རྒྱ་གར་གྱི་མཐའ་མཚམས་སྲུང་སྐྱོབ་དང་རྒྱལ་སྲུང་གི་ལས་གཞིའི་ཁྲོད་འདས་གྲོངས་སུ་ཕྱིན་པའི་བོད་ཀྱི་དྭང་ཞབས་དམག་སྤྱི་གཞོན་པ་བསྟན་འཛིན་ནོར་བུ་ལགས་ཀྱི་བྱས་རྗེས་ལ་རྒྱ་གར་གཞུང་གིས་ཆེ་བསྟོད་ཀྱི་གཟེངས་རྟགས་ཤིག་ཕུལ་ཡོད་འདུག
ཟླ་འདིའི་ཕྱི་ཚེས་ ༡༨ ཉིན་རྒྱ་གར་གྱི་བྱང་ཤར་མངའ་སྡེ་ (Meghalaya) མེག་གྷ་ལ་ཡའི་ས་གནས་ཤེས་ལོངས་སུ། ཕྱི་ལོ་ ༡༩༨༨ ལོར་ཧི་མ་ལ་ཡའི་(Siachen Glacier) གངས་རུད་ཀྱི་གོད་ཆག་ཁྲོད་གར་སོང་ཆ་མེད་དུ་གྱུར་བའི་བོད་མིའི་དྭང་ཞབས་དམག་སྤྱི་གཞོན་པ་དམ་པ་བསྟན་འཛིན་ནོར་བུ་ལགས་ཀྱི་བྱས་རྗེས་ལ་ངོས་འཛིན་ཆེད། རྒྱ་གར་གཞུང་གི་ཆེ་བསྟོད་ཀྱི་གཟེངས་རྟགས་(Indian Gallantry Award)ཕུལ་ཡོད་འདུག་ལ། དམག་སྤྱི་གཞོན་པ་ཁོང་གིས་ལོ་ངོ་ ༢༠ ཙམ་གྱི་རིང་རྒྱ་གར་བྱང་ཕྱོགས་ཀྱི་མཐའ་མཚམས་དང་བདེ་འཇགས་སྲུང་སྐྱོབ་ཐད་རང་སྲོག་བློས་གཏོང་གིས་དཀའ་ལས་བརྒྱབ་ཡོད་འདུག
ཆེ་བསྟོད་གཟེངས་རྟགས་དེ་ཉིད་དམ་པ་ཁོང་གི་བཟའ་ཟླ་ཚེ་རིང་བུ་འཁྲིད་ལགས་ཀྱིས་བླངས་གནང་ཡོད་པ་དང་། དེ་རིང་འདི་གའི་གསར་འགོད་པས་ཁ་པར་བརྒྱུད་དམ་པ་ཁོང་གི་བཟའ་ཟླ་ཚེ་རིང་བུ་འཁྲིད་ལགས་སུ་གཟེངས་རྟགས་དེ་ཐོབ་སྐབས་ཚོར་སྣང་ག་རེ་བྱུང་མིན་དྲིས་པར་ཁོང་མོས། སྐབས་དེར་ང་ལ་དགའ་སྐྱོ་འདྲེས་མའི་ཚོར་བ་བྱུང་། རྒྱུ་མཚན་ནི། ངའི་བཟའ་ཟླ་འདས་གྲོངས་སུ་ཕྱིན་པ་དང་སྐུ་ཕུང་ཡང་ལག་སོན་མ་བྱུང་བ་རེད་ལ། སྐབས་དེ་དུས་ཁ་པར་སོགས་ཀྱི་འབྲེལ་ལམ་ཡག་པོ་མེད་སྟབས། ཁོང་རང་སྐུ་མ་གྲོངས་བའི་ཉིན་ཤས་སྔོན་ང་ལ་ཡི་གེ་ཞིག་བསྐུར་འདུག དེ་ནས་ཉིན་གྲངས་གསུམ་བཞི་ཙམ་གྱི་རྗེས་ལ་ཁོང་འདས་གྲོངས་སུ་ཕྱིན་པའི་གནས་ཚུལ་འབྱོར་བྱུང་བ་རེད། ཡང་རྒྱ་གར་གཞུང་གིས་ང་ཚོ་བོད་མི་ཚོར་དབྱེ་འབྱེད་མེད་པར་སོ་སོའི་ཡུལ་མི་བཞིན་གཅིག་མཚུངས་ཀྱིས་བདག་སྐྱོང་གནང་གི་ཡོད་པའི་གནས་སྟངས་འོག་གཟེངས་རྟགས་དེ་འདྲ་ཞིག་གནང་བར་བཀའ་དྲིན་ཆེ་ཞུ་རྒྱུ་ཡིན། ཞེས་བརྗོད་བྱུང་བ་དང་། གཟེངས་རྟགས་སྤྲོད་སྐབས་ས་གནས་རྒྱ་གར་གྱི་དམག་དཔོན་ཁག་ཅིག་དང་དམག་མི་བཅས་ཁྱོན་མི་གྲངས་ ༡༣ བསླེབས་ཡོད་པ་དང་། ད་རེས་དྭང་ཞབས་དམག་སྤྱི་དམ་པ་ཁོང་ལ་ཕུལ་བའི་གཟེངས་རྟགས་དེ་ཉིད། འདི་ལོའི་རྒྱ་གར་དམངས་གཙོའི་ཉིན་མོར། སྲིད་བློན་མུ་དྷི་གཞུང་གིས་རྒྱ་གར་གྱི་མཐའ་མཚམས་སྲུང་སྐྱོབ་དང་རྒྱལ་སྲུང་གི་ལས་དོན་བསྒྲུབས་པར་ངོས་འཛིན་གྱིས་ཕུལ་བ་ཞིག་ཆགས་ཀྱི་ཡོད་འདུག
མཛད་སྒོའི་སྐབས་དམག་མི་ཞིག་གིས། བོད་མཐོ་སྒང་ནས་སྐྱེས་ཤིང་དཀའ་ཁག་ཆེ་བའི་དུས་སྐབས་སུ། སྙིང་སྟོབས་ཆེ་ཞིང་མི་ཚེ་དཀྱུས་མར་རོལ་བའི་དམག་སྤྱི་གཞོན་པ་བསྟན་འཛིན་ནོར་བུ་ལགས་རྒྱ་གར་གྱི་དམག་མིའི་ཁོངས་སུ་ཞུགས། ཁོང་ནི་དམག་མི་བློ་ཁོག་ཅན་ཞིག་ཡིན་པ་མ་ཟད། བཀུར་འོས་པའི་མགོ་ཁྲིད་ཅིག་ཀྱང་ཡིན། དྭང་ཞབས་དམག་མིའི་རུ་ཁག་དང་པོ་ཡིན་པའི་བསྟན་འཛིན་ནོར་བུ་ལགས། ཕྱི་ལོ་ ༡༩༨༠ ནང་ལ་དྭགས་ཀྱི་མཐའ་མཚམས་ཁུལ་དུ་མངག་གཏོང་གིས། རྒྱ་གར་གྱི་མཐའ་མཚམས་སྲུང་སྐྱོབ་དང་འབྲེལ་ནས་ཕྱིའི་བཙན་འཛུལ་འགོག་སྲུང་དང་ཞི་གནས་ཡོང་ཐབས་ཀྱི་ཕྱག་ལས་གནང་། འོན་ཀྱང་། སྟབས་མ་ལེགས་པ་ཞིག་ལ་ཕྱི་ལོ་ ༡༩༨༨ ཟླ་ ༣ ཚེས་ ༢༢ ཉིན་ཧི་མ་ལ་ཡའི་གངས་རུད་ཀྱི་གོད་ཆག་ཁྲོད་བསྟན་འཛིན་ནོར་བུ་ལགས་གར་སོང་ཆ་མེད་དུ་གྱུར། དེ་རིང་རྒྱ་གར་གཞུང་དང་མི་མང་ངོས་ནས་སྙིང་སྟོབས་ཅན་གྱི་དམག་སྤྱི་ཁྱེད་ལ་བཀའ་དྲིན་ཆེ་ཞུ་རྒྱུ་ཡིན། ཞེས་ཡོངས་བསྒྲགས་གནང་འདུག
དམག་སྤྱི་དམ་པ་བསྟན་འཛིན་ནོར་བུ་ལགས་ཕྱི་ལོ་ ༡༩༨༨ ཟླ་ ༣ ཚེས་ ༢༠ ཉིན་བྱང་ཤར་ཁུལ་གྱི་འཁྱག་རོམ་ཁྲོད་ནས་འདས་གྲོངས་སུ་ཕྱིན་ཡོད་པ་དང་། ད་ལྟ་འདས་པོ་དམ་པ་ཁོང་གི་ཤུལ་དུ་སྐུ་ཟླ་ཚེ་རིང་བུ་འཁྲིད་ལགས་དང་ལོ་ ༡༣ ཡིན་པའི་བུ་མོ་གཅིག་དང་བུ་ཆུང་ལོ་ ༨ ཅན་ཞིག་བཅས་ཡོད་པ་དང་། དམ་པ་ཁོང་ཕྱི་ལོ་ ༡༩༦༩ ནས་ ༡༩༨༨ བར་ལོ་ངོ་ ༢༠ ཙམ་གྱི་རིང་དྭང་ཞབས་དམག་མིར་ཞུགས་ཏེ། རྒྱ་གར་གྱི་མཐའ་མཚམས་སྲུང་སྐྱོབ་དང་རྒྱལ་སྲུང་གི་སྲི་ཞུ་ཞུས་མྱོང་བ་རེད།
གསར་འགོད་པ། སྐལ་བཟང་སྦྱིན་པ།
