ཡུ་རོབ་གྲོས་ཚོགས་ཀྱི་ཚོགས་གཙོ་སྐུ་ཞབས་ཌེ་ཝི་ཌི་ལགས་སུ་གློ་བའི་གཉན་ཚད་ཀྱི་ནད་གཞི་བྱུང་སྟེ། དེ་རིང་ཡུ་རོབ་རྒྱལ་ཁབ་ཨི་ཊ་ལིའི་ནང་དགུང་གྲངས་ ༦༥ སྟེང་འདས་གྲོངས་སུ་ཕྱིན་ཡོད་འདུག
བྷི་བྷི་སི་གསར་ཁང་གིས་གནས་ཚུལ་སྤེལ་བ་ལྟར་ན། ཡུ་རོབ་མཉམ་འབྲེལ་མཐུན་ཚོགས་ཀྱི་གྲོས་ཚོགས་ཀྱི་ཚོགས་གཙོ་སྐུ་ཞབས་ཌེ་ཝི་ཌི་སཱ་སོ་ལེ་ (David Sassoli) ལགས་སུ་ཉེ་བའི་བདུན་ཕྲག་གཉིས་ཙམ་རིང་གློ་བའི་གཉན་ཚད་ཀྱི་ནད་གཞི་བྱུང་སྟེ། ཨི་ཊ་ལིའི་གྲོང་ཚོ་ཨ་ཝེ་ནོ་ (Aviano) ནང་གི་སྨན་ཁང་ཞིག་ཏུ་དེ་རིང་ས་གནས་ཀྱི་སྔ་དྲོ་ཆུ་ཚོད་ ༡།༡༥ སྟེང་འདས་གྲོངས་སུ་ཕྱིན་ཡོད་པ་དང་། སྐུ་ཞབས་ཌེ་ཝི་ཌི་ལགས་ནི་ད་ལྟ་དགུང་ལོ་ ༦༥ ཡིན་པ་རེད།
དེ་འབྲེལ་ཡུ་རོབ་མཐུན་ཚོགས་ཀྱི་གྲོས་ཚོགས་ཚོགས་གཙོ་ཌེ་ཝི་ཌི་ལགས་ཀྱི་མགྲིན་ཚབ་པ་རོ་བྷར་ཊི་ (Robert Cuillo) ལགས་ཀྱིས་སྒེར་གྱི་ཊུ་ཝི་ཊར་སྟེང་། དེ་རིང་སྔ་དྲོའི་ཆུ་ཚོད་ ༡།༡༥ ཙམ་ལ་ཨི་ཊ་ལིའི་གྲོང་སྡེ་ (Aviano) ལ་རྟེན་གཞི་བྱས་ཡོད་པའི་སྨན་ཁང་ཞིག་ཡུ་རོབ་གྲོས་ཚོགས་ཀྱི་ཚོགས་གཙོ་ཌེ་ཝི་ཌི་སཱ་སོ་ལེ་ལགས་འདས་གྲོངས་སུ་ཕྱིན་སོང་། འདས་མཆོད་ཀྱི་དུས་ཚོད་དང་ས་ཚིགས་སོགས་ཆུ་ཚོད་འགའི་རྗེས་གྲོས་བསྡུར་བྱ་རྒྱུ་ཡིན། ཞེས་བརྗོད་ཡོད་པ་དང་། ཡུ་རོབ་གྲོས་ཚོགས་ཀྱི་ཚོགས་གཙོ་ཁོང་འདས་གྲོངས་སུ་ཕྱིན་པར་ཡུ་རོབ་མཐུན་ཚོགས་ཀྱི་ཚོགས་མི་རྒྱལ་ཁབ་ཁག་གི་གནད་ཡོད་མི་སྣ་སོགས་ཀྱིས་གདུང་སེམས་མཉམ་སྐྱེད་དང་མྱ་ངན་ཞུ་ཡི་ཡོད་པ་རེད།
ཡུ་རོབ་མཉམ་འབྲེལ་མཐུན་ཚོགས་ཀྱི་འཛིན་སྐྱོང་ལྷན་ཁང་གི་སྲིད་འཛིན་ཆཱར་ལེ་སི་ (Charles Michel) ལགས་ཀྱིས། སྐུ་ཞབས་དམ་པ་ཁོང་ནི་ཡུ་རོབ་ལ་ཧ་ཅང་བརྩེ་བ་དང་ལྷག་བསམ་ཟོལ་མེད་ཀྱི་མི་ཞིག་ཡིན་སྐོར་འགྲེལ་བརྗོད་དང་སྦྲགས། ང་ཚོས་ད་ལྟ་ནས་སྐུ་ཞབས་ཌེ་ཝི་ཌི་ལགས་ཀྱི་གཤིས་རྒྱུད་འཇམ་པོ་དང་གཏོང་ཕོད། དེ་བཞིན་གྲོགས་པོའི་མཛའ་བརྩེ་དང་འཛུམ་མདང་བཅས་དྲན་གྱི་ཡོད། ཅེས་བརྗོད་ཡོད་པ་དང་། ཡུ་རོབ་མཐུན་ཚོགས་ཀྱི་གྲོས་ཚོགས་འཐུས་མི་ (Ismail