རྒྱ་ནག་གཞུང་གིས་བྲག་མགོ་དགོན་པར་མུ་མཐུད་དམ་དྲག་ཆེན་པོ་བྱེད་བཞིན་ཡོད་པ་མ་ཟད་ཕྱི་ལོ་ ༢༠༡༨ ལོར་ཀློད་གྲོལ་ཐོབ་པའི་བྲག་མགོ་དགོན་པའི་སློབ་དགེ་དགེ་བཤེས་ཚེ་དབང་རྣམ་རྒྱལ་ལགས་དང་ཁོང་གི་བཙོན་རོགས་ཕྱག་མཛོད་བསྟན་དགའ་དང་རྩིས་པ་དགྲ་ལྷག་བཅས་ལ་འགྲོ་འདུག་རང་དབང་མེད་པའི་ཁར་ནད་མནར་གྱིས་དཀའ་ངལ་འཕྲད་བཞིན་ཡོད་འདུག
བཙན་བྱོལ་ནང་ཡོད་པའི་འབྲེལ་ཡོད་ཅིག་གིས་འདི་གའི་གསར་འགོད་པར། འདས་ལོའི་ཕྱི་ཟླ་ ༡༢ ཚེས་ ༢༣ ཙམ་ནས་བཟུང་རྒྱ་ནག་གཞུང་གིས་བྲག་མགོ་དགོན་པར་གཏོར་བཤིག་དྲག་གནོན་བྱས་ཏེ་ད་ལྟའང་མུ་མཐུད་དམ་དྲག་དང་དོགས་ཟོན་ཆེན་པོའི་འོག་གནས་ཡོད་པ་མ་ཟད། ཐད་ཀར་འབྲེལ་བ་ཡོད་པ་དང་རྣམ་འགྱུར་ཡག་པོ་མེད་པ་སོགས་ཀྱི་ཉེས་མིང་འོག སྐབས་དེར་འཛིན་བཟུང་བྱས་པའི་བྲག་མགོ་དགོན་པའི་མཁན་པོ་དཔལ་དགའ་ལགས་དང་ཕྱག་མཛོད་ཉི་མ། གྲྭ་བཀྲ་ཤིས་རྡོ་རྗེ་ལགས་དང་ཉི་མ། དེ་བཞིན། སངས་རྒྱས་ཀྱི་སྐུ་རྟེན་དེ་དག་དང་འབྲེལ་བའི་ལྷ་བྲིས་པའི་བུ་བཀྲོལ་པ། ལྷ་མོ་དབྱངས་སྐྱིད་དང་ཚེ་རིང་བསམ་འགྲུབ་ཞེས་པ་སོགས་སྐྱ་སེར་བཅུ་གྲངས་དེ་ཡི་ད་ལྟའི་གནས་སྟངས་དང་། ཁོང་རྣམས་ཀློད་གྲོལ་བཏང་ཡོད་མེད་སོགས་གང་ཡང་ཤེས་རྟོགས་ཐུབ་ཀྱི་མེད་སྐོར་བརྗོད་བྱུང་།
ཡང་གནས་ཚུལ་མཁོ་སྤྲོད་པས་བརྗོད་པ་ལྟར་ན། བོད་ཀྱི་ཆབ་སྲིད་བཙོན་པ་སྤྱི་མཚུངས་ལྟར། བཙོན་གྲོལ་ཐོབ་ཀྱང་འགྲོ་འདུག་ལ་རང་དབང་མེད་པ་དང་། ལས་ཁུངས་དང་ཚོགས་སྡེ། དེ་བཞིན་དགོན་པ་སོགས་ཀྱི་ནང་འཛུལ་ཞུགས་མི་ཆོག་པ་སོགས་ཀྱི་དམ་དྲག་བཀག་རྒྱ་ཆེ་བར་བརྟེན། ཕྱི་ལོ་༢༠༡༨ ལོའི་ཟླ་ ༡ ནང་ཀློད་གྲོལ་ཐོབ་ཅིང་རྐང་པ་གཉིས་ནད་པར་གྱུར་བའི་བྲག་མགོ་དགོན་པའི་སློབ་དགེ་དགེ་བཤེས་ཚེ་དབང་རྣམ་རྒྱལ་ལགས་དང་། ཁོང་དང་མཉམ་དུ་བཙོན་འཇུག་མནར་གཅོད་མྱངས་བའི་བྲག་མགོ་དགོན་པའི་ཕྱག་མཛོད་དགེ་བཤེས་བསྟན་འཛིན་དཔལ་བཟང་ངམ་(བསྟན་དགའ)དང་། དགོན་པའི་རྩིས་པ་དང་དྲུང་ཡིག་གཅིག་ལྕོགས་དགྲ་ལྷ་ལགས་བཅས་ལ་དུས་ཐོག་ཏུ་ཚད་ལྡན་སྨན་ཁང་དུ་བསྟེན་གཏུག་བྱེད་མ་བཅུག་པའི་རྐྱེན་གྱིས་མུ་མཐུད་ནད་མནར་གྱིས་དཀའ་ངལ་འཕྲད་ཀྱི་ཡོད་འདུག
