ཨུ་རུ་སུས་ཡུ་ཀེ་རེན་ལ་དྲག་པོའི་བཙན་འཛུལ་དངོས་སུ་མགོ་བརྩམས།

དེ་རིང་ཨུ་རུ་སུའི་དྲག་པོའི་དམག་དཔུང་གིས་ཡུ་ཀེ་རེན་གྱི་བྱང་ཕྱོགས་སུ་ཡོད་པའི་རྒྱལ་ས་དང་མཐའ་མཚམས་གྲོང་ཁྱེར་ཁག་གཉིས་སུ་བཙན་འཛུལ་བྱས་ཏེ་དམག་འཐབ་འཁོར་ལོ་གཏོར་རྒོལ་བཏང་བ་དང་ཉུང་མཐར་མི་གྲངས་ ༡༠ གྲངས་ཤིག་ལ་ཤི་རྨས་བྱུང་ཡོད་སྐོར་བསྒྲགས་འདུག

ཉེ་ལམ་ཨུ་རུ་སུའི་སྲིད་འཛིན་པུ་ཀྲིན་གྱིས། ཨུ་རུ་སུས་ཡུ་ཀེ་རེན་གྱི་མཐའ་མཚམས་དམག་མི་ཕྱིར་འཐེན་བྱས་ཏེ་བཙན་འཛུལ་བྱེད་འཆར་མེད་སྐོར་བསྒྲགས་ཡོད་ཀྱང་། དེ་རིང་ཞོགས་པར་ཨུ་རུ་སུའི་དམག་དཔུང་དང་འཐབ་འཛིང་རླངས་འཁོར་མང་པོ་ཡུ་ཀེ་རེན་གྱི་བྱང་ཕྱོགས་སུ་བཙན་འཛུལ་བྱས་ཡོད་པ་མ་ཟད། ཡུ་ཀེ་རེན་གྱི་བྱང་ཕྱོགས་སུ་ཡོད་པའི་རྒྱལ་ས་ཀིབ་ (Kyiv) དང་གྲོང་ཁྱེར་ (Dnipro)། དེ་བཞིན་གྲོང་ཁྱེར་ (Kharkiv)ནང་ཡོད་པའི་དམག་སྤྱིའི་ལས་ཁུངས་དང་གནམ་ཐང་། དམག་གི་མཛོད་ཁང་སོགས་ལ་འབར་རྫས་གཡུགས་ཏེ་གཏོར་རྒོལ་བཏང་ཡོད་ལུགས་དང་། ཉུང་མཐར་མི་ ༧ ལྷག་དམར་གསོད་དང་མི་ ༡༠ ལྷག་ལ་རྨས་སྐྱོན་ཕོག་ཡོད་འདུག

ཡུ་ཀེ་རེན་གྱི་སྲིད་འཛིན་ཝོ་ལོ་ཌི་མིར་ཛེ་ལེན་སི་ཀི་ (Volodymyr Zelensky) ཡིས་དེ་འབྲེལ་བསྒྲགས་གཏམ་ཞིག་སྤེལ་བའི་ནང་། པུ་ཀྲིན་གྱིས་ཡུ་ཀེ་རེན་ནང་བཙན་འཛུལ་བྱེད་མགོ་བརྩམས་ཏེ། ཡུ་ཀེ་རེན་གྱི་ས་ཁུལ་དུ་དྲག་པོའི་ཁྲིམས་གཞི་ལག་བསྟར་བྱས་དང་བྱེད་མུས་ཡིན་སྐོར་དང་། ཡུ་ཀེ་རེན་གྱིས་སྟོབས་ཤུགས་ཅན་དང་གནད་དོན་གང་ཞིག་ལ་འཕྲད་ཀྱང་གྲ་སྒྲིག་ཨང་གསར་ཡོད་ལ། གཞན་ཕམ་ཉེས་སུ་གཏང་རྒྱུ་ཡིན་སྐོར་དང་། ཡུ་ཀེ་རེན་གྱི་མཐའ་མཚམས་ཁུལ་དུ་ཨུ་རུ་སུའི་དཔུང་དམག་འབུམ་ ༢ ཙམ་དང་། དམག་འཐབ་རླངས་འཁོར་གཅིག་སྟོང་ཙམ་གྲ་སྒྲིག་ཡོད་པ་མ་ཟད། ཡུ་ཀེ་རེན་གྱི་དམག་མིའི་རྨང་གཞིའི་འཛུགས་སྐྲུན་དང་མཐའ་མཚམས་སྲུང་སྐྱོབ་ཐད་ཐེ་ཇུས་བྱེད་བཞིན་ཡོད་སྐོར་བསྒྲགས་འདུག

