ཨོ་ལིམ་ཕིག་རྩེད་འགྲན་གྱི་དབུས་རྒྱུན་ཚོས་འགྲོ་བ་མིའི་ཐོབ་ཐང་སྣང་མེད་དུ་བཞག་པ་དང་དཔལ་འབྱོར་གྱི་ཁེ་སྤོགས་གཙོ་འཛིན་བྱས་པའི་སྐྱོན་འོག ཚོགས་པའི་གཙོ་འཛིན་བྷ་ཆི་ཡི་གཙོས་འབྲེལ་ཡོད་ཚང་མས་ལས་གནས་ནས་དགོངས་པ་ཞུ་དགོས་པའི་སྐུལ་མ་བཏང་འདུག
ད་ལྟའི་ཆར་རྒྱ་ནག་ནང་དགུན་ཁའི་ཨོ་རྩེད་འགྲན་བསྡུར་འཚོགས་པར་ཟླ་གཅིག་མ་ཟིན་ཙམ་ལས་མེད་པའི་སྐབས་འདིར། འཇར་མན་གྱི་འགྲོ་བ་མིའི་ཐོབ་ཐང་ལྟ་ཞིབ་ཁང་གི་འགན་འཛིན་ (Wenzel Michalski) ལགས་ཀྱིས། བོད་དང་ཡུ་གུར། ཧོང་ཀོང་དང་རྒྱ་ནག་ནང་ལོགས་བཅས་ཀྱི་འགྲོ་བ་མིའི་ཐོབ་ཐང་གི་གནས་སྟངས་ཇེ་སྡུག་ཏུ་འགྲོ་ཡི་ཡོད་པའི་སྐབས་འདིར། རྒྱལ་སྤྱིའི་ཨོ་རྩལ་འགྲན་ཚོགས་ཀྱི་ཚོགས་གཙོ་ཐོ་མ་སི་བྷ་ཆི་ (Thomas Bach) ཡིས། འགྲོ་བ་མིའི་ཐོབ་ཐང་ལ་དོ་དབྱིངས་མ་བྱས་པར་དཔལ་འབྱོར་གྱི་ཁེ་སྤོགས་ཁོ་ན་བསམས་པ་ནི་དུས་སྐབས་དང་མི་འཚམ་པའི་བྱ་སྤྱོད་ཅིག་ཡིན་པའི་སྐྱོན་བརྗོད་དང་སྦྲགས། ཐོ་མ་སི་བྷ་ཆི་དང་ཨོ་རྩལ་གྱི་འགན་འཛིན་ལྷན་ཚོགས་ཀྱིས་ལས་གནས་ནས་དགོངས་པ་ཞུ་དགོས་པ་ནན་སྐུལ་བྱས་ཡོད་འདུག
དེ་འབྲེལ་ཐད་འཇར་མན་གྱི་འགྲོ་བ་མིའི་ཐོབ་ཐང་ལྟ་ཞིབ་ཁང་གི་འགན་འཛིན་ཝན་རྫིལ་ལགས་ཀྱིས། རྒྱལ་སྤྱིའི་རྩེད་འགྲན་ཆེ་གྲས་ཨོ་ལིམ་ཕིག་དང་ཧྥི་ཧྥ་ (FIFA) ལྟ་བུས། མུ་མཐུད་སྲིད་དབང་སྒེར་གཅོད་གཞུང་དང་ལག་སྦྲེལ་བྱེད་རྒྱུ་ཡིན་ཚེ། འགྲོ་བ་མིའི་ཐོབ་ཐང་གི་ཚོགས་སྡེ་ཁག་གིས་དེ་ལ་དཔག་པའི་ལས་འགུལ་སྤེལ་རྒྱུ་ཡིན་སྐོར་དང་། ངས་ཐག་ཆོད་པོའི་སྒོ་ནས་བཤད་ཐུབ་པ་ནི། རྒྱལ་སྤྱིའི་རྩེད་འགྲན་ཚོགས་པ་དག་གིས། ད་སྔ་བར་ཡོད་པའི་རང་རང་གི་ཆེ་མཐོང་བརླག་ཟིན་པ་རེད། ཕྱི་ལོ་ ༢༠༢༢ ལོ་ནི་ཨོ་ལིམ་ཕིག་དང་ཧྥི་ཧྥ་གཉིས་མུ་མཐུད་གནས་དགོས་མིན་ལ་ལྟ་དགོས་པའི་ལོ་ཞིག་ཡིན། ཞེས་བརྗོད་ཡོད།
