བོད་ཀྱི་དགེ་རྒན་དང་མཆོད་མེ་བོད་ཀྱི་དྲ་བའི་རྩོམ་སྒྲིག་པ་དཀོན་མཆོག་ཚེ་འཕེལ་ལགས་ཀློད་གྲོལ་བཏང་ཡོད་ཀྱང་། ད་དུང་འབྱུང་འགྱུར་ལོ་བཞིའི་རིང་ཁོང་ལ་འགྲོ་འདུག་སྤྱོད་གསུམ་ གྱི་རང་དབང་མེད་པ་རེད་འདུག
དེ་རིང་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་གནས་ཚུལ་སྤེལ་བ་ལྟར་ན། ཟླ་འདིའི་ཕྱི་ཚེས་ ༡༨ ཉིན་མཆོད་མེ་བོད་ཀྱི་རྩོམ་རིག་དྲ་བའི་རྩོམ་སྒྲིག་པ་དང་རྩོམ་པ་པོ་དཀོན་མཆོག་ཚེ་འཕེལ་ལགས་རྒྱ་ནག་གཞུང་གིས་ལོ་ ༡༣ རིང་བཙོན་འཇུག་བྱས་རྗེས་ཀློད་གྲོལ་བཏང་ཡོད་ཀྱང་། ད་དུང་འབྱུང་འགྱུར་ལོ་བཞིའི་རིང་ཁོང་ལ་འགྲོ་འདུག་སྤྱོད་གསུམ་གྱི་རང་དབང་མེད་པ་རེད་འདུག
དེ་ཡང་གནས་ཚུལ་ནང་། བོད་ཀྱི་རྩོམ་པ་པོ་དང་དགེ་རྒན། ཁོར་ཡུག་དོན་གཉེར་བ་དཀོན་མཆོག་ཚེ་འཕེལ་ལགས་མི་ལོ་ ༡༣ རིང་བཙོན་ཁང་དུ་བཞུགས་རྗེས་བཙོན་འཇུག་དུས་བཀག་མ་ཟིན་པའི་ལོ་གཉིས་ཀྱི་གོང་སྟེ། ཉེ་སྔོན་ཕྱི་ཟླ་ ༣ ཚེས་ ༡༨ ཉིན་ཀློད་གྲོལ་ཐོབ་ཡོད་པའི་ཁུངས་ལྡན་གྱི་གནས་ཚུལ་ཤེས་རྟོགས་བྱུང་ཡོད། དཀོན་མཆོག་ཚེ་འཕེལ་ལགས་ལ་རྒྱ་གཞུང་གིས་མི་ལོ་བཅོ་ལྔའི་དུས་བཀག་བཙོན་འཇུག་གི་ཁྲིམས་བཅད་བཏང་ཡོད་ཅིང་ཀན་སུ་ཞིང་ཆེན་ལན་ཌུ་གྲོང་ཁྱེར་གྱི་ཉེ་འགྲམ་ཌིང་ཞི་ཡི་བཙོན་ཁང་མི་འདྲ་བ་གཉིས་ཀྱི་ནང་དུ་བཙོན་འཇུག་བྱས་ཡོད་པ་རེད། ཁོང་ཉིད་བཙོན་ཁང་ནས་ཀློད་གྲོལ་ཐོབ་ཀྱང་མུ་མཐུད་ལོ་བཞིར་ཆབ་སྲིད་ཀྱི་ཐོབ་ཐང་འཕྲོག་ཡོད་པར་བརྟེན་དུས་རྒྱུན་ལྟར་ཁོང་དང་ཁོང་གི་ནང་མིར་ད་དུང་དམ་དྲག་ཆེན་པོ་བྱེད་བཞིན་ཡོད་པ་ཤེས་ཐུབ། ཆབ་སྲིད་ཀྱི་ཐོབ་ཐང་འཕྲོག་སྐབས་ཉེན་རྟོག་པར་ཁྲིམས་ལ་ལྟོས་མེད་ཀྱི་དབང་ཚད་ཡོད་པར་བརྟེན་ཁོང་གི་འགྲོ་འདུག་སྤྱོད་གསུམ་ཐད་དམ་དྲག་ཆེན་པོ་ཡོད་པ་སྨྲོས་མེད་ཡིན། ཞེས་འཁོད་འདུག
རྩོམ་པ་པོ་དཀོན་མཆོག་ཚེ་འཕེལ་ལགས་དང་འབྲེལ་དེ་སྔོན་འདི་གའི་གསར་འགོད་པར་གནས་ཚུལ་འབྱོར་བ་ལྟར་ན། ཕྱི་ལོ་ ༢༠༠༩ ཟླ་ ༢ པའི་ཚེས་ ༢༦ ཉིན་ཀན་ལྷོ་རྨ་ཆུ་རྫོང་ནས་ཡིན་ཞིང་མཆོད་མེ་བོད་ཀྱི་རྩོམ་རིག་དྲ་རྒྱའི་དོ་དམ་པ་དཀོན་མཆོག་ཚེ་འཕེལ་ལགས་ཀན་སུའུ་ཞིང་ཆེན་རྒྱལ་ཁབ་བདེ་འཇགས་ལས་ཁུངས་ཀྱིས་གློ་བུར་འཛིན་བཟུང་བྱས་ཏེ་ལན་ཀྲུའུ་གྲོང་ཁྱེར་གྱི་བཀག་ཉར་ཁང་ཞིག་ཏུ་བཀག་སྐྱིལ་བྱས་ཡོད་པ་དང་། ལོ་དེའི་ཕྱི་ཟླ་ ༡༡ པའི་ཚེས་ ༡༠ ཉིན་རྒྱ་གཞུང་གིས་ཁོང་གི་ནང་མིར་བརྡ་བཏང་སྟེ། ཕྱི་ཚེས་ ༡༢ ཉིན་ཁོང་ལ་ཁྲིམས་གཅོད་ཀྱི་ཉིན་མོ་ཡིན་སྟབས་ཁྲིམས་རྭར་ཡོང་དགོས་ཚུལ་བརྗོད་དེ། ཚེས་ ༡༢ ཉིན་ཀན་ལྷོ་བོད་རིགས་རང་སྐྱོང་ཁུལ་འབྲིང་རིམ་མི་མང་ཁྲིམས་ཁང་གིས། ཁོང་ལ་ ༡༩༩༥ ལོར་ཆབ་སྲིད་ཀྱི་དོགས་གཞིའི་འོག་འཛིན་བཟུང་བཙོན་འཇུག་བྱས་པའི་གནད་དོན་དང་མཆོད་མེ་དྲ་རྒྱའི་ནང་རྒྱ་ནག་གཞུང་གི་ལངས་ཕྱོགས་དང་མི་མཐུན་པའི་རྩོམ་ཡིག་དང་པར་རིས་འགྲེམས་བཀོད་བྱས་པ་སོགས། རྒྱལ་ཁབ་ཀྱི་གསང་བ་ཕྱིར་བསྒྲགས་བྱེད་མཁན་གྱི་ཉེས་མིང་འོག་ལོ་ ༡༥ ཁྲིམས་ཆད་དང་ལོ་ལྔའི་ཆབ་སྲིད་ཀྱི་དབང་ཆ་འཕྲོག་ཡོད་འདུག
ཕྱི་ལོ་ ༡༩༧༠ ལོར་མདོ་སྨད་རྨ་ཆུ་རྫོང་དངུལ་ར་ལྷ་སྡེ་ནས་སྐྱེས་པའི་བོད་ཀྱི་རྩོམ་པ་པོ་དཀོན་མཆོག་ཚེ་འཕེལ་ལགས་ནི། ཕྱི་ལོ་ ༢༠༠༥ ལོར་བོད་ཀྱི་སྙན་ངག་པ་གྲགས་ཅན་སྐྱབས་ཆེན་བདེ་གྲོལ་དང་ལྷན་དུ་བོད་ཀྱི་མཆོད་མེ་རྩོམ་རིག་དྲ་བ་གསར་འཛུགས་གནང་མཁན་ཞིག་ཡིན་པ་དང་། ཕྱི་ལོ་ ༡༩༨༩ ལོར་བཙན་བྱོལ་དུ་འབྱོར་ནས་སུ་ཇཱ་བོད་ཁྱིམ་སློབ་གྲྭར་ལོ་གསུམ་རིང་བོད་ཡིག་དང་དབྱིན་ཡིག་གི་སློབ་གཉེར་བྱས། ཕྱི་ལོ་ ༡༩༩༤ ལོར་ཕྱིར་བོད་དུ་ལོག་རྗེས་ཁོང་གིས་བོད་ཀྱི་ཁོར་ཡུག་སྲུང་སྐྱོབ་དང་དགེ་རྒན་སོགས་ཀྱི་ཕྱག་ལས་གནང་བར་ངོས་འཛིན་ཐོབ་མྱོང་། ཕྱི་ལོ་ ༡༩༩༦ ཁོང་གིས་པེ་ཅིན་མི་རིགས་སློབ་ཆེན་ནས་དབྱིན་ཡིག་དང་རྒྱ་ཡིག་སྦྱངས་ལ། ཕྱི་ལོ་ ༡༩༩༧ ནས་ ༡༩༩༩ བར་ལན་ཀྲུའུ་ལ་རྟེན་གཞི་བྱས་ཡོད་པའི་ནུབ་བྱང་མི་རིགས་སློབ་གྲྭ་ཆེན་མོ་ནས་དབྱིན་ཡིག་སྦྱངས། ཕྱི་ལོ་ ༢༠༠༩ ལོར་ཁོང་གིས་པེ་ཅིན་མི་རིགས་སློབ་ཆེན་ནས་དབྱིན་ཇི་དང་རྒྱ་ཡིག་སོགས་སྦྱངས་མྱོང་ཡོད་འདུག
གསར་འགོད་པ། བསྟན་འཛིན་ཕུར་བུ།
