དོན་འགྲུབ་དབང་ཆེན་ལགས་འདི་ལོའི་ནོར་སྦེལ་ཞི་བདེ་གཟེངས་ཀྱི་འོས་དམིགས་ཁོངས་སུ་མཚན་འདོན་གནང་།

ནོར་ཝེའི་གྲོས་ཚོགས་འཐུས་མི་ཞིག་གིས་བོད་ཀྱི་ཆབ་སྲིད་བཙོན་ཟུར་དོན་འགྲུབ་དབང་ཆེན་ལགས་ཕྱི་ལོ་ ༢༠༢༢ ལོའི་ནོར་སྦེལ་ཞི་བདེ་གཟེངས་རྟགས་ཀྱི་འོས་མིར་མཚན་འདོན་གནང་འདུག

དེ་རིང་གི་ནོར་ཝེ་ (Norway Today)ཞེས་པའི་གསར་ཁང་གིས་གནས་ཚུལ་སྤེལ་བ་ལྟར། དེ་རིང་ཡུ་རོབ་རྒྱལ་ཁབ་ནོར་ཝེ་ཡི་ལྗང་མདོག་སྲིད་དོན་ཚོགས་པའི་གྲོས་ཚོགས་འཐུས་མི་སྐུ་ཞབས་ར་སི་མོ་སི་ཧན་སོན་  (Rasmus Hansson) ལགས་ཀྱིས། ནོར་ཝེ་རྒྱལ་ཁབ་ཀྱི་གསར་འགོད་བརྒྱུད་ལམ་ཆེ་ཤོས་ (NTB) ལ་འཕྲིན་ཡིག་ཅིག་བསྐུར་ཏེ། རང་ཉིད་ནས་བོད་ཀྱི་ཆབ་སྲིད་བཙོན་ཟུར་དོན་འགྲུབ་དབང་ཆེན་ལགས་ཕྱི་ལོ་ ༢༠༢༢ ལོའི་ནོར་སྦེལ་ཞི་བདེ་གཟེངས་རྟགས་ཀྱི་འོས་མིར་མཚན་འདོན་གནང་བ་ཡོངས་བསྒྲགས་བྱས་ཡོད་པ་རེད།

དེ་འབྲེལ་གནས་ཚུལ་ནང་། གྲོས་ཚོགས་འཐུས་མི་སྐུ་ཞབས་རཱ་མོ་སི་ཧན་སོན་ལགས་ཀྱིས་དོན་འགྲུབ་དབང་ཆེན་ལགས་ནི། བོད་མིའི་ཚབ་མཚོན་པའི་འགྲོ་བ་མིའི་ཐོབ་ཐང་རྩོད་ལེན་གནང་མཁན་ཞིག་ཡིན། ཞེས་བརྗོད་ཡོད་པ་དང་། འདི་ལོའི་ཕྱི་ཟླ་ ༡ ནང་དོན་འགྲུབ་དབང་ཆེན་ལགས་ཀྱིས་ཡུ་རོབ་ནང་བོད་དོན་དྲིལ་བསྒྲགས་མཚོན་པའི་རྒྱ་ནག་གི་དགུན་ཁའི་ཨོ་རྩལ་འགྲན་ཚོགས་སོགས་ལ་ངོ་རྒོལ་གྱི་སྐོར་བསྐྱོད་གནང་སྐབས། ནོར་ཝེ་ནང་གྲོས་ཚོགས་འཐུས་མི་སྐུ་ཞབས་རཱ་མོ་སི་ཧན་སོན་ལགས་དང་མཇལ་འཕྲད་ཐོག་མ་དེ་གནང་ཡོད་འདུག

ཕྱི་ལོ་ ༢༠༡༩ ལོར་སྐབས་ ༡༡ པའི་ཇི་ནི་ཝའི་འགྲོ་བ་མིའི་ཐོབ་ཐང་དང་དམངས་གཙོའི་ལྷན་ཚོགས་(Geneva summit for human rights and democracy) ཀྱིས་གཟེངས་རྟགས་འབུལ་བའི་མཛད་སྒོའི་སྟེང་། འཇིགས་བྲལ་གློག་བརྙན་ཕབ་སྐྲུན་པ་དང་བོད་ཀྱི་ཆབ་སྲིད་བཙོན་ཟུར་དོན་འགྲུབ་དབང་ཆེན་ལགས་ཀྱིས། དཔའ་ངར་ཆེན་པོའི་ཐོག་ནས་འཛམ་གླིང་གི་རང་དབང་དང་དམངས་གཙོ། ཀུན་ཁྱབ་འགྲོ་བ་མིའི་ཐོབ་ཐང་བཅས་སྲུང་སྐྱོབ་གནང་བར་ཆེ་བསྟོད་དུ་ཕྱི་ལོ་ ༢༠༡༩ ལོའི་སྙིང་སྟོབས་གཟེངས་རྟགས་(Courage Award)ཕུལ་ཡོད་ལ། ཕྱི་ལོ་ ༢༠༡༤ ལོར་ཁོང་ལ་ཨ་རིའི་ནེའུ་ཡོག་གྲོང་ཁྱེར་ནང་རྟེན་གཞི་བྱས་པའི་འགྲོ་བ་མིའི་ཐོབ་ཐང་ཐེབས་རྩ་ཁང་གིས་འདི་ལོའི་རྣམ་དཔྱོད་ལྡན་པའི་བརྩམས་ཆོས་སྒྱུ་རྩལ་གྱི་ཧ་ཝེལ་ (Havel Prize)ཞེས་པའི་གཟེངས་རྟགས་དེ་ཐོབ་ཡོད།

ད་ལྟ་དགུང་ལོ་ ༤༨ ཡིན་པའི་དོན་འགྲུབ་དབང་ཆེན་ལགས། ཕྱི་ལོ་ ༢༠༠༨ ཟླ་ ༣ ཚེས་ ༢༦ ཉིན་མཚོ་སྔོན་ཟི་ལིང་ནས་འཛིན་བཟུང་བྱས་རྗེས། ལོ་གཉིས་རིང་གང་བྱུང་བཀག་ཉར་འོག་བཅུག་པ་དང་། ཕྱི་ལོ་ ༢༠༡༠ ཟླ་་༡༢ ཚེས་ ༢༨ ཉིན་ཟི་ལིང་གྲོང་ཁྱེར་འབྲིང་རིམ་མི་མང་ཁྲིམས་ཁང་ཟེར་བས་གསང་བའི་ངང་ཁོང་ལ་ལོ་ ༦ བཙོན་འཇུག་ཁྲིམས་ཐག་བཅད།  ཕྱི་ལོ་ ༢༠༡༤ ཟླ་ ༦ ཚེས་ ༦ ཉིན་དོན་འགྲུབ་དབང་ཆེན་ལགས་ཀྱི་བཙོན་འཇུག་དུས་ཡུན་རྫོགས་ཏེ་ཀློད་གྲོལ་ཐོབ། ཕྱི་ལོ་ ༢༠༡༧ ཟླ་ ༡༢ ཚེས་ ༢༥ ཉིན་ཁོང་གིས་དཀའ་སྡུག་དང་ཉེན་ཚབས་ཆེན་བའི་བྲོས་བྱོལ་བརྒྱུད་ཨ་རིར་འབྱོར་ཏེ་བཟའ་མི་རྣམས་དང་ལྷན་འཛོམས་ཀྱིས་ད་ལྟ་ཨ་རིར་གནས་མུས་ཡིན་པ་རེད།

གསར་འགོད་པ། སྐལ་བཟང་སྦྱིན་པ།