བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་བོད་མི་མང་སྤྱི་འཐུས་ཚོགས་གཙོ་མཆོག་རྣམ་གཉིས་ནས་ཨ་རིའི་གྲོས་ཚོགས་གོང་མའི་མང་མོས་དབུ་ཁྲིད་ཟུར་པ་སྐུ་ཞབས་ཧེ་རི་རེཌ་ (Harry Reid) ལགས་དགུང་གྲངས་ ༨༢ ཐོག་སྐུ་གྲོངས་བར་ཐུགས་གསོ་ཞུས་འདུག
སྲིད་སྐྱོང་མཆོག་ནས་དམ་པ་ཁོང་གི་སྐུ་ཟླ་ལན་ཌར་རེཌ་(Landra Reid) ལགས་སུ་ཐུགས་གསོ་ཞུས་པའི་ནང་། ཁྱེད་ཀྱི་བརྩེ་བའི་སྐུ་ཟླ་དང་ཨ་རིའི་གྲོས་ཚོགས་གོང་མའི་མང་མོས་དབུ་ཁྲིད་ཟུར་པ་སྐུ་ཞབས་ཧེ་རི་ (Harry Reid) ལགས་སྐུ་གྲོངས་པའི་ཡིད་སྐྱོའི་གནས་ཚུལ་ཤེས་རྟོགས་བྱུང་བར་ང་རང་བློ་ཕམ་བྱུང་ལ། ངས་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་འདས་པོ་དམ་པ་ཁོང་གི་ཆེད་དུ་བསྔོ་སྨོན་དང་། དམ་པ་ཁོང་དང་ཁོང་གི་ནང་མི་སྤུན་མཆེད་བཅས་ལ་ཐུགས་གསོ་ཞུ་ཡི་ཡོད། ཅེས་གསུངས་འདུག
ཡང་སྲིད་སྐྱོང་མཆོག་གིས། ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་ཧེ་རི་རེཌ་(Harry Reid) ལགས་ཀྱིས་བོད་ནང་གི་ཛ་དྲག་ཆེ་བའི་གནས་སྟངས་སྐོར་གསུངས་པ་དང་། བདེན་པའི་གནས་ལུགས་གཞི་རྩར་བཟུང་སྟེ་བོད་དོན་སླད་རྒྱབ་སྐྱོར་གནང་བར་བོད་མི་རྣམས་ཀྱིས་དྲན་གསོ་དང་བཀའ་དྲིན་ཆེ་ཞུ་ཡི་ཡོད། དེ་སྔ་དམ་པ་ཁོང་ཨ་རིའི་གྲོས་ཚོགས་གོང་མའི་མང་མོས་དབུ་ཁྲིད་ཡིན་པའི་སྐབས་སུ། ཁོང་གིས་ཕྱི་ལོ་ ༢༠༡༤ ལོར་༧གོང་ས་མཆོག་ཨ་རིའི་གྲོས་ཚོགས་གོང་མའི་ཚོགས་འདུ་དབུ་འབྱེད་དང་ཐུགས་སྨོན་གནང་བར་མགྲོན་འབོད་ཞུས་ཡོད་པ་རེད། ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་ཧེ་རི་རེཌ་ལགས་ཀྱིས་ལོ་ངོ་བཅུ་ཕྲག་མང་པོའི་རིང་མི་མང་དང་རྒྱལ་ཁབ། མི་གཞན་བཅས་ཡར་རྒྱས་གོང་འཕེལ་གྱི་ཆེད་བློས་གཏོང་ཆེན་པོས་ཞབས་འདེགས་རླབས་ཆེན་བསྒྲུབས་པ་སོགས་མི་ཚེ་དོན་དང་ལྡན་པ་བསྐྱལ་ཡོད་པར་བརྟེན། ཁོང་གི་ཁྱད་པར་དུ་འཕགས་པའི་སྣེ་ཁྲིད་དང་མི་མང་ལ་སྲི་ཞུ་བསྒྲུབས་པའི་མཛད་རྗེས་རྣམས་དུས་རྟག་ཏུ་དྲན་ངེས་ཡིན། ངས་སླར་ཡང་འདས་པོ་དམ་པ་ཁོང་གི་ཆེད་དུ་བསྔོ་སྨོན་དང་སྐུ་ཉིད་གཙོས་པའི་ཁོང་གི་ནང་མི་ཡོངས་ལ་ཐུགས་གསོ་ཞུ་ཡི་ཡོད་ཅེས་གསུངས་འདུག
