༧གོང་ས་མཆོག་གིས་རྒྱལ་སྤྱིའི་དགེ་ལྡན་ལྷན་ཚོགས་ཀྱི་བགྲོ་གླེང་སྟེང་། དཔེ་ཆ་དེའི་ནང་དེ་ཡོད་རེད་ཟེར་བ་ཙམ་གྱི་ངོ་མཚར་བྱ་རྒྱུ་དང་ཧ་ལས་རྒྱུ་གང་ཡང་མེད་པར། རང་རྒྱུད་ལ་སྦྱར་ནས་ལོ་རེར་བསམ་བློར་འགྱུར་བ་གང་འདྲ་འགྲོ་ཡི་ཡོད་མེད་ལྟ་རྒྱུ་གལ་ཆེན་ཡིན་སྐོར་གསུངས།
དེ་རིང་རྒྱལ་སྤྱིའི་དགེ་ལྡན་ནང་བསྟན་ལྷན་ཚོགས་ཀྱིས་ཇི་ལྟར་གསོལ་བ་བཏབ་པ་བཞིན་༧གོང་ས་རྒྱལ་བ་རིན་པོ་ཆེ་མཆོག་དབུ་བཞུགས་ཀྱི་ཐོག གདན་ས་ཁག་གི་དཔེ་ཁྲིད་དགེ་རྒན་རྣམས་ཀྱིས་དྲ་ལམ་ནས་གཞུང་ཆེན་བཀའ་པོད་ལྔ་དང་གསང་སྔགས་རྡོ་རྗེ་ཐེག་པ་བཅས་ཀྱི་སྐོར་གྱི་ཉིན་གཉིས་པའི་བགྲོ་གླེང་སྐབས་༧གོང་ས་མཆོག་གིས། ཕྱི་ལོ་ ༡༩༥༩ ལོར་ང་ཚོ་སྲན་མ་འཐོར་བ་བཞིན་འཐོར་ནས། མ་འོངས་པ་གང་འདྲ་ཞིག་ཆགས་ཀྱི་ཡོད་མེད་ཚོད་ཐིག་རྒྱུ་མེད་པ་ཞིག་དང་། ཐ་ན་ནོར་བུ་གླིང་ཁ་ནས་བྲོས་དུས། སྲོག་མགོ་ཐོན་དང་མ་ཐོན་གྱི་ཐོག་ནས་ཡོང་བ་ཞིག་རེད། ཡིན་ནའང་། བོད་པར་ཆོས་རྒྱལ་སྲོང་བཙན་སྒམ་པོའི་དུས་ནས་སྐད་དང་བོད་ཡིག་བཟོས་ཡོད་པ་རེད། དེ་ནི་དངོས་གནས་བསམ་བློ་རྒྱ་ཆེན་པོ་དང་སྙིང་སྟོབས་ཆེན་པོ་རེད་འདུག ཆོས་རྒྱལ་སྲོང་བཙན་སྒམ་པོའི་དུས་སུ་རྒྱ་བཟའ་དང་མཐུན་མོང་མ་ཡིན་པའི་འབྲེལ་བ་ཡོད་ཀྱང་། ཁོང་ལ་མི་རིགས་ཀྱི་ལྟ་བ་ཤུགས་ཆེན་པོ་ཡོད་པས། བོད་པ་རང་ལ་ཆོས་རྒྱལ་སྲོང་བཙན་སྒམ་པོའི་དུས་སུ་བོད་ཡིག་སྲོལ་གཏོད་ཡོད་པར་བརྟེན། མཁན་ཆེན་ཞི་བ་འཚོ་བོད་དུ་ཕེབས་སྐབས། ཁྱེད་རང་ཚོར་བོད་ཡིག་ཅིག་ཟུར་དུ་འདུག དེར་བརྟེན། རྒྱ་སྐད་དང་ལེགས་སྦྱར་སོགས་ལ་བསླབ་དགོས་པ་མ་རེད། དེ་ལས་ལེགས་སྦྱར་དང་པ་ལིའི་གཞུང་སོགས་བོད་ཡིག་ཏུ་བསྒྱུར་ན་འགྲིག་གི་རེད་གསུངས་པ་རེད། བདེན་པ་ཡིན་མིན་མི་ཤེས་ཀྱང་། མཁན་ཆེན་ཞི་བ་འཚོ་ཁོང་ཉིད་ཀྱིས་ཀྱང་བོད་ཡིག་བསླབ་པར་ཐུགས་སྣང་གནང་བ་རེད་ཟེར་བ་ཞིག་གོ་རྒྱུ་འདུག