ཉི་ཧོང་གྲོས་ཚོགས་འོག་མས་རྒྱ་ནག་ནང་གི་འགྲོ་བ་མིའི་ཐོབ་ཐང་སྐོར་གྱི་གྲོས་ཆོད་གཏན་འབེབ་གནང་།

ཚོང་འབྲེལ་ཤུགས་ཆེར་ཡོད་པའི་ཁྱིམ་མཚེས་རྒྱ་ནག་དང་མཐུན་གྲོགས་རྒྱལ་ཁབ་ཨ་རི་གཉིས་ཀྱི་ཤུགས་རྐྱེན་ཆེན་པོ་ཡོད་པའི་ཉི་ཧོང་གི་གྲོས་ཚོགས་ནང་རྒྱ་ནག་ནང་གི་འགྲོ་བ་མིའི་ཐོབ་ཐང་སྐོར་གྱི་གྲོས་གཞི་གྲོས་འཆར་ཞིག་ལ་ལོ་གཅིག་ལྷག་ལ་རྩོད་གླེང་བྱུང་རྗེས་གཏན་འབེབ་བྱུང་འདུག

རུ་ཊར་གསར་ཁང་གིས་གནས་ཚུལ་སྤེལ་བ་ལྟར་ན། དེ་རིང་ཞོགས་པར་ཉི་ཧོང་གི་གྲོས་ཚོགས་འོག་མའི་ནང་འདས་པའི་ལོ་གཅིག་ལྷག་རིང་རྩོད་གླེང་ཤུགས་ཆེར་བྱུང་བའི་རྒྱ་ནག་ནང་གི་འགྲོ་བ་མིའི་ཐོབ་ཐང་སྐོར་གྱི་གྲོས་གཞི་གྲོས་འཆར་དེ་དངོས་སུ་གཏན་འབེབ་བྱས་ཏེ། ཉི་ཧོང་གི་འཛིན་སྐྱོང་ངོས་ནས་རྒྱལ་སྤྱིའི་སྤྱི་ཚོགས་དང་མཉམ་འབྲེལ་སྒོས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ལ་རྒྱུས་ལོན་གྱིས་དཀའ་ངལ་སེལ་ཐབས་གནང་དགོས་པའི་སྐུལ་འདེད་བཏང་ཡོད་འདུག

གྲོས་ཚོགས་ཀྱིས་གཏན་འབེབ་བྱས་པའི་གྲོས་ཆོད་དེའི་ནང་། རྒྱལ་སྤྱིའི་སྤྱི་ཚོགས་ངོས་ནས་བཀག་སྐྱིལ་ཁང་ཡོད་སྐོར་དང་། ཤིན་ཅང་ཡུ་གུར་རང་སྐྱོང་ཁུལ་དང་བོད། ཧོང་ཀོང་བཅས་ནང་དུ་ཆོས་དད་རང་དབང་རྡོག་རོལ་གྱི་གནས་ཚུལ་ཐད་བློ་འཚབ་ཡོད་པ་དང་། འགྲོ་བ་མིའི་ཐོབ་ཐང་ནི་ནང་སྲིད་ཀྱི་གནད་དོན་ཙམ་ཞིག་མིན་པར། དེ་ལ་འཇིག་རྟེན་ཀུན་ཁྱབ་ཀྱི་རིན་ཐང་ལྡན་ཡོད་པས། རྒྱལ་སྤྱིའི་སྤྱི་ཚོགས་ཁྱོན་ཡོངས་ཀྱིས་བློ་འཚབ་བྱ་འོས་པ་ཞིག་ཡིན་སྐོར་དང་། གྲོས་ཚོགས་ངོས་ནས་འགྲོ་བ་མིའི་ཐོབ་ཐང་གི་གནས་སྟངས་དེ་ཉིད་རྒྱལ་སྤྱིའི་སྤྱི་ཚོགས་ལ་ཉེན་ཁ་ཞིག་ཡིན་པ་ངོས་འཛིན་བྱ་རྒྱུ་ཡིན་སྐོར་སོགས་འཁོད་འདུག

