ལི་ཀྲན་ཅོའུ་ཟེར་བའི་རྒྱ་རིགས་བུད་མེད་ཅིག་གིས་དབྱིན་ཇིའི་གྲོས་ཚོགས་འཐུས་མི་དང་སྲིད་དོན་ཚོགས་པ། དེ་བཞིན་མི་སྒེར་གནད་ཡོད་མི་སྣ་སོགས་ལ་རོགས་དངུལ་སྤྲད་དེ། དབྱིན་ཇིའི་ཆབ་སྲིད་ནང་རྒྱ་ནག་གི་ཤུགས་རྐྱེན་སྤྲོད་ཐབས་བྱེད་ཀྱི་ཡོད་འདུག
བྷི་བྷི་སི་གསར་ཁང་གིས་གནས་ཚུལ་སྤེལ་བ་ལྟར་ན། ཁ་སང་དབྱིན་ཡུལ་གྱི་རྒྱལ་སྲུང་ལྷན་ཁང་གི་དམག་མིའི་གསང་དོན་ཉུལ་ཞིབ་ (MI5) ཁང་གིས། རྒྱ་རིགས་བུད་མེད་ཁུ་རེ་སི་ཊིན་ཀྲིན་ཀོ་ལི་ (Christine Ching Kui Lee) ཟེར་བ་ཞིག་གིས། དབྱིན་ཇིའི་གྲོས་ཚོགས་ཀྱི་འཐུས་མི་རྣམས་གཙོ་བྱས་པའི་གསར་དུ་གྲོས་ཚོགས་འཐུས་མིར་ལང་མཁན་དང་ཆབ་སྲིད་ཚོགས་པ་དང་མི་སྒེར་སོགས་དབྱིན་ཇིའི་གནད་ཡོད་མི་སྣ་ཁག་དང་འབྲེལ་འདྲིས་ཀྱིས། དབྱིན་ཇིའི་ཆབ་སྲིད་ནང་ཐེ་ཇུས་བྱེད་ཀྱིན་ཡོད་པའི་སྐོར་དབྱིན་ཇིའི་གྲོས་ཚོགས་ལ་ཉེན་བརྡ་དང་སྦྲགས་ནས་འགྲེལ་བརྗོད་བྱས་ཡོད་འདུག
རྒྱ་རིགས་བུད་མེད་ཁུ་རེ་སི་ཊིན་ཀྲིན་ཀོ་ལི་ཟེར་བ་དེའི་མིང་དངོས་ལ་ལི་ཀྲན་ཅོའུ་ (Li Zhenju) ཟེར་གྱི་ཡོད་པ་དང་། ཁོ་མོས་དབྱིན་ཡུལ་ནང་ཁྲིམས་རྩོད་པའི་ལས་ཁུངས་ཤིག་གཉེར་བ་བརྒྱུད། རྒྱ་ནག་དང་ཧོང་ཀོང་ནས་རོགས་དངུལ་བླངས་ཏེ། ཕྱི་ལོ་ ༢༠༡༣ ཙམ་ནས་དབྱིན་ཇིའི་གྲོས་ཚོགས་འཐུས་མི་གཉིས་ལ་ཨ་སྒོར་འབུམ་ ༦ མ་ཟིན་ཙམ་གྱི་ཞལ་འདེབས་བརྒྱབ་ཡོད་པ་དང་། ད་ལན་གྱི་གྲུབ་དོན་དེ་ནི་དབྱིན་ཇིའི་གསང་བའི་ལས་ཁུངས་ཀྱིས་ཡུན་རིང་ཉུལ་ཞིབ་བྱས་པ་བརྒྱུད་ཤེས་རྟོགས་བྱུང་བ་ཞིག་ཡིན་འདུག
དེ་འབྲེལ་བྷི་བྷི་སིའི་གནས་ཚུལ་ནང་། ངལ་རྩོལ་སྲིད་དོན་ཚོགས་པའི་གྲོས་ཚོགས་འཐུས་མི་བྷའེ་རེ་གྷ་ཌི་ནར་ (Barry Gardiner) ལགས་ཀྱིས། ཕྱི་ལོ་ ༢༠༡༤ ལོ་ནས་རྒྱ་ནག་དམར་ཤོག་ཚོགས་པའི་གསང་ཉུལ་བའི་དོགས་གཞི་ཅན་གྱི་བུད་མེད་ལི་ཀྲན་ཅོའུ་ཡི་ལག་ནས་པོན་ཌི་ཁྱོན་ ༤༢༠༠༠༠ ལྷག་གི་ཞལ་འདེབས་བླངས་ཡོད་པ་དང་། ཕྱི་ལོ་ ༢༠༡༣ ལོར་གུ་ཡངས་མང་གཙོ་ཚོགས་པའི་མགོ་ཁྲིད་ཌའེ་ཝི་ (Sir Ed Davey) ལགས་ཀྱིས་པོན་ཌི་ ༥༠༠༠ ཡི་ཞལ་འདེབས་བླངས་ཡོད་པ་མ་ཟད། ལི་ཀྲན་ཅོའུ་ཡི་བུ་ཡིས། གྲོས་ཚོགས་འཐུས་མི་བྷའེ་རེ་གྷ་ཌི་ནར་ལགས་ཀྱི་འོག་ནས་བྱ་བ་སྒྲུབ་ཀྱི་ཡོད་ཀྱང་། ཁ་སང་ཕྱི་ཚེས་ ༡༤ ཉིན་ཁོས་ལས་གནས་ནས་དགོངས་པ་ཞུས་ཡོད་སྐོར་སོགས་བརྗོད་འདུག
དབྱིན་ཇིའི་ནང་སྲིད་ལྷན་ཁང་གི་དྲུང་ཆེ་ལྕམ་པིར་ཏི་པ་ཊལ (Priti Patel) ལགས་ཀྱིས། མི་ཞིག་གིས་བསམ་བཞིན་དུ་རྒྱ་ནག་དམར་ཤོག་ཚོགས་པའི་ཚབ་བྱས་ནས། ང་ཚོའི་གྲོས་ཚོགས་ཀྱི་ཆབ་སྲིད་ཐོག་ཐེ་ཇུས་བྱེད་བཞིན་པར། ཧ་ཅང་བློ་འཚབ་ཆེན་པོ་སྐྱེས་བྱུང་། ཞེས་བརྗོད་ཡོད་པ་དང་། དབྱིན་ཇིའི་གསང་བའི་ལས་ཁུངས་ཀྱིས། དོགས་གཞི་ཅན་གྱི་རྒྱ་རིགས་ལི་ཀྲན་ཅོའུ་དང་འབྲེལ་འདྲིས་བྱུང་བའི་དབྱིན་ཇིའི་གྲོས་ཚོགས་འཐུས་མི་དང་གཞན་ཚང་མས་དོགས་གཟབ་བྱ་དགོས་པའི་ཉེན་བརྡའང་བཏང་ཡོད་པ་རེད།
དེ་བཞིན་ངལ་རྩོལ་ཆབ་སྲིད་ཚོགས་པའི་དྲུང་ཆེ་ཁའོ་པར (Yvette Cooper) ལགས་ཀྱིས། རྒྱ་ནག་གཞུང་གིས་དབྱིན་ཡུལ་གྱི་དམངས་གཙོའི་ལམ་ལུགས་ལ་ཐེ་ཇུས་བྱེད་ཀྱིན་ཡོད་པར་ང་ཚོས་སྐྱོན་དྲག་པོ་བྱེད་ཀྱི་ཡོད། ཅེས་བརྗོད་ཡོད་པ་དང་། ད་ལྟའི་ཆར་དབྱིན་ཡུལ་གྱི་རྒྱལ་སྲུང་ལྷན་ཁང་གི་དམག་མིའི་གསང་དོན་ཉུལ་ཞིབ་ཁང་གིས། གནད་དོན་དེ་ལ་ཞིབ་འཇུག་བྱེད་མུས་ཡིན་པ་དང་འབྲེལ། དབྱིན་ཡུལ་གྱི་རྒྱལ་སྲིད་བདེ་འཇགས་དང་འབྲེལ་ནས། དེ་སྔ་ཨུ་རུ་སུ་ནི་དབྱིན་ཡུལ་གྱི་སེམས་འཚབ་སྐྱེས་ཡུལ་ཞིག་ཆགས་ཀྱི་ཡོད་ཀྱང་། ད་ལྟ་རྒྱ་ནག་དམར་ཤོག་ཚོགས་པ་དབྱིན་ཡུལ་གཞུང་གི་སེམས་འཚབ་སྐྱེས་ཡུལ་ཐོག་མ་དེ་ཆགས་ཡོད་སྐོར་བརྗོད་འདུག
