བདུན་ཕྲག་འདིའི་ནང་བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་ཀྱི་ཁྱབ་ཁོངས་སྨན་ཁང་ཁག་གི་ནང་སྨན་པ་དང་དེ་བཞིན་ས་གནས་ཁག་ ༡༦ ལ་ཏོག་དབྱིབས་ཀྱི་ཆེད་དུ་སྨན་ཞབས་པ་འཕར་མ་ ༢༢ བསྐོ་བཞག་གནང་ཡོད་འདུག
དེ་རིང་བོད་མིའི་སྒྲིག་འཛུགས་ཀྱི་ཏོག་དབྱིབས་ཛ་དྲག་ལས་དོན་ཚོགས་ཆུང་གིས་གསར་འགོད་གསལ་བསྒྲགས་ཐེངས་ ༩༧ པ་སྤེལ་བའི་ནང་། འདས་པའི་བདུན་ཕྲག་གཅིག་ནང་ཏོག་དབྱིབས་ནད་པ་གསར་པ་ ༣༧༧ བྱུང་བ་དང་། བོད་མི་ ༡ འདས་གྲོངས་སུ་ཕྱིན། དེ་བཞིན་རྒྱ་གར་ནང་གི་ས་གནས་ཁག་ ༡༧ དང་བལ་ཡུལ་ནང་གི་ས་གནས་ ༢ ནང་རང་ཁྱིམ་དུ་ཟུར་བཀག་སྡོད་མཁན་བོད་མི་ ༤༩༧ དང་། ཚོགས་སྡེའི་ཟུར་བཀག་ཁང་དུ་མི་གྲངས་ ༡༣༡ བཅས་ཁྱོན་ཟུར་བཀག་ཁང་དུ་བོད་མི་ ༦༢༨ ཡོད་འདུག
འཕྲོད་བསྟེན་ལས་ཁུངས་ཀྱི་དྲུང་གཞོན་བསྟན་འཛིན་ཀུན་བཟང་ལགས་ཀྱིས། བདུན་ཕྲག་འདིའི་ནང་བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་ཀྱི་ཁྱབ་ཁོངས་སྨན་ཁང་ཁག་གི་ནང་སྨན་པ་དང་དེ་བཞིན་ས་གནས ༡༦ ལ་ཏོག་དབྱིབས་ཀྱི་ཆེད་དུ་སྨན་ཞབས་པ་འཕར་མ་ ༢༢ བསྐོ་གཞག་ཞུས་ཡོད་རེད། ད་ལྟའི་ཆར་ང་ཚོ་མི་མང་པོ་ཞིག་ཕྱི་ལོགས་ནས་སོ་སོའི་ས་ཆ་ལ་ལོག་བསྡད་པའི་གནས་སྟངས་ཆགས་ཡོད་པས། ང་ཚོའི་ངོས་ནས་གཟབ་གཟབ་གནང་རྒྱུ་གལ་ཆེན་པོ་རེད་འདུག དེ་ཡང་ཐོག་མར་བརྟག་དཔྱད་ག་པར་གནང་རུང་ཚད་ལྡན་ཞིག་ལ་བརྟག་དཔྱད་གནང་རོགས། རྒྱུ་མཚན་ནི་བརྟག་དཔྱད་བྱས་པའི་ལས་འགན་བསྒྲུབ་ཀྱི་ཡོད་རེད་དེ་། བརྟག་དཔྱད་སྤུས་དག་པོ་མ་བྱས་ཚེ་ན་ཚ་ཡོད་རུང་ཐོན་གྱི་མ་རེད། དེ་བཞིན་བརྟག་དཔྱད་བྱས་ནས་གྲུབ་འབྲས་མ་དོན་བར་དུ་རང་ཁྱིམ་དུ་ཟུར་བཀག་ལ་བཞུགས་དགོས་པ་དང་། ནད་རྟགས་ཡོད་ན་བརྟག་དཔྱད་ངེས་པར་དུ་་བྱེད་རོགས། ད་དུང་མི་ཚང་མས་ཕྱག་ལས་གནང་མཁན་ལ་རྒྱབ་སྐྱོར་གནང་གནང་དགོས་པ་དང་། ཕྱག་ལས་གནང་མཁན་ཚོས་ཀྱང་ནད་པ་རྣམས་རང་ཉིད་ཀྱི་ཕྲུ་གུ་ཡིན་བསམ་པའི་ཐོག་ནས་ཕྱག་ལས་གནང་དགོས་པའི་ལམ་སྟོན་གནང་སོང་།
