རྒྱ་ནག་ནང་ཕྱི་རྒྱལ་གྱི་གསར་འགོད་པ་ཇེ་ཉུང་དང་དམ་དྲག་ཇེ་ཆེ་ཡིན་པའི་སྙན་ཐོ་བཏོན།

རྒྱ་ནག་པེ་ཅིན་དུ་དགུན་དུས་ཨོ་རྩེད་འཚོག་རྒྱུར་ཉིན་གྲངས་ ༣ ཙམ་ལས་མེད་པའི་དུས་འདིར་རྒྱ་ནག་ནང་ཡོད་པའི་ཕྱི་རྒྱལ་གྱི་གསར་འགོད་མཐུན་ཚོགས་(FCCC)ནས་གསར་འགྱུར་ལས་རིགས་གཉེར་མཁན་ཚོར་འཇིགས་སྐུལ་དང་དམ་དྲག་སྔར་ལྷག་བྱེད་བཞིན་ཡོད་པའི་སྙན་ཐོ་ཞིག་འགྲེམས་སྤེལ་བྱས་ཡོད་འདུག

དེ་རིང་རྒྱ་ནག་ཏུ་རྟེན་གཞི་བྱས་པའི་རྒྱལ་སྤྱིའི་གསར་འགོད་པ་མཉམ་འདུས་ཀྱི་རྒྱལ་ཕྱིའི་གསར་འགོད་མཐུན་ཚོགས་ (Foreign Correspondents’ Club of China, FCCC) ངོས་ནས་རྒྱ་ནག་ནང་གསར་འགྱུར་ལས་རིགས་གཉེར་བཞིན་པའི་ཕྱི་རྒྱལ་གྱི་གསར་འགོད་པ་རྣམས་ཀྱི་གནས་སྟངས་སྐོར་གྱི་ལོ་འཁོར་སྙན་ཐོ་ཞིག་བཏོན་པའི་ནང་། སྔར་དང་བསྡུར་ན་རྒྱ་ནག་ནང་ཕྱི་རྒྱལ་གྱི་གསར་འགོད་པ་རྦད་དེ་ཇེ་ཉུང་དུ་སོང་ཡོད་པ་མ་ཟད། རྒྱ་ནག་གཞུང་གིས་སྔར་མུས་བཞིན་གསར་འགོད་པ་རྣམས་ལ་ཐབས་ལམ་སྣ་ཚོགས་བརྒྱུད་འཇིགས་སྐུལ་དང་ཚོད་འཛིན་བྱེད་ཀྱིན་ཡོད་སྐོར་འཁོད་འདུག