དེ་རིང་གི་ཨུ་རུ་སུའི་བཙན་འཛུལ་དེར་ཨ་རིའི་སྲིད་འཛིན་བྷའེ་ཌན་མཆོག་གིས། ཨུ་རུ་སུས་དྲང་བདེན་མེད་པའི་བཙན་འཛུལ་བྱས་ཏེ་མི་མང་གིས་དཀའ་སྡུག་མྱོང་བཞིན་ཡོད་པར་བརྟེན། ཁོང་གིས་ཡུ་ཀེ་རེན་མི་མང་གི་ཆེད་དུ་སྨོན་ལམ་རྒྱག་བཞིན་ཡོད་སྐོར་དང་། ཝ་ཤིང་ཊོན་དང་མཐུན་ཕྱོགས་རྒྱལ་ཁབ་ཁག་གིས་ཨུ་རུ་སུའི་བཙན་རྒོལ་ལ་མཉམ་རུབ་ཀྱི་ཐག་གཅོད་བརྒྱུད་ཡ་ལན་སློག་གི་ཡིན། ཞེས་དང་། སྲིད་འཛིན་པུ་ཀྲིན་གྱིས་སྔོན་ཚུད་ནས་དམག་བརྒྱག་རྒྱུའི་འཆར་གཞི་ངན་པ་ཡོད་པ་དེས། མིའི་ཚེ་སྲོག་ཤོར་བ་སོགས་རྐྱེན་ངན་གང་བྱུང་གི་འགན་འཁྲི་ཡོངས་རྫོགས་ཨུ་རུ་སུས་ལེན་དགོས་རེད། ཅེས་གསུངས་འདུག

ཡུ་རོབ་ལྷན་ཚོགས་ (European Commission) ཀྱི་ཚོགས་གཙོ་ལྕམ་ཨར་སེ་ལ་ཝན་ཌེར་ལེ་ཡན་ (Ursula von der Leyen) ལགས་ཀྱིས། ཡུ་རོབ་ལྷན་ཚོགས་ཀྱིས་ཡུ་ཀེ་རེན་ལ་རྒྱབ་སྐྱོར་ཡོད་པ་དང་། ཨུ་རུ་སུའི་དམག་མི་རྣམས་ངེས་པར་དུ་ཕྱིར་ལོག་བྱ་དགོས་སྐོར་བབསྒྲགས་འདུག  དེ་བཞིན་དབྱིན་ཡུལ་གྱི་སྲིད་བློན་བྷོ་རི་སི་ཇོན་སོན་ (Boris Johnson) ལགས་ཀྱིས་སྲིད་འཛིན་པུ་ཀྲིན་གྱིས་ཡུ་ཀེ་རེན་ནང་མི་གསོད་ཁྲག་སྦྱོར་དང་གཏོར་བཤིག་གི་ལམ་ནས་བཙན་རྒོལ་བྱེད་མགོ་བརྩམས་པའི་ཛ་དྲག་གི་དོན་རྐྱེན་བྱུང་བར་སེམས་འཚབ་ཡོད་སྐོར་དང། ཁོང་གིས་ཡུ་ཀེ་རེན་གྱི་སྲིད་འཛིན་དང་ལྷན་དུ་ཡ་ལན་ཇི་ལྟར་བྱ་དགོས་པའི་སྐོར་དང་། དབྱིན་ཡུལ་དང་མཐུན་ཕྱོགས་རྒྱལ་ཁབ་ཁག་གིས་ཐག་གཅོད་ཅི་དགོས་ཐད་གླེང་སློང་བྱུང་ཡོད་སྐོར་བརྗོད་འདུག

