བཀྲ་ཤིས་དབང་ཕྱུག་ལགས་སུ་སླར་ཡང་འདྲི་རྩད་བྱས་ཡོད་འདུག

བོད་ཀྱི་སྐད་ཡིག་ཐོབ་ཐང་དོན་གཉེར་བ་བཀྲ་ཤིས་དབང་ཕྱུག་ལགས་ཀྱིས་ཡུལ་ཤུལ་རྫོང་སྲིད་གཞུང་གི་མགོ་ཁྲིད་མི་སྣར་བོད་ཀྱི་སྐད་ཡིག་སྲུང་སྐྱོབ་དགོས་པའི་འབོད་སྐུལ་ཞུས་རྗེས། ས་གནས་ཉེན་རྟོག་ཁང་གིས་ཁོང་ལ་འདྲི་རྩད་བྱས་ཡོད་པ་རེད།

ཁ་སང་ཕྱི་ཚེས་ ༡༨ ཉིན་བོད་ཀྱི་སྐད་ཡིག་ཐོབ་ཐང་དོན་གཉེར་བ་བཀྲ་ཤིས་དབང་ཕྱུག་ལགས་ནས་སྒེར་གྱི་ཝེ་པོད་དྲ་ཚིགས་སྟེང་གནས་ཚུལ་སྤེལ་ཏེ།  ཟླ་འདིའི་ཕྱི་ཚེས་ ༡༢ ཉིན་བཀྲ་ཤིས་དབང་ཕྱུག་ལགས་རང་ཉིད་ཡུལ་ཤུལ་གྲོང་ཁྱེར་གྱི་གཙོ་འཛིན་ལས་ཁུངས་སུ་ཕྱིན་ནས། བོད་ཁུལ་དུ་ལས་བྱེད་གསར་འདེམས་ཀྱི་གཙོས་བོད་ནང་བོད་སྐད་བོད་ཡིག་བཀོལ་སྤྱོད་ཀྱི་ཁོར་ཡུག་དང་སྐད་ཡིག་རྒྱུན་འཛིན་དགོས་སྐོར་གྱི་འབོད་སྐུལ་སླད་ཕྱིན་པ་བཀག་འགོག་དང་འབྲེལ། ཟླ་འདིའི་ཕྱི་ཚེས་ ༡༧ ཉིན་ཡུལ་ཤུལ་རྫོང་ཉེན་རྟོག་ལས་ཁུངས་ཀྱིས་བཀྲ་ཤིས་དབང་ལགས་འབོད་འགུག་གིས་ཆུ་ཚོད་ ༣ ལྷག་རིང་འདྲི་རྩད་བྱས་ཡོད་སྐོར་བརྗོད་འདུག

སྐབས་དེར་རྒྱ་ནག་གི་ལས་བྱེད་པ་ཚོས། བཀྲ་ཤིས་དབང་ཕྱུག་ལགས་སུ། ཁྱེད་ལ་བོད་ཁུལ་གྱི་སྐད་ཡིག་ཐད་སེམས་ཁུར་བྱེད་པའི་འགན་དབང་དང་ཐོབ་ཐང་ག་འདྲ་སླེབས་བྱུང་ཞེས་དྲི་བ་འདྲ་མིན་དྲིས་ཡོད་ཅིང་། ཁོང་གིས་རང་ཉིད་བོད་མི་ཞིག་ཡིན་པའི་ཆ་ནས་བོད་ཀྱི་སྐག་ཡིག་གི་ཆག་འཇིགས་སྲུང་སྐྱོབ་བྱེད་པའི་འགན་འཁྲི་རང་བཞིན་གྱི་ཡོད་པ་དང་དེང་སྐབས་གཟའ་འཁོར་གཉིས་རེའི་ནང་དུ་གྲངས་ཉུང་མི་རིགས་ཀྱི་སྐད་ཡིག་རེ་མེད་པར་འགྱུར་བཞིན་ཡོད་པ་སོགས་ཀྱིས་ལན་འདེབས་གནང་ཡོད་པ་མ་ཟད། རྒྱ་ནག་གི་ཉེན་རྟོག་པ་དང་ལས་བྱེད་དེ་དག་གིས་གོ་གནས་སྤྱད་དེ་མི་དམངས་ཀྱི་ཞུ་གཏུག་གིས་ཐོབ་ཐང་མེད་པར་བཟོས་ཏེ། བོད་ཀྱི་སྐད་ཡིག་ལ་སྣང་ཆུང་བྱེད་ཀྱི་ཡོད་སྐོར་སོགས་སྐྱོན་བརྗོད་བྱས་ཡོད་འདུག

