བོད་རྒྱལ་ཡོངས་རྩེད་རིགས་ཚོགས་པས་རྒྱ་གར་ནང་ཕྱི་ལོ་ ༢༠༢༢ ལོའི་རྒྱལ་སྤྱིའི་ཀོ་ནི་ཧྥ་བུད་མེད་ཀྱི་རྐང་སྤོལ་འགྲན་སྡུར་ཐོག་མ་གོ་སྒྲིག་གནང་གི་འདུག
ཟླ་འདིའི་ཕྱི་ཚེས་ ༡༤ ཉིན་ཀོ་ནི་ཧྥ་བུད་མེད་རྐང་སྤོལ་མཐུན་ཚོགས་ཀྱིས་བོད་རྒྱལ་ཡོངས་རྩེད་རིགས་ཚོགས་པར། ཕྱི་ལོ་ ༢༠༢༢ ལོའི་རྒྱལ་སྤྱིའི་ཀོ་ནི་ཧྥ་བུད་མེད་རྐང་སྤོལ་རྩེད་འགྲན་གོ་སྒྲིག་གནང་དགོས་པའི་འཕྲིན་ཡིག་ཅིག་འབྱོར་ཡོད་པ་ལྟར། འཕྲིན་ཡིག་དེའི་ནང་ཀོ་ནི་ཧྥ་བུད་མེད་རྐང་སྤོལ་མཐུན་ཚོགས་ཀྱིས། ང་ཚོས་བོད་མི་ཡོངས་དང་ལྷན་དུ་འཛམ་གླིང་ལ་བོད་ཀྱི་མཛེས་སྡུག་དང་ལོ་རྒྱུས། རིག་གཞུང་དང་ཡུལ་སྲོལ་སོགས་ངོ་སྤྲོད་བྱ་རྒྱུ་ཙམ་དུ་མ་ཟད། བོད་ཀྱི་རིག་གཞུང་དང་ཡུལ་སྲོལ། ལོ་རྒྱུས་སོགས་བརྒྱུད་ནས་མི་ཚང་མར་འཛམ་གླིང་འདི་སྔར་ལྷག་གི་གནས་སྟངས་བཟང་ཕྱོགས་སུ་བསྒྱུར་བར་ཕན་ཐོགས་ཀྱི་ཡོད། དེ་བཞིན་ང་ཚོས་ཕྱི་ཟླ་ ༧ ཚེས་ ༦ ཉིན་༧གོང་ས་༧ཏཱ་ལའི་བླ་མའི་འཁྲུངས་སྐར་སྲུང་གཙི་ཞུ་རྒྱུར་རེ་སྒུག་བྱེད་བཞིན་ཡོད། ཅེས་བརྗོད་འདུག
དེ་རིང་འདི་གའི་གསར་འགོད་པས་བོད་རྒྱལ་ཡོངས་རྩེད་རིགས་ཚོགས་པའི་འགན་འཛིན་བསྟན་འཛིན་རིན་ཆེན་ལགས་སུ་ཕྱི་ལོ་ ༢༠༢༢ ལོའི་ཀོ་ནི་ཧྥ་བུད་མེད་རྐང་སྤོལ་རྩེད་འགྲན་ (CONIFA) དེ་ས་གནས་དང་དུས་ཚེས་སོགས་གཏན་ཁེལ་ཡོད་མེད་དྲིས་པར། ཀོ་ནི་ཧྥ་བུད་མེད་རྐང་སྤོལ་རྩེད་འགྲན་དེ་འདི་ལོའི་ཕྱི་ཟླ་ ༧ ཚེས་ ༡ ནས་ ༦ བར་འཚོག་འཆར་ཡོད་པ་དང་རྒྱ་གར་ནང་འཚོག་རྒྱུ་བྱས་པ་རེད། རྒྱ་གར་གྱི་ས་གནས་གང་དུ་འཚོག་རྒྱུ་ཡིན་མིན། ང་ཚོས་གསལ་བསྒྲགས་བྱས་རྗེས་ཤེས་ཡོང་གི་རེད། ཅེས་བརྗོད་བྱུང་།
བསྟན་འཛིན་རིན་ཆེན་ལགས་ཀྱིས་གསུངས་པ་ལྟར་ན། ད་ལན་བོད་རྒྱལ་ཡོངས་རྩེད་རིགས་ཚོགས་པར་རྒྱལ་སྤྱིའི་ཀོ་ནི་ཧྥ་བུད་མེད་རྐང་སྤོལ་རྩེད་འགྲན་བསྡུ་སྐོང་བྱེད་པའི་གོ་སྐབས་ཐོབ་པ་ནི། རྒྱལ་སྤྱིའི་ཀོ་ནི་ཧྥའི་ཚོགས་པ་དང་གྲོས་བསྡུར་གྱིས་བྱུང་བ་ཞིག་ཡིན་ཞིང་། དམིགས་བསལ་ད་སྔ་བར་བོད་པའི་ངོས་ནས་རྐང་སྤོལ་རྩེད་འགྲན་དེ་གོ་སྒྲིག་ཞུས་མྱོང་མེད་པ་དང་། འདི་ལོའི་རྒྱལ་སྤྱིའི་རང་བཞིན་གྱི་བུད་མེད་རྐང་སྤོལ་རྩེད་འགྲན་ནང་བོད་པའི་རྐང་སྤོལ་རུ་ཁག་གཅིག་དང་་འཛམ་གླིང་རྒྱལ་ཁབ་འདྲ་མིན་གྱི་བུད་མེད་རྐང་སྤོལ་རུ་ཁག་ཁྱོན་ ༨ བཅས་ཀྱིས་མཉམ་ཞུགས་གནང་གི་ཡོད་འདུག་ལ། རྐང་སྤོལ་རྩེད་འགྲན་གྱི་འགྲོ་གྲོན་ཡོངས་བོད་རྒྱལ་ཡོངས་རྩེད་རིགས་ཚོགས་པས་གཏང་རྒྱུ་ཡོད་འདུག
