རྒྱ་ནག་གཞུང་གིས་ཨོ་རྩལ་འགྲན་ཚོགས་སྐབས་གྲངས་ཉུང་མི་རིགས་ལ་སོ་ལྟ་བྱ་བྱེད་ཀྱི་མཉེན་ཆས་ཤིག་བེད་སྤྱོད་བྱས་ཏེ་རྒྱལ་སྤྱིའི་རྩེད་འགྲན་པ་རྣམས་ལ་གསང་ཉན་བྱེད་བཞིན་ཡོད་འདུག
ད་ལྟ་རྒྱ་ནག་གི་རྒྱལ་ས་པེ་ཅིན་དུ་ཕྱི་ལོ་ ༢༠༢༢ ལོའི་དགུན་ཁའི་ཨོ་རྩལ་འགྲན་ཚོགས་དངོས་སུ་འཚོགས་ཀྱི་ཡོད་པའི་སྐབས་འདིར། དེ་སྔ་རྒྱ་ནག་གི་བདེ་སྲུང་ལས་ཁུངས་ཀྱི་ལས་བྱེད་ཟུར་བ་ཞིག་གིས། ད་ལྟ་རྒྱ་ནག་གཞུང་གིས་རྒྱལ་སྤྱིའི་རྩེད་འགྲན་པ་རྣམས་ལ་རྒྱ་ནག་རང་གིས་བཟོས་པའི་ཁ་པར་ཞིག་བེད་སྤྱོད་བྱེད་དུ་བཅུག་པ་བརྒྱུད། ཉིན་གྲངས་ ༡༤ ཡི་ཨོ་རྩལ་འགྲན་ཚོགས་རིང་རྒྱལ་སྤྱིའི་རྩེད་འགྲན་པ་དག་གི་འགྲོ་འདུག་སྤྱོད་གསུམ་ཡོངས་ལ་གསང་ཉན་བྱེད་ཀྱི་ཡོད་པ་མ་ཟད། ཁ་པར་དེའི་སྟེང་གི་གསང་ཞིབ་མཉེན་ཆས་དེ་ནི་འདས་པའི་ལོ་མང་རིང་རྒྱ་ནག་གཞུང་གིས་ཤིན་ཅང་ཁུལ་གྱི་ཡུ་གུར་གྲངས་ཉུང་མི་རིགས་ལ་གསང་ཉན་བྱ་བྱེད་ཀྱི་ལག་ཆ་གཙོ་བོ་ཞིག་ཡིན་སྐོར་ཡང་བརྗོད་ཡོད་པ་རེད།
དེ་འབྲེལ་རྒྱ་ནག་གི་བདེ་སྲུང་ལས་ཁུངས་ཀྱི་ལས་བྱེད་དེས་ཨོ་གླིང་གི་གསར་ཁང་ཆེ་ཤོས་ (SBS) ལ་གསང་བའི་ཐོག་ནས་འགྲེལ་བརྗོད་བྱས་པའི་ནང་། ད་ལྟ་རྒྱ་ནག་གིས་ཨོ་རྩལ་འགྲན་ཚོགས་སྐབས་རྒྱལ་སྤྱིའི་རྩེད་འགྲན་པ་རྣམས་ལ་བཀོལ་སྤྱོད་བྱེད་དུ་འཇུག་བཞིན་པའི་འཕྲུལ་ཆས་དེ་ནི་ (Ke Da Xun Fei) འཕྲུལ་རིགས་བཟོ་ཚོང་ཁང་ལ་བདག་གི་ཡོད་པ་དང་། དེ་ལ་ (iFLYTEK) ཞེས་འབོད་ཀྱི་ཡོད་ཅིང་། ཕྱི་ལོ་ ༢༠༠༤ ནས་རྒྱ་ནག་གིས་ཞིབ་འཇུག་བྱས་ནས་ཡུ་གུར་མི་མང་གི་སྐད་བརྡ་ངོས་འཛིན་དང་དབྱེ་ཞིབ་ཐུབ་པའི་སྐད་བསྒྱུར་གྱི་མཉེན་ཆས་ཤིག་ཀྱང་ཡིན་སྐོར་བརྗོད་འདུག
ད་ལྟ་རྒྱ་ནག་གཞུང་གིས་སྐད་བསྒྱུར་གྱི་མཉེན་ཆས་དེ། ཤིན་ཅང་ཁུལ་གྱི་གཞི་རྩའི་ཤེས་ཡོན་དང་། ངལ་རྩོལ་དང་སློབ་གསོ་སྒྱུར་བཀོད་ཁང་སོགས་སུ་བེད་སྤྱོད་བྱས་ཏེ། ཡུ་གུར་མི་མང་ནས་ཆོས་ལུགས་དང་ཆབ་སྲིད་སོགས་དང་འབྲེལ་བའི་དོགས་ཟོན་དགོས་པའི་ཚིག་བེད་སྤྱོད་བྱས་ཚེ། ཐད་ཀར་ཉེན་རྟོག་པར་ཉེན་བརྡ་འབྱོར་གྱི་ཡོད་པ་དང་། རྒྱ་ནག་གི་ལས་བྱེད་དེས། སྤྱིར་ཡུ་གུར་མི་མང་གི་ཉིན་རེའི་འཚོ་བའི་ཁྲོད་ཀྱི་བྱེད་སྒོ་ཡོངས་ལ་རྒྱ་ནག་གཞུང་གིས་དོགས་ཟོན་བྱེད་ཀྱི་ཡོད་པ་དང་། དམིགས་བསལ་ཁ་ཆེའི་གསོལ་འདེབས་དང་(Quran) ཀློག་པ། ཁྲོམ་ནས་གྲི་ཉོ་བ་སོགས་ཀྱི་སྐད་ཆ་བྱུང་སྐབས། ཉེན་རྟོག་པས་ཐད་ཀར་དྲི་རྩད་འདྲི་ཡི་ཡོད་ཅིང་། དཔེར་ན་བྱིས་པ་ཞིག་གིས་འཛིན་གྲྭའི་ནང་། རང་གི་ཨ་ཕས་རྒྱ་ནག་གི་ཟ་མ་ཟ་མི་ཉན་ཚུལ་བཤད་པ་དང་བྱིས་པ་དེའི་ཨ་ཕ་འཛིན་བཟུང་བྱས་ཡོད་སྐོར་སོགས་བརྗོད་འདུག
རྒྱ་ནག་གཞུང་གིས་ཨོ་ལིམ་ཕིག་རྩེད་འགྲན་སྐབས་རྒྱལ་སྤྱིའི་ལུས་རྩལ་བ་རྣམས་ལ་གསང་ཉན་བྱེད་ཀྱི་ཡོད་པའི་ཐད། ཨ་རིའི་ཁ་པར་དང་དྲ་རྒྱའི་ཉམས་ཞིབ་པ་ཇོ་ན་ཐན་སི་ཁོ་ཊི་ (Jonathan Scott) ལགས་ཀྱིས། ཕྱི་ལོ་ ༢༠༢༢ ལོའི་པེ་ཅིན་ཨོ་ལིམ་ཕིག་དང་འབྲེལ། ཀུ་ཤུ་རྟགས་དང་ཨན་ཌི་རའོ་ཌི། དེ་བཞིན་གྷོལ་གྷལ་སོགས་གསང་བའི་མཉེན་ཆས་ཡོངས་ལ་ཞིབ་འཇུག་བྱས་རྗེས། ངས་བཤད་ཐུབ་པ་ནི། རྒྱ་ནག་གཞུང་གིས་ཨ་རིས་བཀག་སྡོམ་བྱས་པའི་ (iFLYTEK) བེད་སྤྱད་པ་བརྒྱུད། རྩེད་འགྲན་སྐབས་ཀྱི་རྒྱལ་སྤྱིའི་ལུས་རྩལ་བ་དག་གི་སྐད་ཆ་ཡོངས་ཉར་ཚགས་ཀྱིས་དབྱེ་ཞིབ་བྱེད་ཀྱི་ཡོད་པ་གསལ་བོ་རེད། ཅེས་བརྗོད་ཡོད་པ་དང་། ཨ་རིས་ཕྱི་ལོ་ ༢༠༡༩ ནས་རྒྱ་ནག་གི་མཉེན་ཆས་དེས་ཨ་རིའི་རྒྱལ་སྲུང་བདེ་འཇགས་ལ་ཉེན་ཁ་བསྐྲུན་གྱི་ཡོད་པའི་ངོས་འཛིན་འོག ཁྲིམས་འགལ་གྱི་ཐོ་ཁོངས་སུ་བཅུག་ཡོད་པ་རེད།
གཞན་ཡང་། ད་ལྟ་རྒྱ་ནག་གི་རྒྱལ་ས་པེ་ཅིན་དུ་འཚོགས་བཞིན་པའི་ཨོ་རྩལ་འགྲན་ཚོགས་སྐབས། ནེ་ཐི་ལན་ཌིའི་གསར་འགོད་པ་ (Sjoerd den Daas) ལགས་ཀྱིས། པེ་ཅིན་དུ་ཨོ་རྩལ་འགྲན་ཚོགས་ཀྱི་ཡུལ་དངོས་ཐད་གཏོང་བྱེད་སྐབས། རྒྱ་ནག་གི་ཉེན་རྟོག་པས་ཁོ་པ་བཙན་གྱིས་འབུད་རྒྱག་བརྒྱབ་སྟེ་ཐད་གཏོང་གནས་ཚུལ་མཚམས་འཇོག་བྱེད་དུ་བཅུག་ཡོད་པ་དང་། དེ་ནི་རྒྱ་ནག་གཞུང་གིས་གསར་འགོད་རང་དབང་ལ་དམ་དྲག་བྱེད་ཀྱི་ཡོད་པ་འཛམ་གླིང་མི་མང་ལ་སླར་ཡང་ར་སྤྲོད་བྱས་པ་ཞིག་ཆགས་ཀྱི་ཡོད་འདུག
གསར་འགོད་པ། སྐལ་བཟང་སྦྱིན་པ།