རིམ་པས་སྐད་ཡིག་གཞན་སུ་གང་ལ་རེ་མི་དགོས་པར་ང་ཚོའི་བོད་ཡིག་ཐོག་ཏུ་བཀའ་འགྱུར་པོད་ ༡༠༠ དང་བསྟན་འགྱུར་པོད་ ༢༠༠ བལྟ་རྒྱུ་ཡོད་། དེང་སང་ནང་པ་སངས་རྒྱས་པའི་ཆོས་སྤྱི་དང་ལྷག་པར་དུ་དཔལ་ནལེཎྜའི་དབུ་ཚད་ཟུང་འཇུག་གི་གཞུང་དེ་དག་སློབ་ཁྲིད་བྱ་རྒྱུར་བོད་སྐད་དང་བོད་ཡིག་ཡག་ཤོས་ཤིག་ཆགས་བསྡད་ཡོད་པ་རེད། དེ་ངོས་རང་ནས་མིག་མཐོང་ལག་ཟིན་ཡིན། དཔེར་ན། རྩ་བ་ཤེས་རབ་ལྟ་བུ་བོད་ཡིག་ནང་དུ་མ་བསྒྱུར་གོང་དུ་རྒྱ་ཡིག་ཏུ་བསྒྱུར་ཟིན་ཡོད་ཀྱང་། དེ་འགྲེལ་བཤད་བརྒྱག་ཐུབ་མཁན་ཞིག་མེད་པ་རེད། ང་རང་ཚོ་བོད་ལ་བཀའ་འགྱུར་དང་བསྟན་འགྱུར་སུམ་བརྒྱ་ཞིག་ཡོད་པ་དེ་དག སློབ་གཉེར་བ་ཚོས་རྩ་བ་བློ་ལ་བཟུང་ནས། རྒྱ་འགྲེལ་དང་བོད་འགྲེལ་སོགས་ལ་བསྡུར་ནས་ལྟ་རྒྱུ་ཞིག་ཡོད་པ་དེ་ཞེ་དྲགས་ཡག་པོ་རེད་འདུག སྔོན་མ་ངོས་རང་ཆུང་ཆུང་སྐབས། མངོན་རྟོགས་རྒྱན་དང་དབུ་མ་འཇུག་པ་བློར་བཟུང་ནས་ཡོངས་འཛིན་རིན་པོ་ཆེ་ཞོགས་པ་དང་དགོང་མོ་ཆུ་ཚོད་གཅིག་རེར་ཕེབས་དུས། དབུ་མ་འཇུག་པ་དང་མངོན་རྟོགས་རྒྱན་རེས་མོས་བྱས་ནས་བསྐྱོར་གྱི་ཡོད། གང་ལྟར་ང་ཚོ་བོད་པ་ལ་ཆུང་ཆུང་སྐབས་ནས་གཞུང་དེ་དག་བློ་ལ་བཟུང་སྟེ་འགྲེལ་བ་དེ་དག་སོ་སོས་ལྟ་ཀློག་བྱེད་ཀྱི་ཡོད་པ་རེད། ཅེས་གསུངས་སོང་།
ཡང་༧རྒྱལ་བ་རིན་པོ་ཆེ་མཆོག་གིས། ང་ཚོའི་བོད་ལ་གཞུང་དེ་དག་རྩ་འགྲེལ་བྱ་རྒྱུ་དེ་སྤུས་དག་པོ་རེད་འདུག བོད་སྐད་དུ་མིང་ཚིག་འབེལ་པོ་ཡོད་པ་རེད། དེང་སང་ཕྱི་རྒྱལ་ངོ་ཤེས་ཚོར་ནང་ཆོས་དང་ལྷག་པར་དབུ་ཚད་ཀྱི་རིག་གཞུང་སྐོར་ལ་ལབ་དུས། བོད་སྐད་ཁོ་ན་མ་གཏོགས། ལེགས་སྦྱར་སྐད་དེ་ནུབ་ཚར་བ་རེད། རྒྱ་ཡིག་རྒྱ་སྐད་དེ་འདྲ་ཡར་རྒྱས་ཕྱིན་མེད་པ་དང་། དེང་སང་ནུབ་ཕྱོགས་ཀྱི་སྐད་དེར་དོ་སྣང་གསར་པ་སླེབས་ཡོད། བྱས་ཙང་ང་ཚོའི་བོད་པའི་སྐད་ཡིག་དེ་འཛམ་གླིང་དེའི་ཐོག་ལ་ནང་པ་སངས་རྒྱས་པའི་ལྟ་སྒྲུབ་དང་སྐད་ཡག་ཤོས་དེ་ཆགས་ཀྱི་འདུག