རྒྱ་སྒྱུར་སློབ་གསོར་མི་འདོད་པའི་རྣམ་འགྱུར་བསྟན་པས་བོད་རིགས་སློབ་ཕྲུག་གསུམ་འཛིན་བཟུང་བྱས་ཏེ་སློབ་གསོ་སྒྱུར་བཀོད་ཁང་དུ་བཀག་ཉར་འོག་བཞག་ཡོད་འདུག
འདི་ག་བོད་ཀྱི་དུས་བབ་གསར་ཁང་ལ་བོད་ནས་ཁུངས་ལྡན་གནས་ཚུལ་འབྱོར་བ་ལྟར་ན། ཕྱི་ལོ་༢༠༢༡ ལོའི་ཟླ་ ༡༠ ནང་རྒྱ་ནག་གཞུང་གིས་བཅད་བགོ་བྱས་པའི་བོད་རང་སྐྱོང་ལྗོངས་ཆབ་མདོ་ས་ཁུལ་སྨར་ཁམས་སྤོམ་མདའ་སྡེ་བ་ནས་ཡིན་པའི་བོད་རིགས་དམའ་འབྲིང་སློབ་ཕྲུག་དཔལ་སངས་དང་གསར་མོ། གཡང་སྐྱིད་གསུམ་ནས་བོད་ནང་རྒྱ་སྒྱུར་སློབ་གསོ་ལག་བསྟར་བྱེད་བཞིན་པར་ངོ་རྒོལ་བྱས་སྐོར་བརྗོད་ནས་འཛིན་བཟུང་བཙན་ཁྲིད་བྱས་ཏེ། ཡུལ་དེའི་སློབ་གསོ་སྒྱུར་བཀོད་ཁང་ཞིག་ཏུ་བཀག་ཉར་འོག་བཞག་སྟེ་ཟླ་བ་ཁ་ཤས་འགྲོ་བཞིན་ཡོད་ཀྱང་། ད་དུང་ཀློད་གྲོལ་བཏང་མེད་སྐོར་བརྗོད་བྱུང་།
སློབ་ཕྲུག་དེ་དག་འཛིན་བཟུང་བྱ་དགོས་དོན་གཙོ་བོ་ཕྱི་ལོ་ ༢༠༢༡ ལོའི་ཟླ་ ༩ བ་ནས་བཟུང་ས་གནས་དེ་གའི་སློབ་གྲྭ་ཁག་ནང་རྒྱ་ཡིག་སློབ་ཁྲིད་ལག་བསྟར་བྱེད་ཤུགས་ཆེ་རུ་བཏང་ཡོད་སྟབས། སློབ་ཚན་ཚང་མ་རྒྱ་ཡིག་ལ་སྒྱུར་རྒྱུའི་སྔོན་འགྲོའི་སློབ་ཁྲིད་བྱེད་ཤུགས་ཆེ་རུ་བཏང་སྟེ། སློབ་ཕྲུག་ཚོར་ཉིན་རྒྱུན་རྒྱ་ཡིག་ཡིག་གཟུགས་དང་ཀློག་སྟངས་རྐྱང་ཁྲིད་པ་དང་། དེ་དང་འབྲེལ་ནས་རྒྱ་ནག་ལ་དགའ་ཞེན་དགོས་པའི་སློབ་གསོ་རྐྱང་བརྒྱབ་པས། སློབ་ཕྲུག་ཚོས་བོད་ཡིག་སློབ་ཁྲིད་མེད་པས་སྐྱིད་པོ་མེད་པ་དང་དཀའ་ངལ་ཡོད་སྐོར་བརྗོད་དེ། ངུ་ངག་འདོན་པ་སོགས་བྱས་པས་སློབ་ཕྲུག་དེ་གསུམ་ལ་སེམས་ཁམས་སློབ་གསོ་སྤྲོད་དགོས་སྐོར་བརྗོད་ནས་བཙན་ཁྲིད་བྱས་པ་ཡིན་སྐོར་བརྗོད་བྱུང་།
ཡང་ཁོང་གིས་མུ་མཐུད་འགྲེལ་བརྗོད་གནང་བར་གཞིགས་ན།འཛིན་བཟུང་བཀག་ཉར་འོག་ཡོད་པའི་སློབ་ཕྲུག་དེ་དག་ནི་ལོ་ན་ ༡༥ ནས་༡༦ བར་ཡིན་པ་དང་། ཡུལ་དེའི་ནང་འདི་ལོའི་སློབ་མགོ་ཚུགས་པ་དང་བསྟུན་འཛིན་ཁང་ནང་དམག་མི་ཆེད་གཏོང་གིས་ལྟ་རྟོག་དང་། རྒྱ་ནག་གི་མགོ་ཁྲིད་ཞི་ཅིན་ཕིན་གྱི་བསམ་བློ་སློབ་ཁྲིད་ཅེས་ཐབས་ཤེས་འདྲ་མིན་འོག རྒྱ་སྒྱུར་སློབ་གསོ་ཕྱོགས་ཡོངས་ནས་ལག་བསྟར་བྱེད་བཞིན་ཡོད་སྐོར་འགྲེལ་བརྗོད་བྱས་བྱུང་།
སྤྱིར་རྒྱ་ནག་གཞུང་གིས་འདི་ལོ་མཚོ་སྔོན་ཞིང་ཆེན་མངའ་ཁུལ་གྱི་གཞུང་འབྲེལ་སློབ་གྲྭ་ཁག་ཏུ་རྒྱ་སྒྱུར་སློབ་གསོའི་ཆེད་དུ། བོད་ཡིག་གི་སློབ་དེབ་མང་ཆེ་བའི་ཚབ་ཏུ་རྒྱ་ཡིག་སློབ་དེབ་ལག་བསྟར་བྱེད་བཞིན་པ་མ་ཟད། མགོ་ལོག་ཁུལ་གྱི་རྫོང་མང་པོའི་ནང་བོད་པ་ཚོས་ཆེད་འཛུགས་གནང་བའི་སྒེར་གཉེར་སློབ་གྲྭ་མང་པོ་ཞིག་བཙན་ཐབས་ཀྱིས་སྒོ་རྒྱག་བཅུག་ཡོད་པ་དང་། བོད་ཁུལ་གྱི་སློབ་གྲྭ་ཚང་མའི་ནང་རྒྱ་ཡིག་འབྲི་སྦྱོང་གི་རྨང་གཞི་ཞེས་པ་ལག་བསྟར་གྱིས། བོད་ཡིག་སློབ་ཚན་ཁག་སློབ་ཚན་ཕལ་བའི་ངོ་བོར་བཞག་ཡོད་པ་དང་། གནད་དོན་དེར་སློབ་ཕྲུག་གི་ཕ་མ་མང་པོས་མི་འདོད་པ་ཡོང་གི་ཡོད་ན་ཡང་ཐབས་ཤེས་གང་ཡང་མེད་པ་རེད་འདུག
ས་གནས་གསར་འགོད་པ།
