དྲུག་བཞིའི་དོན་རྐྱེན་རྗེས་དྲན་གོ་སྒྲིག་མཁན་ཞིག་ལ་ཁྲིམས་ཐག་བཅད་འདུག

དེ་རིང་ཧོང་ཀོང་སྲིད་གཞུང་གིས་རྒྱལ་ཁབ་བདེ་འཇགས་ཀྱི་ཁྲིམས་གསར་ལག་བསྟར་འོག ཧོང་ཀོང་གི་ཆེས་མཐའ་མའི་དམངས་གཙོ་གསར་ཁང་སྒོ་བརྒྱབ་ཡོད་པ་དང་དྲུག་བཞིའི་དོན་རྐྱེན་རྗེས་དྲན་གྱི་གོ་སྒྲིག་པ་ཞིག་ལ་བཙོན་འཇུག་ཁྲིམས་ཐག་བཅད་འདུག

དེ་རིང་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཧོང་ཀོང་ནང་གནམ་བདེ་སྒོ་མོ་ཆེའི་དྲུག་བཞིའི་རྗེས་དྲན་གྱི་གོ་སྒྲིག་པ་དང་ད་ལྟ་སྒོ་བརྒྱབ་ཟིན་པའི་ཧོང་ཀོང་མནའ་འབྲེལ་ཚོགས་པའི་འགན་འཛིན་གཞོན་པ་ཁྲོ་ཧང་ཐུང་ (Chow Hang Tung) ལགས་ཀྱིས། འདས་ལོའི་ཕྱི་ཟླ་ ༦ ཚེས་ ༤ ཉིན་དྲུག་བཞིའི་དོན་རྐྱེན་གྱི་རྗེས་དྲན་འདུ་འཛོམས་དང་གོ་སྒྲིག་གནང་བར་བརྟེན། རྒྱལ་ཁབ་བདེ་འཇགས་ཀྱི་ཁྲིམས་དང་འགལ་བའི་ཉེས་མིང་འོག ལོ་གཅིག་དང་ཟླ་ ༣ རིང་བཙོན་འཇུག་ཁྲིམས་ཐག་བཅད་ཡོད་པ་དང་། དེ་སྔ་ཁོ་མོས་མར་མེ་ཁྲོམ་སྐོར་ནང་མཉམ་ཞུགས་བྱས་པའི་ཉེས་མིང་འོག་ཟླ་ ༡༠ རིང་བཙོན་འཇུག་ཁྲིམས་ཐག་བཅད་ཡོད་སྟབས། ད་ལྟ་ཁྲོ་ཧང་ཐུང་གིས་ཁྱོན་ཟླ་ ༢༢ ཙམ་གྱི་བཙོན་འཇུག་ཁྲིམས་ཆད་འཁུར་དགོས་ཀྱི་ཡོད་འདུག

དེ་འབྲེལ་ཧོང་ཀོང་རང་དབང་གསར་ཁང་གི་གནས་ཚུལ་ནང་། ཧོང་ཀོང་སྲིད་གཞུང་གིས། ཕྱི་ལོ་ ༢༠༢༠ ལོར་ཧོང་ཀོང་གི་ཝིག་ཊོ་རི་ཡ་སྤྱི་གླིང་དུ་གནམ་བདེ་སྒོ་མོ་ཆེའི་དྲུག་བཞི་དམར་གསོད་དོན་རྐྱེན་རྗེས་དྲན་གྱི་ཚོགས་འདུ་དེ་ཉིད་འཚོགས་མི་ཆོག་པའི་བཀའ་ཁྱབ་བཏང་ཡོད་ནའང་། ཁྲོ་ཧང་ཐུང་གིས་མི་མང་སྟོང་ཕྲག་བརྒལ་བ་འདུ་འཛོམས་བྱས་ཡོད་སྟབས། ཧོང་ཀོང་ཉེན་རྟོག་པས་དམངས་གཙོ་དོན་གཉེར་བའི་སྣེ་ཁྲིད་པ་རྣམས་ཀྱིས་ཤེས་བཞིན་དུ་ཆོག་མཆན་མེད་པའི་འདུ་འཛོམས་ནང་མི་མང་ཞུགས་རྒྱུར་སྐུལ་མ་བྱས་པ་དང་རང་ཉིད་དངོས་སུ་ཞུགས་པའི་ཉེས་མིང་འོག་འཛིན་བཟུང་བྱས་འདུག