དེ་སྔ་ང་རང་ཚོའི་ཆོས་རྒྱལ་དང་ལོ་ཙཱ་བ། འཕགས་བོད་ཀྱི་མཁས་པ་མང་པོས་རྩ་བ་བློ་ལ་བཟུང་ནས། སོ་སོས་འགྲེལ་བ་གསར་པ་བརྩམས་པ་དེ་བཀའ་དྲིན་ཆེན་པོ་རེད། བྱས་ཙང་དེ་དག་གི་བཀྲིན་བསམ་ཡོང་དུས་ང་ཚོས་དེ་དག་གི་བཀྲིན་མཇལ་ཨེ་ཐུབ་མི་ཐུབ་བལྟ་རྒྱུ་དེ་དཔེ་གལ་ཆེན་པོ་རེད། ཅེས་གསུངས་སོང་།
ཡང་མགོན་པོ་གང་ཉིད་མཆོག་གིས། ཆོས་གྲོགས་ཚོས་ཤེས་པ་རྐྱང་རྐྱང་མ་ཡིན་པར། ལོ་གཅིག་གི་ནང་དུ་གཏན་གཏན་སྟོང་ཉིད་ཀྱི་ལྟ་བ་དང་བྱང་ཆུབ་ཀྱི་སེམས་དེ་དག་ཡར་རྒྱས་འགྲོ་ཐུབ་རྒྱུར་ཐབས་ཤེས་ཤིག་གནང་ཐུབ་ན། སྔོན་བྱོན་ཀླུ་སྒྲུབ་ཡབ་སྲས་ཀྱིས་མཚོན་པའི་མཁས་པའི་དབང་པོ་དེ་དག་གི་གཞུང་བརྩམས་པའི་དགོངས་དོན་ཚང་བ་རེད་ལ། བོད་གངས་ཅན་གྱི་ལྗོངས་སུ་གཞུང་ལུགས་དེ་དག་གི་འགྲེལ་བ་དང་ཡང་འགྲེལ་མང་པོ་ཞིག་ཡོད་པ་དེ་དག་གི་དགོས་དོན་ཚང་བ་རེད་མ་གཏོགས། དཔེ་ཆ་དེའི་ནང་དེ་ཡོད་རེད། དེའི་ནང་ཡོད་རེད་ཟེར་བ་ཙམ་གྱི་ངོ་མཚར་བྱ་རྒྱུ་དང་ཧ་ལས་རྒྱུ་གང་ཡང་མེད་པ་རེད། བྱས་ཙང་ཁྱེད་རང་ཚོས་སོ་སོའི་རྒྱུད་ཐོག་ལ་སྦྱར་ནས། ལོ་རེར་བསམ་བློ་བཏང་ན་འགྱུར་བ་གང་འདྲ་འགྲོ་ཡི་འདུག་མིན་ཞིག་ཞུས་འདོད་བྱུང་། དེ་ཡང་ངོས་ནས་ཚིག་སྐམ་པོ་དང་ཧམ་པ་བྱས་ནས་བཤད་པ་ཞིག་མ་རེད། ངོས་རང་ཡང་ཉིན་རེ་བཞིན་དེར་བསམ་བློ་གཏོང་གི་ཡོད། དེས་འགྱུར་བ་ཏན་ཏན་འགྲོ་ཡི་འདུག ཅེས་གསུངས་སོང་།
གསར་འགོད་པ། དཔལ་ལྡན།
དག་ཆར་གཟབ་དགོས་གལ།
༡) བཀྲིན་༼འཇལ་༽བ།
༢) ཆོས་གྲོགས་ཚོས་༼བཤད་པ་༽རྐྱང་རྐྱང་མིན་པ
༣) ༼ཞུ་༽འདོད་བྱུང་།