རྒྱ་ནག་ནང་ཁེ་ན་ཌ་ནས་ཏོག་ནད་འགོས་ཁྱབ་བྱུང་བའི་ཉེས་འཛུགས་བྱས།

རྒྱ་ནག་གཞུང་གིས་རྒྱལ་སྤྱིའི་སྦྲག་ལམ་བརྒྱུད་རྒྱ་ནག་ནང་ངོ་བོ་འགྱུར་བའི་ཏོག་ནད་འགོས་ཁྱབ་བྱུང་གི་ཡོད་སྟབས། རྒྱ་ནག་མི་མང་གིས་ཕྱིའི་རྒྱལ་ཁབ་ཁག་ནས་ཅ་དངོས་མངག་ཉོ་བྱེད་མི་ཆོག་པའི་བཀོད་ཁྱབ་བཏང་ཡོད་འདུག

རྒྱ་ནག་ཏུ་དགུན་དུས་ཀྱི་ཨོ་རྩལ་འཚོག་གྲབས་ཡོད་པའི་སྐབས་འདིར། ཨོ་ལིམ་ཕིག་འཚོགས་ཡུལ་རྒྱལ་ས་པེ་ཅིན་ནང་གི་བུད་མེད་ཅིག་ལ་ཨོ་མི་ཁུ་རོན་གྱི་ཏོག་གསར་ནད་འགོས་ཁྱབ་བྱུང་ཡོད་ཀྱང་། རྒྱ་ནག་གཞུང་གིས་ཏོག་ནད་གསར་པ་དེ་ཁེ་ན་ཌ་ནས་བསྐུར་བའི་ཅ་དངོས་བརྒྱུད་འགོས་ཁྱབ་བྱུང་བའི་ཉེས་འཛུགས་བྱས་ཡོད་པ་མ་ཟད། པེ་ཅིན་མི་མང་ནས་ཕྱིའི་རྒྱལ་ཁབ་ཁག་ནས་ཅ་དངོས་མངག་ཉོ་བྱ་རྒྱུ་མཚམས་འཇོག་དགོས་པའི་བཀོད་ཁྱབ་བཏང་ཡོད་པ་རེད།

དེ་འབྲེལ་བྷི་བྷི་སིའི་གནས་ཚུལ་ནང་། པེ་ཅིན་ནད་ཡམས་འགོག་སྡོམ་བསྟི་གནས་ཁང་ (Beijing’s Centre for Disease Control )གིས་ཏོག་གསར་འགོས་ཁྱབ་བྱུང་བའི་བུད་མེད་དེ་ས་གནས་གཞན་དུ་འགྲིལ་འགྲུལ་བྱས་པའི་ཟིན་ཐོ་སོགས་གང་ཡང་མེད་པའི་ཁར། ཁོ་མོར་འབྱོར་བའི་ཐུམ་སྒྲིལ་ (package )གྱི་སྟེང་དུ་ཏོག་དབྱིབས་གཉན་སྲིན་གྱི་རྗེས་ཤུལ་ཡོད་པ་དང་། དམིགས་བསལ་ཏོག་ནད་འགོས་པའི་མི་དེར་ཁེ་ན་ཌ་ནས་འབྱོར་བའི་ཅ་དངོས་ཀྱི་ཕྱི་ནང་གཉིས་སྟེང་ནས་ནད་འབུའི་རྗེས་ཤུལ་ལག་སོན་བྱུང་ཡོད་པ་དང་། ཅ་དངོས་དེ་དང་མཉམ་གཅིག་ཏུ་སྐྱེལ་འདྲེན་བྱས་པའི་ཅ་དངོས་གཞན་བཅུ་གཉིས་ལ་བརྟག་དཔྱད་བྱས་པ་བརྒྱུད། ཅ་དངོས་བཅུ་ཡི་སྟེང་དུ་ཏོག་དབྱིབས་རིམས་ནད་ཀྱི་ནད་འབུའི་རྗེས་ཤུལ་ཡོད་སྐོར་བརྗོད་དེ། རྒྱ་རིགས་བུད་མེད་དེར་ཕྱི་རྒྱལ་ནས་མངག་ཉོ་བྱས་པའི་ཅ་དངོས་བརྒྱུད་ཨོ་མི་ཁུ་རོན་འགོས་ཡོད་པའི་ཁག་བཀྲུས་ཡོད་འདུག་པ་མ་ཟད། ད་ལྟ་ཁེ་ན་ཌ་ནས་འབྱོར་བའི་ཅ་དངོས་དེར་ལག་འབྲེལ་བྱུང་བའི་ལས་མི་རྣམས་ཟུར་བཀག་ཏུ་བཞག་ཡོད་སྐོར་བསྒྲགས་འདུག

