བོད་ལྗོངས་ཀྱི་གོང་འཕེལ་གླེང་སྟེགས་ཟེར་བའི་ཐོག་རྒྱ་ནག་གཞུང་གིས་འཁྱོག་བརྗོད་ཆེན་པོ་བྱས།

རྒྱ་ནག་གཞུང་གིས་བོད་ནང་ཆོས་དང་སྐད་ཡིག་རིག་གཞུང་སྦྱོང་བའི་ཁོར་ཡུག་ཚད་ལྡན་བསྐྲུན་ཡོད་ཚུལ་བརྗོད་དེ་བོད་ཁུལ་གྱི་བྱིས་པ་ས་ཡ་གཅིག་ཙམ་བཙན་གྱིས་གཏན་འཇགས་སློབ་གྲྭར་བཅུག་སྟེ་རྒྱ་སྒྱུར་སློབ་གསོ་སྤེལ་བཞིན་པ་འགེབ་ཐབས་བྱས་འདུག

འདི་ལོར་རྒྱ་ནག་དམར་གཞུང་གིས་བཙན་དབང་གི་ཐོག་ནས་བོད་ལ་གྲོས་མཐུན་དོན་ཚན་བཅུ་བདུན་ཟེར་བ་བཞག་བཅུག་ནས་མི་ལོ་ ༧༢ འགྲོ་ཡི་ཡོད་པ་ལྟར། ཟླ་འདིའི་ཕྱི་ཚེས་ ༢༣ ཉིན་རྒྱ་ནག་གི་རྒྱལ་ས་པེ་ཅིན་དུ། རྒྱལ་སྲིད་སྤྱི་ཁྱབ་གཞུང་ལས་ཁང་དང་བོད་རང་སྐྱོང་ལྗོངས་མི་མང་སྲིད་གཞུང་ཟེར་བ་གཉིས་ཀྱི་གོ་སྒྲིག་འོག ཕྱི་ལོ་ ༢༠༢༣ ལོའི་ཀྲུང་གོའི་བོད་ལྗོངས་ཀྱི་འཕེལ་རྒྱས་གླེང་སྟེགས་ (2023 forum on the Development of Xizang )ཟེར་བ་ཞིག་བསྡུས་ནས་བོད་ནང་ཆོས་དང་སྐད་ཡིག་རིག་གཞུང་སྦྱོང་བའི་ཁོར་ཡུག་ཚད་ལྡན་བསྐྲུན་ཡོད་སྐོར་སོགས་དྲིལ་བསྒྲགས་བྱས་ཏེ། ཉེ་སྔོན་མཉམ་འབྲེལ་རྒྱལ་ཚོགས་དང་ཨ་རིའི་གཞུང་ནས་བོད་ཀྱི་ཆོས་དང་སྐད་ཡིག་རིག་གཞུང་གི་ཛ་དྲག་གནས་སྟངས་སྐོར་གྱི་སྙན་ཐོར་ཁ་གཏད་དུ་ལངས་ཐབས་བྱས་འདུག

ལྷན་ཚོགས་དེ་དང་འབྲེལ་ནས་རྒྱ་ནག་གི་མགོ་ཁྲིད་ཞི་ཅིན་ཕིང་གིས་འཚམས་འདྲིའི་འཕྲིན་ཡིག་ཅིག་བསྐུར་བའི་ནང་། མི་མང་གི་བདེ་སྐྱིད་ནི་འགྲོ་བ་མིའི་ཐོབ་ཐང་ཆེ་ཤོས་དེ་ཡིན་ཞིང་། རྒྱ་ནག་གཞུང་གིས་བོད་བཅིངས་གྲོལ་ཟེར་བ་ཞིག་བཏང་སྟེ་བོད་མི་མང་དག་ཅིག་དབུལ་ཕོངས་ཀྱི་གནས་ལས་བྲལ་བཅུག་ཡོད་པ་མ་ཟད། བོད་ཀྱི་འགྲོ་བ་མིའི་ཐོབ་ཐང་སྲུང་སྐྱོབ་དང་། བོད་ནང་དུ་དུས་རབས་དང་མཐུན་པའི་འཛུགས་སྐྲུན་གྱི་ལས་གཞི་མང་དག་ཅིག་སྤེལ་ནས་བོད་མི་ཚོས་བློ་འདོད་ཁེངས་པའི་འཚོ་བ་ཞིག་རོལ་མུས་ཡིན་ཚུལ་སོགས་བརྗོད་འདུག

