བོད་རང་སྐྱོང་ལྗོངས་ཟེར་བའི་དམར་ཤོག་དྲུང་ཆེ་གསར་པ་ཝང་ཅུན་ཀྲེང་དགའ་ལྡན་དགོན་དང་ར་མོ་ཆེ་གཙུག་ལག་ཁང་སོགས་སུ་ཕྱིན་ཏེ་ཁྲིམས་ལྟར་བོད་བརྒྱུད་ནང་བསྟན་ཀྲུང་གོ་ཅན་ལ་སྐུལ་འདེད་ཧུར་ཐག་གཏོང་བ་དང་བོད་བརྒྱུད་ནང་བསྟན་སྤྱི་ཚོགས་རིང་ལུགས་ཀྱི་སྤྱི་ཚོགས་དང་འཚམ་མཐུན་ཡོང་བར་ཁྲིད་སྟོན་སོགས་བྱེད་དགོས་སྐོར་བཤད།
རྒྱ་ནག་པེ་ཅིན་གྱི་ཨོ་རྩེད་འགྲན་ཚོགས་འཚོག་བཞིན་པ་དང་བོད་མིའི་གསུམ་བཅུའི་དུས་དྲན་བསླེབ་ལ་ཉེ་སྟབས། ཁེ་ཉིན་ཕྱི་ཚེས་ ༡༧ ཉིན་བོད་རང་སྐྱོང་ལྗོངས་ཟེར་བའི་དམར་ཤོག་དྲུང་ཆེ་ཝང་ཅུན་ཀྲེང་ཟེར་བ་དེ་བོད་ཀྱི་གདན་ས་ཆེན་མོ་དགའ་ལྡན་དགོན་པ་དང་། ལྷ་སའི་ར་མོ་ཆེ་གཙུག་ལག་ཁང་གཉིས་སུ་ཆེད་སྐྱོད་ཀྱིས། དགེ་འདུན་པ་རྣམས་ཀྱིས་ཏང་གི་བཀའ་ལ་ཉན་པ་དང་ཏང་གི་རྗེས་སུ་འབྲངས་ཏེ། ཞི་ཅིན་ཕིང་གི་བོད་བརྒྱུད་ནང་བསྟན་ཀྲུང་གོ་ཅན་དུ་བསྒྱུར་བ་དང་། ཏང་གི་ཆོས་ལུགས་ལས་དོན་ཟེར་བའི་སྐོར་གྱི་གཞི་རྩའི་ཁྲིམས་སྒྲིག་ཁག་ལ་བརྩི་སྲུང་ནན་པོ་བྱ་དགོས་པའི་བཀའ་བཏང་ཡོད་འདུག
རྒྱ་ནག་གཞུང་འབྲེལ་ཀྲུང་གོའི་བོད་ལྗོངས་དྲ་བའི་ནང་། ད་ལན་ཝང་ཅུན་ཀྲེང་ཟེར་བ་དེ་དགོན་སྡེ་ཁག་ལ་རྟོག་ཞིབ་ཆེད་དུ་བསྐྱོད་པ་ཞིག་ཡིན་པ་དང་། སྐབས་དེར་ཁོས་དགེ་འདུན་པ་ཚོས་བློ་བརྟན་འགྱུར་མེད་ཀྱི་ཐོག་ནས་“མེས་རྒྱལ་གཅིག་གྱུར་”དང་“མི་རིགས་མཐུན་སྒྲིལ་”ཟེར་བར་སྲུང་སྐྱོང་བྱ་དགོས་པ་དང་། དེ་གཉིས་ནི་སྤྱི་ཚོགས་ཞི་མཐུན་དང་། བརྟན་ལྷིང་། འཕེལ་རྒྱས་ཟེར་བ་བཅས་སྲུང་སྐྱོང་བྱེད་ཐབས་ཤིག་ཡིན་སྐོར་དང་། ཆབ་སྲིད་ཀྱི་ཐད་ལ་གྲྭ་བཙུན་རྣམས་ཀྱིས་ནམ་ཡང་ཏང་གི་བཀའ་ལ་ཉན་པ་དང་། ཏང་གི་རྗེས་སུ་འབྲང་བ་དགོས་པ། ཆོས་ལུགས་ཀྱི་ཐད་ནས་བོད་བརྒྱུད་ནང་བསྟན་སྐྱོན་བྲལ་ངང་རྒྱུན་འཛིན་བྱེད་དགོས་པ། ཀུན་སྤྱོད་ཀྱི་ཐད་ལ་དམངས་མགུ་བ་དང་། འགག་རྩའི་དུས་སྐབས་སུ་ནུས་པ་ཐོན་དགོས་སྐོར་སོགས་དུས་རྒྱུན་རྒྱ་ནག་གཞུང་གིས་འཆད་བཞིན་པའི་གྲྭ་བཙུན་རྣམས་ལ་ཚང་དགོས་པའི་ “ཚད་གཞི་བཞི་” ལ་སློབ་སྦྱོང་བྱས་ཏེ་སྔོན་ཐོན་པ་ཞིག་བྱ་དགོས་པའི་ཆབ་སྲིད་རང་བཞིན་གྱི་དྲིལ་བསྒྲགས་དེ་ཡིན་ཞིང་། དེ་ནི་བོད་ཀྱི་དགོན་སྡེ་ཁག་དང་ཆོས་ལུགས་ཀྱི་སྡེ་ལ་སྟངས་འཛིན་བྱེད་ཐབས་དང་། ལྷག་པར་དུ་སྲིད་འཛིན་ཞི་ཅིན་ཕིང་གི་བོད་བརྒྱུད་ནང་བསྟན་རྒྱ་ནག་ཅན་དུ་སྒྱུར་ཐབས་ཞེས་པའི་ལས་འགུལ་སྔར་བས་ཤུགས་ཆེར་གཏོང་བའི་རྣམ་པ་ཞིག་ཡིན་པ་རེད།
གཞན་ཡང་ཝང་ཅུན་ཀྲེང་ཟེར་བ་དེས། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་བྱ་རྒྱུ་མཐའ་འཁྱོངས་བྱས་ཏེ། རྒྱལ་ཡོངས་ཀྱི་ཆོས་ལུགས་ལས་དོན་ཚོགས་འདུ་དང་ལྷག་པར་དུ་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་གྱི་དགོངས་དོན་སློབ་སྦྱོང་ལག་བསྟར་གཏིང་ཟབ་དང་། ཏང་གི་ཆོས་ལུགས་ལས་དོན་སྐོར་གྱི་གཞི་རྩའི་མཛད་ཕྱོགས་ལག་བསྟར་གཏིང་ཟབ། ཁྲིམས་ལྟར་ཆོས་ལུགས་ལས་དོན་ལ་དོ་དམ་བྱེད་རྒྱུ་མཐའ་འཁྱོངས། བོད་བརྒྱུད་ནང་བསྟན་ཀྲུང་གོ་ཅན་ལ་སྐུལ་འདེད་ཧུར་ཐག་གཏོང་བ། བོད་བརྒྱུད་ནང་བསྟན་སྤྱི་ཚོགས་རིང་ལུགས་སྤྱི་ཚོགས་དང་འཚམ་མཐུན་ཡོང་བར་ཁྲིད་སྟོན་བཅས་བྱས་ནས། སྤྱི་ཚོགས་རིང་ལུགས་དེང་རབས་ཅན་གྱི་བོད་ལྗོངས་གསར་པ་འཛུགས་སྐྲུན་གྱི་མཉམ་ཤུགས་ཆེན་པོ་གཅིག་ཏུ་སྒྲིལ་དགོས། ཞེས་པ་ནན་བཤད་བྱས་ཡོད་སྐོར་དང་། ད་དུང་དགོན་པའི་རིག་དངོས་ཁག་ལ་སྲུང་སྐྱོབ་ཚད་ལྡན་བྱ་དགོས་པ་དང་། བོད་འདི་གནའ་སྔ་མོ་ནས་རྒྱ་ནག་གི་ཁ་འབྲལ་ཐབས་མེད་པའི་ཆ་ཤས་ཤིག་ཡིན་པའི་དོན་དངོས་རྣམས་སྔོག་འདོན་བྱ་དགོས་པ་ཟད། དེ་དག་དྲིལ་བསྒྲགས་བྱས་ཏེ་མང་ཚོགས་ཁྲོད་དུ་“ཀྲུང་ཧྭ་མི་རིགས་གཅིག་མཐུན་འདུས་གྲུབ་”ཀྱི་འདུ་ཤེས་བརྟན་པོ་སླེབས་རྒྱུར་ཤུགས་བརྒྱབ་དགོས་སྐོར་ཡང་བརྗོད་ཡོད་འདུག
