རྒྱ་ནག་ཏུ་སིལ་སྤོལ་རྩེད་མཁན་ཨ་རིའི་རྒྱལ་ཡོངས་སིལ་སྤོལ་ལྷན་ཚོགས་ཀྱི་རྩེད་མཁན་ཟུར་བ་སོ་ནེ་ལགས་སུ་རྒྱ་རིགས་ཀྱིས་རིགས་རུས་དབྱེ་འབྱེད་དང་དམིགས་བསལ་མི་ནག་ཅེས་སྐྱོན་བརྗོད་བྱས་པར་རྒྱལ་སྤྱིའི་གླེང་སློང་ཤུགས་ཆེན་བྱེད་ཀྱི་ཡོད་པ་རེད།
སི་ཨན་ཨན་གསར་ཁང་གིས་གནས་ཚུལ་སྤེལ་བ་ལྟར་ན། ཉེ་ལམ་རྒྱ་ནག་ནང་ལག་རྩེད་སྤོལ་རྩེད་འགྲན་གྱི་སྐབས་ཤིག་ལ། རྒྱ་ནག་ཀོང་ཏུང་གི་སྟག་རུ་ཁག་ནང་། རྩེད་མོ་རྩེད་མཁན་ཨ་རིའི་རྒྱལ་ཡོངས་སིལ་སྤོལ་ལྷན་ཚོགས་ (NBA) ཀྱི་རྩེད་འགྲན་པ་ཟུར་བ་སོ་ནེ་ཝིམ་སི་(Sonny Weems) ལགས་སུ་རྒྱ་རིགས་ཚོས་མི་ནག་ཅེས་རིགས་རྒྱུད་དབྱེ་འབྱེད་ཀྱིས་སྐྱོན་བརྗོད་བྱས་པར་བརྟེན། རྒྱ་ནག་གི་སིལ་སྤོལ་རྩེད་འགྲན་ལྷན་ཚོགས་ཀྱིས། རྒྱ་རིགས་མི་མང་ལ་ཞུ་སྐུལ་ཡི་གེ་ཞིག་བཏང་སྟེ། རིགས་རྒྱུད་དབྱེ་འབྱེད་ཀྱི་སྐྱོན་བརྗོད་པར་ཐར་བ་གཏན་ནས་མེད་ཅེས་དང་། མང་ཚོགས་ཀྱི་ཚུལ་མཐུན་མིན་པ་དང་ཚད་ལས་བརྒལ་བའི་ཚིག་རྩུབ་བེད་སྤྱོད་གཏོང་རྒྱུ་མེད་པའི་འབོད་སྐུལ་ཞུས་ཡོད་པ་རེད།
དེ་ཡང་ཟླ་འདིའི་ཕྱི་ཚེས་ ༡༣ཉིན་རྒྱ་ནག་གི་སིལ་སྤོལ་མཐུན་ཚོགས་ཀྱི་གོ་སྒྲིག་འོག་ཀོང་ཏུང་སྟག་ (Guangdong Southern Tigers) ཟེར་བའི་སིལ་སྤོལ་རུ་ཁག་དང་ རྒྱའི་(Liaoning Flying Leopards) ཟེར་བའི་སིལ་སྤོལ་རུ་ཁག་གཉིས་དབར་སིལ་སྤོལ་འགྲན་བསྡུར་བྱེད་སྐབས། རང་ལོ་ ༣༥ ཡིན་པའི་ཨ་རིའི་སིལ་སྤེལ་རྩེད་འགྲན་པ་སོ་ནེ་ཝིམ་སི་ལགས་དང་རྒྱ་མིའི་སིལ་སྤོལ་རྩེད་འགྲན་པ་ཧན་དི་ཇོན་ (Han Dejun) གཉིས་དབར་ལ་འཁྲུག་རྩོད་ཤོར་བར་བརྟེན། རྩེད་འགྲན་པ་གཉི་ག་གློ་བུར་དུ་རྩེད་འགྲན་ནས་ཕྱིར་ཕུད་བཏང་ཡོད་ཀྱང་། རྩེད་རའི་ཕྱི་རོལ་ནས་སིལ་སྤོལ་ལ་དགའ་མོས་ཆེ་བའི་རྒྱ་རིགས་ཚོས་ཨ་རིའི་རྩེད་འགྲན་པ་ཁོང་གི་རིགས་རྒྱུད་ལ་དམིགས་པའི་ཚིག་ངན་བརྗོད་དེ། རྒྱ་ནག་ནས་ལོག་དགོས་ཡོད་ཅེས་སྐད་ཤུགས་ཆེན་པོས་སྐྱོན་བརྗོད་ཡོད་པ་རེད།