རྒྱ་ནག་གཞུང་ཕྱོགས་ཀྱི་དེ་འབྲེལ་གསར་འགྱུར་ནང་། ལྷན་ཚོགས་དེའི་ཐོག་རྒྱལ་ཁབ་ ༡༥༠ ལྷག་གིས་མཉམ་ཞུགས་བྱས་ཡོད་ལུགས་དང་། འཐུས་མི་དེ་དག་གིས་དུས་སྐབས་གསར་པ་དང་། བོད་གསར་པ། འགྲུལ་བཞུད་གསར་པ་ཟེར་བ་ཞིག་གི་འོག་ནས། བོད་ནང་གི་འགྲོ་བ་མིའི་ཐོབ་ཐང་སྲུང་སྐྱོབ་དང་སྔར་ལས་ལྷག་པའི་འཛུགས་སྐྲུན་གྱི་ལས་གཞི་སྤེལ་རྒྱུ་ཡིན་ཚུལ་སོགས་བརྗོད་དེ། བོད་ནང་གི་ལས་བྱེད་གཙོས་མི་མང་རྒྱ་ནག་གཞུང་ལ་བརྩེ་ཞེན་ཟབ་ལུགས་དང་། རྒྱ་ནག་གཞུང་གིས་བོད་རང་ལྗོངས་ཟེར་བའི་ནང་གི་བཅའ་སྡོད་སློབ་གྲྭ་ཁག་ཏུའང་བོད་ཀྱི་ཆོས་རིག་གཙོས་སྐད་ཡིག་སྦྱོང་སྤྱོད་ཀྱི་ཁོར་ཡུག་ཚད་ལྡན་བསྐྲུན་གྱི་ཡོད་ལུགས་སོགས་དྲིལ་བསྒྲགས་བྱས་འདུག འོན་ཀྱང་། ཟླ་འདིའི་ཕྱི་ཚེས་ ༡ ཉིན་ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཁང་གིས་ཕྱི་ལོ་ ༢༠༢༣ ལོའི་རྒྱལ་སྤྱིའི་ཆོས་དད་རང་དབང་གི་གནས་སྟངས་སྐོར་གྱི་སྙན་ཐོའི་ནང་།  རྒྱ་ནག་གཞུང་གིས་བོད་མིའི་ཆོས་དད་རང་དབང་ལ་ཚབས་ཆེ་བའི་དྲག་གནོན་བྱེད་བཞིན་ཡོད་པ་མ་ཟད། དམིགས་བསལ་བོད་མི་རྣམས་དུས་ཆེན་སོགས་ཀྱི་སྐབས་སུ་དགོན་པ་དང་ལྷ་ཁང་སོགས་སུ་མཆོད་མཇལ་བྱེད་དུའང་གཏོང་གི་མེད་པ་མ་ཟད། དགོན་པ་དང་ལྷ་ཁང་། མཆོད་རྟེན་སོགས་གཏོར་བཤིག་བཏང་བ་དང་། གྲྭ་བཙུན་རྣམས་སློབ་གསོ་བསྒྱུར་བཀོད་ཁང་དུ་འཁྲིད་ནས་ཆབ་སྲིད་ཀྱི་སློབ་གསོ་སྤྲོད་ཀྱི་ཡོད་སྐོར་དང་། བོད་ནང་གི་བོད་མི་མང་དག་ཅིག་ལ་ནག་ཉེས་སྣ་ཚོགས་གཡོགས་ནས་འཛིན་བཟུང་བཀག་ཉར་བྱས་ཡོད་སྐོར་གསལ་ཡོད།

དེ་བཞིན་ཕྱི་ལོ ༢༠༢༢ ལོའི་རྒྱལ་སྤྱིའི་བོད་དོན་ལས་འགུལ་ཁང་གི་སྙན་ཐོའི་ནང་། རྒྱ་ནག་གཞུང་གིས་བོད་པའི་སློབ་ཕྲུག་བརྒྱ་ཆ་བདུན་ཅུ་ལྷག་དང་། བོད་པའི་སློབ་མ་བཞིའི་ནང་གི་སློབ་མ་གསུམ་བཙན་གྱིས་རྒྱ་ནག་གི་བཅའ་སྡོད་སློབ་གྲྭ་ཁག་ཏུ་འཇུག་གི་ཡོད་པ་དང་། ད་སྔ་བར་ལོ་ ༦ ནས་ ༡༨ བར་ཡིན་པའི་བོད་པའི་སློབ་མ་ཁྱོན་འབུམ་ ༨ ནས་ ༩ བར་དབང་སྒྱུར་ལམ་ལུགས་ཀྱི་བཅའ་སྡོད་སློབ་གྲྭའི་ནང་གཏན་སྡོད་བྱེད་མུས་ཡིན་པ་དང་། བྱིས་པ་ལོ་བཞི་དང་ལྔ་ཅན་ཡང་སློབ་གྲྭ་དེ་དག་གི་ནང་བཙན་གྱིས་འཇུག་གི་ཡོད་སྐོར་གསལ་ཡོད་ལ། ཕྱི་ལོ ༢༠༢༢ ལོའི་ཨ་རིའི་རྒྱ་ནག་ལས་དོན་ཚོགས་ཆུང་གིས་རྒྱལ་སྤྱིའི་འགྲོ་བ་མིའི་ཐོང་ཐང་ལྷན་ཁང་ལ་སྙན་ཞུ་ཞིག་ཕུལ་བའི་ནང་། རྒྱ་ནག་གཞུང་གིས་བོད་ནང་གི་བྱིས་པ་རྣམས་ཁྱིམ་མི་དང་ཁ་བྲལ་དུ་བཅུག་པའི་སྲིད་ཇུས་དེ་ནི་འགྲོ་བ་མིའི་ཐོབ་ཐང་རྡོག་རོལ་དང་། བོད་ཀྱི་སྐད་ཡིག་དང་རིག་གཞུང་རྩ་གཏོར་གཏོང་བའི་ཉེན་ཚབས་ཆེ་བའི་གནད་དོན་ཞིག་ཏུ་ངོས་འཛིན་བྱེད་ཀྱི་ཡོད་ལ། རྒྱལ་ཚོགས་ནས་ཞིབ་འཇུག་ནན་མོ་བྱ་དགོས་པའི་འབོད་སྐུལ་ཡང་ཞུས་ཡོད།

