༧གོང་ས་རྒྱལ་བ་རིན་པོ་ཆེ་མཆོག་གིས་དུས་རབས་བརྒྱད་པའི་སྐབས་ཆོས་རྒྱལ་ཚོས་བོད་ཡིག་གསར་བཟོ་དང་ནང་ཆོས་བོད་བསྒྱུར་གནང་བ་སོགས་ཀྱི་དགོངས་པར་བོད་མི་ཚོས་སློབ་གཉེར་གནང་རྒྱུ་གལ་ཆེན་ཡིན་པའི་བཀའ་སློབ་སྩལ།
དེ་རིང་ཆོ་འཕྲུལ་དུས་ཉིན་སྔ་དྲོའི་ཆུ་ཚོད་ ༨ སྟེང་ཐེག་ཆེན་ཆོས་གླིང་གཙུག་ལག་ཁང་དུ་༧གོང་ས་རྒྱལ་བ་རིན་པོ་ཆེ་མཆོག་གིས། བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་དབུས་པའི་སྲི་ཞུའི་ལས་བྱེད་པ་རྣམས་དང་བཞུགས་སྒར་ཁུལ་དང་ཕྱོགས་མཐའ་ཁག་ནས་ཆེད་ཕེབས་གནང་བའི་སེར་སྐྱ་ཕོ་མོ་བཅས་ལ་སྐྱེས་རབས་དང་སེམས་བསྐྱེད་ཀྱི་བཀའ་ཆོས་བཀའ་དྲིན་སྩལ་གནང་མཛད་སོང་བ་དང་། སྐབས་དེར་མགོན་པོ་གང་ཉིད་མཆོག་གིས། ཐོག་མའི་འཆར་གཞི་ལྟར་ན་དེ་རིང་མང་ལྡི་ལི་རུ་ཕྱིན་ནས་བརྟག་དཔྱད་བྱ་འཆར་བྱས་པ་རེད། འོན་ཀྱང་། ངོས་ཀྱི་གཟུགས་པོར་དཀའ་ངལ་གང་ཡང་མི་འདུག་པས། ཨམ་རྗེ་ལགས་སུ་ཁུར་འཛིང་བྱེད་དགོས་ན་ངོས་ཀྱིས་ཡག་པོ་རྩེད་ཐུབ་ཀྱི་འདུག ཅེས་བཞད་མོ་དང་འབྲེལ། ང་ངེས་པར་དུ་ལྡི་ལིར་འགྲོ་དགོས་དོན་མེད་པས་འགྲོ་མི་དགོས་པར་བྱས་པ་ཡིན། དགུན་ཁ་འཆར་ཅན་རྡོ་རྗེ་གདན་ལ་འགྲོ་ཡི་ཡོད་དུས། དེའི་ཞོར་དུ་ལྡི་ལིར་བརྟག་དཔྱད་བྱ་རྒྱུ་བྱས་ནས་ལྡི་ལིར་འགྲོ་མི་དགོས་པ་བྱས་ཡིན། ང་འདིར་ལྷོད་ལྷོད་བྱས་ནས་སྡོད་ཀྱི་ཡིན། གཟུགས་པོའི་གནས་སྟངས་བདེ་པོ་ཞེ་དྲག་ཡིན། མོ་དང་བརྟག་དཔྱད་བྱས་པ་ཡིན། འདི་ག་དྷ་རམ་ས་ལར་ལྷོད་ལྷོད་བྱས་ནས་བསྡད་པ་ཡིན་ན་དེ་ཡག་པོ་འདུག གནས་སྐབས་ལྡི་ལི་རུ་འགྲོ་བའི་འཆར་གཞི་དེ་མི་དགོས་པ་བྱས། ཁྱེད་རང་ཚོ་བློ་བདེ་པོ་བྱས་ནས་བཞུགས་རོགས། ང་སྐུ་འབུམ་ནས་ཡོང་བའི་བླ་མ་འདི་བདེ་ཐང་ངང་བསྡད་ཡོད། དེར་བརྟེན་ཁྱེད་རང་ཚོ་བློ་བདེ་པོ་བྱས་ནས་བཞུགས་རོགས།
