ཟི་ལིང་དུ་བཙན་ཁྲིད་བྱས་པའི་ལམ་གྲོན་ཡང་སྤྲོད་དགོས་པའི་བཀའ་བཏང་།

མགོ་ལོག་རྨ་སྟོད་རྫོང་སྐྱ་རིང་གྲོང་སྡེ་བ་ནས་ཡིན་པའི་རང་ལོ་ ༢༣ ཅན་བློ་བསྟན་ཞེས་པའི་མཐར་ཕྱིན་སློབ་མ་ཞིག་རྒྱ་ནག་གཞུང་གིས་འཛིན་བཟུང་བྱས་ཏེ་ཟླ་གཅིག་ལྷག་འགྲོ་བཞིན་ཡོད་ཀྱང་གང་དུ་བཀག་ཉར་བྱས་ཡོད་མེད་དང་གནས་སྟངས་ག་འདྲ་ཡོད་སོགས་ད་དུང་ཤེས་རྟོགས་མ་ཐུབ་པར་ལྷག་འདུག

Students attend class at Lhasa Naqu Second Senior High School in Lhasa. © Reuters

འདས་ལོའི་ཕྱི་ཟླ་ ༡༢ ཚེས་ ༡༢ ཉིན་རྒྱ་ནག་གཞུང་གིས་དབྱེ་བགོས་བྱས་པའི་མཚོ་སྔོན་ཞིང་ཆེན་མགོ་ལོག་ཁུལ་རྨ་སྟོད་རྫོང་གི་ས་གནས་ཉེན་རྟོག་པས་བོད་རིགས་མཐར་ཕྱིན་སློབ་མ་བློ་བསྟན་ཞེས་པ་ཞིག་འཛིན་བཟུང་བྱས་ཏེ་ཟི་ལིང་གྲོང་ཁྱེར་དུ་བཙན་འཁྲིད་བྱས་ཡོད་པ་ལྟར། བོད་གནས་ལྟ་ཞིབ་ཁང་གིས་དེའི་གནས་ཚུལ་སྤེལ་བ་ལྟར་ན། ཟླ་དེའི་ཕྱི་ཚེས་ ༢༠ ཉིན་ཁོང་གི་ཁྱིམ་མི་ཚོར་བརྡ་ལན་བསླེབས་ཏེ་བློ་བསྟན་ཟི་ལིང་དུ་བཀག་སྟེ་སློབ་གསོ་སྤྲོད་བཞིན་ཡོད་པས་ཟ་ཆས་དང་མཁོ་དངོས་རིགས་སྐྱེལ་དགོས་ལུགས་བརྗོད་ཡོད་པ་མ་ཟད། ཟི་ལིང་དུ་བཙན་འཁྲིད་བྱས་པའི་ལམ་གྲོན་དུ་རྒྱ་སྒོར་ ༢༠༠ སྤྲོད་དགོས་པའི་བཙན་བཀའ་བཏང་ཡོད་འདུག

བློ་བསྟན་ལགས་ཀྱི་འབྲེལ་ཡོད་ཅིག་གིས་བརྗོད་པ་ལྟར་ན། བློ་བསྟན་ལགས་ཀྱིས་ཁྲིམས་འགལ་གྱི་ལས་ཀ་གང་ཡང་བྱས་མེད་ཀྱང་། སྐད་འཕྲིན་ཚོགས་པ་ཞིག་ཏུ་བོད་ནང་གི་སློབ་གྲྭ་ཁག་ཏུ་བོད་སྐད་བོད་ཡིག་གི་ཚབ་ཏུ་རྒྱ་སྐད་རྒྱ་ཡིག་སློབ་ཏུ་འཇུག་གི་ཡོད་པ་ནི། མ་འོངས་པར་བོད་ཀྱི་བྱིས་པ་ཚོར་རང་རང་གི་ཕ་སྐད་མ་ཡིག་དང་འབྲེལ་ལམ་རྩ་བ་ནས་མེད་པ་བཟོས་ཏེ། མ་འོངས་བོད་ཀྱི་བྱིས་པ་ཚོས་རང་རང་གི་ཕ་སྐད་མི་ཤེས་པ་ཞིག་བཟོ་ཐབས་ཡིན་སྐོར་བརྗོད་དེ། རྒྱ་ནག་གཞུང་གིས་བོད་ནང་གི་ས་ཁུལ་གང་སར་སྤེལ་མུས་ཡིན་པའི་རྒྱ་སྒྱུར་སློབ་གསོ་ལ་མོས་མཐུན་མེད་པའི་རྣམ་འགྱུར་བསྟན་རྐྱེན་ཡིན་སྲིད་སྐོར་བརྗོད་འདུག་ལ། ད་ལྟ་རང་ལོ་ ༢༣ ཡིན་པའི་མཐར་ཕྱིན་སློབ་མ་བློ་བསྟན་ལགས་ནི་རྒྱུན་དུ་བོད་སྐད་ཡིག་གིས་གཙོས་བོད་ཀྱི་རིག་གནས་ལ་དགའ་ཞེན་དང་ལག་བསྟར་རྒྱུན་སྐྱོང་བྱེད་མཁན་གྱི་གཞོན་ནུ་ཞིག་ཡིན་འདུག

