རྒྱ་གར་གཞུང་གིས་ཨོ་རྩེད་ཐོག་གཞུང་འབྲེལ་སྐུ་ཚབ་གཏོང་རྒྱུ་མིན་པའི་གསལ་བསྒྲགས་གནང་།

རྒྱ་དཀར་ནག་བར་གྱི་གྷལ་ཝན་ལུང་གཤོངས་ཀྱི་དམར་འཛིང་བ་རྒྱའི་དམག་དཔོན་ཞིག་ལ་ཨོ་རྩེད་དཔལ་འབར་འཁྱེར་དུ་བཅུག་པར་བརྟེན་རྒྱ་གར་གྱི་གཞུང་འབྲེལ་སྐུ་ཚབ་ཨོ་རྩེད་སྒོ་འབྱེད་དང་མཇུག་བསྡོམས་ཐོག་མཉམ་ཞུགས་གནང་རྒྱུ་མིན་ལ་རྒྱ་གར་དབུས་བརྙན་འཕྲིན་ཁང་ནས་ལས་རིམ་ཐད་གཏོང་ཡང་གནང་རྒྱུ་མིན་པའི་ཐག་གཅོད་གནང་།

རྒྱ་ནག་གཞུང་གིས་འདས་ལོར་བོད་འཕགས་ས་མཚམས་ཀྱི་གྷལ་ཝན་ལུང་གཤོངས་ཀྱི་དམག་མིའི་གདོང་ཐུག་སྐབས་ཀྱི་རྒྱའི་དམག་དཔོན་ཞིག་འདི་ལོའི་དགུན་དུས་ཨོ་རྩེད་ཀྱི་དཔལ་འབར་འཁྱེར་མཁན་ཁྲོད་དུ་བཞག་པར་བརྟེན། ཁ་སང་ཕྱི་ཚེས་ ༣ ཉིན་རྒྱ་གར་ཕྱི་སྲིད་ལྷན་ཁང་ངོས་ནས་རྒྱ་ནག་གཞུང་གིས་ཨོ་ལིམ་ཕིག་རྩེད་འགྲན་དེ་ཉིད་ཆབ་སྲིད་ཀྱི་ངོ་བོར་བསྒྱུར་བར་ངོ་རྒོལ་དང་འབྲེལ། པེ་ཅིན་དགུན་དུས་ཨོ་རྩེད་ཐོག་རྒྱ་གར་གྱི་གཞུང་འབྲེལ་སྐུ་ཚབ་མངག་གཏོང་བྱ་རྒྱུ་མིན་པ་མ་ཟད། རྒྱ་གར་དབུས་བརྙན་འཕྲིན་ཁང་དྷུར་དྷར་ཤན་ (Doordarshan) ངོས་ནས་རྒྱ་གར་ནང་ཨོ་རྩེད་ཤར་གཏོང་བྱ་རྒྱུ་མིན་སྐོར་གྱི་རྒོལ་གཏམ་བསྒྲགས།

ཁ་སང་རྒྱ་གར་ཕྱི་སྲིད་ལྷན་ཁང་གི་མགྲིན་ཚབ་པ་ཨ་རིན་དྷམ་བྷག་ཆི་(Arindam Bagchi) ལགས་ཀྱིས་གསར་འགོད་ལྷན་ཚོགས་ཐོག རྒྱ་ནག་ཕྱོགས་ནས་ཨོ་ལིམ་ཕིག་ལྟ་བུའི་རྩེད་འགྲན་དེ་ཉིད་ཆབ་སྲིད་ཀྱི་རྣམ་པར་སྒྱུར་བཞིན་པ་དེ་བློ་འགྱོད་སྐྱེ་གཞི་རེད། རྒྱ་ནག་ཏུ་ཡོད་པའི་རྒྱ་གར་གྱི་གཞུང་ཚབ་པ་གཞོན་པ་པེ་ཅིན་ཨོ་རྩེད་ཀྱི་སྒོ་འབྱེད་དང་མཇུག་བསྡོམས་ཀྱི་ལས་རིམ་ཐོག་བཅར་རྒྱུ་མ་རེད། ཅེས་བརྗོད་ཡོད་འདུག མགྲིན་ཚབ་པའི་གསལ་བསྒྲགས་དེ་གྲུབ་རྗེས། རྒྱ་གར་གྱི་དབུས་བརྙན་འཕྲིན་ལས་ཁུངས་ Prasar Bharti ཀྱི་སྤྱི་ཁྱབ་འགན་འཛིན་ཤཱ་ཤི་ཤེ་ཁར་ཝེམ་པ་ཏི་ (Shashi Shekhar Vempati) ལགས་ཀྱིས། ང་ཚོས་པེ་ཅིན་དགུན་དུས་ཨོ་རྩེད་ཀྱི་སྒོ་འབྱེད་དང་མཇུག་བསྡོམས་ལས་རིམ་གཉིས་ཤར་གཏོང་བྱ་རྒྱུ་མིན། ཞེས་གསལ་བསྒྲགས་བྱས་ཡོད་འདུག