ཡང་བོད་ཀྱི་སྐད་ཡིག་སྲུང་སྐྱོབ་དང་འབྲེལ་ནས་བཀྲ་ཤིས་དབང་ཕྱུག་ལགས་ཀྱིས་སྒེར་གྱི་ཝེ་པོད་དྲ་ཚིགས་སྟེང་རྩོམ་ཡིག་ཅིག་སྤེལ་བའི་ནང་། ང་ཚོས་ཇི་ལྟར་བྱས་ནས་བོད་ཀྱི་སྐད་དང་ཡི་གེ་ལ་སྲུང་སྐྱོབ་བྱེད་དགོས། མིག་སྔར་ང་ཚོས་མཐོང་ཆེན་བྱ་དགོས་པའི་གནད་དོན་ནི། བོད་རིགས་རང་སྐྱོང་ས་གནས་ཀྱི་གཞུང་ལས་པ་དང་དོན་ལས་སྡེ་ཁག་ནང་ལས་མི་གདན་ཞུ་བྱེད་སྐབས། བོད་ཡིག་གི་རྒྱུགས་ཤོག་སྤྱོད་མིན་དང་བོད་རིགས་རང་སྐྱོང་ས་གནས་ཀྱི་སྲིད་གཞུང་གི་སྡེ་ཁག་གམ་དངུལ་ཁང་དང་གློགའཕྲིན་འབྲེལ་འཕྲིན་སོགས་ནང་ཁུལ་དང་ཕྱི་རོལ་གྱི་ཡིག་ཆ་དང་གན་རྒྱ། ཡིག་ཚགས་སོགས་ཀྱི་རྒྱུ་ཆ་བོད་ཀྱི་ཡི་གེ་སྤྱོད་མིན། ཡང་ན་ལས་སྒོ་གཉེར་སྐབས་བོད་མི་ལ་བོད་སྐད་བཤད་མིན་དང་། བོད་རིགས་ས་ཁུལ་གྱི་སློབ་གྲྭའི་ནང་བོད་ཡིག་ལྷད་མེད་(རྩིས་རིག་དང་། རིག་ཚན། རང་བྱུང་ཚན་རིག་ཚན་ཁག་སོགས་བོད་ཡིག་ཐོག་ནས་སློབ་སྦྱོང་བྱེད་མིན）སྤྱོད་མིན་བཅས་ལ་བལྟ་དགོས།

