དེ་རིང་སྔ་དྲོར་དབུས་གཙང་ཆོལ་ཁའི་སྤྱི་འཐུས་ཀྱི་སྒུག་ཐོ་དང་པོ་བསྟན་འཛིན་ཆོས་འཛིན་ལགས་ནས་སྐབས་བཅུ་བདུན་པའི་སྤྱི་འཐུས་ཀྱི་ལས་འཁུར་དམ་བཅའ་ཕུལ།
ཉེ་སྔོན་དོན་གྲུབ་བཀྲ་ཤིས་ལགས་ཀྱིས་སྤྱི་འཐུས་ནས་རྩ་དགོངས་ཞུས་ཡོད་པ་ལྟར། དེ་རིང་སྔ་དྲོའི་ཆུ་ཚོད་ ༡༠ པའི་ཐོག་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཁང་དུ། དབུས་གཙང་ཆོལ་ཁའི་སྤྱི་འཐུས་ཀྱི་སྒུག་ཐོ་དང་པོ་བསྟན་འཛིན་ཆོས་འཛིན་ལགས་ཀྱིས་བོད་མི་མང་སྤྱི་འཐུས་ཚོགས་གཙོ་མཆོག་གི་མདུན་དུ་སྤྱི་འཐུས་ཀྱི་ལས་འཁུར་དམ་བཅའ་ཕུལ་སོང་ལ། དབུས་གཙང་ཆོལ་ཁའི་སྤྱི་འཐུས་ཀྱི་སྒུག་ཐོ་གཉིས་པ་སྤྱི་ཟུར་བསམ་གཏན་ཆོས་སྒྲོན་ལགས་དང་སྒུག་ཐོ་གསུམ་པ་བཅོ་ལྔ་ཚེ་རིང་ལགས་ཡིན་པ་རེད།
དམ་འབུལ་ཞུས་རྗེས་གསར་འགོད་པས་སྤྱི་འཐུས་བསྟན་འཛིན་ཆོས་འཛིན་ལགས་ཀྱིས་གསར་འགོད་པར། ཐོག་མར་ངའི་ངོས་ནས་བོད་མི་ཡོངས་ལ་འཚམས་འདྲི་བཀྲ་ཤིས་བདེ་ལེགས་ཞུ་ཡི་ཡོད། དེ་རིང་ང་རང་སྐབས་བཅུ་བདུན་པའི་བོད་མི་མང་སྤྱི་འཐུས་ལ་འདེམས་བསྐོ་བྱུང་བ་དང་དམ་འབུལ་ཡང་ལེགས་པོའི་ངང་ནས་འགྲུབ་སོང་། སྤྱིར་བཏང་ང་རང་གི་འདས་པའི་སྤྱི་ཚོགས་ཞབས་ཞུའི་དུས་ཡུན་ནང་མངོན་འདོད་ཆེ་ཤོས་ནི་བོད་མི་མང་སྤྱི་འཐུས་ལྷན་ཚོགས་ནང་ཞབས་འདེགས་ཀྱི་གོ་སྐབས་ཤིག་བྱུང་ན་བསམ་གྱི་ཡོད། དེར་བརྟེན་དེ་རིང་དངོས་སུ་འགྲུབ་པར་སེམས་སུ་དགའ་ཚོར་ཆེན་པོ་བྱུང་སོང་། དགའ་ཚོར་ཤུགས་ཆེན་པོ་བྱུང་དགོས་དོན་ནི་ང་རང་ལ་རྒྱབ་སྐྱོར་བ་དང་ཡིད་ཆེས་གནང་མཁན་མང་པོ་ཡོད་པ་དང་། ང་རང་གི་ནང་མི་ཕ་མ་གཙོས་པའི་གྲོགས་པོ་གྲོགས་མོ། དེ་བཞིན་ཁ་ཡོད་ལག་ཡོད་ཀྱིས་ཕྱག་རོགས་གནང་མཁན་མང་པོ་ཞིག་ཡོད། ད་དུང་ང་རང་ལ་འོས་འཕེན་མཁན་དང་བོད་མི་མང་པོའི་སྙིང་ཉེ་བོའི་ངང་ནས་ང་ལ་སློབ་གསོ་བསྐྱོན་པ་སོགས་ཀྱིས་དེ་རིང་དམ་འབུལ་ཞུ་དུས་སོ་སོར་དགའ་ཚོར་ཆེན་པོ་དང