རྒྱ་ནག་གཞུང་གིས་གཉེར་བཞིན་པའི་དྲ་ལམ་འབྲེལ་མཐུད་སྤྱི་གཉེར་ཁང་(China Unicom)ཟེར་བ་ཞིག་གིས་ཨ་རིའི་རྒྱལ་སྲུང་བདེ་འཇགས་ཐད་གནོད་སྐྱོན་བཟོ་ཡི་ཡོད་པའི་དོགས་གཞིའི་འོག་ཟླ་གཉིས་ནང་ཚུན་དུ་སྒོ་བརྒྱག་དགོས་པའི་བཀའ་བཏང་འདུག
ཧོང་ཀོང་ནང་ཆེད་འཛུགས་བྱས་ཡོད་པའི་རྒྱ་ནག་གཞུང་གིས་གཉེར་བཞིན་པའི་རྒྱང་འཕྲིན་བཟོ་ལས་ཁང་ཆེ་གྲས་རྒྱ་ནག་གཅིག་སྡུད་དྲ་ལམ་འབྲེལ་མཐུད་སྤྱི་གཉེར་ཁང་(China Unicom)ཟེར་བས་ཨ་རིའི་རྒྱལ་སྲུང་བདེ་འཇགས་སོགས་ལ་གནོད་འཚེ་གཏོང་གི་ཡོད་པའི་དོགས་གཞིའི་འོག་མ་འོངས་ཟླ་གཉིས་ཚུན་དུ་ལས་མཚམས་འཇོག་དགོས་པའི་བཀའ་བཏང་།
རྒྱལ་སྤྱིའི་གསར་ལམ་ཁག་ཏུ་གནས་ཚུལ་ཐོན་པ་ལྟར་ན། ཁ་སང་ཨ་རིའི་དབུས་འབྲེལ་མཐུད་དོ་དམ་ལས་ཁུངས་ (Federal Communication Commission) ངོས་ནས་ཡང་བསྐྱར་རྒྱལ་ཁབ་ཀྱི་བདེ་འཇགས་ལ་གནོད་གཞི་དང་གསང་མྱུལ་བྱེད་པའི་དོགས་གཞིའི་འོག རྒྱ་ནག་གཞུང་གིས་གཉེར་བཞིན་པའི་རྒྱང་འཕྲིན་བཟོ་ལས་ཁང་ཆེ་གྲས་རྒྱ་ནག་གཅིག་སྡུད་དྲ་ལམ་འབྲེལ་མཐུད་སྤྱི་གཉེར་ཁང་ (China Unicom) ཟེར་བའི་ཨ་རིའི་ནང་གི་ལས་གཉེར་ལག་འཁྱེར་རྩིས་མེད་བཏང་སྟེ། ཡོང་རྒྱུའི་ཉིན་གྲངས་ ༦༠ ནང་སྤྱི་གཉེར་ཁང་དེའི་ཨ་རིའི་ནང་གི་ལས་གཞི་དང་ཞབས་ཞུ་ཡོངས་རྫོགས་མཚམས་འཇོག་དགོས་པའི་བཀའ་བཏང་ཡོད་འདུག
ཨ་རི་རྒྱལ་ཡོངས་ཀྱི་འབྲེལ་མཐུད་ཚན་པར་དོ་དམ་སྟངས་འཛིན་བྱེད་པའི་དབུས་གཞུང་གི་རང་དབང་ཅན་གྱི་ལས་ཁུངས་དེའི་འགན་འཛིན་ལྕམ་ཇེ་སི་ཁ་རོ་སན་ཝོར་སེལ་ (Jessica Rosenworcel) གྱིས་ཐག་གཅོད་དེའི་ཐད་བསྒྲགས་ཡིག་ཅིག་སྤེལ་བའི་ནང་། རྒྱ་ནག་གཞུང་གིས་གཉེར་བཞིན་པའི་རྒྱང་འཕྲིན་བཟོ་ལས་ཁང་དེ་དག་གིས་ང་ཚོའི་འབྲེལ་མཐུད་མ་ལག་གི་བདེ་འཇགས་ལ་ཉེན་ཁ་ཆེན་པོ་ཡོད་པའི་དཔང་རྟགས་མང་པོ་ཐོན་གྱི་ཡོད་པ་བཞིན། དེའི་ཐད་བློ་འཚབ་ཀྱང་ཆེན་པོ་ཡོང་གི་འདུག ཅེས་བརྗོད་འདུག་ལ། ཨ་རིའི་ནང་ཁ་པར་གྱི་དྲ་བའི་ཞབས་ཞུ་རིགས་སྤྲོད་བཞིན་པའི་རྒྱ་ནག་གི་གཞུང་གཉེར་བཟོ་ལས་ཁང་དེས། ཨ་རིའི་འབྲེལ་མཐུད་དོ་དམ་ལས་ཁུངས་ངོས་ནས་གཞི་རྩ་གང་ཡང་མེད་པ་དང་། ཁྲིམས་ཀྱི་བརྒྱུད་རིམ་གང་ཡང་མ་བརྒྱུད་པར་ཐག་གཅོད་དེ་བླངས་ཡོད་སྐོར་དང་། བཟོ་ལས་ཁང་ངོས་ནས་རང་ཉིད་དང་རང་གི་འཛད་སྤྱོད་པ་རྣམས་ཀྱི་ཐོབ་ཐང་སྲུང་སྐྱོབ་ཆེད་དུ་ཐབས་ཤེས་ཡོད་རྒུ་བསྟེན་རྒྱུ་ཡིན་སྐོར་གྱི་ལན་འདེབས་བྱས་ཡོད་འདུག