གསར་འགོད་གསལ་བསྒྲགས་སྟེང་སྨན་པ་མཚམས་གཅོད་ལགས་ཀྱིས། འདས་པའི་ལོ་གཉིས་ལྷག་ཙམ་གྱི་རིང་ལ་ཏོག་དབྱིབས་གཉན་རིམས་ཀྱི་རྐྱེན་གྱིས་འཛམ་བུ་གླིང་ཁྱོན་ཡོངས་ལ་ནད་གཞི་ཕོག་པའི་མི་གྲངས་ས་ཡ་ ༣༦༠ ཙམ་ཟིན་ཡོད་པ་རེད། ཉེ་བའི་ཆར་རྒྱ་གར་ནང་ཨོ་མི་ཁུ་རོན་གྱི་རྐྱེན་གྱིས་ནད་ཡམས་ཁྱབ་ཚད་མྱུར་པོ་ཕྱིན་ནས་མི་རྒན་གཞོན་བྱིས་པ་མང་པོ་ཞིག་ལ་ནད་གཞི་ཕོག་པའི་གྲངས་འབོར་མང་དུ་ཕྱིན་ཡོད་པས། ཚང་མས་གཟབ་གཟབ་གནང་རྒྱུ་གལ་ཆེན་པོ་རེད་འདུག དེ་བཞིན་ནད་ཡམས་ཁྱབ་གདལ་བཀག་འགོག་གི་ཆེད་དུ་སྔོན་འགོག་གི་ཐབས་ལམ་མུ་མཐུད་དུ་བསྟེན་པ་དང་། དམིགས་བསལ་གྱིས་གསོ་བ་རིག་པའི་ཐོག་ནས་ལུས་སེམས་ནུས་གསོའི་སྨན་བསྟེན་རྒྱུ་དང་། རྒྱུན་དུ་འཕྲོད་བསྟེན་གྱི་ཐོག་ལ་ཐུགས་སྣང་གནང་དགོས་པའི་ལམ་སྟོན་སོགས་གནང་སོང་།
དེའི་རྗེས་སུ་སྨན་པ་བསྟན་འཛིན་རྣམ་གྲོལ་ལགས་ཀྱིས། ཉེ་ཆར་ཨོ་མི་ཁུ་རོན་གྱི་ནད་འབུ་ཐོན་ནས་འཛམ་གླིང་ཁྱོན་ཡོངས་སུ་ཏོག་ནད་ཕོག་པའི་གྲངས་འབོར་མང་པོ་འཕར་ཡོད་རེད། འོན་ཀྱང་། ད་ལྟའི་ཆར་ནད་གཞི་ཕོག་པའི་གྲངས་འབོར་ཉུང་དུ་འགྲོ་ཡི་འདུག དེ་བཞིན་རྒྱ་གར་ནང་ཏོག་དབྱིབས་ནད་པའི་གྲངས་འབོར་ཉུང་དུ་འགྲོ་ཡི་ཡོད་པའི་གནས་སྟངས་ཆགས་འདུག སྤྱིར་བཏང་ནད་པའི་གྲངས་འབོར་ཉུང་དུ་འགྲོ་ཡི་ཡོད་ཀྱང་སོ་སོའི་ངོས་ནས་མུ་མཐུད་དུ་གཟབ་གཟབ་གནང་རྒྱུ་གལ་ཆེན་པོ་ཆགས་ཀྱི་འདུག སྔོན་འགོག་གི་ཐབས་ལམ་ཡག་ཤོོས་ནི་སྔོན་འགོག་གི་ཁབ་ཆགས་ཀྱི་ཡོད་པ་རེད། དེར་བརྟེན་ད་ལྟའི་ཆར་སྨན་ཁབ་བསྐྱོན་མེད་པ་ཡིན་ན་ངེས་པར་དུ་བསྐྱོན་རོགས་གནང་། སྔོན་འགོག་ཁབ་བསྐྱོན་པས་ན་ཚ་ཛ་དྲག་པོ་མ་ཆགས་པ་དང་སྨན་ཁང་དུ་ཉལ་མི་དགོས་པའི་ཁེ་ཕན་ཡོད་པ་རེད། ད་དུང་སོ་སོར་ནད་རྟགས་ཐོན་པ་ཡིན་ན་ལྷོད་གཡེངས་མེད་པའི་ཐོག་ནས་བརྟག་དཔྱད་ངེས་པར་དུ་གནང་དགོས་པ་དང་། དགུན་ཚོང་ནས་རང་ཁྱིམ་དུ་ལོག་མཁན་དང་ཕྱི་ནས་རང་ཁྱིམ་དུ་གུང་གསེང་ལ་ཕེབས་མཁན་ལ་སོགས་པའི་བོད་རིགས་ཡོངས་ཀྱིས་སྔོན་འགོག་གི་སྒྲིག་གཞི་ལག་བསྟར་གནང་དགོས་པའི་ལམ་སྟོན་གནང་སོང་།
ཏོག་དབྱིབས་ཛ་དྲག་ལས་དོན་ཚོགས་ཆུང་གི་གསལ་བསྒྲགས་ལྟར་ན། ད་ལྟ་བར་དུ་རྒྱ་བལ་གཉིས་ནང་བོད་མི་ཏོག་དབྱིབས་ནད་པ་མི་གྲངས་ ༨༧༥༤ བྱུང་བའི་ཁྲོད་དྲག་སྐྱེད་ཟིན་པ་ ༨༢༣༥ དང་། རྐྱེན་འདས་སུ་ཕྱིན་པ་ ༡༦༤། ད་ལྟ་ཏོག་ནད་ཀྱིས་མནར་བཞིན་པའི་བོད་མི་གྲངས་ ༣༥༥ ཡོད་འདུག
གསར་འགོད་པ། བསྟན་འཛིན་ཕུར་བུ།