ཡང་ཁོང་གིས། རྒྱལ་སྤྱིའི་ཨོ་རྩལ་འགྲན་ཚོགས་ཀྱི་དབུས་རྒྱུན་ནས། ད་ལྟའི་རྒྱ་ནག་གི་འགྲོ་བ་མིའི་ཐོབ་ཐང་གི་གནས་སྟངས་ངོས་འཛིན་བྱེད་མ་ཐུབ་པ་དང་། མཉམ་ལས་ཚོང་འབྲེལ་ཡོད་པའི་རྒྱལ་ཁབ་དག་གིས་ཚོང་འབྲེལ་ཐོག་ནས་རྒྱ་ནག་གིས་ཡུ་གུར་བའི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པར་ཁ་གཏད་གཅོག་གི་ཡོད་པ་དང་། བྷ་ཆི་དང་ཨོ་རྩལ་གྱི་འགན་འཛིན་གཞན་རྣམས་ནས་རྩ་དགོངས་ཞུས་ཏེ། འགྲོ་བ་མིའི་ཐོབ་ཐང་གི་གོ་རྟོགས་སད་པའི་གཞོན་སྐྱེས་ཚོར་གོ་སྐབས་སྤྲོད་དགོས་པ་དང་། དམིགས་བསལ་ཐོ་མ་སི་བྷ་ཆི་ལྟ་བུ་མི་རྣམས་ལ་མུ་མཐུད་རྒྱལ་སྤྱིའི་ཨོ་ལིམ་ཕིག་དང་ཧྥི་ཧྥ་ཡི་དབང་ཆ་སྒེར་གཅོད་བྱས་མི་ཆོག་པར་བཟོ་དགོས། རྒྱུ་མཚན་ནི་ཁོ་ཚོར་འགྲོ་བ་མིའི་ཐོབ་ཐང་གི་འགན་འཁྲི་མེད་ཅིང་ཡོད་ཚད་དཔལ་འབྱོར་ལ་རེ་བ་བཅོལ་གྱི་ཡོད་པས་ཡིན། ཞེས་བརྗོད་ཡོད་འདུག
རྒྱ་ནག་གཞུང་གིས། བོད་དང་ཡུ་གུར་གཉིས་ཀྱི་འགྲོ་བ་མིའི་ཐོབ་ཐང་ལ་རྡོག་རོལ་དང་ཧོང་ཀོང་གི་དམངས་གཙོའི་ལས་འགུལ་ལ་དྲག་གནོན། དེ་བཞིན་ཐའེ་ཝན་ལ་དྲག་པོས་འཇིགས་སྐུལ་གཏོང་བཞིན་པ་དང་འབྲེལ་ནས། ཨ་རི་དང་ཨོ་གླིང་། དབྱིན་ཇི་དང་ཁེ་ན་ཌ་བཅས་ཀྱིས་གཞུང་འབྲེལ་ཐོག་ནས་རྒྱ་ནག་གི་ཨོ་རྩལ་འགྲན་ཚོགས་ལ་ངོ་རྒོལ་བྱས་ཡོད་པ་མ་ཟད། འཇར་མན་གྱི་ཕྱི་སྲིད་བློན་ཆེན་ ཨན་ན་ལེ་ན་ (Annalena Baerbock) ལགས་དང་ནང་སྲིད་བློན་ཆེན་ཧྥེ་ཛར་ (Fezer) ལགས་གཉིས་ཀྱིས་སྒེར་ངོས་ནས་རྒྱའི་དགུན་ཁའི་ཨོ་རྩལ་འགྲན་ཚོགས་ལ་ངོ་རྒོལ་བྱས་ཡོད་པ་དང་། ད་ལྟ་འཇར་མན་གྱི་གཙོས་ཡུ་རོབ་མཉམ་འབྲེལ་མཐུན་ཚོགས་ཀྱིས་རྒྱ་ནག་གི་ཨོ་རྩལ་འགྲན་ཚོགས་ཐད་ངོ་རྒོལ་ཡོད་པའི་རྣམ་འགྱུར་གང་ཡང་བསྟན་མེད་པ་མ་ཟད། ཧྥ་རན་སིའི་སྲིད་འཛིན་མ་ཁུ་རོན་ལགས་ཀྱིས། གཞུང་འབྲེལ་ངོ་རྒོལ་བྱེད་པ་ནི་མཚོན་དོན་ཙམ་ཡིན་པས། ཧྥ་རན་སིའི་ངོས་ནས་རྒྱའི་རྩེད་འགྲན་ལ་ངོ་རྒོལ་བྱ་རྒྱུ་མིན་པའི་གསལ་བསྒྲགས་སྤེལ་ཡོད་པ་རེད།
ཡང་འདས་ལོའི་ཕྱི་ཟླ་ ༢ ནང་འཛམ་གླིང་རྒྱལ་ཁབ་ཁག་གི་གྲོས་ཚོགས་འཐུས་མི་དང་གཞུང་འབྲེལ་དང་གཞུང་འབྲེལ་མིན་པའི་འགྲོ་བ་མིའི་ཐོབ་ཐང་གི་ཚོགས་སྡེ་ཁག་ ༡༨༠ ལྷག་གིས། རྒྱ་ནག་གཞུང་གིས་བོད་དང་ཡུ་གུར། དེ་བཞིན་ཧོང་ཀོང་བཅས་ཀྱི་ནང་འགྲོ་བ་མིའི་ཐོབ་ཐང་རྡོག་རོལ་གཏོང་གི་ཡོད་པའི་སྐྱོན་བརྗོད་དང་སྦྲགས། འཛམ་གླིང་རྒྱལ་ཁབ་ཁག་དང་ལུས་རྩལ་བ་མི་སྒེར་སོགས་རྒྱ་ནག་གི་དགུན་ཁའི་ཨོ་རྩལ་འགྲན་ཚོགས་ནང་མཉམ་ཞུགས་མི་གནང་བའི་འབོད་སྐུལ་དང་ངོ་རྒོལ་ལས་འགུལ་སྤེལ་ཡོད་ལ། ལས་འགུལ་དེའི་ནང་རང་རེའི་བཙན་བྱོལ་གྱི་གཞུང་འབྲེལ་མིན་པའི་ཚོགས་སྡེ་ལྔ་ཡིས་ཀྱང་ཆ་ཤས་བླངས་ཏེ་རྒྱ་ནག་གཞུང་ལ་ངོ་རྒོལ་གནང་ཡོད།
ད་སྔ་བར་རྒྱལ་སྤྱིའི་ངོ་རྒོལ་རིམ་པའི་ཁྲོད་རྒྱ་ནག་གཞུང་གིས་ལན་འདེབས་གང་མང་བྱས་ཡོད་པ་དང་། འདས་ལོའི་ལོ་མགོར་དམིགས་བསལ་རྒྱ་ནག་གིས། འཛམ་གླིང་རྒྱལ་ཁབ་གང་ཞིག་ཨོ་རྩལ་འགྲན་ཚོགས་ལ་ཞུགས་རྒྱུ་མིན་ཚེ། རྒྱ་ནག་གིས་རྒྱལ་ཁབ་དེ་དག་ལ་དཔལ་འབྱོར་གྱི་ཉེས་ཆད་གཅོད་རྒྱུའི་ཉེན་བརྡ་བཏང་བ་མ་ཟད། ཟླ་འདིའི་ཕྱི་ཚེས་ ༢༧ ཉིན་ཨ་རིའི་གཞུང་འབྲེལ་མི་སྣ་ ༡༨ རྒྱ་ནག་གི་ཨོ་རྩལ་འགྲན་ཚོགས་སྟེང་ཞུགས་རྒྱུ་ཡིན་པའི་ཐོངས་མཆན་ཞུས་ཡོད་སྐོར་བརྗོད་ཡོད་ལ། ཨ་རིའི་ཕྱོགས་ནས་དེ་འབྲེལ་གནས་ཚུལ་གྱི་ཐད་གཞུང་འབྲེལ་ལན་འདེབས་གང་ཡང་གནང་མེད་པ་རེད།
གསར་འགོད་པ། སྐལ་བཟང་སྦྱིན་པ།
