༧གོང་ས་རྒྱལ་བ་རིན་པོ་ཆེ་མཆོག་རྒྱ་གར་ནང་བཙན་བྱོལ་དུ་ཕེབས་ནས་མི་ལོ་ ༦༣ འཁོར་གྱི་ཡོད་པ་དང་བསྟུན་ཨ་རིའི་གློག་བརྙན་ཁང་ ༨༠༠ ལྷག་ནས་དེ་འབྲེལ་དངོས་བྱུང་གློག་བརྙན་ཞིག་གཟིགས་འབུལ་ཞུ་རྒྱུ་ཡིན་འདུག
ཁ་སང་༧གོང་ས་རྒྱལ་བ་རིན་པོ་ཆེ་མཆོག་གི་སྐུ་ཚེའི་ལོ་རྒྱུས་དང་འབྲེལ་བའི་བོད་ནམ་ཡང་མ་བརྗེད། ཏཱ་ལའི་བླ་མས་གསུང་མ་མྱོང་བའི་གཏམ་རྒྱུད་ཅེས་པའི་གློག་བརྙན་དེའི་སྔོན་བརྡ་དངོས་སུ་སྤྱི་ཚོགས་དྲ་ལམ་དུ་སྤེལ་ཡོད་ཅིང་། དངོས་བྱུང་གློག་བརྙན་དེ་འདི་ལོའི་ཕྱི་ཟླ་ ༣ ཚེས་ ༣༡ ཉིན་དབྱིན་ཡུལ་གྱི་བྱམས་བརྩེའི་གློག་བརྙན་བཟོ་བསྐྲུན་ཁང་ ( Compassionate Film) དང་ཧྥ་ཐོམ་ཨི་ཝེན་ཊི་སི (Fothom event ) གཉིས་ཀྱིས་མཉམ་འབྲེལ་གྱི་ཐོག་ནས་ཨ་རིའི་གློག་བརྙན་ཁང་ ༨༠༠ ལྷག་ནས་གཟིགས་འབུལ་ཞུ་རྒྱུ་ཡིན་འདུག
དེའི་ཐད་ཧྥ་ཐོམ་ཨི་ཝེན་ཊི་སི་ཡི་འགན་འཛིན་རེའེ་ཎཱ་ཊི( Ray Nutt) ཡིས་ཧྥ་ཐོམ་ཨི་ཝེན་ཊི་སི་གློག་བརྙན་ཁང་གིས་འཛམ་གླིང་གི་ཆེས་ཤུགས་རྐྱེན་ཆེ་བའི་སྐྱབས་བཅོལ་བ་ཞིག་བཙན་བྱོལ་དུ་ཕེབས་པའི་དམིགས་བསལ་གྱི་གཏམ་རྒྱུད་ཅིག་རྒྱལ་ཁབ་ཁྱོན་ཡོངས་ལ་གཟིགས་འབུལ་ཞུ་རྒྱུ་བྱུང་བར་དགའ་སྤོབས་ཆེན་པོ་ཡོད་པ་དང་། ༧གོང་ས་རྒྱལ་བ་རིན་པོ་ཆེ་མཆོག་གི་མདུན་ནས་དངོས་སུ་འཛམ་གླིང་གི་ལོ་རྒྱུས་ཀྱི་གལ་གནད་ཅིག་གོ་ཐོས་བྱུང་བ་ནི། དངོས་བྱུང་གློག་བརྙན་འདི་བལྟས་ནས་གཟིགས་མོ་བ་རྣམས་ཀྱི་ཆེས་བརྗེད་ཐབས་བྲལ་བའི་མྱོང་ཚོར་ཞིག་ཏུ་འགྱུར་རྒྱུ་ཡིན་སྐོར་འགྲེལ་བརྗོད་བྱས་འདུག་ལ། གློག་བརྙན་དེའི་འཁྲབ་ཁྲིད་པ་རྗེན་ཕོལ་མིར་ཊིན་ཛི་( Jean-Paul Mertinez ) ལགས་ཀྱིས་ཁོང་ཚོར་གོ་སྐབས་དེ་འདྲ་གནང་བར་དགའ་ཚོར་ཆེན་པོ་བྱུང་སྐོར་བརྗོད་འདུག
