བོད་མི་རིགས་ཐེ་བའི་མི་རིགས་གཞན་གྱི་གཞི་རྩའི་ཐོབ་ཐང་ལ་འགན་ལེན་ཡོད་པའི་རྩ་ཁྲིམས་ལ་བརྩི་བཀུར་ཞུས་ཏེ་བོད་མིའི་གཞི་རྩའི་འགྲོ་བ་མིའི་ཐོབ་ཐང་ལ་བརྩི་མེད་རྡོག་རོལ་དང་བོད་མི་རིགས་ཀྱི་ངོ་བོ་རྩ་བརླག་གཏོང་བའི་སྲིད་ཇུས་མཚམས་འཇོག་ཡོ་བསྲང་བྱེད་དགོས་སྐོར་གསུངས་སོང་།
དེ་རིང་སྔ་དྲོའི་ཆུ་ཚོད་ ༡༠ ཙམ་གྱི་ཐོག་དྷ་ས་གཙུག་ལག་ཁང་གི་གསུང་ཆོས་ར་བའི་ནང་དུ་བོད་མིའི་སྒེར་ལངས་ཆེན་མོ་གསུམ་བཅུའི་དུས་དྲན་ཐེངས་ ༦༣ པ་གཞུང་འབྲེལ་ཐོག་ནས་སྲུང་གཙི་གནང་སོང་ལ། མཛད་སྒོའི་ཐོག་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པའི་དབུས་སྐུ་མགྲོན་གཙོ་བོ་ཅེག་སྤྱི་མཐུན་རྒྱལ་ཁབ་ཀྱི་གྲོས་ཚོགས་གོང་མའི་ཚོགས་གཙོ་གཞོན་པ་སྐུ་ཞབས་ཇི་རི་ཨོ་བྷིར་ཧྥལ་ཛིར་(Jiri Oberfalzer)མཆོག་གིས་དབུ་འཁྲིད་པའི་སྐུ་ཚབ་ཚོགས་ཆུང་ཞིག་དང་། དམིགས་བསལ་སྐུ་མགྲོན་དུ་རྒྱ་གར་གྲོས་ཚོགས་གོང་མའི་འཐུས་མི་སྐུ་ཞབས་ཨེ་མར་རིན་ཌིར་ཌ་རི་སིང་(Amarendra Dhari Singh)ལགས་སོགས་དང་། སེར་སྐྱ་མི་མང་བཅས་འཛོམས་འདུག
མཛད་སྒོའི་ཐོག་སྲིད་སྐྱོང་སྤེན་པ་ཚེ་རིང་མཆོག་གིས་བཀའ་ཤག་གི་གསུང་འཕྲིན་སྒྲོག་སྦྱངས་གནང་བའི་ནང་། ང་ཚོས་ཀྲུང་ཧྭ་མི་རིགས་ལ་གུས་བཀུར་ཞུ་གི་ཡོད་ལ། ལོ་རྒྱུས་ཡུན་རིང་ལྡན་པའི་ཀྲུང་ཧྭའི་རིག་གཞུང་ལ་བརྩི་མཐོང་ཞུ་གི་ཡོད་ཀྱང་། ང་ཚོ་དེ་དག་དང་གཅིག་མཐུན་འདུས་གྲུབ་ཡིན་པའི་ངོས་ལེན་བྱེད་ཐབས་མེད། ང་ཚོས་བོད་མི་རིགས་ནི་མིའུ་གདུང་དྲུག་ལས་མཆེད་པར་འདོད་ལ། བོད་ཀྱི་རིག་གཞུང་ནི་གཡུང་དྲུང་བོན་དང་ནང་ཆོས་ཀྱི་ཤུགས་རྐྱེན་གཏིང་ཟབ་ཐེབས་པའི་ཐུན་མོང་མ་ཡིན་པའི་ཁྱད་ཆོས་ལྡན་པ་ཞིག་ཡིན་པར་ངོས་འཛིན་བྱེད་ཀྱི་ཡོད། ང་ཚོས་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ལ་བརྩི་བཀུར་ཞུ་འདོད་ཡོད་པའི་རྒྱུ་མཚན་ནི། རྩ་ཁྲིམས་དེའི་ནང་མི་རིགས་འདྲ་མཉམ་གྱི་རྩ་དོན་གསལ་ཡོད་པ་དང་། གྲངས་ཉུང་མི་རིགས་ཀྱི་གཞི་རིམ་ཐོབ་ཐང་གང་འཚམ་ཞིག་འགན་ལེན་བྱས་ཡོད་པའི་ཆ་ནས་ཡིན་པ་དང་། དེ་ལས་ལྡོག་སྟེ། རྩ་ཁྲིམས་འགྲེལ་བརྗོད་ཀྱི་དབང་ཚད་ལྡན་པའི་རྒྱལ་ཡོངས་དམངས་འཐུས་རྒྱུན་ལས་ནས་རྒྱའི་སྐད་ཡིག་ཁྱབ་སྤེལ་སླད། ༢༠༢༡ ཟླ་ ༡༢ ནང་མི་རིགས་སྐད་ཡིག་ཐོག་སློབ་ཁྲིད་དང་འབྲེལ་བའི་ཁྲིམས་སྒྲིག་རྣམས་བཀའ་བཏང་ནས་ཕྱིར་བསྡུ་བྱེད་དུ་བཅུག་འདུག་པ་ནི་རྒྱ་ནག་གི་རྩ་ཁྲིམས་ཀྱི་སྙིང་དོན་ལ་རྒྱབ་འགལ་གྱི་འགྲེལ་ལོག་བྱས་པ་ཞིག་ཡིན། རྒྱ་ནག་གཞུང་གིས་བོད་མི་ཚོར་རྒྱ་ནག་མི་དམངས་སྤྱི་མཐུན་རྒྱལ་ཁབ་ལ་དགའ་ཞེན་གྱི་འདུ་ཤེས་བསྐྲུན་འདོད་ཡོད་ཚེ། བོད་རྒྱ་མི་རིགས་དབར་སྲིད་པ་ཆགས་པ་ནས་བཟུང་ཁྱིམ་མཚེས་སུ་གནས་ཏེ་གཅིག་ཕན་གཅིག་གྲོགས་དང་། མཛའ་མཐུན་མཉམ་གནས་ཀྱི་བྱུང་རབས་ལོ་རྒྱུས་ལ་ངོས་ལེན་ཐོག བོད་མི་རིགས་ཐེ་བའི་མི་རིགས་གཞན་གྱི་གཞི་རྩའི་ཐོབ་ཐང་ལ་འགན་ལེན་ཡོད་པའི་རྩ་ཁྲིམས་ལ་བརྩི་བཀུར་ཞུས་ཏེ། བོད་མིའི་གཞི་རྩའི་འགྲོ་བ་མིའི་ཐོབ་ཐང་ལ་བརྩི་མེད་རྡོག་རོལ་དང་། བོད་མི་རིགས་ཀྱི་ངོ་བོ་རྩ་བརླགས་གཏོང་བའི་སྲིད་ཇུས་མཚམས་འཇོག་ཡོ་བསྲང་བྱེད་དགོས་ཤིང་། བོད་རྒྱ་མི་རིགས་གཉིས་དབར་འཁོན་འགྲས་འབྱུང་གཞིའི་བསམ་སྤྱོད་རྒྱང་དུ་དོར་ཏེ། བོད་མིའི་ལུགས་མཐུན་གྱི་དགོས་འདུན་ལ་བདག་སྤྲོད་བྱེད་དགོས། ཞེས་གསུངས་སོང་།
ཡང་གསུང་འཕྲིན་དུ། དེ་རིང་གི་དུས་དྲན་འདི་ཡང་ཡུཀ་རེན་ལ་བཙན་འཛུལ་ལས་བྱུང་བའི་གཡུལ་འཁྲུག་གི་སྨག་རུམ་སྟུག་པོའི་འོག་ནས་སྲུང་བརྩི་ཞུ་བཞིན་ཡོད་ཅིང་། གཡུལ་ཟིང་དེའི་དབང་གིས་འདས་གྲོངས་སུ་གྱུར་པ་རྣམས་ལ་མྱ་ངན་རྗེས་དྲན་དང་། རྨས་སྐྱོན་ཕོག་པ་རྣམས་དང་། བཙན་བྱོལ་དུ་གྱར་བའི་ཡུཀ་རེན་གྱི་མི་མང་ས་ཡ་ ༢ ལྷག་ལ་གདུང་སེམས་མཉམ་བསྐྱེད་ཞུ་རྒྱུ་དང་། འཛམ་གླིང་འདིར་རང་བྱུང་གི་ནད་ཡམས་འབྱུང་འཁྲུག་དང་། མིས་བཟོས་པའི་གཡུལ་ཟིང་གི་དཀའ་ཉེན་འདི་རིགས་གང་མགྱོགས་སངས་ནས། འགྲོ་བ་མི་རྣམས་ཞི་བདེ་བག་ཕེབས་དང་། བྱམས་བརྩེ་བདེ་སྐྱིད་ཀྱི་དཔལ་ལ་ལོངས་སུ་སྤྱོད་ཐུབ་པའི་གསོལ་འདེབས་སྨོན་ལམ་ཞུ་བཞིན་ཡོད། ཅེས་གསུངས་སོང་།
དེའི་རྗེས་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་སྤྱི་འཐུས་ཀྱི་གསུང་འཕྲིན་སྒྲོག་སྦྱངས་གནང་བའི་ནང་། དེང་གི་རྒྱ་ནག་སྲིད་འཛིན་ཞི་ཅིན་ཕིང་གིས་དམར་པོའི་རིང་ལུགས་དྲིལ་བསྒྲགས་དང་བསམ་བློ་གཅུན་སྡོམ་གྱི་ལས་ཀའི་ནུས་ཤུགས་འཕར་མ་ལག་བསྟར་བྱས་ཏེ། དབང་ཆ་གཅིག་སྡུད་ཀྱི་འགན་དབང་ལ་འགོག་རྐྱེན་མི་ཡོང་བའི་ཕྱིར་དྲྭ་རྒྱའི་སྟངས་འཛིན་གྱི་ལྟ་སྲུང་ནན་པོ་དང་། ཚད་མཐོའི་འཕྲུལ་རིགས་ལ་སྔར་ལྷག་མ་འཇོག་བྱས་ཏེ། རྒྱ་ནག་ནང་དྲྭ་རྒྱའི་བཀོལ་སྤྱོད་རང་དབང་ལ་ཕྱོགས་ཡོངས་ནས་སྟངས་འཛིན་དང་། མི་མང་གི་སྨྲ་བརྗོད་རང་དབང་ལ་སྔར་ལས་སྡུག་པའི་བཀག་སྡོམ། དེ་བཞིན་དྲྭ་རྒྱའི་ནང་ཆོས་ཕྱོགས་ཀྱི་བྱེད་སྒོ་ཁག་ལ་དམ་དྲག་གི་སྲིད་བྱུས་ལག་བསྟར་བྱེད་པ་བརྗོད་བཞིན་ཡོད། ཚད་མཐོའི་འཕྲུལ་རིགས་དེ་དག་གི་ལམ་ནས་བོད་གཙོས་པའི་གྲངས་ཉུང་མི་རིགས་རྣམས་ཀྱི་མི་མང་གི་སེམས་ཁམས་དང་འགྲོ་འདུག་སྤྱོད་གསུམ་ལ་ལྡབ་འགྱུར་གྱིས་དམ་དྲག་ལག་བསྟར་དང་། ཆེད་མངགས་སྟངས་འཛིན་གྱིས་ལྟ་རྟོག་ནན་པོ་བྱས་ཏེ་འགྲོ་བ་མིའི་གཞི་རྩའི་རང་དབང་ཡེ་ནས་མེད་པའི་སྤྱི་ཚོགས་ཤིག་ཏུ་འགྱུར་བཞིན་ཡོད། བོད་ནང་བསམ་བློའི་སློབ་གསོ་དང་། སྐད་གཉིས་ཤེས་ཡོན་སློབ་གསོ་ཟེར་བའི་སྲིད་བྱུས་ལག་བསྟར་བྱས་ཤིང་། བོད་ཕྲུག་འབུམ་ཕྲག་མང་པོ་རྒྱ་ནག་ཏུ་འཁྲིད་དེ་ཁྱིམ་མི་དང་འབྲེལ་བ་མེད་པར་སློབ་ཚན་ཆ་ཚང་རྒྱ་ཡིག་ཁོ་ནའི་ཐོག་སློབ་ཁྲིད་བྱས་ཏེ་བོད་ཕྲུག་རྣམས་རྒྱ་མིའི་ངོ་བོར་བསྒྱུར་རྒྱུ་དང་། བོད་མིའི་སྒེར་གྱི་སློབ་གྲྭ་ཁག་ཆེད་མངགས་སྒོ་རྒྱག་བཅུགས་ཏེ། དམར་པོའི་གཞུང་གི་སྲིད་བྱུས་དང་རྒྱ་གཞུང་གི་འགོ་ཁྲིད་ཚོའི་གཏམ་བཤད་ལ་སློབ་སྦྱོང་ཟུར་དུ་སྤྲད་དེ་མ་འོངས་བོད་ཀྱི་སྐད་ཡིག་དང་རིག་གཞུང་རྒྱུད་འཛིན་བྱེད་མཁན་མེད་པ་བཟོ་བཞིན་པ་དང་། དེ་བཞིན་བོད་ཀྱི་སྐད་ཡིག་ལ་ལས་ཀའི་གོ་སྐབས་ཧ་ལམ་ཐོབ་རྒྱུ་མེད་པའི་སྲིད་བྱུས་ལག་བསྟར་བྱེད་བཞིན་ཡོད། ཅེས་གསུངས་སོང་།
ཡང་གསུང་འཕྲིན་ནང་། མཐོ་སྒང་བོད་ཀྱི་ཡུལ་འདིར་རྒྱལ་རབས་ལོ་རྒྱུས་དང་། ས་ཁམས། མི་རིགས། རིག་གཞུང་། སྐད་ཡིག ཡུལ་སྲོལ་གོམས་གཤིས་སོགས་ཀྱི་ཁྱད་ཆོས་གང་ཐད་ནས་ཡོངས་སུ་ཐ་དད་ཀྱི་རང་དབང་རང་བཙན་ལྡན་པའི་རྒྱལ་ཁབ་འདི་ཉིད། ད་ཆ་རྒྱ་གཞུང་གི་རྒྱ་སྐྱེད་རིང་ལུགས་འོག་ཏུ་ཚུད་ནས་མི་ལོ་བདུན་ཅུ་བརྒལ་བཞིན་ཡོད་ཀྱང་། དེང་གི་འཛམ་གླིང་སྤྱིའི་གནས་སྟངས་མང་པོར་འགྱུར་བ་འགྲོ་བཞིན་པ་དང་། ༧གོང་ས་༧སྐྱབས་མགོན་ཆེན་པོ་མཆོག་གི་དགོངས་བཞེད་དང་། བོད་མི་མང་སྤྱི་འཐུས་ལྷན་ཚོགས་ནས་གཏན་འབེབས་བྱས་པའི་གཉིས་ཕན་དབུ་མའི་ལམ་གྱི་སྲིད་བྱུས་དགོངས་དོན་བོད་རྒྱ་འབྲེལ་མོལ་ཡོང་བར་རྒྱ་གཞུང་གི་འགོ་ཁྲིད་ཚོར་གོ་སྐབས་འདི་བརྒྱུད་དེ་སླར་ཡང་ནན་སྐུལ་བྱེད་བཞིན་ཡོད། བོད་ཀྱི་བདེན་དོན་འཐབ་རྩོད་ལ་འཛམ་གླིང་རྒྱལ་ཁབ་ཁག་གི་གཞུང་དང་། གྲོས་ཚོགས། གཞུང་འབྲེལ་མིན་པའི་ཚོགས་པ་ཁག མི་སྒེར་བཅས་ཀྱིས་རྒྱབ་སྐྱོར་གནང་དང་གནང་བཞིན་པ་མ་ཟད། ཕྱི་རྒྱལ་ཁག་ཏུ་ཡོད་པའི་རྒྱ་རིགས་ཤེས་ཡོན་ཅན་དང་མང་གཙོ་དོན་གཉེར་ཅན། དེ་བཞིན་རྒྱ་ནག་ནང་ཡོད་པའི་རྒྱ་རིགས་གཟུར་གནས་ཤེས་ཡོན་ཅན་མང་པོས་ཡི་རངས་བསྔགས་བརྗོད་ཀྱིས་རྒྱབ་སྐྱོར་གནང་བཞིན་ཡོད། དེ་བཞིན་ཨ་རིའི་གཞུང་གིས་བོད་དོན་ཐོག་ཁྲིམས་ཡིག་གཏན་འབེབས་གནང་བ་དང་། ཡུ་རོབ་ཀྱི་རྒྱལ་ཁབ་ཁག་གི་གྲོས་ཚོགས་དང་། ཉི་ཧོང་གྲོས་ཚོགས། རྒྱ་གར་གྲོས་ཚོགས་བཅས་སུ་བོད་དོན་གླེང་སློང་གནང་དང་གནང་བཞིན་པ་བཅས་ཀྱིས་བོད་དོན་འདི་བཞིན་རྒྱལ་སྤྱིའི་ཐོག་གི་གནས་ཚུལ་གལ་ཆེ་ཞིག་ཏུ་འགྱུར་བཞིན་པར་བོད་མི་རྣམས་ལ་དགའ་སྤོབས་སྐྱེ་གཞི་ཞིག་ཏུ་གྱུར་ཡོད་ཅིང་། རང་ཅག་བོད་མི་རྣམས་ཀྱིས་ལེགས་ཉེས་དབྱེ་འབྱེད་ཀྱི་རྣམ་དཔྱོད་རྩལ་དུ་བཏོན་ནས་༧གོང་ས་༧སྐྱབས་མགོན་ཆེན་པོ་མཆོག་གི་དགོངས་བཞེད་བཞིན་བོད་མིའི་ནང་ཁུལ་མཐུན་སྒྲིལ་དང་། བོད་དོན་བདེན་མཐའ་གསལ་ཐབས་ཆེད་ནུས་པ་གང་ཡོད་བཏོན་ཏེ། བོད་བསྟན་སྲིད་ཆེད་ནུས་པ་མཉམ་སྤུངས་དང་འགན་ཁུར་སྔར་ལྷག་ཡོང་བའི་ལྷག་བསམ་དང་སེམས་ཤུགས་ཀྱི་ནུས་པ་ཆིག་སྒྲིལ་ཡོང་ཐབས་བྱ་དགོས་པའི་སྐུལ་མ་ནན་པོ་ཞུ་རྒྱུ་ཡིན། ཞེས་གསུངས་སོང་།
གསུང་འཕྲིན་གྱི་མཇུག་ཏུ། འདས་པའི་ཉིན་བཅུ་ཕྲག་སྔོན་ལ་ཡུཀ་རན་གྱི་མི་མང་གིས་དཀའ་སྡུག་མྱངས་པ་བཞིན། ལོ་ངོ་བདུན་ཅུ་གོང་དུ་རྒྱ་ནག་མི་དམངས་སྤྱི་མཐུན་རྒྱལ་ཁབ་ཟེར་བས་བོད་ནང་བཙན་འཛུལ་གྱིས་དྲག་སྤྱོད་སྤེལ་ཏེ་བོད་མིས་དཀའ་སྡུག་མྱངས་པ་དང་ཆ་འདྲ་བ་ཡོད་སྟབས། ཉེས་མེད་དཀའ་སྡུག་མྱོང་བཞིན་པའི་ཡུཀ་རན་མི་མང་ལ་བོད་མི་མང་སྤྱི་འཐུས་ལྷན་ཚོགས་ཀྱི་ངོས་ནས་གདུང་སེམས་མཉམ་བསྐྱེད་ཞུ་རྒྱུ་དང་། གང་མགྱོགས་མནར་གཅོད་སྡུག་བསྔལ་ལས་གྲོལ་བའི་སྨོན་འདུན་ཞུ་རྒྱུ་ཡིན། གཞན་ཡང་ཨ་རིས་གཙོས་གཞུང་དང་། གྲོས་ཚོགས། གཞུང་འབྲེལ་མིན་པའི་ཚོགས་པ་ཁག་རྣམས་དང་། ལྷག་པར་དུ་རྒྱ་གར་གཞུང་མང་གཉིས་ནས་བོད་དོན་ཐོག་རྒྱབ་སྐྱོར་དང་མཐུན་འགྱུར་གནང་བ་བཅས་ལ་ཐུགས་རྗེ་ཆེ་ཞུ་རྒྱུ་ཡིན། ཞེས་གསུངས་སོང་།
དེའི་རྗེས་སྐུ་མགྲོན་གཙོ་བོ་ཅེག་སྤྱི་མཐུན་རྒྱལ་ཁབ་ཀྱི་གྲོས་ཚོགས་གོང་མའི་ཚོགས་གཞོན་ཇི་རི་ཨོ་བྷིར་ཧྤལ་ཛར་ (Jiri Oberfalzer) མཆོག་གིས། རྒྱ་ནག་གཞུང་གིས་བོད་ས་བཙན་འཛུལ་བྱས་ཏེ། བོད་མིའི་རང་དབང་སྒེར་ལངས་ཐེངས་ ༦༣ པའི་ཐོག་ཏུ་སྐད་ཆ་བཤད་རྒྱུའི་གོ་སྐབས་ཐོབ་པར་དགའ་སྤོབས་ཆེན་པོ་བྱུང་ལ། ཅེག་སྤྱི་མཐུན་རྒྱལ་ཁབ་ཀྱི་གྲོང་ཁྱེར་བརྒྱ་ལྷག་གི་ཚོམས་ཆེན་དུ་བོད་ཀྱི་རྒྱལ་དར་སྒྲེང་འཛུགས་བྱས་ཡོད་པ་དང་། ཅེག་སྤྱི་མཐུན་རྒྱལ་ཁབ་ཀྱི་གྲོས་ཚོགས་གོང་འོག་གཉིས་ཀྱི་མདུན་ཐང་དུ་བོད་ཀྱི་རྒྱལ་དར་སྒྲེང་འཛུགས་བྱ་རྒྱུ་ཡིན། ཅེག་སྤྱི་མཐུན་རྒྱལ་ཁབ་ཀྱི་སྲིད་བློན་ཐོག་མ་ Václav Havel མཆོག་ནི་བསམ་བློ་བ་དང་རྩོམ་པ་པོ་ཞིག་ཡིན་པ་དང་། ཁོང་ཉིད་ནས་དཔལ་འབྱོར་ལས་ཀྱང་མིའི་བཟང་སྤྱོད་གཙིགས་ཆེན་བཟུང་ཡོད་སྟབས། ཁོང་ནི་བོད་དོན་རྒྱབ་སྐྱོར་བ་ཞིག་དང་། ཝེལ་ཝེ་ཊི་གསར་བརྗེ་(Velvet Revolution) གསར་བརྗེ་བྱུང་རྗེས། ཅེག་སྤྱི་མཐུན་རྒྱལ་ཁབ་ལ་རང་བཙན་ཐོབ་པའི་ཟླ་བ་གཅིག་གི་ནང་དུ་ཁོང་གིས་༧གོང་ས་སྐྱབས་མགོན་ཆེན་པོ་མཆོག་ཅེག་སྤྱི་མཐུན་རྒྱལ་ཁབ་ཏུ་གདན་འདྲེན་ཞུས་ཡོད་པ་དང་། ཅེག་སྤྱི་མཐུན་རྒྱལ་ཁབ་ཀྱིས་མི་ལོ་བཅུ་ཕྲག་འགར་མི་གཅིག་དབང་བསྡུས་རིང་ལུགས་དང་། དམར་ཤོག་རིང་ལུགས་ཀྱི་འོག་ནས་སྡུག་བསྔལ་མྱངས་ཡོད་སྟབས། རྒྱལ་ཁབ་གཞན་གྱི་མི་རྣམས་ཀྱི་དཀའ་སྡུག་རྟོགས་ཀྱི་ཡོད། རྒྱ་ནག་གཞུང་གིས་བོད་ས་འཁྱུད་མིད་དུ་བཏང་ནས་མི་རིགས་རྩ་གཏོར་དང་། བོད་ནང་གི་བོད་མིར་རྩ་མེད་གཏོང་མུས་ཡིན་པ་ནི་ཁྲིམས་འགལ་ཡིན་སྟབས། བོད་མིས་རང་དབང་འཐབ་རྩོད་བྱེད་བཞིན་པར་ཅེག་སྤྱི་མཐུན་རྒྱལ་ཁབ་ཀྱིས་རྒྱབ་སྐྱོར་ཡོད་སྐོར་སོགས་གསུངས་སོང་།
གཞུང་འབྲེལ་གྱི་མཛད་སྒོ་གྲོལ་རྗེས་གཞུང་འབྲེལ་མ་ཡིན་པའི་ཚོགས་པ་ལྔའི་གོ་སྒྲིག་འོག སེར་སྐྱ་མི་མང་གིས་དྷ་ཤོད་ཀ་ཅ་རི་བར་གོམ་བགྲོད་ཀྱིས་ངོ་རྒོལ་སྐད་འབོད་བྱས་སོང་བ་དང་། དེ་རིང་གསུམ་བཅུའི་དུས་དྲན་དང་བསྟུན་རྒྱ་བལ་གཉིས་གཙོ་བོར་གྱུར་བའི་འཛམ་གླིང་ས་ཕྱོགས་གང་སར་གསུམ་བཅུའི་དུས་དྲན་སྲུང་གཙི་གནང་བཞིན་ཡོད་པ་རེད།
གསར་འགོད་པ། དཔལ་ལྡན།