རྒྱ་ནག་ནི་ཉི་ཧོང་གི་ཚོང་འབྲེལ་རྒྱལ་ཁབ་ཆེ་ཤོས་དེ་ཡིན་ཞིང་། ད་ལན་པེ་ཅིན་གྱི་དགུན་དུས་ཨོ་རྩེད་འཚོག་ལ་ཉེ་བའི་སྐབས་འདིར། གྲོས་ཚོགས་ཀྱིས་རྒྱ་ནག་ལ་ཁ་གཏད་ཀྱི་གྲོས་ཆོད་འདི་ལྟ་བུ་ཞིག་གཏན་འབེབ་བྱས་པ་དེས། ཉི་ཧོང་ལ་རང་ཤུགས་ཀྱིས་རྒྱ་ནག་གི་དཔལ་འབྱོར་གནོན་ཤུགས་སླེབས་རྒྱུའི་ཉེན་ཁ་ཡོད། འོན་ཀྱང་འདས་ལོའི་ཕྱི་ཟླ་ ༡༠ པའི་ནང་གསར་དུ་བདམས་ཐོན་བསྐོ་གཞག་བྱུང་བའི་ཉི་ཧོང་གི་སྲིད་བློན་གསར་པ་སྐུ་ཞབས་ཧྥུ་མིའོ་ཀི་ཤི་ཌ་ (Fumio Kishida)ལགས་ཀྱིས། དགོས་གལ་བྱུང་ཚེ་རྒྱ་ནག་ལ་བསྟུན་མཁན་ལྟ་བུ་བྱ་རྒྱུ་མིན་སྐོར་བརྗོད་ཡོད་པ་མ་ཟད། བསྐོ་གཞག་བྱུང་ནས་ཟླ་བ་གཅིག་ལས་མ་འགོར་བར་ཡུལ་དེའི་རྒྱལ་སྲུང་བློན་ཆེན་ཟུར་པ་དམག་སྤྱི་ནཱ་ཀ་ཊ་ནི་(Gen Nakatani) ལགས་སྲིད་བློན་གྱི་འགྲོ་བ་མིའི་ཐོབ་ཐང་ཐད་ཀྱི་སློབ་སྟོན་པར་བསྐོ་གཞག་བྱས་ཡོད་པ་རེད།

ཉི་ཧོང་གི་གྲོས་ཚོགས་འོག་མའི་འགྲོ་བ་མིའི་ཐོབ་ཐང་ཚོགས་ཆུང་གི་སྣེ་ཁྲིད་པ་འཐུས་མི་སྐུ་ཞབས་ཡ་སུའི་ཧྥུ་ན་ཡ་མ་ (Yasue Funayama) ལགས་ཀྱིས། གྲོས་ཆོད་གཏན་འབེབ་མ་བྱུང་སྔོན་གྱི་བཅར་འདྲི་ཞིག་གི་སྟེང་། གྲོས་ཆོད་འདི་ནི་རླབས་ཆེ་བའི་གོམ་པ་དང་པོ་དེ་ཡིན་པ་དང་། གལ་ཏེ་གྲོས་ཚོགས་འཐུས་མི་ཡོངས་ཀྱིས་འགྲོ་བ་མིའི་ཐོབ་ཐང་གནད་དོན་དེ་ངོས་འཛིན་བྱས་ན། ད་གཟོད་ང་ཚོས་དེའི་ཐོག་ཕྱག་ལས་ག་རེ་གནང་དགོས་མིན་ལྟ་དགོས་རྒྱུ་རེད། ཅེས་བརྗོད་ཡོད་འདུག་ལ། ཁོང་གིས་གྲོས་ཆོད་འདིས་རང་ཤུགས་ཀྱིས་མ་འོངས་པར་ཉི་ཧོང་གི་བཟོ་གྲྭ་རྣམས་ཀྱིས་ཚོང་དོན་གཉེར་སྐབས་འགྲོ་བ་མིའི་ཐོབ་ཐང་གི་དོན་ཆེན་འདི་བརྩི་དགོས་པའི་ཁྲིམས་གཞིའི་རིགས་གཏན་འབེབ་ཡོང་རྒྱུར་ལམ་ཁ་ཕྱེས་པ་ལྟ་བུ་ཞིག་ཆགས་ཀྱི་ཡོད་སྐོར་བརྗོད་འདུག