དེ་རིང་འདིར་སྐྱེས་རབས་གསུང་ཆོས་རེད། སྔོན་ལ་ངོས་ཀྱིས་འདི་བརྗོད་འདོད་བྱུང་། ཐུབ་རྣམས་སྡིག་པ་ཆུ་ཡིས་མི་འཁྲུ་ཞིང་།། འགྲོ་བའི་སྡུག་བསྔལ་ཕྱག་གིས་མི་སེལ་ལ།། ཉིད་ཀྱི་རྟོགས་པ་གཞན་ལ་འཕོ་མིན་སྟེ།། ཆོས་ཉིད་བདེན་པ་བསྟན་པས་གྲོལ་བ་འགྱུར།། གདུལ་བྱའི་ལུས་ཀྱི་སྡུག་བསྔལ་དང་སེམས་ཀྱི་དངངས་སྐྲག་གི་རྒྱུ་དང་ཉེ་བའི་རིགས་རྣམས་ཆུ་ཡིས་བཀྲུ་རྒྱུ་ཡོད་པ་རེད། སེམས་ཅན་གྱི་སྡུག་བསྔལ་བཅོམ་ལྡན་འདས་ཀྱི་ཕྱག་གིས་སེལ་མི་ཐུབ་པ་དང་། ཁོང་གི་ཐུགས་རྒྱུད་ལ་ཡོད་པའི་ཡོན་ཏན་རྣམས་གདུལ་བྱར་སྦྱིན་རྒྱུ་ཡོད་པ་མ་རེད། བཅོམ་ལྡན་འདས་ཁོང་གི་ཉམས་མྱོང་གི་ཐོག་ནས་སེམས་མ་བཏུལ་བ་འདུལ་བར་བྱེད་པ་དང་། མ་ཞི་བ་ཞི་བར་བྱེད་པ་སོགས་གང་ལྟར་རྗེས་འཇུག་གདུལ་བྱ་རྣམས་ལ་སེམས་མ་བཏུལ་བའི་སྐྱོན་སེལ་ཐབས་ཅི་ལྟར་ཡིན་མིན་གསུངས་པ་ཡིན་པ་རེད། བཅོམ་ལྡན་འདས་ཀྱིས་ཐོག་མར་བདེན་བཞིའི་ཆོས་འཁོར་གསུངས་ཡོད་དང་། དེ་ནས་ཅུང་ཟབ་ཏུ་ཕྱིན་ནས་བྱ་རྒོད་ཕུང་པོའི་རིང་ཤེར་ཕྱིན་གྱི་གཞུང་རྣམས་གསུངས་པ་རེད། དེ་ནི་བཅོམ་ལྡན་འདས་ཀྱི་གསུང་གི་ཉིང་ཁུ་ལྟ་བུ་ཆགས་ཡོད། ང་ཚོས་འཆར་ཅན་འདོན་བཞིན་པའི་ཤེས་རབ་སྙིང་པོའི་ནང་དུ། གཟུགས་སྟོང་པའོ།། སྟོང་པ་ཉིད་གཟུགས་སོ།། གཟུགས་ལས་སྟོང་པ་ཉིད་གཞན་མ་ཡིན། སྟོང་པ་ཉིད་ལས་ཀྱང་གཟུགས་གཞན་མ་ཡིན་ནོ།། ཞེས་སྟོང་ཉིད་བཞི་སྐོར་ནི་བྱ་རྒོད་ཕུང་པོའི་རིར་ཤེར་ཕྱིན་གྱི་གཞུང་མང་པོ་གསུངས་པའི་ནང་གི་སྙིང་བསྡུས་ཤིག་ཤེས་རབ་སྙིང་པོ་ཆགས་ཡོད། ང་ཚོ་ཚང་མས་ཤེས་རབ་སྙིང་པོ་འདོན་བཞིན་ཡོད་པ་མ་རེད། ངོས་རང་ལ་མཚོན་ནའང་ཉིན་རེ་བཞིན་སྟོང་ཉིད་བཞིའི་སྐོར་ལ་བསམ་བློ་གཏོང་གི་ཡོད། སྟོང་པ་ཉིད་ཀྱི་ལྟ་བ་ལ་ག་ཚོད་ཐུབ་ཐུབ་ཀྱིས་བསམ་བློ་བཏང་ཡོང་སྐབས་སེམས་ལ་ཆགས་སྡང་གི་བློ་དང་། ཚུལ་མིན་ཡིད་བྱེད་ཀྱི་རྣམ་རྟོག་སོགས་མ་ཡོང་བ་ལ་ཧ་ཅང་ཕན་གྱི་འདུག