ད་ལྟ་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་སྤེལ་བ་ལྟར་ན། ཨུ་རུ་སུའི་དམག་དཔུང་མང་པོ་ཞིག་ཡུ་ཀེ་རན་ནང་དུ་འཛུལ་ཡོད་པ་དང་། ཡུ་ཀེ་རེན་གྱི་གྲོང་ཁྱེར་ཁག་ཏུ་མེ་ཤུགས་འཕུར་མདའ་གཡུགས་ཡོད་སྟབས། ད་བར་དུ་ཉུང་མཐར་མི་གྲངས་ ༧ གྱི་ཚེ་སྲོག་ཤོར་ཡོད་ཀྱང་། ཡུ་ཀེ་རེན་གྱི་དམག་དཔུང་གིས་ (Kherkakiv) གྲོང་ཁྱེར་གྱི་ཤར་ཕྱོགས་ནས་ཨུ་རུ་སུའི་འཐབ་འཁོར་(tank) བཞི་ཙམ་གཏོར་རྒོལ་བཏང་སྟེ་དམག་མི་ ༥༠ ཙམ་བསད་ཡོད་ལུགས་དང་། གནམ་གྲུ་སོགས་གཏོར་རྒོལ་བྱས་ཡོད་སྐོར་སོགས་བསྒྲགས་འདུག ད་དུང་ཟླ་འདིའི་ཕྱི་ཚེས་ ༢༡ ཉིན་ཡུ་ཀེ་རེན་གྱི་དམག་མི་ ༥ ཨུ་རུ་སུའི་མཐའ་མཚམས་སུ་འཛུལ་ཡོད་པའི་ནག་ཉེས་འཛུགས་ཏེ་དམག་མི་དེ་དག་བསད་ཡོད་ཚུལ་བརྗོད་འདུག་པ་དེར། ཡུ་ཀེ་རེན་གྱི་ཕྱི་སྲིད་བློན་ཆེན་གྱིས། ཡུ་ཀེ་རེན་གྱིས་དམག་མི་གཅིག་ཀྱང་ཨུ་རུ་སུའི་མཐའ་མཚམས་སུ་ཕྱིན་མེད་པ་དང་དམག་མི་གཅིག་ཀྱང་འདས་གྲོངས་སུ་ཕྱིན་མེད་སྐོར་བརྗོད་འདུག

འདས་པའི་ཟླ་བཞིའི་ནང་ཨུ་རུ་སུ་དང་ནུབ་གླིང་རྒྱལ་ཁབ་ཀྱི་མགོ་ཁྲིད་དབར་གྲོས་མོལ་རིམ་པ་བྱས་ཏེ་ཡུ་ཀེ་རེན་གྱི་དཀའ་རྙོག་སེལ་ཐབས་དང་། ཕྱོགས་གཉིས་ཀྱི་གནས་སྟངས་ཞི་འགྲིག་ཡོང་ཐབས་བྱས་ཡོད་ནའང་ལམ་ལྷོངས་མ་སོང་བར་ཨུ་རུ་སུས་ཡུ་ཀེ་རེན་གྱི་བྱང་ཕྱོགས་སུ་ཡོད་པའི་རང་གི་མཐུན་གྲོགས་རྒྱལ་ཁབ་བྷེ་ལེ་རུ་སི་ (Belarus) དང་། ཕྱི་ལོ་ ༢༠༡༤ ལོར་ཡུ་ཀེ་རེན་གྱི་ས་ནས་བཙན་འཕྲོག་བྱས་ཏེ་རང་ཁོངས་སུ་བཅུག་པའི་ཁེ་རེ་མི་ཡ་ (Crimea) ཁུལ་དུ་དཔུང་དམག་གྲ་སྒྲིག་བྱས་ཏེ་སེམས་འཚབ་ཀྱི་གནས་སུ་བསླེབས་པར་བརྟེན། ཨ་རི་དང་རྒྱ་གར་སོགས་འཛམ་གླིང་རྒྱལ་ཁབ་ཕལ་ཆེ་བས་ཡུ་ཀེ་རེན་དུ་ཡོད་པའི་རང་གི་གཞུང་འབྲེལ་མི་སྣ་དང་མི་སེར་དཀྱུས་མ་རྣམས་ཕྱིར་ཐོན་དགོས་པའི་ལམ་སྟོན་བྱས་ཡོད་པ་རེད།