ཚོགས་མི་ ༡༩༢ ལྷག་ཡོད་པའི་གསར་འགོད་མཐུན་ཚོགས་ཀྱི་གསར་འགོད་པ་ ༡༢༧ ལ་བཅར་འདྲི་དང་རྒྱུས་ལོན་བྱས་ཏེ་བཏོན་པའི་སྙན་ཐོ་དེའི་ནང་། རྒྱ་ནག་གཞུང་གིས་སྔར་བཞིན་ཕྱི་རྒྱལ་གྱི་གསར་འགོད་པ་དང་། ཁོ་ཚོའི་རྒྱ་རིགས་ལས་རོགས། དེ་བཞིན་བཅར་འདྲི་བྱ་ཡུལ་གྱི་མི་སྣ་བཅས་ལ་འཇིགས་སྐུལ་བྱ་རྒྱུའི་ཐབས་ལམ་གསར་པ་འཚོལ་གྱིན་འདུག དཔེར་ན་དྲ་ལམ་དང་ཡང་ན་གདོང་གཏུགས་ནས་སྡིགས་ར་སྐུལ་བ་དང་། ཁ་པར་དང་གློད་ཀླད་ལ་དྲ་ལམ་འཇབ་རྒོལ་བྱེད་ཐབས་བཅས་རེད། ཅེས་དང་། དེ་སྔ་རྒྱ་ནག་གཞུང་གིས་ཕྱིའི་གསར་འགོད་པར་འཇིགས་སྐུལ་བྱེད་ཐབས་གཙོ་བོ་དེ་ཐོངས་མཆན་མི་སྤྲོད་པ་དང་། ཐོངས་མཆན་སྤྲད་ནའང་གསར་འགོད་གཉེར་ཆོག་པའི་ལག་འཁྱེར་མི་སྤྲོད་པའམ་དུས་ཡུན་ཉུང་འཕྲི་བྱེད་པ་སོགས་ཡིན་ནའང་། འདས་པའི་ལོ་གཅིག་ནང་རྒྱ་ནག་གཞུང་གིས་རྒྱལ་ཁབ་བདེ་འཇགས་ཀྱིས་མཚོན་པའི་ཁྲིམས་གཞི་འདྲ་མིན་གྱི་འོག་ནས་གསར་འགོད་པར་སྡིགས་ར་སྐུལ་གྱི་ཡོད་སྐོར་བརྗོད་འདུག་ལ། རྒྱ་ནག་ཏུ་གསར་འགོད་གཉེར་རྒྱུ་དེ་སྡུག་བསྔལ་ཞིག་ཡིན་པའི་སྡོམ་བརྒྱབ་ཡོད་འདུག

རྒྱ་ནག་གཞུང་གིས་རྒྱལ་སྤྱིའི་གསར་འགོད་པ་རྣམས་ལ་ཁྲིམས་ཡིག་གི་མིང་ཐོག་ནས་འཇིགས་སྐུལ་བྱ་རྒྱུའི་ཐབས་ཇུས་དེ་ཉིད། ཐོག་མར་ཕྱི་ལོ་ ༢༠༢༠ ལོར་རྒྱ་ནག་གི་གཞུང་འབྲེལ་རྒྱ་ནག་གོ་ལའི་བརྙན་འཕྲིན་ཁང་(CGTN) དུ་གསར་འགྱུར་སྙན་སྒྲོན་པའི་ལས་ཀ་གཉེར་བཞིན་པའི་ཨོ་གླིང་གི་མི་སེར་ཡིན་པ་རྒྱ་རིགས་ཁྲེང་ལེ་(Cheng Lei) ལ་རྒྱལ་ཁབ་ཀྱི་གསང་བའི་གནས་ཚུལ་ཕྱི་ལ་མཁོ་སྤྲོད་བྱས་པའི་ཉེས་མིང་བཙུགས་ཏེ་འཛིན་བཟུང་བཀག་ཉར་བྱས་པ་དང་། དེ་བཞིན་ཨ་རིའི་བྷུ་ལམ་སྦག་(Bloomberg News) གསར་ཁང་གི་གསར་འགོད་པ་ཧ་ཙེ་ཧྥན་(Haze Fan) ལ་རྒྱལ་ཁབ་ཀྱི་བདེ་འཇགས་ལ་གནོད་གཞིའི་བྱ་བ་བརྩམས་པའི་དོགས་གཞིའི་འོག་འཛིན་བཟུང་བྱས་ཡོད་པ་རེད། དེར་བརྟེན་ཕྱིའི་གསར་ཁང་རྣམས་ཀྱིས་རང་གི་ས་གནས་གསར་འགོད་པ་རྣམས་ཀྱི་བདེ་འཇགས་ཀྱི་ཆེད་དུ། ཉེན་ཁའི་སྐབས་ཉེན་ཡོལ་འགྲོ་བའི་ལམ་ཁ་གྲ་སྒྲིག་བྱས་ཡོད་ཅིང་། འདས་པའི་ལོ་གཅིག་གཉིས་ནང་རྒྱ་ནག་ནང་གསར་འགོད་བྱ་བ་གཉེར་བཞིན་པའི་གསར་འགོད་པ་རྣམས་ཧོང་ཀོང་དང་། ཐའེ་ཝན། ཨོ་གླིང་བཅས་ནང་གནས་སྤོས་བྱས་ཡོད་པ་རེད་འདུག