སྤྱིར་འདས་ལོའི་ཕྱི་ཟླ་ ༩ པའི་ནང་རྒྱ་གར་གྱི་རྒྱལ་ས་ལྡི་ལིར་ཚོགས་པའི་བྷི་རིག་སི་(BRICS) ཚོགས་འདུའི་སྟེང་། རྒྱ་གར་གཞུང་ངོས་ནས་དེ་རིང་ནས་འགོ་འཛུགས་བྱ་རྒྱུ་ཡིན་པའི་པེ་ཅིན་གྱི་དགུན་དུས་ཨོ་རྩེད་ལ་རྒྱབ་སྐྱོར་བྱ་རྒྱུ་ཡིན་པ་དང་། དེའི་ཆེད་དུ་རྒྱ་ནག་ཏུ་ཡོད་པའི་རྒྱ་གར་གྱི་གཞུང་ཚབ་ཆེན་མོ་གཞུང་འབྲེལ་སྐུ་ཚབ་ཏུ་མངག་གཏོང་བྱ་རྒྱུ་ཡིན་སྐོར་བརྗོད་ཡོད་ནའང་། ད་ལན་རྒྱ་ནག་གཞུང་གིས་རྒྱལ་ཁབ་གཉིས་དབར་གྱི་ཆེས་ཚོར་ཤུགས་སྐྱེན་པའི་གནད་དོན་ཞིག་ཨོ་ལིམ་པིག་རྩེད་འགྲན་ནང་ཨུ་ཚུགས་ཀྱིས་བཅུག་པས་མི་ཚད། རྒྱ་ནག་གི་གཞུང་འབྲེལ་གོ་ལའི་དུས་བབ་ཀྱིས་འཛེམ་ཟོན་མེད་པར་རྒྱའི་དམག་དཔོན་དེས་ཨོ་རྩེད་ཀྱི་དཔལ་འབར་འཁུར་བཞིན་པའི་བརྙན་པར་འགོད་སྤེལ་གྱིས། ཁོ་པར་གདོང་ཐུག་སྐབས་མགོར་རྨས་སྐྱོན་ཚབས་ཆེན་བྱུང་ཡོད་སྐོར་བཤད་འདུག རྒྱ་ནག་གཞུང་གི་བྱེད་སྟངས་དེ་ནི་རྐང་བཙུགས་ཏེ་རྒྱ་གར་ལ་བསྙད་འཚོལ་བ་ལྟ་བུ་ཞིག་ཆགས་ཡོད་པ་རེད།

Qi Fabao, the Chinese PLA Commander carries the torch during the Beijing 2022 Olympic Torch Relay in Beijing on Feb.