དེ་འབྲེལ་རྒྱ་ནག་གཞུང་འབྲེལ་གྱི་ཞི་ཧྥང་ (Xinhua) གསར་ཁང་གི་གནས་ཚུལ་ལྟར་ན། སིལ་སྤོལ་རྩེད་འགྲན་པ་གཉིས་ཀྱིས་འཁྲུག་པ་བརྒྱག་པར་བརྟེན། ཨ་རིའི་རྩེད་འགྲན་པ་སོ་ནེ་ལགས་ལ་ཨ་སྒོར་ ༢༢།༠༠༨ དང་རྩེད་འགྲན་ལྔའི་ནང་ཞུགས་མི་ཆོག་པ་སོགས་ཀྱི་ཉེས་ཆད་བཏང་ཡོད་པ་དང་། རྒྱ་རིགས་རྩེད་འགྲན་པ་ (Han) ལ་ཆད་དངུལ་ཨ་སྒོར་ ༣༡།༤༤༠ དང་རྩེད་འགྲན་བདུན་གྱི་ནང་ཞུགས་མི་ཆོག་པའི་ཉེས་པ་སོགས་བཏང་ཡོད་སྐོར་བརྗོད་འདུག
གཞན་ཡང་། ཨ་རིའི་སིལ་སྤོལ་རྩེད་མཁན་སོ་ནེ་ལགས་ཀྱི་ཝེ་པོ་དྲ་རྒྱའི་སྟེང་། རྒྱ་རིགས་ཁག་ཅིག་གིས། འཇའ་མཚོན་གྱི་མདོག་ལྡན་པའི་སྙིང་གཟུགས་ (heart-shaped emojis) བསྐུར་བ་དང་། མཆན་སྤེལ་བ་སོགས་བྱས་ཏེ་རྩེད་འགྲན་པ་ཁོང་ལ་རྒྱབ་སྐྱོར་གྱི་རྣམ་པ་བསྟན་ཡོད་པ་དང་། རྒྱ་ནག་གི་སིལ་སྤོལ་མཐུན་ཚོགས་ (Chinese Basketball Association) ཀྱིས། མི་རིགས་དབྱེ་འབྱེད་བྱེད་པར་རྒྱབ་སྐྱོར་རྩ་བ་ནས་མེད་པ་དང་མི་རིགས་དབྱེ་འབྱེད་བྱེད་པར་སྐྱོན་བརྗོད་དྲག་པོ་བྱེད་ཀྱི་ཡོད། ཅེས་བརྗོད་ཡོད་འདུག
དབྱེ་ཞིབ་པ་ཚོས། རྒྱ་ནག་ནང་ཨོ་ལིམ་ཕིག་འཚོགས་པར་བདུན་ཕྲག་གསུམ་ཙམ་ལས་མེད་པའི་སྐབས་འདིར། རྒྱ་ནག་གཞུང་གིས། ཕྱོགས་ཡོངས་ནས་དོགས་ཟོན་དང་དམིགས་བསལ་རྩེད་རིགས་སྐོར་གྱི་དོན་རྐྱེན་དག་ལ་ཡིད་གཟབ་བྱས་ཏེ། ཨོ་ལིམ་ཕིག་འཚོགས་ཐུབ་ཐབས་སུ་འབད་ཀྱི་ཡོད་སྐོར་བརྗོད་འདུག་ལ། རྒྱ་ནག་གི་སིལ་སྤོལ་མཐུན་ཚོགས་ཀྱི་ཚོགས་གཙོ་དང་སིལ་སྤོལ་རྩེད་མཁན་ཡོ་མེན་ལགས་ཀྱིས། སིལ་སྤོལ་གྱི་རྩེད་འགྲན་ནི་མི་དང་མིའི་དབར་གྱི་ཟམ་པ་ལྟ་བུ་ཆགས་ཡོད་པས། ང་ཚོས་ང་ཚོའི་བར་གྱི་འབྲེལ་ལམ་དམ་ཟབ་གཉེར་རྒྱུ་ཡིན། ཞེས་བརྗོད་ཡོད་འདུག
གསར་འགོད་པ། བསྟན་འཛིན་ཕུར་བུ།