ཡང་རྐང་སྤོལ་རྩེད་འགྲན་དེ་གོ་སྒྲིག་གནང་བ་བརྒྱུད་བོད་དོན་དྲིལ་བསྒྲགས་ཁྱབ་ཆེན་པོ་འགྲོ་ཡི་ཡོད་པའི་ཐད་དགོངས་འཆར་ག་རེ་ཡོད་སྐོར་ལ་བསྟན་འཛིན་རིན་ཆེན་ལགས་ཀྱིས། ང་ཚོའི་བོད་ཀྱི་ཆོས་དང་རིག་གཞུང་ལ་སོགས་པ་མང་པོ་ཞིག་བཏོན་རྒྱུའི་གོ་སྐབས་བཟང་པོ་རག་གི་ཡོད་པ་དང་། ཕྱི་རྒྱལ་ཁག་ལ་རྩེད་མོ་རྩེད་མཁན་གྱི་རུ་ཁག་མ་གཏོགས་དམིགས་བསལ་གྱིས་འགྲོ་རྒྱུའི་གོ་སྐབས་རག་གི་མེད་པ་དང་། ང་ཚོས་སྦྱོང་བརྡར་མང་པོ་བྱེད་དགོས་ཀྱི་ཡོད་རེད། རྒྱ་གར་ནང་དུ་རྩེད་འགྲན་འཚོགས་པ་ཡིན་ན། ང་ཚོའི་གཞས་སྣ་འཁྲབ་སྟོན་དང་དགོན་པ་མཇལ་རྒྱུ་ཡོད་པ། དེ་བཞིན་ཕྱི་རྒྱལ་མི་དེ་དག་གིས་ང་ཚོའི་བཙན་བྱོལ་གྱི་གནས་སྟངས་དང་བོད་པ་ག་འདྲ་གནས་ཡོད་པ་སོགས་ཤེས་རྟོགས་ཐུབ་པའི་གོ་སྐབས་ཡག་པོ་ཡོད་པ་རེད་བསམ་གྱི་འདུག ཅེས་བརྗོད་བྱུང་།
འདས་ལོའི་ཕྱི་ཟླ་ ༦ ཚེས་ ༢༣ ནས་ ༣༠ བར་ཡུ་རོབ་ཀྱི་རྒྱལ་ཁབ་རོ་མ་ནི་ཡའི་ (Romania) སི་ཁ་ལེར་ལན་ཌི་ (Szeklerland) ནང་འཚོགས་གཏན་འཁེལ་བའི་རྒྱལ་སྤྱིའི་ཀོ་ནི་ཧྥ་ (CONIFA) བུད་མེད་རྐང་སྤོལ་འགྲན་བསྡུར་ནང་བོད་ཀྱི་བུད་མེད་རུ་ཁག་མཉམ་ཞུགས་བྱ་གཏན་འཁེལ་ཡོད་ཀྱང་། འདས་ལོའི་ཕྱི་ཟླ་ ༣ ཚེས་ ༡༩ ཉིན་རྐང་སྤོལ་རྩེད་འགྲན་གོ་སྒྲིག་ཚོགས་པའི་ངོས་ནས་ཏོག་དབྱིབས་གཉན་རིམས་འགོས་ཁྱབ་ཀྱི་དཀའ་ངལ་འོག རྐང་སྤོལ་རྩེད་འགྲན་དེ་ཚོགས་ཐུབ་ཐབས་མེད་པའི་ཡོངས་བསྒྲགས་བྱས་ཡོད་འདུག
ཀོ་ནི་ཧྥ་རྐང་སྤོལ་མཐུན་ཚོགས་ (Confederation of Independent Football Associations) ཐོག་མར་ཕྱི་ལོ་ ༢༠༡༣ ཟླ་ ༦ ཚེས་ ༧ ཉིན། ཧྥི་ཧྥ་རྒྱལ་སྤྱིའི་རྐང་སྤོལ་མཐུན་ཚོགས་ཀྱི་ངོས་འཛིན་མེད་པའི་རྒྱལ་ཁབ་དང་ས་ཁུལ་གྱི་རྐང་སྤོལ་རུ་ཁག་རྣམས་ལ་དམིགས་ཏེ་མགོ་བརྩམས་པ་ཞིག་ཡིན་པ་དང་། ཆེས་ཐོག་མའི་རྒྱལ་སྤྱིའི་རྐང་སྤོལ་འགྲན་བསྡུར་དེ་ཕྱི་ལོ་ ༢༠༡༤ ལོར་སི་ཝེ་ཌན་དུ་ཚོགས་ཡོད་པ་དང་། ཕྱི་ལོ་ ༢༠༡༨ ལོར་བོད་རྒྱལ་ཡོངས་སྐྱེས་པའི་རྐང་སྤོལ་རུ་ཁག་མཐུན་ཚོགས་དེས་གོ་སྒྲིག་བྱས་པའི་རྐང་སྤོལ་རྩེད་འགྲན་ནང་ཞུགས་མྱོང་ཡོད།
གསར་འགོད་པ། བསྟན་འཛིན་ཕུར་བུ།
