སི་པིན་ནང་རྒྱའི་དཔྱིད་གསར་དུས་ཆེན་གྱི་ཆབ་སྲིད་དྲིལ་བསྒྲགས་ལ་བོད་མི་ཁག་ཅིག་གིས་ངོ་རྒོལ་བྱས་ཡོད་པ་དང་དེ་བཞིན་པེ་ཅིན་ཨོ་རྩེད་འགྲན་ཚོགས་ཀྱི་ཆབ་སྲིད་གཡོ་ཇུས་ལ་ཡིད་ཆེས་དང་ཐད་གཏོང་ལ་ལྟ་ཉན་བྱ་རྒྱུ་མེད་པ་སོགས་ཀྱི་བོད་དོན་ཞི་བའི་གོམ་བགྲོད་ཅིག་ཨོ་གླིང་གནས་མཁར་གསར་ནས་མགོ་འཛུགས་གནང་འདུག
སེ་པན་གྱི་གྲོང་ཁྱེར་བྷར་སི་ལོ་ན་ (Barcelona) ནང་ཡོད་པའི་རྒྱ་ནག་གཞུང་ཚབ་ཁང་གིས་རྒྱའི་དཔྱིད་གསར་དུས་ཆེན་ལ་ཁ་གཡར་ཏེ། གྲོང་ཁྱེར་དེའི་ནང་ཉིན་གྲངས་ ༡༥ རིང་བོད་ཀྱི་གླུ་གཞས་ཞབས་བྲོ་སོགས་ཚུད་པའི་ལས་རིམ་སྣ་ཚོགས་ཤིག་གོ་སྒྲིག་བྱས་ཡོད་པ་ལྟར། ཁ་སང་ཕྱི་ཚེས་ ༣༠ ཉིན་ལས་རིམ་ཐོག་མར་མགོ་འཛུགས་བྱེད་སྐབས་བོད་ཀྱི་གཞས་སྣ་འཁྲབ་སྟོན་ཞེས་པའི་མིང་ཐོག་ནས་འཁྲབ་སྟོན་བྱས་ཏེ་བོད་རྒྱ་ཁུངས་ཡིན་ཚུལ་གྱི་རྣམ་པ་སྟོན་ཐབས་བྱས་ཡོད་པར་བརྟེན། སེ་པན་བོད་རིགས་ཚོགས་པའི་ཚོགས་མི་འགའ་ཡུལ་དངོས་སུ་ཕྱིན་ཏེ་བོད་རྒྱལ་དར་འཕྱར་ནས་ངོ་རྒོལ་སྐད་འབོད་གནང་ཡོད་འདུག
ཡུ་རོབ་སྤྱི་འཐུས་ཐུབ་བསྟན་དབང་ཆེན་ལགས་ཀྱིས་འདི་གའི་གསར་འགོད་པར། བོད་ཀྱི་གཞས་སྣ་འཁྲབ་ཀྱི་ཡིན་ལབ་ཡོད་ཀྱང་བོད་ནས་གཞས་འཁྲབ་མཁན་བསླེབས་མེད་པ་དང་། སེ་པན་ནང་ཡོད་པའི་བོད་རིགས་ཚོགས་པ་ཚོས་འཁྲབ་ཀྱི་མེད་པ་རེད། དེར་བརྟེན། སེ་པན་བོད་རིགས་ཚོགས་པའི་ཚོགས་མི་འགའ་ཡུལ་དངོས་སུ་ཕྱིན་ཏེ། བོད་ཀྱི་སྐོར་ལ་ག་རེ་བཤད་ཀྱི་ཡོད་མེད་དང་བོད་ཀྱི་གཞས་སྣ་ག་འདྲ་འཁྲབ་ཀྱི་ཡོད་མེད་ལྟ་བར་ཕྱིན་སྐབས། རྒྱ་གཞས་བཏང་ནས་འཁྲབ་སྟོན་བྱེད་ཀྱི་ཡོད་སྟབས། བོད་རིགས་ཚོགས་པའི་མི་འགའ་དེས་སྡིངས་ཆའི་མདུན་དུ་བོད་ཀྱི་རྒྱལ་དར་འཁྱེར་ཏེ་ངོ་རྒོལ་བྱས་ཡོད་པ་རེད་ལ། སྐབས་དེ་དུས་ལྟ་རྟོག་བྱེད་མཁན་རྒྱ་མི་དེ་དག་ལམ་སེང་ཡོང་སྟེ་བོད་མི་ངོ་རྒོལ་བ་རྣམས་ཕར་ཚུར་འབུད་རྒྱག་བཏང་སྟེ། བོད་ཀྱི་རྒྱལ་དར་དང་ཁ་པར་སོགས་འཕྲོག་པ་སོགས་སྤྱོད་པ་ངན་པོ་ཞེ་དྲགས་བྱས་འདུག