ད་ལྟ་རྒྱ་ནག་ནང་ངོ་བོ་འགྱུར་བའི་ཏོག་ནད་འགོས་ཁྱབ་ཀྱི་དཀའ་ངལ་འཕྲད་ཀྱི་ཡོད་པར་བརྟེན། ཏོག་ནད་གཅིག་ཀྱང་མེད་པའི་སྲིད་ཇུས་འོག ཏོག་ནད་ཀྱི་ལས་དོན་འཐུས་ཤོར་བཏང་བར་ངོས་འཛིན་གྱིས་གྲོང་ཁྱེར་གཅིག་གི་ཉེན་རྟོག་དཔོན་དང་དམར་ཤོག་དཔོན་རིགས་སོགས་མི་དྲུག་ལས་གནས་ནས་ཕྱིར་ཕུད་བཏང་ཡོད་འདུག
ད་ལྟའི་ཆར་རྒྱལ་སྤྱིའི་ཁྱོན་ཡོངས་སུ་ཏོག་དབྱིབས་གཉན་རིམས་འགོས་ཁྱབ་ཀྱི་དཀའ་ངལ་ཇེ་ཆུང་དུ་ཕྱིན་ནས། འཛམ་གླིང་རྒྱལ་ཁབ་མང་པོས་ཁྱིམ་སྡོད་བཀག་རྒྱ་ལྷོད་ཡངས་ཀྱི་གཙོས་རྒྱལ་མཚམས་སྒོ་འབྱེད་སོགས་གནང་མུས་ཡིན་ཡང་། ཁ་སང་ཕྱི་ཚེས་ ༡༤ ཉིན་རྒྱ་ནག་གི་ཞིང་ཆེན་ ༤ ཙམ་ནང་ཏོག་ནད་གསར་པ་ཕོག་པའི་མི་གྲངས་ ༥༢༨༠ བྱུང་ཡོད་པར་བརྟེན། ཞིང་ཆེན་དེ་དག་ནང་མི་མང་གི་འགྲོ་བསྐྱོད་རང་དབང་ལ་དམ་དྲག་དང་། མི་མང་ནས་ཏོག་དབྱིབས་ནད་རྟགས་ཡོད་མེད་བརྟག་དཔྱད་གཏོང་དགོས་པ། དེ་བཞིན་སྤྱི་དམངས་འགྲིམས་འགྲུལ་དང་འབྲེལ་བའི་སྤྱི་སྤྱོད་རླངས་འཁོར་སོགས་ཀྱི་ཞབས་ཞུའི་ལས་རིགས་མཚམས་འཇོག་བྱས་ཡོད་པ་མ་ཟད། ཧྲི་ཊིན་གྲོང་ཁྱེར་གྱི་མི་མང་ས་ཡ་ ༡༧ ལྷག་ཁྱིམ་སྡོད་བཀག་རྒྱའི་འོག་བཅུག་ཡོད་པ་རེད།
དེ་ཡང་རྒྱ་ནག་འཕྲོད་བསྟེན་ལྷན་ཁང་གིས་བསྒྲགས་པའི་གནས་ཚུལ་ནང་། འདས་པའི་ཆུ་ཚོད་ཉེར་བཞིའི་ནང་རྒྱ་ནག་ནང་ཏོག་ནད་གསར་པ་ཕོག་མཁན་མི་གྲངས་ ༥༢༨༠ ཙམ་བྱུང་ཡོད་པའི་ཁྲོད། རྒྱ་ནག་གི་བྱང་ཤར་ཁུལ་གྱི་མངའ་སྡེ་ཇི་ལིན་ (Jilin) ནང་ཏོག་ནད་གསར་པ་ཕོག་པའི་མི་གྲངས་ ༣༠༠༠ ལྷག་བྱུང་ཡོད་པར་བརྟེན། མི་འབོར་ས་ཡ་ ༡༤ ལྷག་ཡོད་པའི་ཇི་ལིན་གྲོང་ཁྱེར་གྱི་མི་མང་རྣམས་ཞིང་ཆེན་གཞན་དང་གྲོང་ཁྱེར་གཞན་ནང་བསྐྱོད་མི་ཆོག་པའི་བཀག་རྒྱ་བསྡམས་ཡོད་པ་དང་། རྒྱལ་སྤྱིའི་ (Aljazeera) གསར་ཁང་གི་གནས་ཚུལ་ལྟར་ན་ཟླ་འདིའི་ཕྱི་ཚེས་ ༡༡ ཉིན་ཇི་ལིན་ཞིང་ཆེན་གྱི་གྲོང་ཁྱེར་ལྟེ་བ་ཁྲང་ཆིན་ (Changchun) ཁྱིམ་སྡོམ་བཀའ་རྒྱའི་འོག་བཅུག་ཡོད་ཅིང་། ཕྱི་ཟླ་གསུམ་པའི་ཟླ་མགོའི་བདུན་ཕྲག་གཉིས་རིང་རྒྱ་ནག་ནང་ཏོག་དབྱིབས་གཉན་རིམས་འགོས་ཁྱབ་བྱུང་བ་མི་གྲངས་ ༡༠༠༠༠ ལྷག་ཡོད་པར་བཤད།