ཊོམ་ཕུ་སྲིད་གཞུང་སྐབས་ཨ་རི་དང་རྒྱ་ནག་གཉིས་ཀྱིས་ཕན་ཚུན་གྱི་གསར་འགོད་པ་རྣམས་ལ་ཚོད་འཛིན་དང་། སྐབས་འགར་ཕྱིར་འབུད་བཏང་བའི་གནས་ཚུལ་བྱུང་ཡོད་པ་རེད། དེ་ཡང་ཕྱི་ལོ་ ༢༠༢༠ ལོར་ཊོམ་ཕུ་སྲིད་གཞུང་གིས་ཨ་རིའི་ནང་རྟེན་གཞི་བྱས་པའི་རྒྱ་ནག་གཞུང་འབྲེལ་གསར་ཁང་སྐོར་ཞིག་གི་གསར་འགོད་པའི་གྲངས་འབོར་ཉུང་འཕྲི་དགོས་པ་སོགས་ཀྱི་ཚད་བཀག་བཟོས་པ་དེར་ཡ་ལན་གྱི་ཚུལ་དུ། རྒྱ་ནག་གཞུང་གིས་ཨ་རིའི་སྒེར་གཉེར་གསར་ཁང་ཆེ་གྲས་ནེའུ་ཡོག་དུས་བབ་ (New York Times) དང་ཝ་ཤིང་ཊོན་ཆ་འཕྲིན་ (The Washington Post)། ཝོལ་སི་ཏྲིཊ་གསར་ཁང་ (The Wall Street Journal) བཅས་ཀྱི་རྒྱ་ནག་ནང་གི་ས་གནས་གསར་འགོད་པ་རྣམས་ཕྱིར་འབུད་བཏང་ཡོད་ཅིང་། ལོ་དེར་ཁྱོན་བསྡོམས་ཨ་རིའི་གསར་ཁང་གི་གསར་འགོད་པ་ ༡༨ རྒྱང་ཕུད་བཏང་ཡོད་འདུག

ཐེངས་འདིའི་སྙན་ཐོའི་ཆེད་བཅར་འདྲིར་ལན་འདེབས་བྱེད་མཁན་གསར་འགོད་པ་གསུམ་ཆ་གཅིག་ལྷག་གིས་རང་གིས་སྤེལ་བའི་གནས་ཚུལ་གྱི་རྐྱེན་པས་དྲ་ལམ་ནས་དམོད་ཚིག་གཟེད་དགོས་པ་བྱུང་ཡོད་པ་དང་། ཡང་སྐོར་ཞིག་ལ་གཞུང་གི་ལས་བྱེད་དང་། གནས་ཚུལ་མཁོ་སྤྲོད་པས་ཁྲིམས་ཐོག་ནས་གྱོད་བཙུགས་པའི་གནས་ཚུལ་བྱུང་ཡོད་འདུག དེ་ཡང་དབྱིན་ཡུལ་གྱི་བྷི་བྷི་སི་གསར་ཁང་གི་གསར་འགོད་པ་ཇོན་སུཌ་ཝོ་ཐི་ (John Sudworth) ཡིས་ཤིན་ཅང་ནང་གི་ཡུ་གུར་མི་རིགས་སྐོར་ནས་གནས་ཚུལ་ཕོན་ཆེན་བྲིས་པའི་རྒྱུ་མཚན་གྱིས་དྲ་ལམ་དང་ཁྲིམས་ཐོག་ནས་འཇིགས་སྐུལ་མང་པོ་བྱས་ཡོད་པར་བརྟེན། ཁོ་པ་ནང་མི་དང་བཅས་པ་ཐའེ་ཝན་ལ་གནས་སྤོ་བྱ་དགོས་ཁེལ་ཡོད་འདུག་ལ། རྒྱ་ནག་གི་གནམ་ཐང་ནས་མ་ཐོན་བར་དུ་ཁོ་པར་སྒྲིག་ཆས་གྱོན་མེད་པའི་ཉེས་རྟོག་པ་ཞིག་གིས་རྗེས་འདེད་བཏང་ཡོད་འདུག

