དེ་རིང་བོད་མི་མང་སྤྱི་འཐུས་ལྷན་ཚོགས་སྐབས་ ༡༧ པའི་གྲོས་ཚོགས་ཚོགས་དུས་གསུམ་པ་དངོས་སུ་འགོ་འཛུགས་ཀྱིས་འབྱུང་འགྱུར་ཉིན་གྲངས་ ༡༠ ནང་སྤྱི་ཡོངས་ནས་བོད་མིའི་སྒྲིག་འཛུགས་ཀྱི་རྩིས་ལོ་ ༢༠༢༢ ནས་ ༢༠༢༣ ལོའི་བར་གྱི་ལྷན་ཁང་རེ་རེའི་སྔོན་རྩིས་ཐོག་བགྲོ་གླེང་དང་གཏན་འབེབས་བྱ་རྒྱུ་ཡིན་པ་དང་། འཛིན་སྐྱོང་བཀའ་ཤག་ངོས་ནས་བོད་མིའི་སྒྲིག་འཛུགས་ཀྱི་དཔལ་འབྱོར་གནས་བབ་སྐོར་གྱི་སྙན་ཐོ་ཞིག་གྲོས་ཚོགས་ལ་སྙན་སྒྲོན་ཞུས་གནང་སོང་།
དེ་ཡང་ཚོགས་གཙོ་མཆོག་ནས། གཙོ་བོ་ང་ཚོ་ཆབ་སྲིད་ཀྱི་སྐྱབས་བཅོལ་བའི་གནས་སྟངས་ཆགས་ཀྱི་ཡོད་སྟབས། ༧གོང་ས་སྐྱབས་མགོན་ཆེན་པོ་མཆོག་གིས་དགུང་ལོ་ ༡༦ ནས་བོད་ཀྱི་ཆབ་སྲིད་ཀྱི་ཐུགས་འགན་བཞེས་ནས་ད་ལྟ་བར་དུ་བོད་ཕྱི་ནང་གཉིས་ཀྱི་བོད་མི་རྣམས་ཀྱི་རེ་བའི་མི་འབུར་གཏད་ས་ལྟ་བུ་དེ་༧སྐྱབས་མགོན་རིན་པོ་ཆེ་ཁོང་ཉིད་ཆགས་བསྡད་ཡོད། ཁོང་གི་མཛད་པ་འཕྲིན་ལས་དང་བཀའ་དྲིན་ཉག་གཅིག་ལ་བརྟེན་ནས་ང་ཚོའི་བཙན་བྱོལ་གྱི་སྒྲིག་འཛུགས་འདི་ཐོག་མ་ཉིད་ནས་དམངས་གཙོ་ཅན་དུ་འགྱུར་རྒྱུ་དང་། དེ་བཞིན་དུས་རྒྱུན་ང་ཚོས་ཡོངས་གྲགས་ཐོག་ནས་༧གོང་ས་སྐྱབས་མགོན་རིན་པོ་ཆེ་མཆོག་གིས་དམངས་གཙོ་གསོལ་རས་གནང་བ་རེད་ཟེར་ནས། དུས་རྒྱུན་ཕྱི་ཟླ་ ༩ ཚེས་ ༢ ལ་དུས་དྲན་སྲུང་གཙི་ཞུ་རྒྱུ་ཆགས་པ་རེད། རྩ་བའི་དམངས་གཙོའི་ལམ་ལུགས་ནང་ལ་ཐད་ཀའི་དམངས་གཙོ་ཟེར་བ་དང་། སྐུ་ཚབ་ཀྱི་དམངས་གཙོ་ཟེར་བ། དེ་བཞིན་གྲོས་ཚོགས་དང་སྲིད་འཛིན་གྱི་ལམ་ལུགས་ཟེར་བ་ལྟ་བུའི་རྒྱལ་སྤྱིའི་དམངས་གཙོའི་འཕེལ་རིམ་ནང་ངོས་འཛིན་བྱེད་སྟངས་མི་འདྲ་བ་ཆགས་ཡོད། ཡིན་ནའང་། ང་ཚོ་སྐྱབས་བཅོལ་བའི་གནས་སྟངས་ཤིག་གི་ཐོག་ནས་དེ་ཚོ་ཚང་མའི་ལེགས་ཆ་བླངས་ཏེ། དམངས་གཙོའི་ལམ་ལུགས་ཤིག་ཆགས་པ་ཕལ་ཆེར་གསལ་པོ་རེད་འདུག