་གདེང་སྤོབས་ཆེན་པོ་སྐྱེས་སོང་ཞུ་ཡི་ཡིན། ཡིན་ནའང་། དམ་འབུལ་གྱི་ཚིག་རེ་རེ་འདོན་ཡོང་དུས་འཇིགས་སྣང་གི་ཚོར་བ་ཤུགས་ཆེན་པོ་བྱུང་སོང་། དེ་རིང་དམིགས་བསལ་སྤྱི་འཐུས་ལྷན་ཁང་ནང་གཞོན་པའི་ནང་ནས་ལོ་ཆུང་བ་ཞིག་ཆགས་ཀྱི་ཡོད་པས། ཉམས་མྱོང་གི་ཆ་ནས་སོ་སོས་ནུས་པ་སྤུངས་ཐུབ་རེད་པས་བསམ་ནས་དྲི་བ་བསླེབས་སོང་། ཡིན་ནའང་འདས་པའི་ལོ་ཤས་ནང་ཤེས་ཡོན་གང་སྦྱངས་པ་རྣམས་ལག་བསྟར་བྱེད་ཀྱི་ཡིན་བསམ་པའི་འདུན་པ་ཆེན་པོ་ཡོད། དེ་ཡང་ང་རང་སྤྱི་ཚོགས་ཞབས་ཞུའི་ནང་ནས་དམིགས་བསལ་བུད་མེད་ནུས་སྟོབས་གོང་འཕེལ། ན་གཞོན་ནུས་སྟོབས་གོང་འཕེལ་དང་རྩོད་རྙོག་འདུམ་འགྲིག་ཐད་ལ་ལས་ཀ་བྱ་རྒྱུའི་འདུན་པ་ཆེན་པོ་ཡོད། ད་དུང་བོད་མི་མང་གི་འཐབ་རྩོད་ནང་ལོགས་ལ་གལ་ཆེ་ཤོས་གཅིག་ཆབ་སྲིད་ལས་འགུལ་ཆགས་ཀྱི་ཡོད་རེད་དེ། ང་ཚོའི་སྤྱི་ཚོགས་ཡར་རྒྱས་འདིའང་གནད་འགག་ཆེན་པོ་མཐོང་གི་ཡོད། ཅེས་བརྗོད་སོང་།
མ་འོངས་ལོ་ལྔའི་ནང་ནས་གནད་དོན་གཙོ་བོ་ག་རེར་ངོས་འཛིན་གྱི་ཡོད་སྐོར་ལ་བསྟན་འཛིན་ཆོས་འཛིན་ལགས་ཀྱིས། སྤྱིར་བཏང་སྤྱི་ཚོགས་ཡར་རྒྱས་ཟེར་བ་དེ་རྒྱ་ཆེན་པོ་རེད། ད་ལྟའི་གནས་སྟངས་ལ་ང་ཚོ་བོད་པའི་སྤྱི་ཚོགས་ནང་གཞོན་སྐྱེས་ཕྱག་ལས་མ་གནང་མཁན་གྱི་གྲངས་འབོར་དང་། གོ་སྐབས་མ་རག་པའི་དཀའ་ངལ་སོགས་སོ་སོའི་ལས་ཀའི་ཉམས་མྱོང་དེ་འདྲ་མང་པོ་བྱུང་ཡོད། དེར་བརྟེན་ན་གཞོན་ནུས་སྟོབས་གོང་འཕེལ་དེ་འདྲའི་ཐོག་ལ་ང་ཚོས་གྲོས་ཆོད་གྲོས་འཆར་འཁྱེར་ཡོང་བ་ཙམ་མིན་པར། སྤྱི་ཚོགས་ནང་འཐིམས་ནས་སོ་སོས་ལས་ཀ་བྱས་ཏེ་གནས་ཚུལ་ཤེས་རྟོགས་བྱ་ཐབས་དང་། དེ་ཚོ་མར་སྟོན་ཐུབ་པའི་ཐབས་ཤེས་བྱ་རྒྱུ་ཡིན་བསམ་པའི་བློ་དེ་འདྲ་ཡོད། ཅེས་བརྗོད་སོང་།