Ertug) ལགས་ཀྱིས་སྒེར་གྱི་ཊུ་ཝི་ཊར་སྟེང་། དམ་པ་ཁོང་འདས་གྲོངས་སུ་ཕྱིན་པར་ཤུལ་ལུས་ནང་མི་ཡོངས་ལ་སེམས་གསོ་དང་། ཁོང་འདས་གྲོངས་སུ་ཕྱིན་པ་ནི་ཧང་སང་དགོས་པ་དང་གྱོང་གུད་ཆེན་པོ་ཕོག་ཡོད་པ་རེད། ཅེས་བཀོད་ཡོད་འདུག་ལ། ཡུ་རོབ་མཐུན་ཚོགས་ཀྱི་གྲོས་ཚོགས་འཐུས་མི་ (Paola Borchia) ལགས་ཀྱིས་ཀྱང་དམ་པ་ཁོང་འདས་གྲོངས་སུ་ཕྱིན་པར་ཁོང་གི་ཤུལ་ལུས་ནང་མི་རྣམས་ལ་ཐུགས་གསོ་གནང་བ་དང་། གནས་ཚུལ་འདི་ཐོན་པར་ཧང་སང་ཡོད་སྐོར་བརྗོད་འདུག
གཞན་ཡང་། འདས་ལོའི་ཕྱི་ཟླ་ ༩ ནང་ཡུ་རོབ་གྲོས་ཚོགས་ཀྱི་ཚོགས་གཙོ་སྐུ་ཞབས་ཌེ་ཝི་ཌི་ལགས་གློ་བའི་གཉན་ཚད་ཀྱི་ཛ་དྲག་གི་གནས་སྟངས་འོག ཡུ་རོབ་རྒྱལ་ཁབ་ཧྥ་རན་སིའི་ཤར་ཕྱོགས་ཀྱི་གྲོང་ཁྱེར་སི་ཊར་སི་བྷག་ (Strasbourg) ཏུ་རྟེན་གཞི་བྱས་པའི་སྨན་ཁང་ཞིག་ཏུ་སྨན་བཅོས་བྱས་ཏེ། འདས་ལོའི་ཕྱི་ཟླ་ ༡༡ ནང་ཆབ་སྲིད་ཀྱི་ལས་འགན་མུ་མཐུད་དུ་བླངས་ཡོད་ཀྱང་། ཡུན་རིང་མ་འགོར་བར་སླར་ཡང་ནད་པ་ཆགས་ཏེ། ཧྥ་རན་སིའི་ཤར་ཕྱོགས་ཀྱི་གྲོང་ཁྱེར་སི་ཊར་སི་བྷག་ (Strasbourg) ཏུ་རྟེན་གཞི་བྱས་པའི་ཡུ་རོབ་གྲོས་ཚོགས་ནང་མཉམ་ཞུགས་གནང་ཐུབ་མེད་པ་རེད།
རོའུ་ཊར་གསར་ཁང་གི་གནས་ཚུལ་ལྟར་ན། ཟླ་འདིའི་ནང་སྐུ་ཞབས་ཌེ་ཝི་ཌི་ལགས་ཀྱི་ཚོགས་གཙོའི་ལས་ཡུན་རྫོགས་ཀྱི་ཡོད་པ་དང་། ཁོང་རང་སླར་ཡང་ཚོགས་གཙོའི་འོས་བསྡུའི་ནང་ཞུགས་རྒྱུ་མིན་པ་རེད། སྐུ་ཞབས་ཌེ་ཝི་ཌི་སཱ་སོ་ལེ་ (David Sassoli) ནི་ཕྱི་ལོ་ ༡༩༥༦ ཟླ་ ༥ ཚེས་ ༣༠ ཉིན་ཨི་ཊ་ལིའི་གྲོང་ཁྱེར་ཕོ་ལོ་རེན་སི་ (Florence) ནང་སྐྱེས་ཤིང་། ཁོང་གིས་རོམ་གཙུག་ལག་སློབ་གྲྭ་ཆེན་མོའི་ (University of Rome) ནང་ཆབ་སྲིད་ཚན་རིག་སྐོར་སློབ་སྦྱོང་བྱས་རྗེས། ལོ་ངོ་སུམ་ཅུའི་རིང་གསར་འགོད་པའི་ཕྱག་ལས་གནང་མྱོང་བ་དང་། དེ་ནས་ཕྱི་ལོ་ ༢༠༠༩ ལོར་ཡུ་རོབ་མཐུན་ཚོགས་ཀྱི་གྲོས་ཚོགས་འཐུས་མི་ཆགས་ཡོད་པ་རེད། ཕྱི་ལོ་ ༢༠༡༩ ཟླ་ ༧ ཚེས་ ༣ ནས་ཡུ་རོབ་མཐུན་ཚོགས་ཀྱི་ཚོགས་གཙོ་ཡང་གནང་མྱོང་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