ད་ལྟའི་ཨ་རིའི་བྷའེ་ཌིན་སྲིད་གཞུང་ངོས་ནས་སྲིད་འཛིན་ཟུར་པ་ཊོམ་ཕུ་སྲིད་གཞུང་ལྟར་། རྒྱ་ནག་གི་གཞུང་གཉེར་རྒྱང་འཕྲིན་བཟོ་ལས་ཁང་གི་ཐད་མུ་མཐུད་དོ་དམ་སྟངས་འཛིན་བྱེད་ཀྱི་ཡོད་པ་དང་། འདས་པའི་ལོ་གཅིག་ནང་རྒྱ་ནག་གི་ཁ་པར་དང་འབྲེལ་མཐུད་བཟོ་ལས་ཁང་དག་གི་ཨ་རིའི་ནང་གི་བྱ་འགུལ་ལ་ཚོད་འཛིན་ནན་པོ་བྱས་ཡོད་པ་རེད། དེ་ཡང་འདས་ལོའི་ཕྱི་ཟླ་ ༡༡ ནང་ཨ་རིའི་གྲོས་ཚོགས་གོང་འོག་གཉིས་ཀྱིས་རྒྱབ་སྐྱོར་བརྒྱུད་བདེ་འཇགས་ཡོ་བྱད་ཁྲིམས་གཞི་(The Secure Equipment Act) ཟེར་བ་ཞིག་གཏན་འབེབ་བྱས་ཏེ། ཨ་རིའི་ནང་རྒྱལ་ཁབ་བདེ་འཇགས་ལ་ཉེན་ཁ་ཡོད་པའི་དོགས་གཞིའི་འོག་བཀག་སྡོམ་བྱས་ཟིན་པའི་བཟོ་གྲྭ་ཁག་གི་འཕྲུལ་ཆའམ་ཡོ་བྱད་གསར་བ་རྣམས་བཀོལ་སྤྱོད་བྱ་རྒྱུའི་ཆོག་མཆན་སྤྲོད་མི་ཆོག་པ་བཟོས་ཡོད་ཅིང་། ཁྲིམས་གཞི་དེའི་འོག་ནས་ད་ལྟ་བཀག་སྡོམ་ཟིན་པའི་རྒྱ་ནག་གི་ཁ་པར་བཟོ་ལས་ཁང་ཆེ་གྲས་ཧྭ་ཝེ་ (Huawei) དང་ཛེ་ཊི་ཨི་ (ZTE) སོགས་ཀྱི་འཕྲུལ་ཆས་རྣམས་ཨ་རིའི་འབྲེལ་མཐུད་ཚན་པའི་ནང་བཀོལ་སྤྱོད་ཆོག་གི་མེད་པ་རེད་ལ། བཟོ་ལས་ཁང་དེ་དག་གིས་སྙན་ཞུ་གསར་པ་ཞིག་ལ་ཆོག་མཆན་ཡང་སྤྲོད་ཆོག་གི་མེད་འདུག
འདས་པའི་ལོ་ཤས་ནང་ཨ་རིའི་གཞུང་གིས་རྒྱལ་ཁབ་བདེ་འཇགས་དང་གསང་མྱུལ་གྱི་བྱ་སྤྱོད་སྤེལ་སྲིད་པའི་དོགས་གཞི་ཁོ་ན་མིན་པར། རྒྱ་ནག་གི་དམག་དོན་དེང་རབས་ཅན་དུ་བསྐྲུན་རྒྱུར་ཞབས་འདེགས་དང་ཞབས་ཞུ་སྒྲུབ་མཁན་གྱི་རྒྱ་ནག་གི་སྤྱི་སྒེར་བཟོ་ལས་ཁང་མི་ཉུང་བ་ཞིག་ཀྱང་བཀག་སྡོམ་བྱས་ཡོད་པ་རེད། དེ་ཡང་འདས་ལོའི་ཕྱི་ཟླ་ ༤ པའི་ནང་སྲིད་འཛིན་བྷའེ་ཌིན་གྱིས་ཨ་རིའི་བཟོ་གྲྭ་ཁག་གིས་རྒྱ་ནག་གི་དམག་དང་མཉམ་འབྲེལ་བྱེད་མཁན་གྱི་རྒྱ་ནག་གི་བཟོ་སྐྲུན་ཁང་ ༥༩ ནང་མ་རྐང་འཛུགས་མི་ཆོག་པའི་འཛིན་སྐྱོང་བཀའ་ཁྱབ་བཏང་ཡོད་པ་རེད། དེ་བཞིན་འདས་ལོའི་ཕྱི་ཟླ་ ༡༡ པའི་ནང་ཨ་རིའི་གཞུང་ངོས་ནས་རྒྱ་ནག་ནང་རྟེན་གཞི་བྱས་པའི་བཟོ་ལས་ཁང་ ༨ ཀྱིས། རྒྱ་ནག་གི་དམག་གི་མ་ལག་གོང་འཕེལ་གྱི་ཆེད་དུ་ཨ་རིའི་འཕྲུལ་རིག་ཤེས་བྱ་མཁོ་སྒྲུབ་བྱེད་བཞིན་པའི་དོགས་གཞིའི་འོག ཨ་རིའི་བཟོ་སྐྲུན་གཞན་ཁང་རྣམས་ཀྱིས་རྒྱ་ནག་གི་བཟོ་ལས་ཁང་དེ་དག་དང་ཚོང་འབྲེལ་མི་ཆོག་པའི་བཀའ་བཏང་ཡོད་པ་མ་ཟད། དེ་དང་འབྲེལ་བའི་མི་སྒེར་ ༡༦ དང་རྒྱལ་ཁབ་གཞན་དུ་རྟེན་གཞི་བྱས་པའི་བཟོ་ལས་ཁང་ ༡༩ ལྷག་མིང་ཐོ་ནག་པོའི་ནང་བཅུག་ཡོད་པ་རེད།
China Unicom Network Capabilities. (Screenshot from China Unicom website)
རྒྱ་ནག་གི་གཞུང་གཉེར་རྒྱང་འཕྲིན་བཟོ་ལས་ཁང་དེ་ཉིད་ཀྱི་ལས་ཁུངས་ལྟེ་བ་ཧོང་ཀོང་དུ་ཡོད་ཅིང་། བཟོ་ལས་ཁང་གི་གཞུང་འབྲེལ་དྲ་ཚིགས་ནང་གསལ་བ་ལྟར་ན། བཟོ་ལས་ཁང་དེར་འཛམ་གླིང་ཁྱོན་ཡོངས་ནང་ཡན་ལག་ལས་ཁུངས་ ༣༠ ལྷག་ཡོད་པ་དང་། རྒྱལ་སྤྱིའི་ཁྱོན་དུ་རྒྱང་འཕྲིན་དང་། ཁ་པར་གྱི་དྲ་རྒྱ། བརྙན་ལེན་འབྲེལ་མཐུད། དྲ་ལམ་བདེ་འཇགས་སོགས་ཀྱི་ཐད་ཞབས་ཞུ་སྤྲོད་ཀྱི་ཡོད་ལ། ཕྱི་ལོ་ ༢༠༠༦ ལོར་དབྱིན་ཡུལ་གྱི་ཁྲོམ་རའི་ནང་ཞུགས་རྗེས། མཚོ་འོག་ནས་དྲ་ལམ་ཐག་སྐུད་འདྲེན་པ་སོགས་བྱས་ཡོད་འདུག
འདས་ལོའི་ཕྱི་ཟླ་ ༡༠ པའི་ནང་ཨ་རིའི་གཞུང་གིས་ཨ་རིའི་ནང་ལོ་ངོ་ ༢༠ ལྷག་གི་རིང་དྲ་བའི་ཞབས་ཞུ་སྤྲོད་མཁན་རྒྱ་ནག་གི་གཞུང་འབྲེལ་བཟོ་ལས་ཁང་ཆེ་ཤོས་ China Telecom ཟེར་བ་དེ་ཡང་མིང་ཐོ་ནག་པོའི་ནང་བཅུག་སྟེ་འཚོང་འགྲེམ་ལག་འཁྱེར་རྩིས་མེད་བཏང་ཡོད་པ་རེད། ཨ་རིའི་གཞུང་ངོས་ནས་རྒྱ་ནག་གི་བཟོ་ལས་ཁང་དེ་དག་རྒྱ་ནག་གཞུང་གི་སྟངས་འཛིན་འོག་ཡོད་པའི་རྒྱུ་མཚན་གྱིས། རྒྱ་ནག་གཞུང་ལ་བཟོ་ལས་ཁང་དེ་དག་གི་འཕྲུལ་རིག་བརྒྱུད་ནས་ཨ་རིའི་ནང་གི་འབྲེལ་མཐུད་ཚན་པར་དོ་ཕོག་དང་སྔོག་བཤེར་བྱ་རྒྱུའི་དབང་ཆ་ཡོད་པ་དང་། དེ་བརྒྱུད་ནས་རང་ཤུགས་ཀྱིས་གསང་མྱུལ་གྱིས་མཚོན་པའི་ཨ་རི་ལ་རྒོལ་བའི་བྱ་འགུལ་རིགས་སྤེལ་ཐུབ་ཀྱི་ཡོད་པའི་སྐྱོན་བརྗོད་བྱས་ཡོད་པ་རེད།
གསར་འགོད་པ། པ་སངས་ཚེ་རིང་།
