དེ་རིང་ནས་ཟླ་འདིའི་ཕྱི་ཚེས་ ༡༡ བར་ལོ་འཆར་ཅན་ལྟར་གནས་མཆོག་རྡོ་རྗེ་གདན་གྱི་མ་ཧཱ་བོ་དྷའི་མཆོད་སྡོང་ཆེན་མོའི་དྲུང་དུ་འཛམ་གླིང་ཞི་བདེ་དང་ནད་མུག་འཁྲུག་རྩོད་སོགས་ཞི་བའི་ཆེད་དུ་སྔ་འགྱུར་རྙིང་མའི་སྨོན་ལམ་ཆེན་མོ་ཐེངས་ ༣༣ པ་འཚོག་མུས་ཡིན་པ་རེད།
སྔ་འགྱུར་རྙིང་མ་སྨོན་ལམ་ཆེན་མོ་གྲོ་སྒྲིག་ཚོགས་ཆུང་གི་ཚོགས་མི་མཁན་པོ་ཨོ་རྒྱན་རིག་འཛིན་ལགས་ཀྱིས་འདི་གའི་གསར་འགོད་པར། ད་ལོ་ནམ་རྒྱུན་ནང་བཞིན་དགོན་སྡེ་ཁག་ནས་ཞེ་དྲག་བཅར་ཐུབ་མེད་པར་གཙོ་བོ་གནས་སྐོར་ལ་ཡོང་མཁན་དང་། ཉེ་འཁོར་ལ་ཡོད་པའི་དགོན་སྡེ་ཁག་གི་དགེ་འདུན་པ་ ༤༠༠ ཡས་མས་དང་། དེའི་ཐོག་དགེ་སློང་སེར་པོ་ ༡༠༠༠ ཡས་མས་བཅར་ཡོད་པ་རེད། ཅེས་དང་། ཡང་དུས་རྒྱུན་ཡིན་ན་བོད་ཚེས་ ༡ ནས་ ༡༠ དབར་ཁྱོན་ཉིན་གྲངས་བཅུ་རིང་འཚོག་གི་ཡོད་ནའང་། ད་ལོ་ཉིན་གྲངས་བཞི་མ་གཏོགས་འཚོག་གི་མེད་པ་དང་། ས་གནས་ཀྱི་འབྲེལ་ཡོད་ལས་ཁུངས་ནས་ཆོག་མཆན་ཆ་ཚང་ཞུས་པའི་ཐོག་ནས་འཚོག་གི་ཡོད་སྐོར་བརྗོད་བྱུང་།
སྤྱིར་འདས་ལོའི་ཕྱི་ཟླ་ ༡༡ པའི་ཚེས་ ༡༩ ཉིན་རྡོར་གདན་སྔ་འགྱུར་རྙིང་མའི་སྨོན་ལམ་ཆེན་མོའི་རྒྱུན་ལས་ནས་གསལ་བསྒྲགས་ཤིག་སྤེལ་ཏེ། འདི་ལོའི་སྨོན་ལམ་ཆེན་མོ་དེ་བཞིན་ཟླ་འདིའི་ཕྱི་ཚེས་ ༢ ནས་ ༡༡ བར་འཚོག་རྒྱུ་ཡིན་པ་དང་། ཏོག་དབྱིབས་གཉན་རིམས་ཀྱི་རྐྱེན་པས་རྡོར་གདན་དུ་རྟེན་གཞི་བྱས་པའི་རྣམ་གྲོལ་གླིང་དགོན་པ་དང་། ཞི་ཆེན་དགོན་པའི་དགེ་འདུན་པ་རྣམས་ཀྱིས་གཙོས་གཉུག་མར་གནས་པའི་རྙིང་མའི་དགེ་འདུན་གྲྭ་བཙུན་སྔགས་གསུམ་གྱིས་སྨོན་ལམ་འཚོག་རྒྱུ་དང་། སྨོམ་ལམ་ལ་དངོས་སུ་བཅར་མ་ཐུབ་པའི་དགོན་སྡེ་ཁག་གིས་རང་རང་ས་ནས་གཉན་རིམས་སྔོག་འགོག་ཐོག་སྨོན་ལམ་འཚོག་རྒྱུའི་འབོད་སྐུལ་ཞུས་ཡོད་པ་རེད།
འདས་པའི་ལོ་གཉིས་ནང་རྒྱ་གར་ཚུད་པའི་འཛམ་གླིང་ཁྱོན་དུ་ཏོག་དབྱིབས་གཉན་རིམས་ཀྱི་ཛ་དྲག་གནས་སྟངས་ལ་བརྟེན་ནས། ཤེས་ཡོན་དང་སྲིད་དོན། ཆོས་ལུགས་ཀྱིས་མཚོན་པའི་འདུ་འཛོམས་རིགས་ཕར་འགྱངས་དང་སྐབས་བསྟུན་བཅོས་སྒྲིག་བྱ་དགོས་ཁེལ་ཡོད་པ་ལྟར། དུས་རྒྱུན་གནས་མཆོག་རྡོར་གདན་དུ་འཚོག་གི་ཡོད་པའི་དཔལ་ས་སྐྱའི་འཇིག་རྟེན་ཞི་བདེའི་སྨོན་ལམ་ཆེན་མོ་དེ་བཞིན་དྲ་ལམ་ནས་འཚོགས་ཡོད་ལ། དེར་མཚུངས་བཀའ་བརྒྱུད་དགུན་ཆོས་ཆེན་མོ་ཡང་འདི་ལོའི་ཟླ་ ༡ ཚེས་ ༢༣ ནས་སང་ཉིན་ཕྱི་ཚེས་ ༩ བར་དྲ་ལམ་དུ་འཚོག་བཞིན་ཡོད་པའི་ཐོག ༧རྒྱལ་དབང་ཀརྨ་པ་མཆོག་ནས་དྲ་ལམ་ཐད་གཏོང་བརྒྱུད་སེམས་ཙམ་སུམ་ཅུའི་པའི་གསུང་ཆོས་སྩལ་གནང་གི་ཡོད་པ་རེད།
གསར་འགོད་པ། པ་སངས་ཚེ་རིང་།