ཕྱི་ལོ་ ༢༠༢༡ ཟླ་ ༡༢ ཚེས་ ༩ ཉིན་རྒྱ་ནག་ཤེས་རིག་ལྷན་ཁང་གིས་སྤྱི་ཡོངས་ནས་དུས་རབས་གསར་བའི་སྐད་ཡིག་ལས་དོན་གྱི་བསམ་འཆར་ཟེར་བའི་སྲིད་ཇུས་ཤིག་ཡོངས་ཁྱབ་གསལ་བསྒྲགས་བྱས་ཏེ། ཕྱི་ལོ་ ༢༠༢༥ ལོར་རྒྱའི་སྤྱི་སྐད་ཁྱབ་ཚད་རྒྱལ་ཡོངས་ཀྱི་བརྒྱ་ཆ་ ༨༥ ཟིན་དགོས་ཡོད་སྐོར་བསྒྲགས་ཡོད་པ་ལྟར། ཕྱི་ལོ་ ༢༠༡༤ ཙམ་ནས་རྒྱ་ནག་གཞུང་གིས་བོད་ཁུལ་གྱི་བྱིས་གཉོར་ཁང་ནས་བཟུང་རྒྱ་ཡིག་རྒྱ་སྐད་གཙོ་གཉེར་གྱི་སྲིད་ཇུས་ལག་བསྟར་བྱས་ཡོད་པ་མ་ཟད། རྒྱའི་སྐད་ཡིག་ནི་རྒྱལ་ཁབ་ཀྱི་སྤྱི་སྤྱོད་སྐད་ཡིག་དང་ཕ་སྐད་མ་ཡིག་ཡིན་ཚུལ་གྱི་དྲིལ་བསྒྲགས་བྱས་ཏེ། སློབ་འཁྲིད་ཐབས་ལམ་གཉིས་པ་ཞེས་རྒྱ་ཡིག་རྒྱ་སྐད་ཀྱི་ཐོག་ནས་སློབ་འཁྲིད་བྱེད་པའི་རྒྱ་སྒྱུར་སློབ་གསོའི་སྲིད་ཇུས་བོད་ཁུལ་གང་སར་བཙན་འགེལ་བྱེད་ཀྱི་ཡོད་པ་ལྟར། འདས་པའི་ཟླ་ཤས་ནང་བྲག་མགོ་དགོན་པའི་དགེ་ལྡན་ནང་བསྟན་སློབ་གྲྭ་སྒོ་བརྒྱབ་པ་དང་། སེང་འབྲུག་སྟག་རྩེའི་བཅའ་སྡོད་སློབ་གྲྭ་གཙོ་བོར་གྱུར་བའི་མགོ་ལོག་ཁུལ་གྱི་སྒེར་བཙུགས་སློབ་གྲྭ་ཁག་ཅིག་སྒོ་རྒྱག་དགོས་པའི་གཞུང་འབྲེལ་བཀའ་རྒྱ་བསྒྲགས་ཡོད་པ་དང། སེང་འབྲུག་སྟག་རྩེའི་སློབ་གྲྭ་སྒོ་བརྒྱབ་པ་དང་སློབ་གྲྭ་དེའི་དགེ་རྒན་རིན་ཆེན་སྐྱིད་འཛིན་བཟུང་བཙན་འཁྲིད་བྱས། དེ་བཞིན་འདས་ལོའི་ཕྱི་ཟླ་ ༨ ཚེས་ ༡༤ ཉིན་རྔ་བ་རྫོང་སྤྲོ་ཚིགས་ཡུལ་ཚོ་རུ་རྒྱ་ནག་གཞུང་གིས་བོད་རིགས་ན་གཞོན་ཚོར་ཏང་ལ་དགའ་ཞེན་དང་བདེ་འཇགས་ལས་འགན་སློབ་གསོ་ཟེར་བའི་ཆབ་སྲིད་དྲིལ་བསྒྲགས་ཀྱི་ཚོགས་འདུར་མ་ཞུགས་པའི་ཉེས་མིང་འོག སློབ་མ་ཤེས་རབ་རྡོ་རྗེ་ལགས་སོགས་འཛིན་བཟུང་བྱས་ཡོད་པའི་གནས་ཚུལ་ཐོན་ཡོད་པ་རེད།

གསར་འགོད་པ། དཔལ་ལྡན།