སློབ་ཆེན་དུ་ད་ལྟའི་སྤྱི་ཚོགས་ལ་མཁོ་བའི་འབྲེལ་ཡོད་བོད་ཡིག་ཆེད་ལས་ཡོད་ལ་མེད། རང་ཉིད་ཀྱིས་བསམ་ན་གོང་གི་དེ་དག་ནི་བོད་ཡིག་དང་བོད་སྐད་ཀྱི་སྲོག་རྩ་ཡིན་པའི་ངོས་འཛིན་བྱེད་ཀྱི་ཡོད། རྒྱུ་མཚན་ནི་བོད་རིགས་རང་སྐྱོང་ས་གནས་ཀྱི་གཞུང་ལས་པ་དང་དོན་ལས་སྡེ་ཁག་མི་སྣ་གདན་ཞུ་ཡིག་ཚད་གཏོང་སྐབས་བོད་ཡིག་གི་རྒྱུགས་ཤོག་མེད་ན། བོད་རིགས་སློབ་མས་བོད་ཡིག་སློབ་སྦྱོང་བྱ་རྒྱུ་དོར་ནས། རྒྱ་ཡིག་མ་སྦྱོང་ཀ་མེད་བྱུང་ཡོད། ང་ཚོའི་མིག་སྔའི་ཡོངས་ཁྱབ་ཀྱི་འདུ་ཤེས་ནི། སློབ་གྲྭ་ཆེན་མོ་འགྲིམ་དོན་ནི་གཞུང་ཞབས་པ་དང་དོན་ལས་སྡེ་ཁག་ལ་རྒྱུགས་འཕྲོད་པའི་ཆེད་དུ་ཡིན་ཞིང་། ད་ལྟ་ང་ཚོས་བོད་རིགས་སློབ་གྲྭ་བ་ཧ་ཅང་མང་པོ་ཞིག་སློབ་ཆེན་ལོ་རིམ་དང་པོ་ནས་བཟུང་བོད་ཀྱི་ཡི་གེ་སྦྱོང་མྱོང་མེད་པས། ཁོ་ཚོའི་ད་ལྟའི་བོད་ཡིག་ཆུ་ཚད་ནི་བོད་ཡིག་གི་བརྡ་སྤྲོད་སོགས་བརྗོད་ནས་བོད་ཡིག་འབྲི་མི་ཤེས་པའི་གནས་སུ་སླེབས་འདུག

བོད་རིགས་རང་སྐྱོང་ས་གནས་ཀྱི་སྲིད་གཞུང་གི་སྡེ་ཁག་དང་དོན་ལས་སྡེ་ཁག་ནང་དུ་ལོ་ན་གཞོན་པའི་བོད་རིགས་ལས་བྱེད་པ་དང། ཐ་ན་ལོ་བཞི་བཅུ་ལྔ་བཅུ་ལོན་པའི་བོད་རིགས་ལས་བྱེད་པའི་ནང་དུའང་བོད་སྐད་བཤད་མི་ཤེས་པའི་བོད་རིགས་ཀྱི་གཞུང་དོན་བ་ཁག་གཅིག་ཡོད་པས། དེ་དག་ནི་བོད་ཀྱི་སྐད་དང་བོད་ཀྱི་ཡི་གེ་ཉམས་དམས་སུ་སོང་བའི་རྒྱུ་རྐྱེན་གཙོ་བོ་ཡིན་པ་ང་ཚོས་ཤེས་དགོས། ཡུལ་ཤུལ་བའི་སློབ་གྲྭ་བཞིན་བོད་ཡིག་སྣ་གཅིག་ལས་སྦྱང་གི་མེད་པའི (རྩིས་རིག་དང༌། རིག་གནས་ཚན་ཁག་གམ་རིང་བྱུང་ཚན་རིག་ཚན་ཁག་བཅས་རྒྱ་ཡིག་གི་ཐོག་ནས་སློབ་སྦྱོང་བྱེད་ཀྱི་ཡོད། ）སློབ་ཚན་གྱི་སློབ་ཁྲིད་བྱེད་སྟངས་དེས། དེང་སྐབས་བོད་ཀྱི་ཡི་གེ་དང་བོད་སྐད་ལ་སྲུང་སྐྱོབ་བྱེད་པའི་ནུས་པ་ཐོན་མེད་པ་མ་ཟད། བོད་རིགས་སློབ་མ་ཁག་གཅིག་དབྱིན་ཡིག་འཛིན་གྲྭར་དབྱེ་ཡོད། ཁོང་ཚོ་ལ་ལ་ཞིག་གིས་བོད་ཀྱི་ཡི་གེ་སྦྱོང་གི་མེད། དེ་དག་གིས་བོད་ཀྱི་སྐད་དང་ཡི་གེ་ཉམས་རྒུད་ཇེ་མགྱོགས་སུ་བཏང་ཡོད། ལོ་བཅུ་ལྷག་ཙམ་སོང་རྗེས་བོད་ཀྱི་སྐད་དང་ཡི་གེ་དེ་བས་ཚབས་ཆེ་རུ་ཕྱིན་ཡོད། ཅེས་བརྗོད་འདུག

