རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐད་སེམས་འཚབ་ཡོད་པའི་སྐྱོན་བརྗོད་དང་ངོས་འཛིན་འོག ཡུ་རོབ་རྒྱལ་ཁབ་ཌན་མག་དང་ནེ་ཐི་ལན་ཌི་གཉིས་ཀྱིས་གཞུང་འབྲེལ་ཐོག་ནས་རྒྱའི་དགུན་ཁའི་ཨོ་རྩལ་འགྲན་ཚོགས་ལ་ངོ་རྒོལ་བྱས་འདུག
རྒྱ་ནག་ནང་དགུན་ཁའི་ཨོ་ལིམ་ཕིག་རྩེད་འགྲན་བསླེབ་ལ་ཉེ་བ་དང་བསྟུན། ཟླ་འདིའི་ཕྱི་ཚེས་ ༡༤ ཉིན་ཡུ་རོབ་རྒྱལ་ཁབ་ཌན་མག་དང་ནེ་ཐི་ལན་ཌ་གཉིས་ནས། འདི་ལོའི་རྒྱ་ནག་གི་ཨོ་རྩེད་འགྲན་ཚོགས་སྟེང་གཞུང་འབྲེལ་མཉམ་ཞུགས་བྱ་རྒྱུ་མིན་པའི་གསལ་བསྒྲགས་སྤེལ་ཡོད་ཀྱང་། ཁ་སང་རྒྱ་ནག་གཞུང་གིས་ཌན་མག་གཞུང་འཛིན་ཚོགས་པ་ཨོ་ལིམ་ཕིག་སྟེང་མཉམ་ཞུགས་བྱ་རྒྱུའི་འདུན་པ་ཡོད་ནའང་ཁ་གཏད་སྲིད་དོན་ཚོགས་པས། ཨོ་ལིམ་ཕིག་རྩེད་འགྲན་གྱི་སྙིང་བོ་རྡོག་རོལ་གཏོང་གི་ཡོད་པའི་སྐྱོན་བརྗོད་བྱས་འདུག
ཐེངས་འདིར་ནེ་ཐི་ལན་ཌི་གཞུང་རྒྱའི་ཨོ་རྩེད་འགྲན་བསྡུར་སྟེང་གཞུང་འབྲེལ་མཉམ་ཞུགས་མི་བྱེད་དོན་ནི། རྒྱ་ནག་གི་ཏོག་དབྱིབས་གཉན་རིམས་འགོག་སྲུང་གི་སྒྲིག་ལམ་ཧ་ཅང་དམ་དྲག་ཡིན་སྟབས། ཁོ་ཚོས་རྒྱ་ནག་གཞུང་དང་ལྷན་དུ་ཉེན་ཚབས་ཆེ་བའི་འགྲོ་བ་མིའི་ཐོབ་ཐང་གླེང་སློང་བྱེད་ཀྱི་མེད་པའི་ངོས་འཛིན་འོག་གཞུང་འབྲེལ་བྱས་ཡིན་སྐོར་བརྗོད་ཡོད་པ་དང་། ཌན་མག་གཞུང་གིས། རྒྱ་ནག་ནང་འགྲོ་བ་མིའི་ཐོབ་ཐང་ལ་རྡོག་རོལ་ཐེབས་ཀྱི་ཡོད་པའི་སྐྱོན་བརྗོད་དང་སྦྲགས། རྒྱའི་ཨོ་ལིམ་ཕིག་ལ་གཞུང་འབྲེལ་ངོ་རྒོལ་བྱེད་ཀྱི་ཡོད་སྐོར་བརྗོད་ཡོད་འདུག
ཉེ་ལམ་ཉི་ཧོང་གི་རྒྱལ་སྲིད་དྲུང་ཆེ་ (Hirokazu Matsuno) ལགས་ཀྱིས། རྒྱ་ནག་གཞུང་གིས། ཁྲིམས་ཀྱི་དབང་སྒྱུར་ལ་བརྩི་སྲུང་དང་རང་དབང་། གཞི་རྩའི་འགྲོ་བ་མིའི་ཐོབ་ཐང་སོགས་སྲུང་སྐྱོབ་བྱ་རྒྱུ་ནི་གལ་ཆེན་ཡིན་སྐོར་བརྗོད་པ་དང་འབྲེལ། ཉི་ཧོང་གཞུང་འབྲེལ་ཐོག་ནས་རྒྱ་ནག་གི་ཨོ་རྩལ་འགྲན་ཚོགས་ནང་ཞུགས་རྒྱུ་མིན་པ་ཡོངས་བསྒྲགས་བྱས་ཡོད་ཀྱང་། ཉི་ཧོང་གིས་རྒྱ་ནག་གི་ཨོ་ལིམ་ཕིག་ལ་གཞུང་འབྲེལ་ངོ་རྒོལ་བྱེད་ཀྱི་ཡོད་མེད་ཁ་གསལ་བཟོས་མེད་པ་རེད། ད་སྔ་ཡོངས་གྲགས་ཐོག་རྒྱ་ནག་གི་ཨོ་ལིམ་ཕིག་རྩེད་འགྲན་ལ་གཞུང་འབྲེལ་ངོ་རྒོལ་བྱེད་མཁན། ཌན་མག་དང་ནེ་ཐི་ལན་ཌི་ཚུད་པའི་ཨ་རི་གཙོ་བྱས་པའི་ཁེ་ན་ཌ་དང་དབྱིན་ཇི། ཨོ་གླིང་བཅས་འཛམ་གླིང་རྒྱལ་ཁབ་ ༦ བྱུང་ཡོད་ཅིང་། རྒྱལ་ཁབ་དེ་དག་ཚང་མས། རྒྱ་ནག་གཞུང་གིས་ཡུ་གུར་གཙོས་རྒྱ་ནག་ནང་འགྲོ་བ་མིའི་ཐོབ་ཐང་གི་གནས་སྟངས་ལ་དྲག་གནོན་དང་རྡོག་རོལ་གཏོང་གི་ཡོད་པའི་སྐྱོན་བརྗོད་བྱས་ཡོད།
ཡང་ད་ལྟའི་གནས་སྐབས་སུ་རྒྱ་ནག་གི་མཐུན་གྲོགས་ལྟ་བུར་གྱུར་བའི་ཨུ་རུ་སུ་དང་པ་ཀི་སི་ཐན་གཉིས་རྒྱ་ནག་གི་ཨོ་རྩལ་འགྲན་ཚོགས་སྟེང་གཞུང་འབྲེལ་མཉམ་ཞུགས་བྱ་རྒྱུ་ཡིན་པ་མ་ཟད། ཨུ་རུ་སུའི་མགོ་ཁྲིད་པུ་ཊིན་དང་པ་ཀི་སི་ཐན་གྱི་སྲིད་བློན་ཨིམ་རན་ཁན་ (Imran Khan) གཉིས་ཨོ་ལིམ་ཕིག་རྩེད་འགྲན་གྱི་གཞུང་འབྲེལ་མཛད་སྒོར་དངོས་སུ་ཞུགས་རྒྱུ་ཡིན་པ་ཡོངས་བསྒྲགས་བྱས་ཡོད་ལ། དེ་བཞིན་དུ། མཉམ་འབྲེལ་རྒྱལ་ཚོགས་ཀྱི་དྲུང་ཆེ་ཆེན་མོ་ཨན་ཊོ་ནི་གྷ་ཊར་སི་ལགས་ཀྱིས་ཀྱང་རང་ཉིད་དངོས་སུ་རྒྱའི་ཨོ་ལིམ་ཕིག་སྟེང་མཉམ་ཞུགས་བྱ་རྒྱུ་ཡིན་པ་བསྒྲགས་ཡོད།
ད་ལྟ་ཨ་རི་གཙོ་བྱས་པའི་ཌན་མག་སོགས་ནུབ་ཕྱོགས་རྒྱལ་ཁབ་ཁག་གིས། རང་རང་གི་ལུས་རྩལ་བ་རྣམས་ལ་ལམ་སྟོན་བྱས་ཏེ། རྒྱ་ནག་ཏུ་བསྐྱོད་སྐབས། ལུས་རྩལ་བ་མི་སྒེར་གྱི་ཁ་པར་དང་གློག་ཀླད་སོགས་མི་འཁུར་བ་དང་། ཕྱིར་ལོག་སྐབས་རྒྱ་ནག་ཏུ་བེད་སྤྱོད་བྱས་པའི་ཁ་པར་དང་གློག་ཀླད་ཀྱི་གསང་ཚིག་ཡོངས་བརྗེ་དགོས་པ་སོགས་རྒྱའི་གསང་ཉུལ་བའི་རྗེས་འདེད་གཏོང་བར་མཐའ་གཅིག་ཏུ་སྔོན་འགོག་བྱེད་དགོས་པའི་ལམ་སྟོན་གནང་ཡོད་པ་མ་ཟད། ཏོག་དབྱིབས་གཉན་རིམས་འགོས་ཁྱབ་ཀྱི་དོགས་གཞིའི་འོག་རྒྱ་ནག་གི་ཤའི་རིགས་ཟ་མི་ཆོག་པའི་ཉེན་བརྡའང་བཏང་ཡོད་འདུག་ལ། རྒྱལ་མཚམས་མེད་པའི་གསར་འགོད་མཐུན་ཚོགས་དང་ཡུ་རོབ་གྲོས་ཚོགས་ཀྱི་འཐུས་མི་ཁག་ཅིག་གིས། རྒྱལ་སྤྱིའི་གསར་འགོད་པ་རྣམས་རྒྱ་ནག་ཏུ་བསྐྱོད་སྐབས། རྒྱ་ནག་གི་ཆེས་དམ་དྲག་ཆེ་བའི་དྲ་རྒྱའི་གསང་ཉུལ་འོག་མི་ཚུད་རྒྱུ་དང་ཡང་རྒྱ་ནག་གཞུང་གི་དྲིལ་བསྒྲགས་ཁོ་ནའི་ལག་ཆར་མི་འགྱུར་བའི་འབོད་སྐུལ་སོགས་ཞུས་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
