བོད་མིའི་རང་དབང་སྒེར་ལངས་ཐེངས་ ༦༣ པ་དང་བསྟུན་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་ནེན་སི་པི་ལོ་སི་མཆོག་དང་ཁེ་ན་ཌའི་གྲོས་ཚོགས་འཐུས་མི་སྐུ་ཞབས་ཨ་རི་ཧྥི་ཝི་ར་ནི་ (Arif Virani)ཨ་རི རྣམ་གཉིས་ཀྱིས་བོད་དོན་གླེང་སློང་དང་རྒྱབ་སྐྱོར་ཡོད་པའི་བསྒྲགས་གཏམ་སྤེལ་་གནང་ཡོད་པ་རེད།
ལྕམ་ནེན་སི་པི་ལོ་སི་མཆོག་གིས་སྤེལ་བའི་བསྒྲགས་གཏམ་ནང་། དེ་རིང་ཨ་རི་དང་རང་དབང་དོན་གཉེར་བྱེད་མཁན་གྱི་རྒྱལ་ཁབ་ཚོས་བོད་མི་རྣམས་ཀྱི་སྙིང་སྟོབས་དང་ཆོད་སེམས་སོགས་ལ་རྗེས་དྲན་ཞུ་དགོས་པའི་ཉིན་མོ་ཞིག་ཡིན་ལ། རྒྱ་ནག་གཞུང་གི་བཙན་དབང་འོག་ནས་བོད་མི་ཚོར་རང་དབང་དང་རང་སྐྱོང་གི་ཐོབ་ཐང་སྤྲོད་པར་རྒྱབ་སྐྱོར་བྱ་དགོས་པ་དང་། མི་ལོ་དྲུག་ཅུ་རེ་གསུམ་གྱི་ཡར་སྔོན་དུ་བོད་མི་སྟོང་ཕྲག་མང་པོས་ཚེ་སྲོག་འབེན་དུ་བཞག་ནས་རྒྱ་ནག་གཞུང་གིས་བོད་ས་བཙན་འཛུལ་བྱས་པར་རྒོལ་ལན་སློག་ཡོད་པ་མ་ཟད། རྒྱ་ནག་གཞུང་གི་གདུག་རྩུབ་ཅན་གྱི་སྲིད་ཇུས་ཀྱི་འོག་ནས་བོད་མི་ཚོས་ལོ་བཅུ་ཕྲག་འགར་བོད་ཀྱི་ཆོས་རིག་སྲུང་སྐྱོབ་བྱས་ཡོད་པར་བརྟེན། ཚད་ལས་འདས་པའི་མནར་གཅོད་མྱངས་ཡོད་པ་རེད། བོད་མིའི་འཐབ་རྩོད་དང་༸གོང་ས་མཆོག་གི་ཁྱད་དུ་འཕགས་པའི་དབུ་ཁྲིད་བཟང་པོའི་ལམ་སྟོན་ལ་སེམས་འགུལ་ཐེབས་ནས། ཨ་རིའི་གཞུང་གིས་རྒྱ་ནག་གཞུང་གི་བྱ་སྤྱོད་ལ་འགན་ཁུར་ལེན་རྒྱུ་དང་། མུ་མཐུད་བོད་རྒྱའི་འབྲེལ་མོལ་ཡོང་ཐབས་ལ་ནུས་ཤུགས་གདོན་རྒྱུ་ཡིན། ཞེས་གསུངས་འདུག
ཡང་ཁོང་མོས། ཕྱི་ལོ་ ༢༠༢༠ ལོར་ཨ་རི་གཞུང་གི་བོད་དོན་སྲིད་ཇུས་དང་རྒྱབ་སྐྱོར་གྱི་ཁྲིམས་གཏན་འབེབ་བྱས་ཏེ། བོད་ཀྱི་ཆོས་རིག་དང་། བོད་ཀྱི་ངོ་བོ་དང་རིག་གཞུང་བཅས་གོང་སྤེལ་དང་། བོད་མི་ཚོས་རང་གི་ཆོས་ལུགས་ཀྱི་མགོ་ཁྲིད་འདེམ་དུ་འཇུག་དགོས་སྐོར་དང་། ཁོང་ཚོས་ཚོང་འབྲེལ་གྱི་ཁེ་ཕན་གཅིག་པུར་དམིགས་ནས་རྒྱ་ནག་གཞུང་དང་ལྷན་གཞི་རྩའི་འགྲོ་བ་མིའི་སྐོར་ལ་གླེང་སློང་བྱས་མ་ཐུབ་ཚེ། ཁོང་ཚོས་འཛམ་གླིང་ཤར་ནུབ་གང་སར་འགྲོ་བ་མིའི་རིགས་ཀྱི་ཐོབ་ཐང་གླེང་སློང་བྱེད་པའི་འགན་འཁྲི་དོར་བ་ཡིན་སྐོར་སོགས་གསུངས་འདུག
དེ་བཞིན་ཁེ་ན་ཌའི་གྲོས་ཚོགས་འཐུས་མི་སྐུ་ཞབས་ཨ་རི་ཧྥི་ཝི་ར་ནི་ (Arif Virani) ལགས་ཀྱི་རང་གི་སྤྱི་ཚོགས་དྲ་ལམ་ཊུ་ཝི་ཊར་སྟེང་། བརྙན་ལམ་བརྒྱུད་གསུམ་བཅུའི་དུས་དྲན་གྱི་ཉིན་མོ་ངོ་སྤྲོད་དང་འབྲེལ། དེ་རིང་ཁེ་ན་ཌ་ཚུད་པའི་འཛམ་གླིང་གི་དམངས་གཙོའི་རྒྱལ་ཁབ་ནང་བོད་མི་དང་བོད་དོན་རྒྱབ་སྐྱོར་བ་རྣམས་ཀྱིས་བོད་མིའི་གཞི་རྩའི་ཐོབ་ཐང་དང་༧གོང་ས་མཆོག་ཕོ་བྲང་པོ་ཏ་ལར་ཞབས་སོར་འཁོད་དགོས་ཞེས་རྒྱ་ནག་གཞུང་ལ་ངོ་རྒོལ་སྐད་འབོད་བྱེད་ཀྱི་ཡོད། འོན་ཀྱང་བློ་ཕམ་པ་ཞིག་ལ་བོད་ནང་གི་བོད་མི་ཚོས་དེ་ལྟར་བྱེད་ཐུབ་ཀྱི་མེད། རྒྱ་ནག་གཞུང་གིས་མུ་མཐུད་བོད་ནང་གི་བོད་མི་ཚོར་ཆོས་དད་རང་དབང་དང་། སྐད་ཡིག་རང་དབང་སོགས་སྤྲོད་ཀྱི་མེད། ང་ཚོ་ཚང་མས་དྲང་བདེན་མིན་པའི་གནས་སྟངས་དེར་འཐབ་རྩོད་བྱ་དགོས། ཉེ་ཆར་འཛམ་གླིང་ཡོངས་ཀྱིས་དབང་ཆ་གཅིག་བསྡུས་ཀྱི་སྟོབས་ཤུགས་ལ་རྒོལ་ལན་སློག་གི་ཡོད་པ་སྟེ། ཨུ་རུ་སུའི་པུ་ཀྲིན་ལ་རྒོལ་ལན་སློག་གི་ཡོད་པ་རེད། ད་ལན་བོད་མི་རྣམས་ཀྱིས་ཡུ་ཀེ་རེན་གྱི་མི་རྣམས་ལ་གཞི་རྩའི་ཐོབ་ཐང་དང་རང་དབང་འཐོབ་རྒྱུར་རྒྱབ་སྐྱོར་བྱེད་བཞིན་པ་དེ་སེམས་ཤུགས་སྐྱེད་བྱེད་ཅིག་ཆགས་ཡོད། ངས་རང་གི་འོས་འཕེན་ས་ཁོངས་ཀྱི་ཁེ་ན་ཌའི་བོད་མི་དང་འཛམ་གླིང་ཁྱོན་དུ་ཡོད་པའི་བོད་མི་རྣམས་ལ་དུས་རྟག་ཏུ་ང་རང་ངོས་ནས་བོད་དོན་འཐབ་རྩོད་འདི་གསོན་པོར་གནས་ཐུབ་ཐབས་བྱ་རྒྱུའི་ཁས་ལེན་ཞུ་ཡི་ཡོད། ཅེས་གསུངས་འདུག
གསར་འགོད་པ། པ་སངས་ཚེ་རིང་། དཔལ་ལྡན།
