རྒྱ་ནག་གཞུང་གིས་གྲོང་ཁྱེར་དང་ཁུལ་རེར་ཉུང་མཐར་སྐྱེལ་འདྲེན་གནམ་ཐང་གཅིག་རེ་དགོས་པའི་འཆར་གཞིའི་འོག་ཕྱི་ལོ་ ༢༠༢༥ བར་མཚོ་སྔོན་ཞིང་ཆེན་ཡོངས་ནང་སྐྱེལ་འདྲེན་གནམ་ཐང་ ༡༠ འཛུགས་སྐྲུན་ཟིན་པ་དགོས་པའི་ལས་འཆར་གཏན་འབེབ་བྱས་འདུག
དེ་རིང་རྒྱ་ནག་གི་གཞུང་འབྲེལ་གསར་ལམ་དུ་གནས་ཚུལ་ཐོན་པ་ལྟར་ན། འདི་ལོའི་ཕྱི་ཟླ་ ༤ པའི་ནང་རྒྱ་ནག་གཞུང་གིས་བཅད་བགོས་བྱས་པའི་མཚོ་སྔོན་ཞིང་ཆེན་མཚོ་ལྷོ་ཁུལ་གསེར་ཆེན་རྫོང་གི་ནུབ་བྱང་ཕྱོགས་སུ་གནམ་ཐང་གསར་པ་ཞིག་འཛུགས་སྐྲུན་བྱ་གཏན་འཁེལ་ཡོད་ཅིང་། གནམ་ཐང་གསར་པ་དེས་ཕྱི་ལོ་ ༢༠༣༠ བར་ཁྱོན་འགྲུལ་བ་འབུམ་ ༤ དང་ཕྱེད་ཀ་དང་། དངོས་ཟོག་ཏུན་ ༦༥༠ ལྷག་སྐྱེལ་འདྲེན་བྱ་རྒྱུའི་དམིགས་ཚད་བཟུང་ཡོད་འདུག
གསར་དུ་རྒྱག་འཆར་ཡོད་པའི་གནམ་ཐང་དེ་ནི་ཆབ་ཆ་གྲོང་བརྡལ་དང་བར་ཐག་སྤྱི་ལེ་ ༡༡ ཙམ་ཀྱི་མཚམས་སུ་ཡོད་ཅིང་། གཞུང་ལམ་གྱི་ལམ་ཐག་ལ་སྤྱི་ལེ་ ༡༤ ཙམ་དང་། འཛུགས་སྐྲུན་གྱི་ཆ་ཤས་གཙོ་བོ་ནི་རིང་ཚད་ལ་སྨི་ ༥༢༠༠ ཟིན་པའི་རྒྱུག་ལམ་གསར་པ་གཅིག་དང་། སྨི་གྲུ་བཞི་མ་ ༦༠༠༠ ཟིན་པའི་གནམ་ཐང་གི་ཐོག་ཁང་། གནམ་གྲུ་འབབ་ས་ ༥ བཅས་གསར་རྒྱག་བྱ་འཆར་ཡོད་པ་དང་། དེ་བཞིན་འཕྲིན་གཏོང་དང་། ཕྱོགས་སྟོན། གནམ་གཤིས། གློག་འདོན། ཆུ་བེད་མཁོ་འདོན། སྣུམ་འདོན། མེ་གསོད་རོགས་སྐྱོང་ཟེར་བ་སོགས་ཀྱི་ཞོར་འདེགས་ཐོན་སྐྱེད་དང་འཚོ་བའི་སྒྲིག་ཆས། གནམ་ཐང་གི་ཕྱི་ལོགས་སུ་ཆུ་ལོག་སྔོན་འགོག་གི་སྒྲིག་བཀོད་སོགས་འཛུགས་སྐྲུན་བྱ་བའི་འཆར་གཞི་ཡོད་སྐོར་བསྒྲགས་ཡོད་འདུག
རྒྱ་ནག་གི་གཞུང་འབྲེལ་གནས་ཚུལ་ལྟར་ན། རྒྱ་ནག་གཞུང་གིས་མཚོ་སྔོན་ཞིང་ཆེན་ནང་ལོ་ལྔ་ཚན་བཅུ་བཞི་པའི་ཕྱོགས་བསྡུས་འགྲིམ་འགྲུལ་སྐྱེལ་འདྲེན་མ་ལག་འཕེལ་རྒྱས་འཆར་འགོད་ཟེར་བ་གཞིར་བཟུང་། ཕྱི་ལོ་ ༢༠༢༥ བར་ཞིང་ཆེན་ཡོངས་ནང་སྐྱེལ་འདྲེན་གནམ་ཐང་ ༡༠ འཛུགས་སྐྲུན་ཟིན་དགོས་པ་དང་། གྲོང་ཁྱེར་དང་ཁུལ་རེར་ཉུང་མཐར་སྐྱེལ་འདྲེན་གནམ་ཐང་གཅིག་རེ་དགོས་པའི་འཆར་གཞི་བཟོས་ཡོད་པ་ལྟར། ད་ལྟའི་ཆར་མཚོ་སྔོན་ཞིང་ཆེན་གཅིག་པུའི་ནང་ཟི་ལིང་གནམ་ཐང་དང་། ན་གོར་མོ་གནམ་ཐང་། སྐྱེ་རྒུ་མདོ་གནམ་ཐང་། གཏེར་ལེན་ཁའི་གནམ་ཐང་དང་། ཧྭ་ཐུའུ་ཀོའུ་གནམ་ཐང་། མགོ་ལོག་གནམ་ཐང་། མདོ་ལའི་གནམ་ཐང་བཅས་ཡོད་པའི་ཐོག ད་ལན་གྱི་ལས་གཞིའི་ནང་གསེར་ཆེན་གནམ་ཐང་དང་། རྨ་ལྷོ་གནམ་ཐང་བཅས་ཡོད་འདུག
འདས་པའི་ལོ་ཤས་ནང་རྒྱ་ནག་གཞུང་གིས་བོད་རང་སྐྱོང་ལྗོངས་ཟེར་བའི་ནང་དམངས་དོན་དང་དམག་དོན་གཉིས་སུ་སྤྱོད་པའི་གནམ་ཐང་གསར་རྒྱག་གི་ལས་གཞི་ཇེ་མང་དུ་གཏོང་བཞིན་ཡོད་པ་ལྟར། འདས་ལོའི་ཕྱི་ཟླ་ ༩ པའི་ནང་རྒྱ་ནག་གི་གཞུང་འབྲེལ་བརྒྱུད་ལམ་ཁག་ཏུ། ལོ་དེར་བོད་དང་ཤར་ཊུར་ཀི་སི་ཐན་(ཤིན་ཅང་)ཁུལ་དུ་དམག་དཔུང་གི་འགྲུལ་སྐྱོད་སྟབས་བདེ་ཡོང་ཆེད་ཁྱོན་གནམ་ཐང་གསར་པ་ ༣༠ གསར་རྒྱག་བྱེད་བཞིན་ཡོད་སྐོར་དང་། ལས་གཞི་དེ་དག་རྒྱ་གར་དང་ས་ཐག་ཉེ་བའི་བོད་མངའ་རིས་ཁུལ་གྱི་སྤུ་ཧྲེང་རྫོང་དང་། དབུས་ཁུལ་གྱི་དིང་རི་དང་ལྷུན་རྩེ་རྫོང་བཅས་སུ་འཛུགས་སྐྲུན་བྱེད་ཀྱིན་ཡོད་པ་དང་། གནམ་ཐང་དེ་གསུམ་བརྒྱུད་ཤིན་ཅང་དང་བོད་གཉིས་རྒྱ་ནག་གི་གྲོང་ཁྱེར་ཁག་ལ་མཐུད་པའི་མཁའ་ལམ་ ༢༠ ཙམ་བསྐྲུན་རྒྱུ་ཡིན་སྐོར་བསྒྲགས་ཡོད་པ་རེད།
ད་ལྟའི་ཆར་བོད་རང་སྐྱོང་ལྗོངས་ཟེར་བའི་ནང་སྐྱེལ་འདྲེན་གནམ་ཐང་ ༧ ཡོད་པའི་ཐོག རྒྱ་ནག་གཞུང་གིས་ཕྱི་ལོ་ ༢༠༡༧ ནས་ ༢༠༣༠ བར་བོད་རང་སྐྱོང་ལྗོངས་ཟེར་བའི་ནང་གནམ་ཐང་ཕོན་ཆེན་གསར་རྒྱག་བྱ་རྒྱུའི་འཆར་གཞི་བསྒྲིགས་ཡོད་པ་ལྟར། ད་ལྟའི་ཆར་འདམ་གཞུང་དང་། གྲོ་མོ། སྐྱིད་གྲོང་། ལྷུན་རྩེ། མེ་ཏོག རྒྱ་མདའ། སྨར་ཁམས། འབྲི་རུ། སྤུ་ཧྲེང་བཅས་གནམ་ཐང་གསར་པ་ ༩ རྒྱག་བཞིན་ཡོད་པ་དང་། འདི་ལོ་ནས་བཟུང་རིམ་པས་ལྷུན་གྲུབ་རྫོང་དང་། གཉའ་ནང་རྫོང་། དིར་རི་རྫོང་། ལྷོ་བྲག་རྫོང་། ཉི་མ་རྫོང་སོགས་ནང་ལོ་རེ་བཞིན་ཆ་སྙོམས་གནམ་ཐང་ ༣ རེ་གསར་རྒྱག་བྱ་རྒྱུའི་དམིགས་ཚད་བཟུང་ཡོད་སྐོར་བཀོད་འདུག
གསར་འགོད་པ། པ་སངས་ཚེ་རིང་།