ད་དུང་སྐབས་དེར་བོད་པ་ཚོས་ཚུལ་ལྡན་གྱི་ཐོག་ནས་རྒྱ་མི་ལ་སྐད་ཆ་བཤད་དེ་བོད་པའི་གཞས་འཁྲབ་ཀྱི་ཡིན་ཟེར་ནས་དྲིལ་བསྒྲགས་བྱེད་ཀྱི་འདུག་ཀྱང་། བོད་པའི་གཞས་མིན་པ་དང་འཁྲབ་མཁན་བོད་པ་མེད་ཅིང་། འཁྲབ་ཆས་ནི་བོད་པའི་མ་རེད་ཅེས་སྐད་ཆ་མང་པོ་བཤད་པ་དེ་དག་ཕྱི་རྒྱལ་མི་ཡིས་མཐོང་ཡོད་པ་རེད། ཕྱི་རྒྱལ་མི་མང་པོ་ཞིག་ལྟད་མོ་ལྟ་བར་སླེབས་ཡོད་པས་ཁོང་ཚོས་ང་ཚོར་རྒྱབ་སྐྱོར་གྱི་ཚུལ་དུ་ལག་པ་བརྡབ་པ་དང་བོད་པ་ལ་རྒྱབ་སྐྱོར་ཡོད་པའི་རྣམ་འགྱུར་སྟོན་པ་སོགས་བྱས་ཡོད་འདུག ཅེས་དང་། ད་ལྟའི་ཆར་མཛད་སྒོ་ཚོགས་དང་འཚོག་བཞིན་ཡོད་པ་རེད་ལ། ཁོ་ཚོས་ཉིན་གྲངས་ ༡༥ རིང་ཡོད་ཟེར་ནས་དྲིལ་བསྒྲགས་བྱེད་ཀྱི་འདུག ང་ཚོས་ལས་རིམ་ལ་ལྟ་གིན་བྱེད་ཀྱི་ཡིན། ལས་རིམ་གྱི་ནང་བོད་པའི་སྐོར་ལ་སྐད་ཆ་བཤད་རྒྱུ་ཡོད་པ་དང་ཚོགས་འདུ་སོགས་འཚོག་འཆར་ཡོད་ན་ང་ཚོ་འགྲོ་ཆོག་གི་ཡོད་པ་རེད། ད་ལྟའི་ཆར་ཉིན་རེའི་ལས་རིམ་ཆ་ཚང་བ་ཤེས་ཀྱི་མེད་པ་རེད། ཅེས་གསུངས་བྱུང་།
ད་ལོར་རྒྱ་ནག་གཞུང་ཚབ་ཁང་གིས་དཔྱིད་གསར་དུས་ཆེན་སྐབས་དམིགས་བསལ་གྱིས་ཉིན་གྲངས་མང་པོར་དྲིལ་བསྒྲགས་བྱེད་བཞིན་ཡོད་པའི་སྐོར་ལ་ཁོང་གིས། ནམ་རྒྱུན་དུ་ཉིན་གྲངས་གཅིག་གི་རིང་རྒྱ་མིའི་ལོ་གསར་བཏང་གི་ཡོད་པ་རེད། འོན་ཀྱང་། ད་ལོ་དམིགས་བསལ་གྱིས་ཉིན་གྲངས་ ༡༥ རིང་གྲོང་ཁྱེར་དེའི་ས་གནས་གལ་ཆེན་པོ་དེར་ལོ་གསར་གཏོང་གི་འདུག དེ་ཡང་ད་ལོ་རྒྱ་ནག་གིས་དམིགས་བསལ་གྱིས་གཞུང་ལ་ཆོག་མཆན་ཞུས་པ་དང་གཙོ་བོ་རྒྱ་ནག་གཞུང་ཚབ་རང་གིས་གྲ་སྒྲིག་བྱས་འདུག དེའི་དམིགས་ཡུལ་གཙོ་བོ་ནི་དྲིལ་བསྒྲགས་ཀྱི་ཆེད་དུ་རེད་འདུག