ཁ་སང་ (West Kowloon Magistrates’ Courts) ཁྲིམས་ཁང་དུ། ཁྲིམས་དཔོན་ཨ་མེ་ཁྲན་ (Amy Chan) ཟེར་བས་ཆེས་མཐའ་མའི་འདྲི་རྩད་དྲིས་སྐབས། ཧོང་ཀོང་མནའ་འབྲེལ་ཚོགས་པའི་འགན་འཛིན་གཞོན་པ་ཁྲོ་ཧང་ཐུང་གིས། གནམ་བདེ་སྒོ་མོ་ཆེའི་དྲུག་བཞི་དམར་གསོད་དོན་རྐྱེན་གྱི་གནད་དོན་དེ་ཉིད་བདེན་པ་ཡིན་དང་ཆབ་སྲིད་ཀྱི་བསམ་ཚུལ་མ་རེད། ཕྱི་ཟླ་ ༦ ཚེས་ ༤ ཉིན་གྱི་དོན་རྐྱེན་ཁྲོད་འདས་གྲོངས་སུ་ཕྱིན་པའི་མི་རྣམས་ནི་གནོད་འཚེ་ཕོག་མཁན་དངོས་ཡིན་པ་དང་། ང་ལས་ལྷག་གིས་ཁོང་ཚོ་ཁྲིམས་ཁང་འདིའི་ནང་དགོས་ཀྱི་ཡོད་པ་རེད། ཅེས་བརྗོད་ཡོད་པ་མ་ཟད།  ད་དུང་ཁོ་མོས་ཧོང་ཀོང་མི་མང་གིས་དྲུག་བཞིའི་དམར་གསོད་དོན་རྐྱེན་དེ་ནམ་ཡང་བརྗེད་མི་ཉན་པའི་འབོད་སྐུལ་ཡང་བྱས་ཡོད་འདུག

གཞན་ཡང་། ཕྱི་ཚེས་ ༣ ཉིན་ཧོང་ཀོང་གི་དམངས་གཙོ་ལས་འགུལ་བ་ (Andy Li) དང་ཁྲིམས་རྩོད་པ་ (Chan Tsz-wah) གཉིས་ནས། རྒྱལ་ཁབ་བདེ་འཇགས་ཀྱི་ཁྲིམས་ལ་འགལ་ཡོད་པའི་ནག་ཉེས་ངོས་ལེན་བྱས་ཏེ། ཟླ་ལྔ་རེའི་བཙོན་འཇུག་ཁྲིམས་ཆད་དང་ཁྲིམས་གསར་དེ་ལག་བསྟར་འོག་གི་ཆེས་ཐོག་མའི་ཉེས་ཅན་པར་གྱུར་བ་ངོས་འཛིན་བྱེད་ཀྱི་འདུག་ལ། ཁོ་གཉིས་ཀྱིས་ཧོང་ཀོང་གི་ཀུ་ཤུ་ཉིན་རེའི་གསར་ཤོག་ (Apple Daily) གི་སྦྱིན་བདག་ཇི་མེ་ལའེ་དང་ལས་རོགས་ (Mark Simon)། དེ་བཞིན་ལས་འགུལ་བ་ (Finn Lau)  བཅས་ཀྱིས། ཕྱི་ལོ་ ༢༠༢༠ ཟླ་ ༧ ནས་འདས་ལོའི་ཕྱི་ཟླ་ ༢ ཚེས་ ༡༥ བར་རྒྱལ་སྤྱིའི་རང་བཞིན་གྱི་ལས་འགུལ་ཞིག་སྤེལ་ཏེ། ཧོང་ཀོང་དང་རྒྱ་ནག་ཐོག་ཕྱིའི་ཁྲིམས་ཆད་གཏོང་ཐབས་ཀྱི་འཆར་གཞི་སྒྲིག་མྱོང་ཡོད་པ་ངོས་ལེན་བྱས་ཡོད་འདུག