འདས་ལོའི་ཕྱི་ཟླ་ ༦ པའི་ཚེས་ ༡༥ ཉིན་བྱུང་བའི་གྷན་ཝན་ལུང་གཤོངས་ཀྱི་གདོང་ཐུག་ཁྲོད་རྒྱ་གར་གྱི་དམག་མི་ ༢༠ རྐྱེན་འདས་ཕྱིན་ཡོད་པ་ལྟར། རྒྱ་གར་གཞུང་གིས་འདས་པོ་རྣམས་ལ་ཆེ་མཐོང་མཚོན་ཆེད་གཞུང་འབྲེལ་གྱི་མཛད་སྒོ་ཚོགས་ཡོད་ནའང་། རྒྱ་ནག་གཞུང་གིས་ཐོག་མའི་ཆར་གདོང་ཐུག་ཁྲོད་རྒྱའི་དམག་མི་ཅི་ཙམ་རྐྱེན་འདས་སོང་ཡོད་མེད་གྱི་གནས་ཚུལ་ཕྱིར་བསྒྲགས་བྱས་མེད་ནའང་། ཕྱིས་སུ་དམག་མི་ ༤ རྐྱེན་འདས་ཕྱིན་ཡོད་སྐོར་བསྒྲགས་ཡོད་པ་རེད། འོན་ཀྱང་དེ་རིང་རྒྱ་གར་གྱི་བང་ཆེན་གསར་ཁང་སོགས་ཀྱིས་གནས་ཚུལ་སྤེལ་བ་ལྟར་ན། ཨོ་གླིང་གི་གསར་འགོད་པ་ཨེན་ཐོ་ནི་ཀེ་ལན་ (Anthony Klan) གྱིས་ The Klaxon ཞེས་པའི་གསར་ཤོག་ནང་གྷལ་ཝན་གྱི་དོན་རྐྱེན་ཐད་རྟོག་ཞིབ་གསར་འགྱུར་ཞིག་འཁོད་པའི་ནང་། རྒྱ་ནག་ནང་ལོགས་ཀྱི་སྤྱི་ཚོགས་དྲ་ལམ་གྱི་གནས་ཚུལ་དང་ཞིབ་འཇུག་པ་རྣམས་ཀྱིས་གནས་ཚུལ་མཁོ་འདོན་བྱས་པ་གཞིར་བཟུང་། འདས་ལོའི་གདོང་ཐུག་ཁྲོད་དུ་ཉུང་མཐར་རྒྱ་ནག་གི་དམག་མི་ ༣༨ ལྷག་རྐྱེན་འདས་ཕྱིན་ཡོད་སྐོར་བཀོད་ཡོད་པ་རེད།

འདི་ལོའི་རྒྱ་ནག་གིས་དྲིལ་བསྒྲགས་དང་རེ་བ་ཆེན་པོ་བྱ་སའི་དགུན་དུས་ཨོ་རྩེད་དེར་ཨ་རི་དང་། ཨོ་གླིང་། དབྱིན་ཇིས་མཚོན་པའི་སྟོབས་ཆེན་རྒྱལ་ཁབ་དང་། ལི་ཐུ་ནི་ཡ་དང་། ཀོ་སོ་ཝོ་ (Kosovo)། བྷེལ་ཇམ། ཌེན་མག(Denmark) ཨེ་སི་ཊོ་ནི་ཡ་(Estonia)། ཐའེ་ལན་ཌི་ཡིས་མཚོན་པའི་རྒྱལ་ཁབ་ཆུང་གྲས་ཀྱིས་ངོ་རྒོལ་གྱི་རྣམ་པ་ཤུགས་ཆེན་པོ་བསྟན་ཏེ། ཕལ་ཆེར་རྒྱ་ནག་གི་ཨོ་རྩེད་ནང་དམངས་གཙོ་ཡང་དག་ལག་བསྟར་བྱེད་མཁན་གྱི་རྒྱལ་ཁབ་ཀྱི་སྐུ་ཚབ་མེད་པའི་ཚོད་དུ་སླེབས་ཡོད་ཅིང་། དེའི་ལྡོག་ཕྱོགས་ལྟ་བུར་རྒྱ་ནག་དང་འབྲེལ་ལམ་ཇེ་ཟབ་ཏུ་འགྲོ་བཞིན་པའི་ཨུ་རུ་སུའི་སྲིད་འཛིན་པུ་ཊིན་དང་། པཱ་ཀི་སི་ཐན་གྱི་སྲིད་བློན་ཨིམ་རཱན་ཁཱན་ (Imran Khan)། སའོ་དྷི་ཨ་ར་བྷི་ཡའི་རྒྱལ་སྲས་མོ་ཧཱ་མེཌ་བྷིན་སལ་མཱན་ (Mohammed bin Salman) གསུམ་དང་། དེ་བཞིན་རྒྱ་ནག་དང་འབྲེལ་བ་ཟབ་པོ་ཡོད་པའི་རྒྱལ་སྤྱིའི་འཕྲོད་བསྟེན་སྒྲིག་འཛུགས་ཀྱི་འགན་འཛིན་ཊེ་ཌོ་རོ་སི་ (Tedros Adhanom Ghebreyesus) སོགས་བཅར་གྱི་ཡོད་འདུག

གསར་འགོད་པ། པ་སངས་ཚེ་རིང་།