དེ་རིང་སྔ་དྲོར་བསྟན་འཛིན་ཡོན་ཏན་ལགས་ཀྱིས་ཁྲིམས་ཞིབ་པ་ཆེ་བའི་ལས་ཚབ་ཀརྨ་དགྲ་འདུལ་ལགས་ཀྱི་དྲུང་ནས་ལྷོ་ཕྱོགས་ཀྱི་ས་གནས་ཁྲིམས་ཞིབ་པའི་ལས་འཁུར་དམ་འབུལ་ཞུས་གནང་སོང་།
བཙན་བྱོལ་བོད་མིའི་བཅའ་ཁྲིམས་དོན་ཚན་རེ་དགུའི་ནང་གསེས་དོན་ཚན་དང་པོའི་ནང་། ཆེས་མཐོའི་ཁྲིམས་ཞིབ་ཁང་གིས་ས་གནས་སོ་སོའི་འགོ་འཛིན་ཁག་དང༌། དེ་མིན་ལས་བྱེད་དང༌། སྐྱེ་བོ་སུ་འོས་ལ་ཁྲིམས་ཞིབ་ཀྱི་དབང་ཆ་སྤྲད་དེ་གཏན་འཇགས་དང༌། འཕྲལ་སེལ། ཡང་ན་སྐོར་བསྐྱོད་བཅས་ཀྱི་ཁྲིམས་ཞིབ་ཁང་འོག་མའི་ལས་དོན་སྐབས་བསྟུན་གྱིས་སྒྲུབ་ཆོག་པ་ཡིན། ཞེས་གསལ་དོན་ལྟར། དེ་རིང་སྔ་དྲོ་ཆུ་ཚོད་ ༡༠ སྟེང་ཆེས་མཐོའི་ཁྲིམས་ཞིབ་ཁང་དུ་སྲོང་བཙན་ཚོམས་ཁང་དུ། དཔལ་ལྡན་ཁྲིམས་ཞིབ་པ་ཆེ་བའི་ལས་ཚབ་ཀརྨ་དགྲ་འདུལ་མཆོག་གི་མདུན་ནས། བསྟན་འཛིན་ཡོན་ཏན་ལགས་ཀྱིས་ལྷོ་ཕྱོགས་ས་གནས་ཁྲིམས་ཞིབ་པའི་ལས་འཁུར་དམ་འབུལ་ཞུ་བའི་མཛད་སྒོ་ཚོགས་སོང་བ་དང་། མཛད་སྒོའི་སྟེང་ཁྲིམས་ཞིབ་པ་ཆེ་བའི་ལས་ཚབ་ཀརྨ་དགྲ་འདུལ་མཆོག་དང་ཁྲིམས་ཞིབ་པ་གཞན་བསྟན་འཛིན་ལུང་རྟོག་མཆོག དེ་བཞིན། ཁྲིམས་དྲུང་ཡི་ཤེས་དབང་མོ་མཆོག་དང་ཁྲིམས་ཞིབ་ཁང་གི་འབྲེལ་ཡོད་ལས་བྱེད་ཁག་ཅིག་འཛོམས་འདུག
གཞུང་འབྲེལ་མཛད་སྒོའི་སྟེང་ཁྲིམས་ཞིབ་པ་ཆེ་བའི་ལས་ཚབ་ཀརྨ་དགྲ་འདུལ་མཆོག་གིས་༸རྒྱལ་བའི་བཞུགས་ཁྲི་རིན་པོ་ཆེར་མཎྜལ་རྟེན་དོད་དང་དྲུང་ལས་བསྟན་འཛིན་ཡོན་ཏན་ལགས་ཀྱིས་༸རྒྱལ་བའི་བཞུགས་ཁྲི་རིན་པོ་ཆེར་མཎྜལ་རྟེན་དོད་འབུལ་ལམ་ཞུས་མཚམས། ཁྲིམས་ཞིབ་པ་ཆེ་བའི་ལས་ཚབ་མཆོག་གི་དྲུང་ནས་ལས་ཁུར་དམ་འབུལ་ཞུས་གནང་སོང་། ལྷོ་ཕྱོགས་ས་གནས་ཁྲིམས་ཞིབ་པར་བསྐོ་གཞག་བྱུང་བའི་ཐད་ཁོང་གིས་གསར་འགོད་པའི་དྲིས་ལན་དུ། ང་ཚོ་དམངས་གཙོ་ཡིན་པའི་ཆ་ནས་ཁྲིམས་ཀྱི་དབང་སྒྱུར་དེ་ཧ་ཅང་གནད་འགོག་ལ་མཐོང་གི་ཡོད་པ་དང་། དེ་ལེགས་འགྲུབ་ཡོང་བར་མི་མང་ལ་ཁྲིམས་ཀྱི་གོ་རྟོགས་གལ་ཆེན་པོ་ཡིན་པས། མང་ཚོགས་ཁྲོད་ཁྲིམས་ཀྱི་གོ་རྟོགས་སྤེལ་ཐབས་སུ་འབད་བརྩོན་གང་ཐུབ་ཞུ་རྒྱུ་ཡིན་སྐོར་གསུངས་བྱུང་།
ད་ལྟའི་ཆར་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་གི་ཁྱབ་ཁོངས་སུ་རྡེ་ར་རྡུན་བདེ་སྐྱིད་གླིང་གཞིས་སྒར་དུ་བྱང་ཕྱོགས་བོད་མིའི་ས་གནས་ཁྲིམས་ཞིབ་ཁང་དང་། སྦེལ་ཀོབ་ལུགས་བསམ་གཞིས་ཆགས་སུ་ལྷོ་ཕྱོགས་བོད་མིའི་ས་གནས་ཁྲིམས་ཞིབ་ཁང་། དེ་བཞིན་ལ་དྭགས་བསོད་ནམས་གླིང་གཞིས་ཆགས་སུ་ལ་དྭགས་བོད་མིའི་ས་གནས་ཁྲིམས་ཞིབ་ཁང་བཅས་ཁྱོན་ས་གནས་ཁྲིམས་ཞིབ་ཁང་གསུམ་ཡོད་པ་ལས། ལྷོ་ཕྱོགས་ས་གནས་ཁྲིམས་ཞིབ་པར་བསྐོ་གཞག་བྱུང་བའི་བསྟན་འཛིན་ལགས་ནི་ད་ལྟ་རང་ལོ་ ༣༡ ཡིན་པ་དང་། ཕྱི་ལོ་ ༢༠༠༤ ལོར་བོད་ནས་རྒྱ་གར་ནང་སྐྱབས་བཅོལ་དུ་འབྱོར་རྗེས། ཕྱི་ལོ་ ༢༠༠༤ ནས་སུ་ཇཱ་བོད་ཁྱིམ་དང་ཀོ་པ་པུར་གཉིས་ནས་གཞི་རིམ་དང་འབྲིང་རིམ་སློབ་མཐར་ཕྱིན་ཡོད་ཅིང་། ལྷོ་ཕྱོགས་མངའ་སྡེ་ཀ་ནཱ་ཊ་ཁའི་གྲོང་ཁྱེར་མའེ་སོར་ནས་ལོ་ལྔའི་རིང་ཁྲིམས་ཀྱི་སློབ་སྦྱོང་བྱས་མྱོང་ཡོད་འདུག
གསར་འགོད་པ། སྐལ་བཟང་སྦྱིན་པ།