རྒྱ་ནག་གཞུང་གི་ལྷན་ཚོགས་དེ་དང་བསྟུན་རྒྱ་ནག་ཕྱོགས་ཀྱི་གསར་ཁང་རྒྱ་ནག་ཉིན་རེའི་གསར་ཁང་ (China Daily) དང་། གོ་ལའི་དུས་བབ། རྒྱ་ནག་སི་ཨེན་ (china .org. cn) སོགས་ཀྱིས་གནས་ཚུལ་དྲུག་ལྷག་སྤེལ་ཡོད་པའི་ཁྲོད། བོད་རང་སྐྱོང་ལྗོངས་ཟེར་བར་བོད་ (Tibet) ཀྱི་ཚབ་ཏུ་ཤི་ཙང་(西藏）ཞེས་བྲིས་ཏེ་བོད་ཀྱི་མངའ་ཁོངས་ཁྱབ་ཚད་དང་ཡོངས་ཁྱབ་ངོས་འཛིན་ལ་རིམ་གྱིས་ཁ་ལོ་བསྒྱུར་ཐབས་བྱེད་ཀྱི་ཡོད་ཅིང་། ཤི་ཙང་(西藏）ཞེས་པ་ནི་རྒྱ་ནག་གཞུང་གིས་དབྱེ་བགོས་བྱས་པའི་བོད་རང་སྐྱོང་ལྗོངས་ཟེར་བ་ཁོ་ནར་གོ་དགོས་ཀྱི་ཡོད་སྟབས། མདོ་སྟོད་སྨད་སོགས་བོད་ཁུལ་གྱི་ས་ཆ་མང་པོ་ཞིག་ཚུད་ཀྱི་མེད་པ་རེད།

ཕྱི་ལོ ༢༠༢༠ ལོར་ཨ་རིའི་གྲོས་ཚོགས་འོག་མའི་ནང་བཏོན་པའི་བོད་དོན་རྒྱབ་སྐྱོར་གྱི་ཁྲིམས་འཆར་ནང་བོད་རང་སྐྱོང་ལྗོངས་དེ་རྒྱ་ནག་ལས་ཐ་དད་པའི་རང་བཙན་གཙང་མའི་རྒྱལ་ཁབ་ཅིག་དང་ཡང་ན། ངོས་འཛིན་གཞན་ཞིག་ཡིན་སྐོར་གསལ་ཡོད་པར་བརྟེན། བོད་མིའི་སྒྲིག་འཛུགས་བཀའ་ཤག་དང་། གཞུང་ཁོངས་མ་ཡིན་པའི་ཚོགས་པ་ཁག་བཅས་ནས་སྔ་རྗེས་སུ་བོད་ནི་རྒྱ་ནག་གཞུང་གིས་བརྗོད་བཞིན་པའི་བོད་རང་སྐྱོང་ལྗོངས་ཟེར་བ་ཁོ་ན་མ་ཡིན་པར་བོད་ཆོལ་ཁ་གསུམ་བཅས་བོད་ཁུལ་ཡོངས་ལ་ཁྱབ་ཀྱི་ཡོད་སྟབས། ཨ་རིའི་གཞུང་ནས་དེ་བཞིན་ངོས་འཛིན་དང་བསྐྱར་བཅོས་ཡོང་བའི་རེ་སྐུལ་ཞུས་ཡོད་པ་རེད།

གསར་འགོད་པ། དཔལ་ལྡན།