ཕྱི་ལོ་ ༢༠༡༤ ཙམ་ནས་ཨུ་རུ་སུ་དང་ཡུ་ཀེ་རེན་གྱི་དཀའ་རྙོག་དེ་རྒྱལ་སྤྱིའི་དཀའ་རྙོག་ཅིག་ཏུ་གྱུར་ཏེ། ལོ་དེའི་ནང་ཧྥ་རན་སི་དང་འཇར་མ་ནི་གཉིས་ཀྱིས་གཟུ་དཔང་བྱས་ཏེ་ཡུ་ཀེ་རེན་དང་། ཨུ་རུ་སུ། ཡུ་རོབ་ཀྱི་བདེ་སྲུང་དང་མཉམ་ལས་སྒྲིག་འཛུགས་ (OSCE) དབར་ལ་མིན་སི་ཀི་གྲོས་ཆོད་ (Minsk Agreement) ཅེས་པའི་གྲོས་ཆོད་ཐེངས་གཉིས་བཞག་ཡོད་ནའང་། ཕྱོགས་གཉིས་ཀས་གྲོས་ཆོད་ཀྱི་དགོངས་དོན་རྡོག་རོལ་བཏང་བའི་རྐྱེན་གྱིས་ད་བར་ཡུ་ཀེ་རེན་གྱི་དཀའ་རྙོག་དེ་སེལ་ཐུབ་མེད་པ་རེད།

ཕྱི་ལོ་ ༡༩༩༡ ལོར་ཨུ་རུ་སུ་མཉམ་འབྲེལ་དུམ་བུར་འཐོར་ཏེ་སྤྱི་མཐུན་རྒྱལ་ཁབ་གསར་པ་མང་པོར་གྱུར་ཡོད་ནའང་། དེ་དག་ཕལ་ཆེ་བ་ཨུ་རུ་སུའི་ཕྱོགས་སུ་མ་བསྡད་པར་ཡུ་རོབ་ཀྱི་ཕྱོགས་གཏོགས་ལྟ་བུར་གྱུར་བ་མ་ཟད། ཨུ་རུ་སུ་མཉམ་འབྲེལ་ནུབ་བརྒྱུད་རྒྱལ་ཕྲན་ཕལ་ཆེ་བ་ཡུ་རོབ་མཐུན་ཚོགས་ནང་ཞུགས་ཏེ། ཨུ་རུ་སུའི་ཤུགས་རྐྱེན་ཇེ་ཉུང་དང་ནུབ་གླིང་གི་ཤུགས་རྐྱེན་ཇེ་ཆེར་འགྲོ་བཞིན་པའི་སྐབས་དེར། ཨུ་རུ་སུས་ཨ་རིའི་ཤུགས་རྐྱེན་རང་གི་སྒོ་རྩར་ཐོན་རྒྱུར་བཀག་འགོག་ཆེད་ཐབས་ཇུས་ཡོད་རྒུ་བཙལ་ཡོད་ཅིང་། ཡུ་ཀེ་རེན་ནི་ཨུ་རུ་སུའི་ཕྱི་འབྲེལ་དང་རྒྱལ་སྲུང་སྲིད་ཇུས་ཀྱི་ལྟེ་བ་ལྟ་བུར་ངོས་འཛིན་བྱེད་བཞིན་ཡོད་འདུག

གསར་འགོད་པ། བསྟན་འཛིན་ཕུར་བུ།