སྤྱིར་འདས་ལོའི་ཕྱི་ཟླ་ ༡ ཚེས་ ༡༤ ཉིན་བཙོན་གྲོལ་ཐོབ་པའི་བོད་ཀྱི་སྐད་ཡིག་སློབ་གསོའི་ཐོབ་ཐང་དོན་གཉེར་བ་བཀྲ་ཤིས་དབང་ཕྱུག་ལགས་ཀྱིས། ཕྱི་ལོ་ ༢༠༡༥ ཙམ་ནས་པེ་ཅིན་དུ་གནས་སྡོད་ནེའུ་ཡོག་དུས་བབ་ཡན་ལག་གི་གསར་འགོད་པར་རྒྱ་ནག་གཞུང་གི་སྲིད་བྱུས་འོག་བོད་ཁུལ་གྱི་སློབ་གྲྭ་ཁག་ཏུ་བོད་སྐད་ཡིག་སློབ་གསོ་རྩ་མེད་བཟོ་ཡི་ཡོད་པ་དང་། བོད་ཕྲུག་བྱིས་པའི་བོད་སྐད་ཡིག་གི་གནས་ཚད་ཉེན་ཚབས་ཅན་དུ་གྱུར་ཡོད་སྟབས། ངེས་པར་དུ་རྒྱ་ནག་གཞུང་གི་མི་རིགས་རང་སྐྱོང་ཁུལ་གྱི་བཅའ་ཁྲིམས་ནང་གསལ་ལྟར་བོད་སྐད་ཡིག་སྲུང་སྐྱོབ་དགོས་པའི་འབོད་སྐུལ་བྱས་ཡོད་པ་མ་ཟད། གསར་ཁང་དང་ཁྲིམས་རྩོད་པ་སོགས་ལ་འབྲེལ་བ་བྱས་ཏེ་བོད་ཁུལ་གྱི་སློབ་གསོའི་དཀའ་ངལ་དྲིལ་བསྒྲགས་བྱེད་ཐབས་གནང་ཡོད་པར་བརྟེན། ཕྱི་ལོ་ ༢༠༡༦ ཟླ་ ༡ ཚེས་ ༢༧ ཉིན་ཡུལ་ཤུལ་ཉེན་རྟོག་པས་གསང་བའི་ཐོག་ནས་ཁོང་འཛིན་བཟུང་བྱས་ཏེ། ལོ་དེའི་ཕྱི་ཟླ་ ༣ ཚེས་ ༢༤ བར་ནང་མིར་ཤེས་རྟོགས་བྱུང་བཅུག་མེད་པ་མ་ཟད། ནང་མི་སྤུན་མཆེད་སོགས་ལ་ཐུག་ཏུ་མ་བཅུག་པར་བཀག་ཉར་བྱས་ཏེ་ལོ་ ༢ ལྷག་བཞག་ཡོད་པ་རེད། ཕྱི་ལོ་ ༢༠༡༨ ཟླ་ ༥ ཚེས་ ༢༢ ཉིན་ཡུལ་ཤུལ་འབྲིང་རིམ་མི་དམངས་ཁྲིམས་ཁང་ཟེར་བ་དེས། རྒྱལ་ཁབ་ཁ་བྲལ་གཏོང་ཐབས་ཀྱི་བྱ་སྤྱོད་སྤེལ་བའི་ཉེས་མིང་འོག བཀྲ་ཤིས་དབང་ཕྱུག་ལགས་སུ་ལོ་ ༥ བཙོན་འཇུག་ཁྲིམས་བཅད་ཡོད།

གསར་འགོད་པ། སྐལ་བཟང་སྦྱིན་པ།