ཁོ་ཚོས་སྐད་ཆ་བཤད་པ་དང་གཞས་སྣ་འཁྲབ་སྟོན། རྒྱ་ནག་གི་ཁ་ལག་དང་ཅ་ལག་བཙོང་པ་སོགས་བྱེད་བཞིན་འདུག དེའི་སྒང་ལ་ཉིན་གཉིས་གསུམ་གྱི་རྗེས་སུ་རྒྱ་ནག་ཏུ་དགུན་ཁའི་ཨོ་ལིམ་ཕིག་རྩེ་རྒྱུ་ཡིན་པས། ཨོ་ལིམ་པིག་དྲིལ་བསྒྲགས་བྱེད་པར་ཕྱི་རྒྱལ་མི་མང་དེ་ཚོ་མགོ་སྐོར་གཏོང་གི་འདུག ཁོ་རང་ཚོའི་དམིགས་ཡུལ་ནི་ཨོ་ལིམ་པིག་ཁྱབ་བསྒྲགས་ཆེན་པོ་བྱ་ཐུབ་རྒྱུ་དང་བོད་དེ་རྒྱའི་ཁུངས་ཡིན་པ་གསལ་སྟོན་བྱ་རྒྱུ་དེ་རེད་འདུག གང་ཡིན་ཟེར་ན། ལོ་གསར་སྲུང་གཙི་སྒོ་འབྱེད་ཀྱི་ཉིན་མོར། ཐོག་མ་ནས་བོད་ཀྱི་གཞས་སྣ་གཟིགས་འབུལ་ཞུ་ཡི་ཡིན་ཞེས་བྲིས་འདུག བོད་ཀྱི་གཞས་སྣ་འཁྲབ་ཀྱི་ཡིན་ཟེར་དུས་བོད་དེ་རྒྱ་མིའི་ནང་ལོགས་ལ་ཡོད་པ་དང་རྒྱ་མིའི་ཡིན་པ་སྟོན་རྒྱུའི་ཆེད་དུ་དེ་ལྟར་བརྗོད་པ་རེད། འོན་ཀྱང་། ང་ཚོ་ཚོགས་འདུའི་ནང་ཕྱིན་མེད་པས་སྐབས་དེར་བོད་དེ་རྒྱ་ཁུངས་ཡིན་པ་བཤད་ཡོད་མེད་ང་ཚོས་ཤེས་ཀྱི་མེད། ལས་རིམ་སྒོ་འབྱེད་སྐབས་སེང་གེ་དང་འབྲུག་འཁྲབ་པ། དེ་བཞིན་རྒྱ་གཞས་འཁྲབ་པ་དང་རྒྱའི་དྲག་རྩལ་ (Taiji) དང་ (Kungfu) ལ་སོགས་འཁྲབ་འདུག ཅེས་གསུངས་བྱུང་།
གཞན་ཡང་། ཨོ་གླིང་གི་གནས་མཁར་གསར་བོད་རིགས་མཐུན་ཚོགས་ཀྱི་གོ་སྒྲིག་འོག དེ་རིང་ནས་ཉིན་གྲངས་ ༥ ཡི་རིང་གནས་མཁར་གསར་ནས་སིཌ་ནེ་གྲོང་ཁྱེར་བར་སྤྱི་ལེ་ ༡༦༤ ཙམ་གྱི་བོད་དོན་ཞི་བའི་གོམ་བགྲོད་ཅིག་མགོ་འཛུགས་གནང་སྟེ། རྒྱ་ནག་གཞུང་གིས་བོད་དང་ཡུ་གུར་སོགས་ཀྱི་འགྲོ་བ་མིའི་ཐོབ་ཐང་ལ་རྡོག་རོལ་གཏོང་མུས་ཡིན་པར་སྐྱོན་བརྗོད་དང་། རྒྱ་ནག་གི་དགུན་ཁའི་ཨོ་རྩེད་འགྲན་ཚོགས་ཕྱིར་འཐེན་དགོས་པ། དེ་བཞིན། ཉེ་ལམ་བྲག་མགོར་རྒྱ་ནག་གཞུང་གིས་སངས་རྒྱས་ཀྱི་སྐུ་བརྙན་དང་མ་ཎི་ལག་འཁོར་སོགས་གཏོར་བཤིག་བཏང་ཡོད་པ་སོགས་ལ་ངོ་རྒོལ་ལས་འགུལ་རྒྱུ་ཡིན་འདུག
