གཞུང་ཆེན་བཀའ་པོད་ལྔ་དང་གསང་སྔགས་རྡོ་རྗེ་ཐེག་པའི་སྐབས་དང་པོའི་བགྲོ་གླེང་དབུ་འཛུགས་ཐོག ༧གོང་ས་རྒྱལ་བ་རིན་པོ་ཆེ་མཆོག་དབུ་བཞུགས་ཀྱིས་བཀའ་ཆོས་སྩལ་གནང་སོང་།
དེ་རིང་རྒྱལ་སྤྱིའི་དགེ་ལྡན་ནང་བསྟན་ལྷན་ཚོགས་ཀྱིས་ཇི་ལྟར་གསོལ་བ་བཏབ་པ་བཞིན་༧གོང་ས་རྒྱལ་བ་རིན་པོ་ཆེ་མཆོག་དབུ་བཞུགས་ཀྱི་ཐོག གདན་ས་ཁག་གི་དཔེ་ཁྲིད་དགེ་རྒན་རྣམས་ཀྱིས་དྲ་ལམ་ནས་གཞུང་ཆེན་བཀའ་པོད་ལྔ་དང་གསང་སྔགས་རྡོ་རྗེ་ཐེག་པ་བཅས་ཀྱི་སྐོར་ལ་ཉིན་གཉིས་ཀྱི་བགྲོ་གླེང་ཞིག་དབུ་འཛུགས་གནང་སོང་།
སྐབས་དེར་༧གོང་ས་རྒྱལ་བ་རིན་པོ་ཆེ་མཆོག་གིས། དེ་རིང་བགྲོ་གླེང་བྱ་རྒྱུ་དེ་ཡག་པོ་ཞེ་དྲགས་བྱུང་། ང་ཚོར་དེ་སྔ་མཁན་ཆེན་ཞི་བ་འཚོས་དབུ་ཚད་ཟུང་འཇུག་ཅིག་ལམ་སྟོན་གནང་བ་བཞིན། བོད་གངས་ཅན་ལྗོངས་སུ་གཞུང་པོ་ཏི་ལྔ་གལ་ཆེན་ཞེ་དྲགས་རེད་འདུག མཛོད་མདོ་གཉིས་གྲངས་འདྲེན་ཞིག་མ་གཏོགས་གནད་འགག་གལ་ཡོད་མ་རེད། ཕར་ཕྱིན་དང་དབུ་མ་གཉིས་པོ་ཞེ་དྲགས་གལ་ཆེན་རེད་འདུག དབུ་མ་འཇུག་པ་གཙོ་བོ་བྱས་ནས་རིགས་ཚོགས་དྲུག་བལྟ་རྒྱུ་ཡོད་པ་དང་། ཚད་མའི་གཞུང་ནས་དབུ་མ་དང་ཚད་མ་ཟུང་འཇུག་བལྟ་རྒྱུ་ཕྱག་སྲོལ་ཡག་པོ་ཞིག་ཡོད། ང་ཚོ་བཙན་བྱོལ་ལ་ཚུར་སླེབས་པའི་རྗེས་ནས། གཙོ་བོ་གདན་ས་གསུམ་དང་བཀྲིས་ལྷུན་པོས་གཞུང་ཆེན་སློབ་གཉེར་བྱ་རྒྱུའི་ཕྱག་སྲོལ་དེ་ཉམས་པ་མེད་པ་བྱས་ནས་ད་ལྟ་རྒྱུན་འཛིན་བསྡད་ཀྱི་ཡོད་རེད། དེ་བཞིན་དེ་སྔ་བོད་ལ་འབྲེལ་བ་ཁྱོན་ནས་མེད་པའི་ཚན་རིག་དང་སེམས་ཁམས་རིག་པའི་སྐོར་དེ་དག་སློབ་གཉེར་གྱི་ཤེས་རྒྱ་ཆེ་རུ་གཏོང་ཆེད། ཚན་རིག་སློབ་གཉེར་བྱས་སྡོད་ཀྱི་ཡོད་རེད། གདན་ས་གསུམ་གཙོ་བོ་གྱུར་བའི་གཞུང་ཆེན་སློབ་གཉེར་ཡོད་པའི་གདན་ས་ཁག་ཧ་ཅང་གལ་ཆེན་རེད། དེ་དང་ཆགས་ཅིག་ཐོས་དོན་སྒྲུབ་ནས་ཤེས་ཟེར་བ་རེད། ཐོས་པའི་དོན་དེ་རྒྱུད་སྟོབས་ལ་སྐྱེས་ནས་གཤིས་རྒྱུད་འགྱུར་བ་འགྲོ་དགོས་ཀྱི་རེད་ལ། དེ་བྱུང་བ་ཡིན་ན་ཐོས་བསམ་སྒོམ་པ་ཡ་མ་བྲལ་བ་ཞིག་ཡོང་གི་ཡོད་པ་རེད། གཞུང་ཆེན་བཀའ་པོད་ལྔ་གཙོ་བོ་གྱུར་བའི་རིགས་ཚོགས་དེ་དག་ལ་སློབ་སྦྱོང་བྱ་རྒྱུ་དཔེ་གལ་ཆེན་པོ་རེད། ང་རང་ལ་ཆ་བཞག་ན་དེ་སྔ་དཔེ་ཆ་ལྟ་དུས་སུ་འཕྲལ་ཙམ་གྱིས་བལྟས་པ་ལས་གང་ཡང་ཡོད་མ་རེད། དེ་ནས་བར་སྐབས་དབུ་མ་འཇུག་པ་གཙོ་བོ་གྱུར་བའི་གཞུང་དེ་དག་རྒྱུན་མཁོའི་དཔེ་ཆའི་ནང་དུ་བཞག་པ་ཡིན། དབུ་མ་རིགས་ཚོགས་དྲུག་ལྟ་བུ་བསམ་བློ་གཏང་རྒྱུར་ཕན་ཐོགས་ཞེ་དྲགས་ཡོད་པ་ཞིག་རེད་འདུག་པས། གཞུང་ཆེན་དེ་དག་སེམས་ལ་འགྱུར་བ་གཏང་རྒྱུ་མ་གཏོགས་རྟགས་གསལ་གཏོང་རྒྱུ་གཅིག་པུ་མ་རེད། བྱས་ཙང་གཞུང་ཆེན་དེ་དག་སྦྱང་རྒྱུ་ཧ་ཅང་གལ་ཆེན་རེད། ཅེས་གསུངས་སོང་།
གདན་ས་ཁག་གི་དཔེ་ཁྲིད་དགེ་རྒན་རྣམས་ཀྱིས་དྲ་ལམ་ནས་གཞུང་ཆེན་བཀའ་པོད་ལྔ་དང་གསང་སྔགས་རྡོ་རྗེ་ཐེག་པ་བཅས་ཀྱི་སྐོར་གྱི་བགྲོ་གླེང་ཚོགས་ཐེངས་དང་པོར། སེར་སྨད་གྲྭ་ཚང་གི་དགེ་བཤེས་ཆོས་བཟང་སྤྲུལ་སྐུ་ལགས་ཀྱིས་ཚད་མའི་བརྗོད་བྱའི་སྙིང་དོན་གང་ཡིན་མིན་དང་། ཚད་མ་རྣམ་འདྲེན་གྱི་གལ་གནད་ཁག་ཅིག་གི་སྐོར་དང་། དགའ་ལྡན་ཤར་རྩེ་གྲྭ་ཚང་གི་དགེ་བཤེས་བྱམས་པ་འཕེལ་རྒྱས་ལགས་ཀྱིས་ཕར་ཕྱིན་སྟོད་ཆ་སྐབས་དང་པོ་བཞི་ཡི་བརྗོད་བྱའི་སྙིང་དོན་གང་ཡིན་དང་། གདམ་ངག་རྣམ་པ་བཅུ་ཡི་ཐེག་པ་ཆེན་པོའི་ལམ་གྱི་གནད་ཀུན་འདོད་ཚུལ་དང་། སྐབས་དེ་དག་གི་བརྗོད་བྱ་དཀའ་གནད་ཆེ་བ་ཁག་གི་སྐོར། ཚོགས་ཐེངས་གཉིས་པར་བློ་གསལ་གླིང་གྲྭ་ཚང་གི་དགེ་བཤེས་ངག་དབང་སྐལ་བཟང་ལགས་ཀྱིས་མངོན་པ་མཛོད་ཀྱི་སྐོར་དང་། རྒྱུད་མེད་དགེ་བཤེས་བསོད་ནམས་བློ་གྲོས་ལགས་ཀྱིས་གསང་སྔགས་རྡོ་རྗེ་ཐེག་པའི་སྐོར་ལ་གཏམ་བཤད་དང་དྲི་བར་ལན་འདེབས་སོགས་གནང་ནས་ཉིན་དང་པོ་བགྲོ་གླེང་དངོས་སུ་མཇུག་སྒྲིལ་གནང་སོང་།
སྐུ་སྒེར་དྲ་བའི་མཛད་འཆར་ལྟར་ན། ཟླ་འདིའི་ཕྱི་ཚེས ༡༥ ནས་ཉིན་གཉིས་རིང་དྲ་ལམ་ནས་ཁོར་ཡུག་རྒྱུན་གནས་ཆེད་དུ་ཚན་རིག་དང་ཆོས་ལུགས་སུ་ལག་ལེན་བསྟར་ཚུལ་ལ་ཁ་ཆེ་དང་ནང་པའི་ལྟ་ཚུལ་ཅི་ཡིན་སྐོར་གྱི་བགྲོ་གླེང་ཞིག་འཚོག་རྒྱུའི་དབུ་འབྱེད་མཛད་སྒོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་དང་བཀའ་སློབ་སྩལ་རྒྱུ་དང་། དེ་བཞིན་ཟླ་འདིའི་ཕྱི་ཚེས་ ༢༠ ཉིན་ ( by Be the Love, The Changemaker Studio and The New Humanitarian) ཞེས་པའི་ཚོགས་པ་གསུམ་གྱིས་ཇི་ལྟར་གསོལ་བ་བཏབ་པ་ལྟར། ༧གོང་ས་རྒྱལ་བ་རིན་པོ་ཆེ་མཆོག་གིས་དྲ་ལམ་ནས་ཨ་ཧྥི་རི་ཁ་དང་ཨེ་ཤ་ཡ། ཡུ་རོབ་བཅས་ནས་ཕེབས་པའི་ན་གཞོན་མགོ་ཁྲིད་རྣམས་དང་ལྷན་དུ་ང་ཚོ་བྱམས་དང་བརྩེ་བའི་གསར་བརྗེ་བ་ཡིན་ (Revolution of Love and Compassion) ཞེས་པའི་བརྗོད་གཞིའི་ཐོག་བཀའ་མོལ་གནང་རྒྱུ་དང་། གཞན་ཡང་ཟླ་འདིའི་ཕྱི་ཚེས་ ༢༥ ཉིན་རྒྱ་གར་འཕྲུལ་རིག་མཐོ་སློབ་ཁང་(Indian Institute of Technology) གིས་གསོལ་བ་བཏབ་པ་ལྟར། ༧གོང་ས་མཆོག་གིས་དཀའ་ངལ་ཅན་གྱི་དུས་སྐབས་སུ་བདེ་སྐྱིད་འཚོལ་ཐབས་ (Finding Happiness in Troubled Times) ཞེས་པའི་ཐོག་དྲ་ལམ་ནས་བཀའ་སློབ་སྩལ་གཏན་ཁེལ་ཡོད་འདུག
གསར་འགོད་པ། དཔལ་ལྡན།
རྒྱུད་མེད་མ་རེད། རྒྱུད་སྨད་རེད།