ད་སྔ་བར་ལི་ཀྲན་ཅོའུ་དང་འབྲེལ་འདྲིས་བྱུང་བའི་དབྱིན་ཇིའི་གྲོས་ཚོགས་འཐུས་མི་དེ་དག་ལ་ཆབ་སྲིད་དང་ཁྲིམས་འགལ་གྱི་ནག་ཉེས་གང་ཡང་མེད་པ་ར་སྤྲོད་བྱུང་ཡོད་ཀྱང་། ལི་ཀྲན་ཅོའུ་ཟེར་བའི་རྒྱ་རིགས་དེས། ཁོ་མོའི་ཁྲིམས་རྩོད་པའི་ལས་ཁུངས་དེ་ནི་དབྱིན་ཡུལ་དུ་ཡོད་པའི་རྒྱ་ནག་གཞུང་ཚབ་ཁང་གི་ཁྲིམས་ཀྱི་ཚབ་མཚོན་ཐུབ་པའི་ལས་ཁུངས་ཤིག་ཡིན་པ་དང་། དེའི་དམིགས་ཡུལ་ནི་དབྱིན་ཇིའི་ནང་རྒྱ་རིགས་ཚུད་པའི་མི་རིགས་སྣ་མང་འདུས་པའི་སྤྱི་ཚོགས་བསྐྲུན་རྒྱུ་དང་། དེ་ཡང་རྒྱ་ནག་དམར་ཤོག་ཚོགས་པའི་(UFWD) ལས་ཁུངས་དང་མཉམ་འབྲེལ་གྱིས། ཧོང་ཀོང་དང་རྒྱ་ནག་རིགས་ཀྱི་ལག་ནས་རོགས་དངུལ་ལེན་གྱི་ཡོད་སྐོར་དབྱིན་ཇིའི་གསང་བའི་ལས་ཁུངས་ལ་འགྲེལ་བརྗོད་བྱས་ཡོད་འདུག
རྒྱ་ནག་དམར་ཤོག་ཚོགས་པའི་སོ་ཉུལ་བའི་དོགས་གཞི་ཅན་གྱི་ལི་ཀྲིན་ཅོའུ་ཡིས། ཕྱི་ལོ་ ༢༠༠༦ ནས་དབྱིན་ཡུལ་ནང་ (British Chinese Project) ལས་གཞི་བརྩམས་ཏེ། དབྱིན་ཡུལ་ནང་རྒྱ་ནག་གི་ཤུགས་རྐྱེན་སྤེལ་ཐབས་བྱས་ཡོད་པ་དང་། ལས་གཞི་དེའི་ཚོགས་གཙོ་ནི་ད་ལྟའི་ངལ་རྩོལ་ཆབ་སྲིད་ཚོགས་པའི་གྲོས་ཚོགས་འཐུས་མི་ (Mr Gardiner) ཡིན་པ་རེད་ལ། ཕྱི་ལོ་ ༢༠༡༩ ལོར་ལྕམ་ཐི་རེ་ཟ་མེ་ཡེ་གཞུང་འཛིན་སྐབས། ལི་ཀྲིན་ཅོ་ཡིས་དབྱིན་ཡུལ་ནང་རྒྱ་རིགས་དང་དབྱིན་ཇི་གཉིས་ཀྱི་འབྲེལ་ལམ་གོང་མཐོར་བཏང་བར་ཆེ་མཐོང་ངོས་འཛིན་གྱིས། གཟེངས་རྟགས་ཤིག་ཀྱང་སྤྲད་ཡོད་པ་རེད།
ད་ལྟ་རང་ལོ་ ༥༨ ཡིན་པའི་རྒྱ་རིགས་བུད་མེད་ལི་ཀྲན་ཅོའུ་རྒྱ་ནག་ནང་སྐྱེས་ཤིང་། ཕྱི་ལོ་ ༡༩༨༠ ནང་དབྱིན་ཡུལ་དུ་གནས་སྤོར་བྱས་ཏེ། འདས་པའི་ལོ་ངོ་ ༢༠ རིང་དབྱིན་ཡུལ་གྱི་གྲོང་ཁྱེར་ (Birmingham) ནང་ (Christine Lee & Co) ཞེས་པའི་ཁྲིམས་རྩོད་པའི་ལས་ཁུངས་ཤིག་གཉེར་ཡོད་ཅིང་། དབྱིན་ཡུལ་གྱི་རྒྱལ་ས་ལོན་ཌོན་ (London) གཙོས་རྒྱ་ནག་གི་རྒྱལ་ས་པེ་ཅིན་ (Beijing)་དང་། དེ་བཞིན་ཧོང་ཀོང་དང་རྒྱ་ནག་གི་གྲོང་ཁྱེར་གཱང་ཌའོ་ (Guangzhou) སོགས་ཀྱི་ནང་ལས་ཁུངས་དེར་ཡན་ལག་ལས་ཁུངས་ཡོད་འདུག
གསར་འགོད་པ། བསྟན་འཛིན་ཕུར་བུ།