ཞི་བའི་གོམ་བགྲོད་ནང་མཉམ་ཞུགས་གནང་མཁན་བོད་ཀྱི་ཆབ་སྲིད་བཙོན་ཟུར་གྲྭ་བག་བྲོ་ལགས་ཀྱིས། ལུས་རྩལ་བ་དང་རྩེད་འགྲན་གོ་སྒྲིག་བྱེད་མཁན། དེ་བཞིན་རང་ཁྱིམ་ནས་བརྙན་འཕྲིན་བརྒྱུད་རྒྱ་ནག་ནང་གི་ཨོ་རྩེད་འགྲན་ཚོགས་ལ་ལྟ་མཁན་ཚོས། རྒྱ་ནག་གཞུང་ལ་ཡིད་ཆེས་བྱ་རྒྱུ་མེད། རྒྱ་ནག་གཞུང་གིས་བོད་ནང་གི་དགོན་པ་ཁག་དང་ལྷ་སྐུ་སོགས་གཏོར་བཤིག་དང་བོད་མི་རྣམས་ལ་དྲག་གནོན་བྱེད་ཀྱིན་ཡོད་སྟབས། ད་རེས་ཀྱི་ཨོ་ལིམ་པིག་རྩེད་འགྲན་འཚོགས་ཏེ་ཞི་བདེ་ཡོང་རྒྱུ་ཞིག་གཏན་ནས་མེད། ཅེས་བརྗོད་ཡོད་པ་དང་། ཕྱི་ཟླ་ ༢ ཚེས་ ༤ སྟེ། རྒྱ་ནག་ནང་ཨོ་ལིམ་ཕིག་མགོ་འཛུགས་ཀྱི་ཉིན་མོར་བོད་དོན་ཞི་བའི་གོམ་བགྲོད་ཀྱི་ལས་འགུལ་དེ་སིཌ་ནེ་གྲོང་ཁྱེར་གྱི་ (Martin Place)ཞེས་པའི་ས་ཚིགས་ནས་མཇུག་སྒྲིལ་རྒྱུ་ཡིན་འདུག
ཡང་ཁ་སང་སྦེལ་འཇམ་གྱི་གྲོང་ཁྱེར་ (Diksmuide) ནང་ཡོད་ཅིང་ལོ་རྒྱུས་ཀྱི་དྲན་རྟེན་ལྕོག་མཁར་ (Yser Towers) སྟེང་བོད་ཀྱི་རྒྱལ་དར་སྒྲེང་འཛུགས་དང་བོད་མི་མང་པོ་ས་ཁུལ་དེར་འཛོམས་ཏེ། བོད་ལ་རང་དབང་དགོས་པ་དང་རྒྱ་ནག་གི་ཨོ་རྩེད་འགྲན་ཚོགས་ལ་ངོ་རྒོལ་ཡོད་པའི་སྐད་འབོད་དང་ལས་འགུལ་སྤེལ་ཡོད་པ་དང་། ཡུ་རོབ་ཀྱི་ཅེག་སྤྱི་མཐུན་རྒྱལ་ཁབ་ཀྱི་རྒྱ་ནག་གཞུང་ཚབ་མདུན་དུ། བོད་དོན་རྒྱལ་སྐྱོར་བ་ཁག་ཅིག་གིས་ཞི་ཅིན་ཕིན་དམར་ཧྲང་ཡིན་པའི་འདྲ་འབག་བཟོས་ཏེ། རྒྱ་ནག་གི་འགྲོ་བ་མིའི་ཐོབ་ཐང་གི་གནས་སྟངས་ལ་སྐྱོན་བརྗོད་དང་སྦྲགས་ཨོ་ལིམ་ཕིག་རྩེད་འགྲན་མཚམས་འཇོག་དགོས་པའི་ངོ་རྒོལ་ལས་འགུལ་སྤེལ་ཡོད་པ་རེད་ལ། གཞན་ཡང་ཨ་རི་དང་ཡུ་རོབ་ཀྱི་རྒྱལ་ཁབ་ཁག་གང་སར་བོད་མི་དང་ཡུ་གུར་བ། ཧོང་ཀོང་བ་དང་རྒྱ་རིགས་དམངས་གཙོ་དོན་གཉེར་བ་སོགས་ཀྱིས་རྒྱ་ནག་གཞུང་ལ་ངོ་རྒོལ་གྱི་ལས་འགུལ་སྤེལ་དང་སྤེལ་མུས་རེད་འདུག
གསར་འགོད་པ། སྐལ་བཟང་སྦྱིན་པ། བསྟན་འཛིན་ཕུར་བུ།