ཉི་ཧོང་ནི་འདི་ལོའི་རྒྱ་ནག་གི་དགུན་དུས་ཨོ་རྩེད་ལ་ངོ་རྒོལ་མཚོན་ཆེད་གཞུང་འབྲེལ་གྱི་སྐུ་ཚབ་མངག་གཏོང་མི་བྱེད་པའི་ཨ་རིའི་སྣེ་ཁྲིད་པའི་དམངས་གཙོའི་སྟོབས་ཆེན་རྒྱལ་ཁབ་གྲས་ཤིག་ཡིན་ཞིང་། ད་ལན་གྱི་རྒྱ་ནག་ནང་གི་འགྲོ་བ་མིའི་ཐོབ་ཐང་སྐོར་གྱི་གྲོས་ཆོད་དེ་ཉིད་འདས་ལོ་ནས་གྲོས་ཚོགས་ཀྱི་མདུན་ཅོག་སྟེང་བསླེབས་ཡོད་ཀྱང་། ཉི་ཧོང་གི་ཆབ་སྲིད་ཁྲོད་ཚོང་འབྲེལ་ཤུགས་ཆེར་ཡོད་པའི་ཁྱིམ་མཚེས་རྒྱ་ནག་དང་མཐུན་གྲོགས་རྒྱལ་ཁབ་ཨ་རི་གཉིས་ཀྱི་ཤུགས་རྐྱེན་ཆེན་པོ་ཡོད་པའི་རྒྱུ་མཚན་གྱིས། གྲོས་ཆོད་ཀྱི་ནང་དོན་དང་ཚིག་འབྲུ་སོགས་ཀྱི་ཐད་ནས་ལྗིད་སྙོམས་ཡོང་རྒྱུར་འབད་བརྩོན་བྱས་ཡོད་ལ། ཐ་ན་གཞུང་འཛིན་གུ་ཡངས་དམངས་གཙོ་ཡར་རྒྱས་ཚོགས་པའི་འཐུས་མིའི་ཁྲོད་དུའང་བསམ་ཚུལ་མི་འདྲ་བ་བྱུང་སྟེ། རྙིང་ཞེན་ཅན་གྱི་འཐུས་མི་རྣམས་ཀྱིས་རྒྱ་ནག་གི་སྲིད་ཇུས་སྤྱི་དང་། དམིགས་སུ་རྒྱལ་སྲུང་གི་གནད་དོན་ཐད་ལ་རྒྱ་ནག་ལ་ལྟ་ཕྱོགས་ལེགས་པོ་མེད་ནའང་། འཐུས་མི་གཞན་རྣམས་ཀྱིས་རྒྱ་ནག་དང་དམ་དུ་འབྲེལ་བའི་ཚོང་འབྲེལ་གློད་རྒྱུར་ཐེ་ཚོམ་བྱེད་ཀྱི་ཡོད་པ་རེད།

ཉི་ཧོང་དུས་བབ་ཀྱི་དེ་འབྲེལ་གནས་ཚུལ་ནང་། གྲོས་ཚོགས་ཀྱི་གྲོས་ཆོད་དེ་ཉིད་འདས་ལོར་ཟིན་བྲིས་བཏབ་ནས་ད་བར་བསམ་ཚུལ་མི་མཐུན་པ་མང་པོ་ཐོན་པའི་རྐྱེན་གྱིས། དེ་རིང་གཏན་འབེབ་བྱུང་བའི་གྲོས་ཆོད་ཀྱི་ཚིག་གཞི་དང་གྲོས་ཚོགས་ནང་ཐོག་མར་འདོན་སྐབས་ཀྱི་ཚིག་གཞི་དབར་ཁྱད་པར་ཆེན་པོ་བྱུང་ཡོད་ཚུལ་འཁོད་འདུག དེ་སྔ་ “འགྲོ་བ་མིའི་ཐོབ་ཐབ་རྡོག་རོལ་”ཞེས་པའི་ཚིག་འབྲུ་དེ་ཉིད་ “འགྲོ་བ་མིའི་ཐོབ་ཐང་གི་གནས་སྟངས་” ཞེས་པར་བསྒྱུར་ཡོད་ཅིང་། “ངོ་རྒོལ་སྐྱོན་བརྗོད་” ཅེས་པའི་ཚིག་དེ་ནག་བསུབ་བཏང་ཡོད་འདུག དེ་ཙམ་དུ་མ་ཟད་གྲོས་ཆོད་ནང་རྒྱ་ནག་ཅེས་གསལ་རྗེན་དུ་བརྗོད་མེད་པ་རེད་འདུག