དེ་རིང་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གི་ཐུགས་གསོའི་ནང་། སྐུ་ཞབས་དམ་པ་ཧར་རེ་རེཌ་ལགས་ཀྱིས་བོད་ཀྱི་བདེན་པའི་འཐབ་རྩོད་ཐོག་གལ་འགངས་ཆེ་བའི་རྒྱབ་སྐྱོར་གནང་བར་ང་ཚོ་བོད་མི་ཚང་མས་བཀའ་དྲིན་ཆེ་ཞུ་རྒྱུ་དང་། དམ་པ་ཁོང་ཨ་རིའི་གྲོས་ཚོགས་གོང་མའི་མང་མོས་དབུ་ཁྲིད་གནང་སྐབས་ཕྱི་ལོ་ ༢༠༡༤ ལོར་༧གོང་ས་མཆོག་ཨ་རིའི་གྲོས་ཚོགས་གོང་མའི་ནང་སྨོན་ལམ་འདུ་ཚོགས་ཀྱི་དབུ་འབྱེད་མཛད་སྒོའི་ཚོགས་མགོན་དུ་གདན་ཞུས་གནང་ཡོད། དམ་པ་ཁོང་ནི་རང་དོན་བློས་གཏོང་གིས་ཨ་རིའི་རྒྱལ་ཁབ་དང་མི་མང་ལ་ཞབས་འདེགས་རླབས་ཆེན་ཞུ་མཁན་ཞིག་ཡིན་པར་ངོས་འཛིན་ཞུ་ཡི་ཡོད། ཁོང་སྐུ་གཤེགས་པ་ནི་ཨ་རིའི་རྒྱལ་ཁབ་དང་མི་མང་ཙམ་མིན་པར་ང་ཚོ་བོད་མི་ཚོ་ལའང་གྱོང་གུད་ཧ་ཅང་ཆེན་པོ་ཐེབས་ཡོད་པ་རེད། ངས་སླར་ཡང་དཀའ་ཚེགས་ཆེ་བའི་དུས་ཚོད་འདིར་ཁྱེད་ཀྱི་ནང་མི་ཡོངས་ལ་ཐུགས་གསོ་ཞུ་ཡི་ཡོད་ཅེས་གསུངས་འདུག
སྐུ་ཞབས་ཧེ་རི་རེཌ་ (Harry Reid) ལགས་ཕྱི་ལོ་ ༡༩༣༩ ཟླ་ ༡༢ ཚེས་ ༢ ཉིན་ཨ་རིའི་ལྷོ་བརྒྱུད་ཀྱི་ནཱེ་ཝ་དྷ་ (Nevada) མངའ་སྡེའི་ནང་གི་ (Searchlight) ཟེར་བའི་གྲོང་སྡེའི་ནང་སྐྱེས་པ་དང་། ཁོང་གིས་ (Southern Utah University) ནང་རྒྱལ་རབས་དང་སྲིད་དོན་ཚན་རིག་ཐོག་ཆེད་སྦྱོང་གནང་ཡོད་འདུག སྐུ་ཞབས་ཧེ་རི་རེཌ་ལགས་ཡོངས་གྲགས་སུ་ཨ་རིའི་ཁྲིམས་རྩོད་པ་དང་ཆབ་སྲིད་པ་ཞིག་ཡིན་པ་དང་། ཁོང་གིས་ཕྱི་ལོ་ ༡༩༨༧ ནས་ ༢༠༡༧ བར་ཨ་རིའི་ལྷོ་བརྒྱུད་ཀྱི་ནཱེ་ཝ་དྷ་ (Nevada) མངའ་སྡེའི་གྲོས་ཚོགས་གོང་མའི་འཐུས་མི་གནང་ཡོད་པ་དང་། ཕྱི་ལོ་ ༢༠༠༥ ནས་ ༢༠༡༧ བར་དམངས་གཙོ་ཚོགས་པའི་ཨ་རིའི་གྲོས་ཚོགས་གོང་མའི་དབུ་འཁྲིད་གནང་། ཕྱི་ལོ་ ༢༠༠༧ ནས་ ༢༠༡༥ བར་ཨ་རིའི་གྲོས་ཚོགས་གོང་མའི་མང་མོས་དབུ་ཁྲིད་གནང་ཡོད་པ་རེད།
གསར་འགོད་པ་བསྟན་འཛིན་ཕུར་བུས་བོད་མིའི་སྒྲིག་འཛུགས་ཀྱི་དྲ་བ་ལས་བཏུས།
