ལོ་གསར་སྐབས་སྨོན་ལམ་དང་མེ་ཏོག་མཆོད་པ་སོགས་མཇལ་བར་དམ་དྲག་བྱེད་ཀྱི་ཡོད་འདུག

རྒྱ་ནག་གཞུང་གིས་ཏོག་ནད་འགོག་སྲུང་ལ་ཁ་གཡར་ནས་བོད་དུ་སྔར་སྲོལ་ནས་ཡོད་པའི་ལོ་སར་སྐབས་ཀྱི་ཆོ་འཕྲུལ་སྨོན་ལམ་དང་མེ་ཏོག་མཆོད་པ་སོགས་མང་ཚོགས་ལ་མཇལ་བཅུག་གི་མེད་འདུག

ད་ལྟའི་ཆར་བོད་མདོ་དབུས་ཁམས་གསུམ་གྱི་ས་ཁུལ་ཁག་ཅིག་ཏུ་བསོད་ནམས་ལོ་གསར་སྲུང་བརྩི་ཞུ་ཡི་ཡོད་པ་དང་འབྲེལ། ལོ་གསར་གྱི་ཚེས་པ་བཅུ་ནས་བཅོ་ལྔའི་བར་ཆོས་འཕྲུལ་སྨོན་ལམ་དང་མཆོད་འབུལ་སོགས་འཚོགས་སྲོལ་ཡོད་ཀྱང་། ད་ལྟ་བོད་ཀྱི་ས་ཁུལ་ཁག་ཅིག་ཏུ་དགོན་སྡེ་ཁག་གི་ལོ་གསར་སྐབས་ཀྱི་ཆོས་ཕྱོགས་ཀྱི་བྱེད་སྒོ་ཁག་སྤེལ་མི་ཆོག་པ་དང་། ཏོག་དབྱིབས་གཉན་རིམས་ལ་ཁག་བཀྲིས་ནས་མང་ཚོགས་དགོན་པར་མཆོད་འཇལ་བྱེད་དུ་འགྲོ་མི་ཆོག་པའི་བཀའ་བཏང་ཡོད་འདུག

དེ་འབྲེལ་འདི་གའི་གསར་འགོད་པར་འབྲེལ་ཡོད་བོད་མི་ཞིག་གིས་གསུངས་དོན་ལྟར་ན། ད་སྐབས་བོད་ཀྱི་དགོན་སྡེ་ཁག་ཏུ་ཆོས་འཕྲུལ་སྨོན་ལམ་འཚོགས་བཞིན་ཡོད་ཀྱང་། ས་ཁུལ་སོ་སོའི་ཏང་ཡོན་ལས་བྱེད་པ་དང་དགོན་པའི་དོ་དམ་ལྷན་ཁང་སོགས་ལ་གོང་རིམ་ནས་བཀའ་བཀོད་བཏང་ཡོད་པ་ལྟར། བླ་བྲང་བཀྲ་ཤིས་འཁྱིལ་དང་སྐུ་འབུམ་བྱམས་པ་གླིང་། རེབ་གོང་རི་བོ་དགོན་ཆེན། ཀན་ལྷོ་ཁུལ་གྱི་རྔོག་རྒྱལ་མོ་དགོན་དང་ཀླུ་ཤོད་ཚོ་བ་བརྒྱད་སོགས་སུ། ཏོག་དབྱིབས་གཉན་རིམས་ལ་ཁ་གཡར་ནས་མི་མང་དགོན་པར་མཆོད་འཇལ་དུ་འགྲོ་རྒྱུ་བཀག་སྡོམ་བྱེད་ཀྱི་ཡོད་པ་དང་། དམིགས་བསལ་རི་བོ་དགོན་ཆེན་དང་སྐུ་འབུམ་བྱམས་པ་གླིང་གཉིས་ནས་དགོན་པའི་མཚན་ཐོག་ནས། འདི་ལོའི་ལོ་གསར་སྐབས་དགོན་པའི་སྒོ་ཕྱེ་རྒྱུ་མིན་སྐོར་བསྒྲགས་ཡོད་འདུག

སྐུ་འབུམ་དགོན་པའི་བདག་གཉེར་ཨུ་ཡོན་ལྷན་ཁང་གི་གསལ་བསྒྲགས་ནང་། སྐུ་འབུམ་དགོན་པས་རིམས་ནད་སྔོན་འགོག་གི་བླང་བྱ་གཞིར་བཟུང་སྟེ། ཧོར་ཟླ་དང་པོའི་ཚེས་བཅོ་ལྔ་ཉིན་གྱི་མཆོད་མཇལ་དང་དགོང་མོའི་མེ་ཏོག་མཆོད་པ་སྒོ་འབྱེད་རྒྱུ་མིན་པའི་བརྡ་སྦྱོར་དེ་ཆེད་དུ་སྤེལ་བ་ཡིན་པས། རྒྱ་ཆེ་བའི་དད་ལྡན་མང་ཚོགས་དང་ཡུལ་སྐོར་བ་རྣམས་ཀྱིས་ངེས་པར་ཡིད་འཇགས་གནང་སྐོར་བརྗོད་འདུག་པ་དང་། དེ་བཞིན། རོང་བོ་དགོན་པའི་དོ་དམ་ཨུ་ཡོན་ལྷན་ཁང་གིས་ཞིང་ཆེན་དང་ཁུལ། གྲོང་ཁྱེར་རིམ་པའི་ཏང་ཨུ་སྲིད་གཞུང་དང་འབྲེལ་ཡོད་སྡེ་ཁག་གིས་རིམས་ནད་སྔོན་འགོག་ཚོད་འཛིན་གྱི་བླང་བྱ་གཞིར་བཟུང་སྟེ། ཟླ་འདིའི་ཕྱི་ཚེས་ ༡༢ ནས་ཚེས་ ༡༦ ཉིན་གྱི་བར་དུ་རོང་བོ་དགོན་པས་ཕྱི་ལ་སྒོ་མི་ཕྱེ་བ་དང་ཡུལ་སྐོར་སྣེ་ལེན་བྱེད་མཚམས་འཇོག་རྒྱུ་ཡིན་པས། རྒྱ་ཆེ་བའི་དད་ལྡན་མང་ཚོགས་དང་ཡུལ་སྐོར་བ་རྣམས་ཀྱིས་ངེས་པར་ཏུ་ཡིད་འཇགས་གནང་སྐོར་བརྗོད་འདུག

ཕྱི་ལོ་ ༢༠༢༠ ལོར་རྒྱ་ནག་གཞུང་གིས་ཏོག་དབྱིབས་གཉན་རིམས་འགོས་ཁྱབ་འགོག་སྲུང་གི་ཆེད་དུ་ཡིན་ཟེར་ནས། ལོ་སར་མ་བསླེབས་གོང་ནས་བོད་གཞིས་ཀྱི་གདན་ས་གསུམ་གཙོ་བོར་གྱུར་བའི་བོད་ཁུལ་གྱི་དགོན་པ་ཁག་ཏུ་མཆོད་མཇལ་སོགས་ཆོས་ཕྱོགས་ཀྱི་འདུ་འཛོམས་རིགས་བཀག་སྡོམ་བྱས་པ་དང་སྨོན་ལམ་ཡང་སྟབས་བདེ་བཟོས་ཡོད་འདུག

གསར་འགོད་པ། སྐལ་བཟང་སྦྱིན་པ།