ད་བར་ཧྥ་རན་སི་དང་། དབྱིན་ཇི། ཁེ་ན་ཌ། ལི་ཐུ་ནི་ཡ། ཧོ་ལན་ཌི་བཅས་ཀྱིས་གྲོས་ཚོགས་ངོས་ནས་ཀྱང་འདི་ལྟ་བུའི་གྲོས་ཆོད་གཏན་འབེབ་བྱས་ཏེ། རྒྱ་ནག་གིས་བོད་ཀྱི་བྱང་ཕྱོགས་ཀྱི་ཁྱིམ་མཚེས་ཤར་ཊུར་ཀི་སི་ཐན་(ཤིན་ཅང་)ནང་འགྲོ་བ་མིའི་ཐོབ་ཐང་རྡོག་རོལ་ཚབས་ཆེན་གཏོང་བཞིན་པར་སྐྱོན་བརྗོད་དྲག་པོ་བྱས་ཡོད་ཅིང་། དེའི་ཁྲོད་ནས་ཧྥ་རན་སི་གྲོས་ཚོགས་ཀྱིས་རྒྱ་ནག་གིས་ཁུལ་དེར་མི་རིགས་རྩ་མེད་གཏོང་བཞིན་པའི་ངོས་འཛིན་བྱས་ཡོད་པ་རེད། ཨ་རིས་བསྟུན་མར་ཡུ་གུར་འགྲོ་བ་མིའི་ཐོབ་ཐང་སྲིད་ཇུས་ཁྲིམས་ཡིག་ (Uyghur Human Rights Policy Act) དང་། ཡུ་གུར་བཙན་བཀོལ་ངལ་རྩོལ་བཀག་སྡོམ་ཁྲིམས་ཡིག་ (Uyghur Forced Labor Prevention Act) གཏན་འབེབ་བྱས་ཏེ་ཤར་ཊུར་ཀི་སི་ཐན་ནས་བཙན་བཀོལ་ངལ་རྩོལ་ལས་ཐོན་སྐྱེད་བྱས་པའི་ཚོང་ཟོག་རྣམས་ཨ་རིར་ནང་འདྲེན་བྱ་རྒྱུར་བཀག་སྡོམ་དང་། ཤར་ཊུར་ཀི་སི་ཐན་ནང་ཡོད་པའི་རྒྱ་རིགས་མགོ་འཁྲིད་རྣམས་ལ་དཔལ་འབྱོར་གྱི་ཉེས་ཆད་ལྕི་མོ་བཅད་ཡོད་པ་རེད། འོན་ཀྱང་རྒྱ་ནག་གཞུང་གིས་དུས་རྒྱུན་ལྟར་ཨ་རིས་མཚོན་པའི་རྒྱལ་ཁབ་དེ་དག་ལ་ནང་སྲིད་ལ་ཐེ་བྱུས་བྱ་མི་ཉན་སྐོར་དང་། ཡུ་གུར་མི་རིགས་ས་ཡ་ ༡ ལྷག་བཀག་སྐྱིད་ཁང་དུ་ཌབཅུག་ཟེར་བ་དེ་དུས་རབས་འདིའི་རྫུན་གཏམ་ཆེ་ཤོས་དེ་ཡིན་སྐོར་སོགས་བསྒྲགས་ཡོད་པ་རེད།

གསར་འགོད་པ། པ་སངས་ཚེ་རིང་།