དེ་དང་ཆབས་ཅིག་བྱང་ཆུབ་སེམས་སྐོར་ལ་སྤྱོད་འཇུག་ནང་། བདག་བདེ་གཞན་གྱི་སྡུག་བསྔལ་དག། ཡང་དག་བརྗེ་བར་མ་བྱས་ན།། སངས་རྒྱས་ཉིད་དུ་མི་འགྲུབ་ཅིང་།། འཁོར་བ་ན་ཡང་བདེ་བ་མེད།། དེ་བས་སྐྱོ་ངལ་ཀུན་སེལ་བའི།། བྱང་ཆུབ་སེམས་ཀྱི་རྟ་ཞོན་ནས།། བདེ་ནས་བདེ་བར་འགྲོ་བ་ལ།། སེམས་ཤེས་སུ་ཞིག་སྒྱིད་ལུག་འགྱུར།། ཞེས་སྤྱོད་འཇུག་ལས་གསུངས་པ་འདི་ལ་བསམ་བློ་གཏོང་གི་ཡོད། དེར་བརྟེན། བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་བསམ་བློ་གཏོང་དུས་སེམས་ལ་ཕན་ཐོགས་ཞེ་དྲག་ཡོང་གི་འདུག ཅེས་དང་། དངོས་ཡོད་གནས་ཚུལ་ལ་ང་རང་ཚོའི་སེམས་མ་སྐྱིད་པ་བཟོ་མཁན་ནི་ཕྱི་ལོགས་ནས་དཀྲུགས་པ་མ་ཡིན་པར་ང་རང་ཚོའི་བསམ་བློའི་ནང་ནས་ཆགས་སྡང་ཉོན་མོངས་ཀྱིས་སེམས་འཁྲུག་ཡོང་གི་ཡོད། དེ་ལ་གཉེན་པོ་བརྟེན་ནས་ཆགས་སྡང་གི་བློ་ཆུང་དུ་འགྲོ་ཐུབ་པ་ཡིན་ན་རྩ་བ་ཤེས་རབ་ཀྱི་ནང་དུ་ཧ་ཅང་གསལ་བོ་ཡོད་པ་བཞིན། ཆགས་སྡང་གི་བློ་ཤུགས་ཆུང་དུ་སོང་བ་ཡིན་ན་སེམས་ལ་ཞི་བདེ་རང་བཞིན་གྱིས་ཡོང་གི་རེད། བྱམས་སྙིང་རྗེ་བྱང་ཆུབ་ཀྱི་སེམས་དང་། འདུན་པ་གཉིས་ལྡན་གྱི་སེམས་བསྐྱེད་བཅས་ནི་ཅུང་ཙམ་ཁག་པོ་རེད་དེ། གང་ལྟར་སངས་རྒྱས་བཅོམ་ལྡན་འདས་ཀྱི་སེམས་འདུལ་བའི་བསླབ་བྱ་གཙོ་བོ་ནི་སེམས་པ་བཟང་པོ་བྱ་རྒྱུ་གསུངས་ཀྱི་འདུག ང་རང་ཚོ་བོད་གངས་ཅན་པར་མཚོན་ན་འཕགས་པ་སྤྱན་རས་གཟིགས་ཀྱི་གདུལ་ཞིང་རེད། སྤྱན་རས་གཟིགས་ནི་སྙིང་རྗེའི་ལྷ་མཆོག་རེད། དེར་བརྟེན། ང་ཚོ་བོད་མི་རྣམས་རང་ཤུགས་ཀྱིས་བྱམས་བརྩེ་ཤུགས་ཆེན་པོ་ཡོད་པ་ནི་འཕགས་པ་སྤྱན་རས་གཟིགས་ཀྱི་ཐུགས་རྗེ་བྱིན་རླབས་རེད། དེ་རིང་འདིར་སྨོན་ལམ་གྱི་སྐྱེས་རབས་གསུང་ཆོས་རེད། ཅེས་བཀའ་སློབ་སྩལ་རྗེས་ཤེས་རབ་སྙིང་པོ་སོགས་གསུང་འདོན་དང་འབྲེལ་སྲིད་སྐྱོང་སྤེན་པ་ཚེ་རིང་མཆོག་གིས་མཎྜལ་རྟེན་གསུམ་འདེགས་འབུལ་ཞུས་གནང་སོང་།
དེ་རྗེས་སྲོང་བཙན་སྒམ་པོས་བོད་ཡིག་གསར་བཟོ་དང་དུས་རབས་བརྒྱད་པར་སངས་རྒྱས་པའི་གཞུང་བོད་ཡིག་ནང་དུ་བསྒྱུར་བའི་ལོ་རྒྱུས་སྐོར་བཀའ་སློབ་དང་འབྲེལ་སྔར་ཆོས་རྒྱལ་ཚོས་དགོངས་པ་རྒྱ་ཆེན་པོ་བཞེས་ཡོད་པ་འདི་རྣམས་བོད་རིགས་གཞོན་སྐྱེས་ཚོས་སློབ་གཉེར་བྱ་རྒྱུ་ཧ་ཅང་གལ་ཆེན་པོ་ཡིན་སྐོར་དང་། དུས་ད་ལྟ་ཆ་བཞག་ན་ཆབ་སྲིད་ཀྱི་གནས་སྟངས་ཐོག་ནས་དཀའ་ངལ་ཞེ་དྲག་འཕྲད་ཀྱི་ཡོད། བསམ་བཞིན་དུ་དགོས་དབང་གིས་ཆོས་དད་མེད་པར་བཟོ་བཞིན་ཡོད་ནའང་། བོད་རྒྱ་ཆེ་མི་མང་གི་སེམས་གཏིང་གི་འཕགས་པ་སྤྱན་རས་གཟིགས་དང་མ་ཎི་སོགས་ཁྱོན་བསུབ་ཐབས་མེད་པ་དང་འགྱུར་བ་མེད་པར་བརྟན་པོ་ཞེ་དྲག་འདུག དུས་ཚོད་རིམ་པར་འགྱུར་བ་ཕྱིན་པའི་དེ་རིང་ཁ་སང་རྒྱ་ནག་ནང་ནས་སངས་རྒྱས་ཀྱི་ཆོས་ལ་དད་པ་བྱེད་མཁན་ཇེ་མང་དུ་འགྲོ་ཡི་ཡོད། ངོས་ཀྱི་ངོ་ཤེས་སློབ་གྲྭ་ཆེན་མོའི་རྒྱ་རིགས་དགེ་རྒན་ཞིག་གིས་བོད་ཀྱི་ཆོས་དེ་ན་ལན་ཌའི་ཆོས་ལུགས་འཁྲུལ་མེད་དང་ཆོས་དེ་རིག་པ་དང་ལྡན་པ་ཞིག་རེད་འདུག་ཅེས་བཤད་ཡོད་པ་རེད། དེ་དངོས་འབྲེལ་རེད། གང་ལྟར་དངོས་ཡོད་གནས་ཚུལ་ཞིབ་འཇུག་བྱས་ཏེ་བཤད་ཡོད་པ་རེད། ཅེས་དང་བོད་ཀྱི་ནང་ཆོས་གཞན་ལ་འགྲེལ་བཤད་རྒྱག་སྐབས། ཚན་རིག་དང་མཐུན་ཞིང་གཞན་དང་མི་འདྲ་བ་ཆགས་བསྡད་ཡོད་སྟབས། ལུས་ལ་གྲྭ་ཆས་གྱོན་ཐུབ་ཙམ་དང་ལག་ཏུ་ཕྲེང་བ་འཛིན་ཐུབ་ཙམ་མ་ཡིན་པར་ང་ཚོའི་ངོས་ནས་སློབ་གཉེར་གནང་རྒྱུ་གལ་ཆེན་ཡིན་སྐོར་གསུངས།
གསར་འགོད་པ། སྐལ་བཟང་སྦྱིན་པ།
