐུད་དུ་གནས་ཀྱི་ཡོད་ཀྱང་། སོ་སོས་ཕྱིར་འཐེན་བྱས་པ་ཡིན་ན་ང་ཚོར་བྱ་རྒྱུ་གང་ཡང་མེད་པ་ལས། དེ་མིན་མུ་མཐུད་དུ་གནས་རྒྱུ་ཡིན་པ་དང་། སློབ་ཡོན་ཡང་རྒྱ་གར་གཞུང་གིས་གཏན་འབེབ་གནང་བ་བཞིན་ལག་བསྟར་བྱ་རྒྱུ་ཡིན་པ་གསལ་བཤད་བྱས་ཡོད་སྟབས། རྒྱ་གར་སློབ་ཕྲུག་གི་ཕ་མ་བརྒྱ་ཆ་དགུ་བཅུར་དཀའ་ངལ་མེད་ཀྱང་། རེ་ཟུང་ཞིག་ཡོང་གི་ཡོད་པ་དེར་གདོང་ལེན་བྱས་ནས་འགྲོ་དགོས་རེད། ཅེས་བརྗོད་བྱུང་།
སམ་བྷོ་ཊའི་སྤྱི་ཁྱབ་འགན་འཛིན་ཚེ་རིང་དོན་གྲུབ་ལགས་ཀྱིས། ཤེས་རིག་ཚོགས་ཆེན་ཐེངས་བདུན་པའི་ཚོགས་འདུའི་སྟེང་གྲོས་གཞི་གྲོས་འཆར་ཞིག་བཞག་པའི་ནང་། བཙན་བྱོལ་བོད་པའི་སློབ་གྲྭ་ཁག་གི་ནང་དུ་བོད་ཕྲུག་ཇེ་ཉུང་དུ་འགྲོ་ཡི་ཡོད་སྟབས། སློབ་གྲྭ་ཁག་སོ་སོས་ཟླ་སྒྲིལ་གཏང་དགོས་པའི་བཀའ་ཕེབས་ཡོད་པ་ལྟར། ད་ལྟའི་ཆར་སམ་བྷོ་ཊའི་སློབ་གྲྭ་ཁག་ཟླ་སྒྲིལ་གཏོང་བ་དེ་ལག་བསྟར་འགྲོ་མུས་ཡིན་པས། ད་ལན་ཤེས་རིག་ལས་ཁུངས་ལ་གོ་བསྡུར་ཞུས་པའི་ཐོག སྤོན་ཊ་གཏན་སློབ་འཕོ་འགྱུར་གཏང་རྒྱུའི་ཐག་གཅོད་བྱུང་ཡོད། ད་ལོ་ནས་སྤོན་ཊ་སློབ་གྲྭ་རུ་གཞི་རིམ་འོག་མ་བར་གཞག་སྟེ། འཛིན་རིམ་དྲུག་པ་ནས་བཅུ་གཉིས་བར་གྱི་སློབ་མ་རྣམས་མ་སུ་རི་གཏན་སློབ་ཏུ་ཟླ་སྒྲིལ་གཏང་རྒྱུ་དང་། དགེ་ལས་མང་ཆེ་བ་ཞིག་ཧ་སྤར་སྤུར་དང་མ་སུ་རིར་ཟླ་སྒྲིལ་གཏང་རྒྱུའི་ཐག་གཅོད་བྱུང་ཡོད་སྐོར་དང་། དེ་བཞིན་སྤོན་ཊ་སློབ་གྲྭ་ནི་སམ་བྷོ་ཊའི་སློབ་གྲྭ་ཆེ་ཤོས་ཤིག་ཡིན་པས། འཛུགས་སྐྲུན་མང་པོ་ཞིག་བྱས་ཡོད་པ་དང་འགྲོ་སོང་ཕོན་ཆེན་ཞིག་བཏང་སྟེ་མཐུན་རྐྱེན་མང་པོ་ཞིག་མཁོ་སྦྱོར་བྱས་པར་བརྟེན། དེའི་རིགས་ལ་ཕངས་སེམས་ཆེན་པོ་ཞིག་ཀྱང་ཡོད་ནའང་། དེ་མིན་གྱི་འཛིན་ཆས་དང་ཤེས་ཡོན་གྱི་མཁོ་ཆས་རིགས་བགོ་འགྲེམས་བྱ་དགོས་པས་དཀའ་ངལ་ཅུང་ཙམ་ཡོད་སྐོར་སོགས་བརྗོད་བྱུང་།
ཡང་ཁོང་གིས་མུ་མཐུད་དུ། ཤེས་རིག་ཚོགས་ཆེན་སྐབས་བདུན་པའི་སྐབས་ཀྱི་གྲོས་ཆོད་དང་པོ་དེ། བོད་ནས་ཕེབས་མཁན་གྱི་སློབ་མ་ཉུང་དུ་འགྲོ་ཡི་ཡོད་པ་དང་། དེ་བཞིན་ཕྱི་རྒྱལ་དུ་ཕེབས་མཁན་མང་དུ་འགྲོ་བ། བཙན་བྱོལ་སྤྱི་ཚོགས་ཀྱི་ཕྲུ་གུའི་སྐྱེས་ཚད་ཧ་ཅང་དམའ་བོ་ཡོད་དུས། སློབ་གྲྭ་ཁག་ཏུ་སློབ་ཕྲུག་གི་གྲངས་འབོར་མར་ཆགས་འགྲོ་ཡི་ཡོད་པར་བརྟེན། སློབ་གྲྭ་ཁག་སྔོན་མ་ནང་བཞིན་གནས་པ་ཡིན་ན། ནམ་ཞིག་དཀའ་ངལ་འཕྲད་ཀྱི་སྲིད་པས། རྡ་སྟེང་བོད་ཁྱིམ། མ་སུ་རི་བོད་ཁྱིམ། དབུས་བོད་སློབ་འཛིན་ཚོགས། སམ་བྷོ་ཊ་བོད་སློབ་ཚོགས་པ་བཅས་སློབ་གྲྭའི་སྡེ་ཁག་བཞི་ཡོད་པ་དེར་ཕན་ཚུན་ཟླ་སྒྲིལ་གཏོང་བ་དང་། འཛིན་གྲྭ་གཅོག་དགོས་པའི་དུས་ལ་བབས་ཡོད་པའི་གྲོས་ཆོད་ཅིག་བཞག་ཡོད་པ་གཞིར་བཟུང་གིས། ད་ལྟའི་ཆར་སློབ་གྲྭ་ཁག་མང་པོ་ཞིག་གི་ནང་དུ་སློབ་གྲྭ་ཟླ་སྒྲིལ་གཏང་རྒྱུ་དང་། འཛིན་རིམ་གཅོག་རྒྱུའི་ལས་རིམ་ཞིག་འགྲོ་མུས་ཡིན་པ་རེད། ཅེས་བརྗོད་བྱུང་།
ཕྱི་ལོ་ ༢༠༡༩ ཟླ་ ༢ ཚེས་ ༢༣ ནས་ ༢༥ བར་ཚོགས་པའི་བཙན་བྱོལ་བོད་མིའི་ཤེས་རིག་ཚོགས་ཆེན་བདུན་པའི་ཐོག་བཞག་པའི་གྲོས་ཆོད་དང་པོའི་ནང་། སློབ་སྡེ་ཁག་གི་འཛིན་སྐྱོང་གི་གནས་བབ་མི་འདྲ་བར་བརྟེན། ཤེས་རིག་ལས་ཁུངས་ཀྱིས་རྐང་འགན་བཞེས་ཏེ། སློབ་སྡེ་ཁག་གི་འགན་འཛིན་དང་ལྷན་དུ་གོ་བསྡུར་གྱིས་གཞིས་ཆགས་ཁག་གི་གཞི་རིམ་འོག་མ་རྣམས་གནས་ཐབས་དང་། གཞི་རིམ་བར་མ་དང་གོང་མ་རྣམས་སློབ་གྲྭ་སོ་སོའི་གནས་བབ་དང་བསྟུན་ཁུ་བསྡུ་དང་ཟླ་སྒྲིལ་གནང་ཐུབ་ན་དཔལ་འབྱོར་བསྲི་ཚགས་དང་མིའི་ནུས་ཤུགས་མཉམ་སྤུངས་ཐུབ་པས་དེ་ལྟར་གནང་གལ་ཞེས་བཀོད་ཡོད་པ་ལྟར། རིམ་གྱིས་སློབ་གྲྭ་ཁག་ཟླ་སྒྲིལ་གཏོང་གི་ཡོད་པ་དང་། དེ་དང་བསྟུན་ཆོས་དང་རིག་གཞུང་གཅིག་པའི་ཧི་མ་ལ་ཡའི་རི་རྒྱུད་ཀྱི་བྱིས་པ་རྣམས་སློབ་འཇུག་དང་། དགོན་སྡེ་ཁག་ཏུ་གྲྭ་རྒྱུན་ཤུགས་ཆེན་པོ་ཆགས་ཀྱི་ཡོད་པ་རེད།
གསར་འགོད་པ། དཔལ་ལྡན།
