བདུན་ཕྲག་འདིའི་ནང་རྒྱ་གར་དང་བལ་ཡུལ་གཉིས་ཀྱི་ནང་ཏོག་དབྱིབས་ནད་གཞི་ཕོག་པའི་བོད་མི་གྲངས་ ༤༧༤ བྱུང་ཡོད་ཀྱང་རྐྱེན་འདས་སུ་ཕྱིན་པ་གཅིག་ཀྱང་བྱུང་མི་འདུག
དེ་རིང་བོད་མིའི་སྒྲིག་འཛུགས་ཀྱི་ཏོག་དབྱིབས་ཛ་དྲག་ལས་དོན་ཚོགས་ཆུང་གིས་གསར་འགོད་གསལ་བསྒྲགས་ཐེངས་ ༩༥ པ་སྤེལ་སྐབས། བདུན་ཕྲག་འདིའི་ནང་རྒྱ་གར་དང་བལ་ཡུལ་གཉིས་ཀྱི་ནང་ཏོག་དབྱིབས་ནད་གཞི་ཕོག་པའི་བོད་མི་གྲངས་ ༤༧༤ བྱུང་ཡོད་པའི་ཁྲོད་སྐྱེས་པ་གྲངས་ ༢༤༧དང་། བུད་མེད་གྲངས་ ༢༢༧ ཡོད་ཅུང་། རྐྱེན་འདས་སུ་ཕྱིན་པ་གཅིག་ཀྱང་བྱུང་མི་འདུག འདས་པའི་བདུན་ཕྲག་གཅིག་གི་ནང་རྒྱ་གར་ནང་གི་ས་གནས་ཁག་ ༡༤ དང་བལ་ཡུལ་ནང་གི་ས་གནས་གྲངས་ ༤ ནང་རང་ཁྱིམ་དུ་ཟུར་བཀག་འོག་སྡོད་མཁན་བོད་མི་ ༤༥༠ དང་། ཚོགས་སྡེའི་ཟུར་བཀག་ཁང་དུ་མི་གྲངས་ ༢༥༡ བཅས་ཁྱོན་ཟུར་བཀག་ཁང་དུ་བོད་མི་ ༧༠༡ ཡོད་འདུག
བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་དྲུང་གཞོན་བསྟན་འཛིན་ཀུན་བཟང་ལགས་ཀྱིས། འཛམ་གླིང་ཁྱོན་ཡོངས་དང་ལྷག་པར་དུ་རྒྱ་གར་ནང་ཏོག་ནད་ཕོག་པའི་གྲངས་འབོར་མང་དུ་འགྲོ་བའི་གནས་སྟངས་ཤིག་རེད་འདུག མི་སྒེར་དང་ཚོགས་པའི་ནང་དུ་ཏོག་ནད་ཕོག་མཁན་ཡོད་ན། མི་སྒེར་གྱིས་སོ་སོའི་ཐུགས་འགན་བཞེས་པའི་ཐོག་ནས་སྨན་ཁང་དུ་བསྟེན་པ་དང་བརྟག་དཔྱད་བྱས་པ་སོགས་སོ་སོའི་ངོས་ནས་གང་ཐུབ་ཅི་ཐུབ་ཀྱིས་སྣང་མེད་གཏོང་རྒྱུ་མེད་པ་གལ་ཆེན་པོ་རེད་འདུག འོན་ཀྱང་ཚོགས་པ་དེ་ཚོར་སྟངས་འཛིན་གནང་མཁན་འགན་འཛིན་ཁག་ཁག་ཡོད་པར་བརྟེན། ཚོགས་པའི་ནང་ཏོག་ནད་ཕོག་མཁན་ཡོད་ན། ཚང་མས་འཛེམ་ཟོན་མེད་པར་བརྟག་དཔྱད་གནང་རྒྱུའི་ཐུགས་སྣང་བཞེས་དགོས་པའི་ལམ་སྟོན་གནང་བ་དང་། ད་ལྟའི་ཆར་དགེ་རྒན་དང་ལས་བྱེད། དེ་བཞིན་སློབ་ཕྲུག་རྣམས་རང་ཁྱིམ་དུ་གུང་གསེང་ལ་ཕེབས་པའི་དུས་དང་དགུན་ཚོང་ནས་རང་ཁྱིམ་དུ་ལོག་པའི་དུས་ཚོད་རེད། འདས་ལོར་ཕྱི་ལོགས་ནས་ཕེབས་མཁན་ཁ་ཤས་ཀྱིས་ཟུར་བཀག་སྡོད་རྒྱུའི་ཁྲིམས་ཏག་ཏག་མ་འཁུར་བའི་རྐྱེན་གྱིས་སོ་སོའི་ནང་མི་སྤུན་མཆེད་སོགས་ལ་དཀའ་ངལ་ཆེན་པོ་འཕྲད་པ་བྱུང་ཡོད་པ་རེད། དེར་བརྟེན། ཕྱི་ལོགས་ནས་ཕེབས་མཁན་ཚང་མའི་ངོས་ནས་གཟབ་གཟབ་གནང་དགོས་པ་དང་། གཞིས་ཆགས་ཀྱི་ནང་དུ་སྡོད་མཁན་ཡིན་རུང་སོ་སོའི་ངོས་ནས་ཐུགས་འགན་བཞེས་པའི་ཐོག་ཉིན་གྲངས་ ༧ དང་ ༡༠ རྗེས་སུ་ཐུག་པར་ཕེབས་པ་སོགས་སྔོན་འགོག་གི་ཐབས་ལམ་ལག་བསྟར་དང་། སྔོན་ཁབ་རྒྱག་དགོས་པའི་ལམ་སྟོན་གནང་སོང་ལ། ད་ལྟའི་ཆར་དགུན་ཁའི་གནམ་གཤིས་གྲང་མོ་ཡིན་པར་བརྟེན། གྱོན་གོས་དྲོན་པོ་གྱོན་དགོས་པ་དང་ཆུ་གྲང་མོ་མིན་པར་དྲོད་འཇམ་འཐུང་རྒྱུ། དེ་བཞིན་སེམས་ལྷོད་པོ་དགོས་རྒྱུ་སོགས་རང་ཉིད་ཀྱི་འཕྲོད་བསྟེན་ལ་དོ་སྣང་དང་། ཉིན་ལྟར་དབུགས་སྦྱོང་བྱེད་དགོས་རྒྱུ་གལ་ཆེན་པོ་ཡིན་པའི་དྲན་སྐུལ་གནང་སོང་།
གསར་འགོད་གསལ་བསྒྲགས་སྟེང་སྨན་པ་མཚམས་གཅོད་ལགས་ཀྱིས། ཟུར་བཀག་ཏུ་བཞུགས་པའི་སྐབས་སུ་སྔ་དགོང་འཆམ་འཆམ་དང་ཕྱི་ལ་ཡར་མར་འགྲུལ་བཞུད་བྱེད་པ་ལ་སོགས་པ་མེད་པས་གཟུགས་པོར་ལུས་རྩལ་དང་འགུལ་སྐྱོད་མེད་པར་བརྟེན། ཞལ་ལག་འཇུ་དཀའ་བ་ཡོང་བ་དང་ཆབ་གསང་ཡག་པོ་མ་བབས་པ་ལ་སོགས་པའི་དཀའ་ངལ་འཕྲད་མ་སྲིད་པ་མ་རེད། དེར་བརྟེན། སོ་སོའི་ངོས་ནས་སོ་སོའི་འཕྲོད་བསྟེན་ལ་དོ་སྣང་ཡོད་པའི་ཐོག་ནས་སྔ་དགོང་དབུགས་སྦྱོང་དང་ཉིན་མོའི་དུས་སུ་གཉིད་ཉལ་བར་འཛེམ་ཟོན་བྱ་དགོས་ཤིང་། ཞལ་ལག་འཇུ་སླ་པོ་དང་འཕྲོད་པའི་རིགས་མཆོད་རྒྱུ་གལ་ཆེན་པོ་ཡིན་སྐོར་དང་། ཞལ་ལག་སྣུམ་ལ་བརྔོས་པ་དང་ཁ་ལག་རྙིང་པ་སོགས་ཀྱིས་གློ་ལ་གནོད་ཀྱི་ཡོད་པས། དེ་དག་རིགས་ཉུང་དུ་བཏང་དགོས་པའི་སྐོར་དང་། ཚ་བ་འཕར་བ་སོགས་ནད་རྟགས་ཐོན་པ་ཙམ་གྱིས་སྨན་ཁང་དུ་བསྟེན་དགོས་པ་ནི་གལ་ཆེན་པོ་ཡིན་པའི་སྐོར་སོགས་ལམ་སྟོན་གནང་སོང་།
དེའི་རྗེས་ཕྱི་ལུགས་སྨན་པ་བསྟན་འཛིན་རྣམ་གྲོལ་ལགས་ཀྱིས། ནད་རྟགས་ཡོད་མེད་ལ་མ་ལྟོས་པར་ཁ་རས་གྱོན་པ་སོགས་སྔོན་འགོག་གི་ཐབས་ལམ་རྣམས་མུ་མཐུད་ལག་ལེན་བསྟར་རྒྱུ་གལ་ཆེན་ཡིན་པ་དང་། ནད་པ་ཛ་དྲག་ཡིན་ན་མ་གཏོགས་སྨན་ཁང་དུ་མ་ཕེབས་ན་ཡག་པ་འདུག རྒྱུ་མཚན་ནི་ད་ལྟའི་ཆར་སྨན་ཁང་དུ་ཏོག་དབྱིབས་ནད་པ་མང་པོ་ཡོད་པའི་རྐྱེན་གྱིས་རང་ཉིད་ལ་ན་ཚ་ཁྱབ་གདལ་མ་ཡོང་བའི་སླད་དུ་སྨན་ཁང་དུ་མ་བསྟེན་ན་ལེགས་པོ་ཡོད་པའི་སྐོར་དང་། རང་ཁྱིམ་དུ་ཟུར་བཀག་བཞུགས་པའི་སྐབས་སུ། ཉིན་གྲངས་ ༧ ནས་ ༡༠ བར་དུ་ནང་མི་དང་སྤུན་མཆེད་སོགས་ལ་ཐུག་འཕྲད་མི་ཆོག་པ་དང་། ཉིན་རེར་ཚ་བ་དང་སྲོག་རླུང་ག་ཚོད་ཡོད་པའི་བརྟག་དཔྱད་བྱ་རྒྱུ་གལ་ཆེན་པོ་ཆགས་ཀྱི་ཡོད་པ་རེད། ཚ་བ་འབར་བ་དང་སྲོག་རླུང་སོགས་ཀྱི་དཀའ་ངལ་བྱུང་ན་སྨན་ཁང་དུ་བསྟེན་དགོས་ཤིང་། སྨན་རྣམས་དུས་ཐོག་ཏུ་མཆོད་དགོས་ཀྱི་ཡོད་པ་རེད། རང་ཉིད་སྒེར་སོ་སོར་ནད་རྟགས་ཡོད་མེད་སོགས་ལ་མི་ལྟོས་པར། ཁ་རས་གྱོན་པ་སོགས་སྔོན་འགོག་གི་ཐབས་ལམ་རྣམས་ངེས་པར་དུ་ལག་བསྟར་གནང་དགོས་པའི་ལམ་སྟོན་གནང་སོང་།
ཏོག་དབྱིབས་ཛ་དྲག་ལས་དོན་ཚོགས་ཆུང་གི་གསལ་བསྒྲགས་ལྟར་ན། ད་ལྟ་བར་དུ་རྒྱ་བལ་གཉིས་ནང་བོད་མི་ཏོག་དབྱིབས་ནད་པ་གྲངས་ ༧༩༦༣ བྱུང་བའི་ཁྲོད་དྲག་སྐྱེད་ཟིན་པ་ ༧༡༤༤ དང་། རྐྱེན་འདས་སུ་ཕྱིན་པ་ ༡༦༩། ད་ལྟ་ཏོག་ནད་ཀྱིས་མནར་བཞིན་པའི་བོད་མི་གྲངས་ ༦༥༧ ཡོད་འདུག འདས་པའི་ཆུ་ཚོད་ཉེར་བཞིའི་ནང་རྒྱ་གར་དུ་ནད་པ་གསར་པ་ ༣༡༧།༥༣༢ བྱུང་ཡོད་པ་དང་། ཨོ་མི་ཁུ་རོན་ན་མཁན་གྱི་ནད་པའི་གྲངས་ ༩༢༨༧ བྱུང་སྟེ། ད་ལྟ་རྒྱ་གར་ནང་དུ་ཏོག་དབྱིབས་རིམས་ནད་ཀྱི་ནད་རླབས་གསུམ་པ་ཁྱབ་བརྡལ་འགྲོ་མུས་ཡིན་པ་རེད་འདུག
གསར་འགོད་པ། བསྟན་འཛིན་ཕུར་བུ།