ཡང་དེ་རིང་ཕྱི་ཚེས་ ༤ ཉིན་ནས་ཧོང་ཀོང་ནང་གི་དམངས་གཙོའི་གསར་ཁང་ (Citizen News) སྒོ་བརྒྱབ་ཡོད་པ་དང་། གསར་ཁང་དེ་སྒོ་རྒྱག་དགོས་པའི་ཐད་གསར་འགོད་གསལ་བསྒྲགས་ཤིག་སྤེལ་བའི་སྟེང་འབྲེལ་ཡོད་ལས་བྱེད་ཅིག་གིས། ཧོང་ཀོང་ནང་གི་གསར་འགོད་རང་དབང་ཇེ་སྡུག་ཏུ་འགྲོ་མུས་ཡིན་པ་དང་གསར་ཁང་གི་ལས་བྱེད་ཀྱི་བདེ་འཇགས་ལ་ཉེན་ཁ་ཡོད་པའི་གནས་སྟངས་འོག་གསར་ཁང་སྒོ་རྒྱག་དགོས་སྐོར་བསྒྲགས་ཡོད་པ་རེད།འདས་ལོའི་ཕྱི་ཟླ་ ༡༢ ཚེས་ ༢༩ ཉིན་རྒྱལ་ཁབ་བདེ་འཇགས་ཀྱི་ཁྲིམས་འགལ་འོག ཧོང་ཀོང་གི་ཉེན་རྟོག་པ་ ༢༠༠ ལྷག་གིས་བཙན་གྱིས་གསར་ཁང་དེར་སྔོག་བཤེར་བྱས་པ་དང་བསྟུན། ཧོང་ཀོང་གི་མཚན་མཐུན་གཉེན་སྒྲིག་གི་ཐོབ་ཐང་བརྩོན་ལེན་པ་དང་གཞས་མ་ཌན་ནེ་སི་ཧོ་ (Denise Ho) ཡི་གཙོས་གསར་ཁང་གི་འབྲེལ་ཡོད་ལས་བྱེད་ ༧ འཛིན་བཟུང་བྱས་ཡོད་པ་རེད།

ཕྱི་ལོ་ ༡༩༩༧ ལོར་དབྱིན་གཞུང་གིས་རྒྱལ་ཁབ་གཅིག་ལ་ལམ་ལུགས་གཉིས་ཀྱི་སྲིད་ཇུས་འོག་ཧོང་ཀོང་རྒྱ་ནག་ལ་རྩིས་སྤྲོད་བྱས་ཡོད་པ་དང་། སྐབས་དེར་རྒྱ་ནག་གཞུང་གིས་ཧོང་ཀོང་གི་གཞི་རྩའི་ཁྲིམས་ཀྱི་དགོངས་དོན་ལྟར་ཧོང་ཀོང་ནང་སྨྲ་བརྗོད་རང་དབང་དང་འདུ་འཛོམས་རང་དབང་སོགས་ཁག་ཐེག་བྱས་ཡོད་པ་རེད། ཕྱི་ལོ་ ༢༠༡༩ ལོར་ཧོང་ཀོང་གཞུང་གིས་རྒྱ་ནག་སྐམ་ས་དང་མཉམ་དུ་ཉེས་ཅན་རྩིས་སྤྲོད་ཀྱི་ཁྲིམས་གཏན་འབེབ་བྱ་རྩིས་བྱས་པ་ལ་བརྟེན། དམངས་གཙོ་དོན་གཉེར་བས་སྣེ་ཁྲིད་པའི་གཞུང་རྒོལ་གྱི་ལས་འགུལ་ཤུགས་ཆེན་བྱུང་ཡོད་པ་དང་། ལས་འགུལ་ཁྲོད་དྲག་པོའི་དོན་རྐྱེན་ཡང་བྱུང་ཡོད་སྟབས། ཕྱི་ལོ་ ༢༠༢༠ ལོར་རྒྱ་ནག་གཞུང་གིས་ཧོང་ཀོང་གི་དམངས་གཙོ་དོན་གཉེར་བར་དམིགས་ཏེ་རྒྱལ་ཁབ་བདེ་འཇགས་ཀྱི་ཁྲིམས་ཞེས་པ་ཞིག་གཏན་འབེབ་བྱས་ཏེ། རྒྱལ་ཁབ་ཁ་བྲལ་དང་མགོ་རྟིང་སློག་པ། གྱེན་ལོག་གིས་མཚོན་པའི་བདེ་སྲུང་ལ་གནོད་པའི་བྱ་སྤྱོད་ཁག་བཀག་འགོག་བྱེད་པར་ཁ་གཡར་ཏེ་ཧོང་ཀོང་གི་ལས་འགུལ་བ་ཚོ་འཛིན་བཟུང་བྱེད་པ་དང་གྲོས་ཚོགས་འཐུས་མི་དམངས་གཙོ་དོན་གཉེར་ཕྱིར་ཐུག་གཏོང་བ་སོགས་བྱས་ཡོད་པ་རེད།

གསར་འགོད་པ། བསྟན་འཛིན་ཕུར་བུ།