བོད་གནས་ཉམས་ཞིབ་པ་རྣམས་ཀྱིས་ད་ལན་བོད་རང་སྐྱོང་ལྗོངས་ཟེར་བའི་དམར་ཤོག་དྲུང་ཆེ་དགའ་ལྡན་དགོན་པ་དང་ར་མོ་ཆེ་གཙུག་ལག་ཁང་ལ་བསྐྱོད་རྒྱུ་དེ། གཙོ་བོ་གསུམ་བཅུ་དུས་དྲན་འཆར་ལ་ཉེ་བའི་སྐབས་འདིར་བོད་ཁུལ་དུ་ངོ་རྒོལ་ལས་འགུལ་རིགས་མི་ཡོང་བའི་ཆེད་དུ་ཡིན་སྐོར་འགྲེལ་བརྗོད་བྱེད་བཞིན་ཡོད་འདུག དེ་ཡང་ཉེ་བའི་ལོ་ཤས་ནང་རྒྱ་ནག་གཞུང་གིས་སྲིད་འཛིན་ཞི་ཅིན་ཕིང་གི་ཏང་གི་ཚོགས་ཆེན་བཅུ་དགུ་པའི་དགོངས་དོན་ཟེར་བ་སོགས་བཤད་དེ། བོད་ས་སྟོད་སྨད་ཡོངས་སུ་བོད་བརྒྱུད་ནང་བསྟན་རྒྱ་ནག་ཅན་དུ་སྒྱུར་ཐབས་དང་། བོད་བརྒྱུད་ནང་བསྟན་དེ་ཉིད་སྤྱི་ཚོགས་རིང་ལུགས་ཀྱི་སྤྱི་ཚོགས་དང་ “འཚམ་མཐུན་”ཡོང་ཐབས་སོགས་ཀྱི་མིང་ཐོག་ནས་དམ་དྲག་དང་སྟངས་འཛིན་ཤུགས་ཆེར་བྱེད་མུས་ཡིན་པ་རེད།
དེའི་ཐོག་ཕྱི་ལོ་ ༡༩༩༦ ལོར་ཐོག་མར་བོད་རང་སྐྱོང་ལྗོངས་ཀྱི་དགོན་སྡེ་ཁག་ཏུ་སྤེལ་ཏེ་རིམ་བཞིན་བོད་ས་ཡོངས་སུ་ཁྱབ་གདལ་དུ་སོང་བའི་རྒྱལ་གཅེས་ཆོས་གཅེས་ཀྱི་སློབ་གསོ་དེ་མུ་མཐུད་ལག་བསྟར་བྱེད་མུས་ཡིན་ཞིང་། དྷ་སར་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་གྲངས་ཐོ་ལྟར་ན། ད་བར་བོད་ཀྱི་དགོན་སྡེ་ཁག་ཏུ་རྒྱལ་གཅེས་ཆོས་གཅེས་ཀྱི་སློབ་གསོ་དང་ལེན་མ་བྱས་པའི་གྲྭ་བཙུན་རྣམས་འཇུ་བཟུང་དང་ཕྱིར་འབུད། རང་ལོ་ ༡༨ མ་སོན་པ་རྣམས་དགོན་པར་སྡོད་མ་བཅུག་པ་དང་། ཕྱི་ལོ་ ༢༠༠༨ ཟླ་ ༣ པ་ནས་བཟུང་ཁྲིམས་ལུགས་དྲིལ་བསྒྲགས་སློབ་གསོའི་ལས་འགུལ་དང་། ༢༠༡༡ ལོའི་ལོ་མཇུག་ཏུ་བོད་རང་སྐྱོང་ལྗོངས་ཀྱི་དགོན་སྡེ་ཁག་འཆམ་མཐུན་མིག་དཔེ་དགོན་པ་དང་རྒྱལ་གཅེས་སྔོན་ཐོན་གྱི་གྲྭ་བཙུན་དཔྱད་འདེམས་བྱེད་པའི་ལས་འགུལ། དཔེ་བཟང་གཟེངས་བསྟོད་ལས་འགུལ་སོགས་དང་། དུས་རྒྱུན་དུ་ནས་སྒྲིག་བཀུར་ཁྲིམས་སྲུང་ཟེར་བ་དང་། ཞི་མཐུན་གོང་བཀུར། ཞི་བདེར་རེ་སྨོན་སོགས་ཀྱི་ཆབ་སྲིད་རྒྱབ་ལྗོངས་དང་དྲིལ་བསྒྲགས་རང་བཞིན་ལྡན་པའི་ལས་འགུལ་ཤུགས་ཆེར་སྤེལ་མུས་ཡིན་པ་རེད།
གསར་འགོད་པ། པ་སངས་ཚེ་རིང་།