ཧྥ་ཐོམ་ཨི་ཝེན་ཊི་སི (Fathom events) ཡིས་སྤེལ་བའི་གནས་ཚུལ་ལྟར་ན། དངོས་བྱུང་གློག་བརྙན་དེ་ནི་༧གོང་ས་རྒྱལ་བ་རིན་པོ་ཆེ་མཆོག་དང་། ཕྱི་ལོ་ ༡༩༥༩ ལོར་རྒྱ་གར་གྱི་རྒྱལ་མཚམས་སྲུང་སྐྱོབ་ཐད་ཀྱི་ཆབ་སྲིད་གནད་ཡོད་མི་སྣ་ཧར་མན་ཌིར་སིང་(Har Mander Singh) ལགས་རྣམ་གཉིས་ཀྱིས། རྒྱ་ནག་གཞུང་གིས་བོད་ས་བཙན་བཟུང་བྱས་རྗེས། ༧གོང་ས་རྒྱལ་བ་རིན་པོ་ཆེ་མཆོག་བཙན་བྱོལ་དུ་ཕེབས་དགོས་བྱུང་བའི་སྐོར་གསུངས་པའི་དངོས་བྱུང་གློག་བརྙན་ཐོག་མ་དེ་ཡིན་པ་དང་། ལོ་རྒྱུས་རང་བཞིན་ལྡན་པའི་དངོས་བྱུང་གློག་བརྙན་དེས་འཛམ་གླིང་གི་ལོ་རྒྱུས་དང་། སྒྱུ་རྩལ། རིག་གཞུང། བོད་བརྒྱུད་ནང་བསྟན་བཅས་ཀྱི་སྙིང་བཅུད་ལ་འཚོལ་ཞིབ་བྱས་ཡོད་སྐོར་དང་། གློག་བརྙན་དེའི་ནང་དུ་བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་གི་སྙིང་བཅུད་གསལ་སྟོན་བྱས་པ་དང་སྦྲགས། བྱམས་དང་སྙིང་རྗེའི་ལམ་ནས་འཛམ་གླིང་གཅིག་གྱུར་ཡོང་ཐུབ་པ་སོགས་ཀྱི་སྐོར་འཁོད་ཡོད་འདུག
དངོས་བྱུང་གློག་བརྙན་དེའི་འཁྲབ་ཁྲིད་པ་ (JeanPaul Mertinez) ལགས་ཡིན་པ་དང་། རོལ་དབྱངས་དཀྲོལ་ལེན་པ་ (Anouska Shankar) ཡིན་ཞིང་། ཁོང་མོ་ནི་རྒྱ་གར་གྱི་སྙན་གྲགས་ཆེ་བའི་རོལ་དབྱངས་དཀྲོལ་ལེན་པ་ཤན་ཀར་(Sri Ravi Shankar) གྱི་བུ་མོ་ཡིན་པ་རེད། དེ་བཞིན་ལོ་རྒྱུས་རང་བཞིན་པའི་དངོས་བྱུང་གློག་བརྙན་དེ་ནི་དྲ་ཐག་https://www.fathomevents.com/events/ ནས་འཚོལ་ཞིབ་དང་འཛིན་བྱང་ཉོ་ཐུབ་ཀྱི་ཡོད་པ་དང་། དྲ་ཐག་འདི་ནས་ www.fathomevents.com གློག་བརྙན་ཁང་གང་དུ་གཟིགས་འབུལ་བྱ་རྒྱུ་ཡིན་མིན་བལྟ་ཐུབ་ཀྱི་འདུག
གསར་འགོད་པ། དཔལ་ལྡན།
གཏམ་བཟང་རེད་ཐུགས་རྗེ་ཆེ།