དབྱེ་ཞིབ་པ་ཚོས། རྒྱ་ནག་གཞུང་གིས་རྒྱལ་སྤྱིའི་ཚན་རིག་པ་མང་པོས་དེ་སྔ་ནས་འཛམ་གླིང་རྒྱལ་ཁབ་གང་སར་སྐྱེལ་འདྲེན་བྱེད་མུས་ཡིན་པའི་འཁྱག་ཟས་རིགས་( frozen food )  ལས་ཏོག་དབྱིབས་འགོས་ཁྱབ་བྱུང་གི་ཡོད་པའི་དོགས་གཞི་གླེང་སློང་གིས། ད་ལྟ་རྒྱ་ནག་ནང་རྒྱལ་སྤྱིའི་འཁྱག་ཟས་རིགས་ལས་ཏོག་དབྱིབས་ཁྱབ་བརྡལ་གཏོང་གི་ཞ་མོ་གཡོག་ཐབས་བྱེད་ཀྱི་ཡོད་པ་མ་ཟད། ཞི་ཅིན་ཕིན་གྱི་སྲིད་དབང་འོག་མང་ཚོགས་ཀྱི་འགྲོ་འདུག་སྤྱོད་གསུམ་ལ་ཚོད་འཛིན་ནན་མོ་བྱས་ཏེ། རྒྱ་ནག་འཛམ་གླིང་ཏོག་དབྱིབས་ནད་པ་གཅིག་ཀྱང་མེད་པའི་ལུང་པ་ཞིག་ཡིན་པ་ར་སྤྲོད་ཐབས་བྱེད་ཀྱི་ཡོད་སྐོར་བརྗོད་འདུག

གཞན་ཡང་རྒྱལ་སྤྱིའི་ཨོ་ལིམ་ཕིག་དགུན་དུས་ཨོ་རྩལ་གོ་སྒྲིག་ཚོགས་ཆུང་གིས། ཏོག་དབྱིབས་རིམས་ནད་འགོག་སྡོམ་གྱི་སླད་དུ་མི་དམངས་རྣམས་ལ་རྒྱལ་སྤྱིའི་ཨོ་རྩལ་དང་དབང་པོ་སྐྱོན་ཅན་གྱི་ཨོ་རྩལ་འགྲན་ཚོགས་སྐབས། སྤྱི་དམངས་ལ་ལྟད་མོ་བའི་འཛིན་བྱང་བཙོང་རྒྱུའི་ཚབ་ཏུ། རྒྱ་ནག་གི་ཚོགས་སྡེ་ཁག་ལ་བགོ་འགྲེམས་བྱ་རྒྱུ་ཡིན་པའི་གསལ་བསྒྲགས་བྱས་ཡོད་པ་དང་། གསལ་བསྒྲགས་དེའི་ནང་རྙོག་འཛིང་ཅན་གྱི་དུས་ཚོད་འདིར་རིམས་ནད་འགོག་སྡོམ་དང་། ཨོ་རྩལ་གྱི་ཆེད་ལས་མི་སྣ། ལྟད་མོ་བ་རྣམས་ཀྱི་འཕྲོད་བསྟེན་དང་བདེ་འཇགས་ཀྱི་ཆེད་དུ། ང་ཚོས་མི་དམངས་ལ་འཛིན་བྱང་བཙོང་རྒྱུ་དེར་འགྱུར་བ་བཏང་བ་ཡིན། ཞེས་འགྲེལ་བརྗོད་བྱས་ཡོད།

རྒྱ་ནག་ནང་ཨོ་ལིམ་ཕིག་འཚོག་གྲབས་ཡོད་ཀྱང་ཏོག་དབྱིབས་གཉན་རིམས་ཁྱབ་གདལ་ཤུགས་ཆེན་བྱུང་གི་ཡོད་སྟབས། རྒྱ་ནག་གཞུང་གིས་ཏོག་ནད་གཅིག་ཀྱང་མེད་པའི་སྲིད་ཇུས་སྔར་ལྷག་དམ་དྲག་གིས་མི་མང་ས་ཡ་ ༣༤ ཙམ་རང་ཁྱིམ་དུ་བཅུག་སྟེ་ཏོག་དབྱིབས་རིམས་ནད་ཁྱབ་གདལ་མི་འགྲོ་བར་དོགས་གཟོན་བྱེད་མུས་ཡིན་པ་ལྟར། དེ་རིང་བར་རྒྱ་ནག་ཏུ་ནད་པ་གྲངས་ ༡༠༥༣༡༠ ལས་བྱུང་ཡོད་ཅིང་། མི་གྲངས་ ༤༦༣༦ ལྷག་རྐྱེན་འདས་སུ་ཕྱིན་ཡོད་པ་དང་། མི་གྲངས ༩༧༡༤༧ དྲག་སྐྱེད་བྱུང་འདུག དེ་བཞིན་ད་ལྟ་ནད་མནར་བཞིན་པ་མི་གྲངས་ ༣༤༩༤ ལྷག་ཡོད་འདུག་ལ། འདས་པའི་ཆུ་ཚོད་ཉེར་བཞིའི་ནང་རྒྱ་ནག་ཏུ་ནད་པ་གསར་བ་མི་གྲངས་ ༢༢༣  བྱུང་ཡོད་འདུག

གསར་འགོད་པ། དཔལ་ལྡན།