རྒྱ་གར་གྱི་ (News Nine) གསར་ཁང་གི་གནས་ཚུལ་ལྟར་ན། ད་ལྟ་རྒྱ་ནག་གི་ཞིང་ཆེན་ ༡༦ ནང་ཏོག་གསར་འགོས་ཁྱབ་ཀྱི་དཀའ་ངལ་འཕྲད་ཀྱི་ཡོད་ཅིང་། དེ་དག་གི་ཁྲོད་རྒྱ་ནག་ཧྲན་ཏུང་ (Shangdong) ཞིང་ཆེན་ནང་མི་གྲངས་ ༡༠༦ ཙམ་ལ་ཏོག་ནད་ཕོག་ཡོད་པ་དང་། ཀོང་ཏུང་ (Guangdong) ཞིང་ཆེན་ནང་མི་གྲངས་ ༤༨། དེ་བཞིན། པེ་ཅིན་དང་ཧྲང་ཧེ་ (Shanghai) ནང་མི་གྲངས་ ༡༥། གྲངས་འབོར་ཁ་གསལ་མེད་པར་ཐའེ་ཇི་གྲོང་ཁྱེར་དང་ཁྲུང་ཆིན་(Chongqing) སོགས་ཀྱི་ནང་ཏོག་ནད་འགོས་ཁྱབ་ཀྱི་དཀའ་ངལ་འཕྲད་མུས་ཡིན་སྐོར་བརྗོད་འདུག
ལན་ཌོ་གཙུག་ལག་སློབ་གྲྭ་ཆེན་མོའི་ཉམས་ཞིབ་པ་ཚོས། ད་ལྟ་རྒྱ་ནག་ནང་འགོས་ཁྱབ་འགྲོ་བཞིན་པའི་ཏོག་ནད་ནི་ཨོ་མེ་ཁུ་རོན་ཏོག་གསར་ཡིན་པ་དང་། འདི་ལོའི་ཕྱི་ཟླ་ ༤ ནང་ཏོག་དབྱིབས་འགོས་ཁྱབ་ཀྱི་དཀའ་ངལ་སེལ་ཐུབ་སྐོར་བརྗོད་འདུག་ལ། རྒྱ་ནག་འཕྲོད་བསྟེན་ལྷན་ཁང་གིས་ད་ལྟ་རྒྱ་ནག་ནང་ཏོག་ནད་འགོས་ཁྱབ་འབྱུང་བཞིན་པའི་གྲངས་འབོར་ ༣༥༠༠༠ ཙམ་ཆགས་སྲིད་སྐོར་བསྒྲགས་འདུག
ད་ལན་རྒྱ་ནག་ནང་ཏོག་ནད་འགོས་ཁྱབ་ཤུགས་ཆེན་བྱུང་བ་དང་བསྟུན། ཀོང་ཏུང་ཞིང་ཆེན་ཏུང་ཀོན་(东莞市) གྲོང་ཁྱེར་ནང་ཏོག་གསར་ནད་པ་ཐོན་ཏེ་གཉན་རིམས་སྔོན་འགོག་གི་ལས་དོན་འཐུས་ཤོར་བཏང་བའི་གནས་སྟངས་འོག གྲོང་ཁྱེར་དེའི་ཉེན་རྟོག་པ་དང་དམར་ཤོག་ཚོགས་པའི་མགོ་ཁྲིད་སོགས་མི་སྣ་དྲུག་ལས་གནས་ནས་ཕྱིར་ཕུད་བཏང་ཡོད་པ་དང་། ད་བར་རྒྱ་ནག་ནང་ཏོག་ནད་ཕོག་པའི་མི་གྲངས་འབུམ་ ༡ ལྷག་བྱུང་བའི་ཁྲོད། མི་གྲངས་ ༤༦༣༦ ཙམ་འདས་གྲོངས་སུ་ཕྱིན་ཡོད་འདུག
གསར་འགོད་པ། བསྟན་ཕུར་བུ།