འདས་ལོའི་ཕྱི་ཟླ་ ༡༡ ཚེས་ ༣ ཉིན་བྲག་མགོའི་ས་གནས་སྲིད་གཞུང་གི་དམར་ཤོག་མགོ་ཁྲིད་ཚོས་བྲག་མགོ་དགོན་པའི་འཛིན་སྐྱོང་འོག་ཡོད་པའི་དགེ་ལྡན་ནང་བསྟན་སློབ་གྲྭར་ཡིག་ཆ་ཚད་ལྡན་མེད་སྐོར་བརྗོད་དེ་སྒོ་བརྒྱབ་བཅུག་ཡོད་པ་དང་། ཕྱི་ཟླ་ ༡༢ ཚེས་ ༢༣ ཙམ་ལ་དགོན་པའི་ཉེ་འདབས་སུ་ཡོད་པའི་མ་ཎི་ལག་འཁོར་གྲངས་ ༤༠ ལྷག་དང་མཐོ་ཚད་རྨིད་༩༩ ལྷག་ཅན་གྱི་ཐུབ་དབང་གི་སྐུ་བརྙན་ཞིག་དང་། རྗེ་བཙུན་བྱམས་པ་མགོན་པོའི་སྐུ་བརྙན་ཞིག་གཏོར་བཤིག་བཏང་བ་སོགས་རིག་གནས་གསར་བརྗེ་བསྐྱར་ལོག་བྱས་པ་ལྟ་བུའི་བྱ་འགུལ་སྤེལ་དང་སྤེལ་མུས་ཡིན་འདུག
དེ་སྔོན་ཕྱི་ལོ་ ༢༠༡༢ ལོའི་ཟླ་ ༡ ཚེས་ ༢༣ སྟེ་རྒྱ་ནག་གི་དཔྱིད་གསར་དུས་སྟོན་ཉིན། བྲག་མགོ་རུ་སེར་སྐྱ་མང་ཚོགས་ཀྱིས་རྒྱ་ནག་གཞུང་གི་བཙན་གནོན་ལ་ངོ་རྒོལ་བྱེད་སྐབས། རྒྱ་གཞུང་གིས་མི་མང་ནང་གང་བྱུང་མེ་མདས་བརྒྱབ་སྟེ་བོད་མི་ཁག་ཅིག་དམར་གསོད་དང་རྨས་སྐྱོན་བཟོས་ཡོད་པ་དང་། དེ་ནས་ཉིན་ཤས་རྗེས་ཁྲིན་ཏུའུ་ནས་སྤྲུལ་སྐུ་བློ་བཟང་བསྟན་འཛིན་དང་། བྲག་མགོ་དགོན་པའི་སློབ་དགེ་དགེ་བཤེས་ཚེ་དབང་རྣམ་རྒྱལ། ཚོང་པ་འཕྲིན་ལས། རྩིས་པ་དགྲ་ལྷ། དེའི་རྗེས་བྲག་མགོ་དགོན་པའི་ཕྱག་མཛོད་རྒན་པ་དགེ་བཤེས་བསྟན་འཛིན་དཔལ་བཟང་ངམ་བསྟན་དགའ་བཅས་ཞི་རྒོལ་དང་འབྲེལ་བ་ཡོད་པའི་ཉེས་མིང་འོག་འཛིན་བཟུང་བྱས་ཏེ་ཟླ་བ་མང་པོར་གར་སོང་ཆ་མེད་དུ་གྱུར་རྗེས། ཁྱིམ་མི་དང་རང་དབང་ཁྲིམས་རྩོད་པ་སོགས་གང་མེད་པར་སྒོ་ཆེན་དགོན་པའི་སྤྲུལ་སྐུ་བློ་བཟང་བསྟན་འཛིན་ལ་ལོ་༧ དང་། ཕྱག་མཛོད་དགེ་བཤེས་བསྟན་འཛིན་དཔལ་བཟང་ངམ་(བསྟན་དགའ་)དང་། སློབ་དགེ་དགེ་བཤེས་ཚེ་དབང་རྣམ་རྒྱལ་དང་རྩིས་པ་དགྲ་ལྷ་གཉིས་ལ་ལོ་ ༦ རེ། དེ་བཞིན་དགོན་པའི་ཚོང་པ་འཕྲིན་ལས་ལ་ལོ་ ༥ བཅས་ཀྱི་ཁྲིམས་ཐག་བཅད། ཕྱིས་སུ་ཁོང་རྣམ་བཙོན་འཇུག་དུས་ཡུན་རྫོགས་ཏེ་རིམ་གྱིས་ཀློད་གྲོལ་ཐོབ་ཡོད་ཀྱང་དགོན་པར་ཕེབས་མི་ཆོག་པ་དང་། འགྲོ་འདུག་ལ་རང་དབང་མེད་པའི་རྐྱེན་གྱིས་ཚད་ལྡན་སྨན་པར་བསྟེན་གཏུག་མ་ཐུབ་པ་སོགས་ཀྱི་དཀའ་ངལ་འཕྲད་བཞིན་ཡོད་འདུག
རྒྱ་གར་ལྷོ་ཕྱོགས་ཀྱི་གསར་འགོད་པ་དོན་འགྲུབ་བཀྲ་ཤིས།