སྙན་ཐོ་འདི་ཉིད་པེ་ཅིན་གྱི་དགུན་དུས་ཨོ་ལིམ་པིག་རྩེད་འགྲན་འཚོག་ལ་ཉེ་བའི་སྐབས་འདིར་ཐོན་ཡོད་ཅིང་། རྒྱ་ནག་གཞུང་གིས་རྒྱལ་སྤྱིའི་གསར་འགོད་པ་རྣམས་ཨོ་རྩེད་ཀྱི་གནས་ཚུལ་འགོད་རྒྱུར་དགའ་བསུ་ཞུ་ཡི་ཡོད་སྐོར་བསྒྲགས་ཡོད་ནའང་། ཟླ་འདིའི་ཕྱི་ཚེས་ ༢༠ ཉིན་ཨ་རིིའི་ཝ་ཤིང་ཊོན་ཆ་འཕྲིན་གྱིས་གནས་ཚུལ་ཞིག་སྤེལ་བའི་ནང་། འདི་ལོར་ཕྱིའི་གསར་འགོད་པ་རྣམས་ཨོ་རྩེད་ཀྱི་ཆེད་དུ་རྒྱ་ནག་ཏུ་སྐྱོད་སྐབས་རང་གི་རྒྱུན་སྤྱོད་གློག་ཀླད་དང་ཁ་པར་གྱི་ཚབ་ཏུ། འཕྲལ་སེལ་གྱི་ཁ་པར་དང་གློད་ཀླད་གསར་པ་བེད་སྤྱོད་བྱ་རྒྱུ་ཡིན་སྐོར་བརྗོད་འདུག་ཅིང་། རྒྱ་ནག་གཞུང་གིས་ཁོ་ཚོའི་ཁ་པར་དང་གློག་ཀླད་ནང་དྲ་འབུ་བླུགས་ཏེ་གསང་མྱུལ་བྱ་སྲིད་པའི་ཉེན་ཁ་ཡོད་པ་རེད་འདུག