དེར་བརྟེན། ང་ཚོའི་དམངས་གཙོ་དབུ་བརྙེས་ནས་ལོ་ངོ་ ༦༠ ལྷག་ཕྱིན་པ་རེད། ལུས་པ་ཁ་ཤས་ཀྱི་དམངས་གཙོ་ང་ཚོ་ལས་གཞོན་པ་ལྟ་བུ་དང་། ང་ཚོའི་དམངས་གཙོ་དེ་ལོ་ངོ་བཅུ་ཕྲག་ ༦ ལྷག་གིས་རྒན་པ་ལྟ་བུ་ཆགས་བསྡད་ཡོད། དེར་བརྟེན་མང་ཚོགས་ཀྱིས་འོས་བསྡུ་བྱས་པའི་འཐུས་མི་ང་ཚོས་དམངས་གཙོའི་ལྟ་གྲུབ་དེ་སེམས་ལ་ངེས་དགོས་པ་ཞིག་དང་། གཞི་རིམ་མང་ཚོགས་ལའང་དམངས་གཙོའི་ཐོག་ལ་བསམ་ཚུལ་འདོན་ཕྱོགས་སོགས་ཀྱི་ཐད་ལ་དུས་རྒྱུན་དུ་སློབ་སྦྱོང་བྱེད་ཐུབ་དགོས་པ་དེ་གནད་འགག་ཆེན་པོ་རེད་འདུག ཅེས་གསུངས་སོང་།
ཁོང་གིས་མུ་མཐུད་ནས་བོད་ཀྱི་དམངས་གཙོའི་སྒྲིག་འཛུགས་ཀྱི་གཞི་འཛིན་ས་དེ་བཙན་བྱོལ་བོད་མིའི་བཅའ་ཁྲིམས་དེ་ཡིན་པ་དང་། བཅའ་ཁྲིམས་ཀྱིས་བོད་མིའི་སྒྲིག་འཛུགས་ལ་གཙོ་བོ་བོད་དོན་བདེན་མཐའ་གསལ་ཐབས་དང་། བཙན་བྱོད་སྤྱི་ཚོགས་ཀྱི་བདེ་དོན། གནས་སྐབས་བོད་ནང་གི་བོད་མིའི་ཚོ་དཀའ་ངལ་ལས་སྐྱོབ་ཐབས། བོད་ནང་གི་ཁོར་ཡུག་ཐད་ཞུ་སྐུལ་དང་གླེང་སློང་ཐུབ་རྒྱུ། དེ་བཞིན་བཙན་བྱོལ་སྤྱི་ཚོགས་འདི་བཞིན་འདྲ་མཉམ་དང་དྲང་བདེན། དཔལ་འབྱོར་གྱི་ཁེ་ཕན་སྤྱི་སྙོམས་ཡོང་ཐུབ་པའི་སྲིད་ཇུས་འཛིན་རྒྱུའི་འགན་དབང་བསྐུར་ཡོད་པ་ལྟར། བཀའ་སྤྱི་གཉིས་ནས་དེ་ལྟར་ལག་བསྟར་ཐུབ་རྒྱུ་གལ་འགངས་ཆེན་པོ་ཡིན་སྐོར་གསུངས་སོང་།
ཚོགས་གཙོ་མཆོག་ནས་གྲོས་ཚོགས་ར་བའི་ནང་སྤྱི་འཐུས་དང་འཛིན་སྐྱོང་བཀའ་ཤག་ངོས་ནས་སྤྱི་སེམས་ཡོད་པའི་ཐོག་ནས་བསམ་ཚུལ་འདོན་རྒྱུ་དང་བགྲོ་གླེང་ནང་ཞུགས་ཐུབ་རྒྱུ་གལ་ཆེན་པོ་ཡིན་པ་ལས། ཚོར་བའི་དབང་དུ་ཕྱིན་ན་གྲོས་ཚོགས་ཀྱི་ལས་རིམ་ལ་འགལ་རྐྱེན་བཟོ་ཡི་ཡོད་པ་མ་ཟད། སྤྱི་ཚོགས་ལའང་བརྡབ་གསིག་ཡོང་གི་ཡོད་སྐོར་དང་། སྤྱི་འཐུས་རྣམ་པ་ཉེ་ལམ་ས་གནས་ཁག་ལ་འཚམས་གཟིགས་སུ་བསྐྱོད་ཟིན་ཙམ་ཡིན་སྟབས། མང་ཚོགས་ཀྱི་བསམ་ཚུལ་དང་རེ་བ་རྣམས་སེམས་ལ་བཅངས་ཏེ་གྲོས་ཚོགས་ཀྱི་ལས་རིམ་ནང་ཆ་ཤས་བཞེས་རྒྱུའི་འབོད་སྐུལ་ཞུས་སོང་།
དེ་རིང་སྔ་དྲོའི་ཚོགས་ཐུན་ཐོག་སྤྱི་འཐུས་རྣམ་པས་བོད་ཀྱི་ཁོར་ཡུག་གནས་སྟངས་ཐོག་གཞུང་འབྲེལ་གྲོས་ཆོད་གྲོས་འཆར་ཐོག་བགྲོ་གླེང་བྱས་ཡོད་ཅིང་། ཉིན་རྒྱབ་ཀྱི་ཚོགས་ཐུན་སྟེང་སྲིད་སྐྱོང་དང་དཔལ་འབྱོར་བཀའ་བློན་གཅིག་ལྕོགས་སྤེན་པ་ཚེ་རིང་མཆོག་ནས་བོད་མིའི་སྒྲིག་འཛུགས་ཀྱི་རྩིས་ལོ་ ༢༠༢༢ ནས་ ༢༠༢༣ ལོའི་སྔོན་རྩིས་འགོད་འབུལ་གྱི་གཏམ་བཤད་སྤེལ་ཡོད་པ་རེད། ད་ལན་གྱི་སྔོན་རྩིས་གྲོས་ཚོགས་སྟེང་བཀའ་ཤག་གི་གསལ་བཤད་དང་། ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བའི་འོས་ཆོས་དང་འབྲེལ་བའི་བཅའ་ཁྲིམས་བཟོ་བཅོས་ཀྱི་ཁྲིམས་འཆར་ཞིག་དང་། དེ་བཞིན་འདས་ལོའི་ཕྱི་ཟླ་ ༡༠ པའི་ནང་འཚོགས་པའི་གྲོས་ཚོགས་ཚོགས་དུས་ ༡ པོའི་ནང་བཀའ་ཤག་གི་བཀའ་བློན་ ༤ བསྐོ་གཞག་ཐུབ་མེད་པར་བརྟེན། ད་ལན་བཀའ་བློན་འོས་འདེམས་བྱ་སྲིད་པ་རེད་འདུག
གསར་འགོད་པ། པ་སངས་ཚེ་རིང་།
སྤྱི་འཐུས་སྐབས་བཅུ་གཅིག་ནས་སྐབས་བཅུ་དྲུག་བར་བཅའ་ཁྲིམས་དོན་ཚན་བཞི་བཅུའི་འོག་གྲོས་ཚོགས་ཀྱི་ལས་རིམ་ཁྲིམས་མཐུན་ཐོག་ཕྱིན་ཡོད་པ་དང་། ད་ལམ་སྤྱི་འཐུས་སྐབས་བཅུ་བདུན་ནས་ཟླ་བ་གཅིག་གི་ནང་གྲོས་ཚོགས་ཚོགས་དུས་གཉིས་པ་དང་གསུམ་པ་ཚོགས་རྒྱུ་དེ་ཁྲིམས་མཐུན་ལ་ངོས་འཛིན་དགོས་པ་རེད་དམ་ཁྲིམས་འགལ་ལ་ངོས་འཛིན་དགོས་པ་རེད་།