གཞན་ཡང་། བོད་ནང་གི་བོད་མི་ཚོར་བརྡ་ལན་ཅི་ཡོད་སྐོར་ལ་ཁོང་མོས། ང་ཚོ་བོད་པའི་གཞོན་སྐྱེས་མང་པོ་ཞིག་འོས་མིའི་ནང་ལངས་པ་ཙམ་གྱིས་བརྡ་ལན་ཤུགས་ཆེན་པོ་འགྲོ་ཡི་ཡོད་རེད་བསམ་གྱི་འདུག ང་ཚོ་དེ་ལ་བསླེབས་ནས་ལས་ཀ་བྱ་རྒྱུའི་འདུན་པ་ཡོད་ལ། ཁྱེད་ཚོས་སེམས་ཁྲལ་མ་གནང་། ང་ཚོའི་འཐབ་རྩོད་བརླག་ཡོད་མ་རེད། ང་ཚོ་བོད་མིའི་ནང་ནས་དམིགས་བསལ་གཞོན་སྐྱེས་དེ་ཚོ་རྒྱལ་སྤྱིའི་སྡིངས་ཆ་དང་། པེ་ཅིན་ཨོ་ལིམ་ཕིག་ཐོག་ལའང་ང་ཚོ་གཞོན་པ་མང་པོ་ཞིག་གིས་དཀའ་ལས་རྒྱག་གི་ཡོད་རེད། དེ་ཚོ་ཚང་མ་བརྡ་ལན་ཆེན་པོ་རེད་བསམ་གྱི་འདུག དེར་བརྟེན་ང་ཚོས་ནུས་པ་མཉམ་སྤུངས་བྱས་ཏེ་མདུན་ལ་ཤར་སྐྱོད་བྱ་དགོས་པ་རེད་བསམ་གྱི་འདུག ཅེས་བརྗོད་སོང་།
བསྟན་འཛིན་ཆོས་འཛིན་ལགས་ནི་ཕྱི་ལོ་ ༡༩༩༢ ཟླ་ ༧ ཚེས་ ༢༧ ཉིན་རྒྱ་གར་དྷ་རམ་ས་ལར་སྐྱེས་ཤིང་། ཁོང་མོས་རྡ་སྟེང་བོད་ཕྲུག་ཁྱིམ་སྡེ་ནས་གཞི་རིམ་སློབ་སྦྱོང་དང་གོ་པལ་པུར་བོད་ཕྲུག་ཁྱིམ་སྡེ་ནས་འཛིན་རིམ་བཅུ་གཉིས་ཐོན་རྗེས། རྒྱ་གར་གྲོང་ཁྱེར་ (Chennai) ནང་རྟེན་གཞི་བྱས་ཡོད་པའི་མ་དྷ་རཱ་སི་ཡེ་ཤུའི་མཐོ་སློབ་ (Madras Christian College) ནས་དབྱིན་ཡིག་རྩོམ་ཡིག་སྟེང་གཙུག་ལག་རབ་འབྱམས་པ་དང་། རྒྱ་གར་རྒྱལ་ས་ལྡི་ལིར་ཡོད་པའི་ནི་རུ་གཙུག་ལག་སློབ་གཉེར་ཁང་ (JNU) ནས་དབྱིན་ཡིག་སྟེང་ཉེ་བའི་གཙུག་ལག་རབ་འབྱམས་པའི་སློབ་མཐར་སོན། དེ་ནས་ཕྱི་ལོ་ ༢༠༡༦ ནས་ ༢༠༡༧ བར་དབུས་བོད་ཀྱི་བུད་མེད་ལྷན་ཚོགས་ཀྱི་འཆར་འགོད་འགན་འཛིན་གནང་བ་དང་། ཕྱི་ལོ་ ༢༠༡༧ ནས་ ༢༠༢༠ བར་དབུས་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་ན་གཞོན་རོགས་སྐྱོར་ཚན་པའི་ཁྱབ་ཁོངས་འོག་བོད་མིའི་མདུན་ལམ་སློབ་སྟོན་ཁང་གི་འགན་འཛིན་གནང་། གཞན་ཡང་། བོད་མི་གནས་སའི་གཞིས་ཆགས་ཁག་ཏུ་ཐེངས་མང་ཆེད་བཅར་གྱིས་ན་གཞོན་ནུས་སྟོབས་གོང་སྤེལ་དང་ལས་འཚོལ་བའི་ནུས་རྩལ། ཕོ་མོ་འདྲ་མཉམ་སོགས་ཀྱི་སྐོར་ཟབ་སྦྱོང་དང་བགྲོ་གླེང་སོགས་ལས་གཞི་མང་པོ་བརྩམས་མྱོང་ཡོད་པ་རེད།
གསར་འགོད་པ། བསྟན་འཛིན་ཕུར་བུ།