དེ་བཞིན་རྒྱ་ནག་གཞུང་གིས་ཨོ་རྩེད་སྐབས་ཏོག་དབྱིབས་གཉན་རིམས་འགོག་སྡོམ་ལ་ཁ་གཡར་ཏེ་གསར་འགོད་པ་རྣམས་ལའང་བཀག་སྡོམ་ཆེན་པོ་བྱེད་བཞིན་ཡོད་འདུག དེ་ཡང་ཨོ་ལིམ་པིག་སྒྲིག་འཛུགས་དང་རྒྱ་ནག་གི་གོ་སྒྲིག་ཚོགས་ཆུང་གཉིས་ཀྱིས་གསར་འགོད་པ་དང་རྩེད་འགྲན་པ། ཕྱིའི་རྒྱལ་ཁབ་ཀྱིས་གཞུང་འབྲེལ་མི་སྣ་རྣམས་ཀྱིས་ཨོ་རྩེད་སྐབས་ལག་བསྟར་བྱ་དགོས་པའི་སྒྲིག་གཞི་ལམ་སྟོན་གྱི་དེབ་ཆུང་ཤོག་གྲངས་ ༨༤ ཅན་ཞིག་འགྲེལ་སྤེལ་བྱས་ཡོད་ཅིང་། དེའི་ནང་ཨོ་རྩེད་ཆེད་རྒྱ་ནག་ནང་སླེབས་མཁན་སྐྱེ་བོ་སུ་འདྲ་ཞིག་ཡིན་རུང་འགོག་ཁབ་བརྒྱབ་ཟིན་པའམ། ཡང་ན་རྒྱ་ནག་ཏུ་འབྱོར་རྗེས་ཉིན་གྲངས་ ༢༡ རིང་ཟུར་བཀག་ཏུ་འདུག་དགོས་པ། ཨོ་རྩེད་སྐབས་གསར་འགོད་པ་དང་རྩེད་འགྲན་པ། གཞུང་འབྲེལ་མི་སྣ་རྣམས་གོ་སྒྲིག་པའི་བཀོད་སྒྲིག་བྱས་པའི་ས་ཚིགས་ནས་བརྒལ་མི་ཆོག་པ་དང་། གཞུང་གིས་གོ་སྒྲིག་བྱས་པའི་མགྲོན་ཁང་དང་རྩེད་འགྲན་ར་བའི་བར་སྐྱོད་སྐབས་ཀྱང་པེ་ཅིན་ཨོ་ལིམ་པིག་རྩེད་འགྲན་གོ་སྒྲིག་ཚོགས་ཆུང་གི་བཀོད་སྒྲིག་བྱས་པའི་མོ་ཊའམ། རླངས་འཁོར། མེ་འཁོར་བཅས་ནང་མ་གཏོགས་གང་འདོད་དུ་འགྲོ་སྐྱོད་མི་ཆོག་པ་བཟོས་ཡོད་འདུག དེ་ཙམ་དུ་མ་ཟད་གསར་འགོད་པ་དང་རྩེད་འགྲན་པ། ཕྱི་རྒྱལ་གྱི་སྐུ་ཚབ་དབར་ལ་ཐུག་འཕྲད་ཀྱང་ཆོག་གི་མེད་པ་རེད་འདུག

འདས་ལོའི་ཕྱི་ཟླ་ ༡༡ པའི་ནང་རྒྱ་ནག་གི་ཕྱི་རྒྱལ་གསར་འགོད་པའི་མཐུན་ཚོགས་ཀྱིས། ད་ཐེངས་རྒྱ་ནག་གཞུང་གིས་རྒྱ་ནག་ཏུ་ཡོད་པའི་ཕྱིའི་གསར་འགོད་པ་རྣམས་ལ་ཨོ་ལིམ་པིག་གི་དཔལ་འབར་རྒྱ་ནག་ཏུ་འབྱོར་བའི་མཛད་སྒོ་ལྟ་བུའི་རིགས་ལ་བཀག་སྡོམ་བྱས་ཡོད་པ་མ་ཟད། འདས་པའི་ཟླ་ཁ་ཤས་ནང་གསར་འགོད་པ་ཚོ་ཨོ་ལིམ་པིག་གི་རྩེད་ར་ནང་ཡོང་དུ་མ་བཅུག་པའི་གནས་ཚུལ་བྱུང་འདུག གསར་འགོད་པ་འགའ་ཤས་ལ་གཞུང་འབྲེལ་མི་སྣས་སྡིགས་དམོག་དང་རྗེས་འདེད་བྱས་པའང་བྱུང་ཡོད་འདུག རྒྱ་ནག་གཞུང་གིས་ཚད་བཀག་དེ་དག་གཉན་རིམས་འགོག་སྡོམ་གྱི་ཆེད་དུ་ཡིན་སྐོར་འགྲེལ་བརྗོད་བྱས་ཡོད་ནའང་། གསར་འགོད་པ་རྣམས་ཀྱིས་དེ་ནི་རྒྱ་ནག་གཞུང་གིས་ཆེད་མངག་གསར་འགོད་པའི་བྱ་བར་སྟངས་འཛིན་དང་བར་ཆད་བཟོ་ཆེད་ཡིན་སྐོར་སྐྱོན་བརྗོད་བྱས་འདུག

གསར་འགོད་པ། པ་སངས་ཚེ་རིང་།