རྒྱ་ནག་གི་ཕྱི་སྲིད་བློན་ཆེན་ཝང་ཡེ་ཟེར་བ་རྒྱ་གར་ནང་འབྱོར་བར་ངོ་རྒོལ་ལས་འགུལ་སྤེལ།

རྒྱ་ནག་གི་ཕྱི་སྲིད་བློན་ཆེན་ཝང་ཡེ་ཟེར་བ་གཞུང་འབྲེལ་ཐོག་ནས་རྒྱ་གར་ནང་འབྱོར་ཡོད་པར་བརྟེན། བོད་རང་བཙན་སློབ་ཕྲུག་ཚོགས་པ་དང་གཞོན་ནུ་ལྷན་ཚོགས་གཉིས་ནས་ཝང་ཡེ་རྒྱ་གར་ནང་ཡོང་བར་ངོ་རྒོལ་དང་བོད་ཀྱི་ཆབ་སྲིད་བཙོན་པ་ཡོངས་ཀློད་གྲོལ་གཏོང་དགོས་པ་སོགས་ཀྱི་འབོད་སྐུལ་འོག་ངོ་རྒོལ་ལས་འགུལ་སྤེལ་ཡོད་པ་རེད།

དེ་རིང་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ལོ་གཉིས་རིང་རྒྱ་དཀར་ནག་གཉིས་བར་མོས་མཐུན་ཡོད་པའི་ངེས་གཏན་གྱི་ས་མཚམས་སུ་རྩོད་རྙོག་བྱུང་ཡོད་པར་བརྟེན། ཁ་སང་ཕྱི་ཚེས་ ༢༤ ཉིན་གྱི་ཕྱི་དྲོར་རྒྱ་ནག་གི་ཕྱི་སྲིད་བློན་ཆེན་ཝང་ཡེ་ (Wang Yi) ཟེར་བ་་རྒྱ་གར་གྱི་རྒྱལ་ས་ལྡི་ལི་རུ་འབྱོར་བ་དང་། བོད་རང་བཙན་སློབ་ཕྲུག་ཚོགས་པའི་ཚོགས་མི་བསྟན་འཛིན་ལེགས་ལྡན་ལགས་དང་བསྟན་འཛིན་བློ་བཟང་ལགས་གཉིས་ནས། རྒྱ་ནག་གི་ཕྱི་སྲིད་བློན་ཆེན་ཝང་ཡི་ཟེར་བ་རྒྱ་གར་ནང་ཡོང་བར་ངོས་ལེན་མེད་པའི་ངོ་རྒོལ་ལས་འགུལ་སྤེལ་ཡོད་པ་རེད།

འདི་གའི་གསར་འགོད་པས་ཁ་པར་བརྒྱུད་བོད་རང་བཙན་སློབ་ཕྲུག་ཚོགས་པའི་ལས་འཆར་འབྲེལ་མཐུད་པ་བསྟན་འཛིན་པ་སངས་ལགས་སུ་ཝང་ཡེ་ལ་ངོ་རྒོལ་ལས་འགུལ་སྤེལ་དགོས་དོན་སྐོར་དྲིས་པར། ཁ་སང་ཕྱི་དྲོའི་ཆུ་ཚོད་ ༧།༣༠ ཡས་མས་ཤིག་ལ་ལྡི་ལིའི་རྒྱལ་སྤྱིའི་གནམ་ཐང་དུ། ལས་འགུལ་འབྲེལ་མཐུད་པ་ (Campaign Coordinator) བསྟན་འཛིན་ལེགས་ལྡན་ལགས་ཀྱིས་ཝང་ཡེ་རྒྱ་གར་ནང་ཡོང་བར་འདོད་པ་མེད། རྒྱ་དཀར་ནག་གི་ས་མཚམས་མ་རེད། ཧིན་བོད་ཀྱི་ས་མཚམས་རེད། ཝང་ཡེར་རྒྱ་གར་དང་བོད་ཀྱི་ས་མཚམས་ཐོག་སྐད་ཆ་ཤོད་རྒྱུའི་ཐོབ་ཐང་མེད། བོད་རང་བཙན་ནི་རྒྱ་གར་གྱི་བདེ་འཇགས་ཡིན། ཞེས་སྐད་འབོད་ཀྱི་ལམ་ནས་ངོ་རྒོལ་ལས་འགུལ་སྤེལ་ཡོད་པ་རེད། དེ་རིང་ཝང་ཡེ་དང་རྒྱ་གར་གྱི་ཕྱི་སྲིད་བློན་ཆེན་གཉིས་ཚོགས་འདུ་འཚོག་བཞིན་ཡོད་པས། ང་ཚོས་སྐད་འབོད་བརྒྱག་རྒྱུའི་འཆར་གཞི་ཡོད། ཅེས་དང་། ད་རེས་ཐུག་འཕྲད་སྐབས་རྒྱ་གར་ངོས་ནས་བོད་རང་བཙན་ཐོབ་པ་ཡིན་ན་རྒྱ་གར་ལ་ཕན་ཐོགས་པ་དང་། རྒྱ་གར་གྱི་ས་མཚམས་བརྟན་སྲུང་ལ་ཕན་ཐོགས་ཆེ་བའི་གནད་དོན་ཁག་གཞིར་བཞག་ནས་གྲོས་མོལ་བྱ་དགོས་པའི་འབོད་སྐུལ་དང་། རྒྱ་ནག་གཞུང་གིས་བོད་ནང་དམ་དྲག་བྱ་རྒྱུའི་མཚོན་པའི་ཀུན་གཟིགས་པཎ་ཆེན་རིན་པོ་ཆེ་སོགས་བོད་ཀྱི་ཆབ་སྲིད་བཙོན་པ་ཡོངས་ཀློད་གྲོལ་དགོས་པའི་བརྡ་ལན་སྤྲོད་ཀྱི་ཡོད་སྐོར་སོགས་བརྗོད་བྱུང་།

ཡང་འདི་གའི་གསར་འགོད་པས་བོད་ཀྱི་གཞོན་ནུ་ལྷན་ཚོགས་ཀྱི་སྒྲིག་འཛུགས་འགན་འཛིན་དང་ལས་འགུལ་བ་སྤེན་པ་ཚེ་རིང་ལགས་སུ་དེ་རིང་གི་ངོ་རྒོལ་ལས་འགུལ་སྤེལ་བའི་སྐོར་དྲིས་པར་ཁོང་གིས། ལས་འགུལ་འདིའི་ནང་ལྡི་ལི་ས་གནས་གཞོན་ནུ་དང་བོད་རང་བཙན་སློབ་ཕྲུག་ཚོགས་པ་བཅས་ཀྱི་མི་ ༨ མཉམ་ཞུགས་གནང་ཡོད་པ་རེད། དེ་རིང་ལས་འགུལ་སྤེལ་དགོས་པའི་དགོས་འདུན་དང་པོ་ནི་རྒྱ་ནག་གི་ཕྱི་སྲིད་བློན་ཆེན་དང་རྒྱ་གར་གྱི་ཕྱི་སྲིད་བློན་ཆེན་གཉིས་རྒྱ་གར་གྱི་ (Hyderabad House) ལ་ཚོགས་འདུ་འཚོག་གི་ཡོད་པ་དང་ཚོགས་འདུ་དེའི་ནང་བོད་དང་རྒྱ་གར་གྱི་ས་མཚམས་ཀྱི་གནད་དོན་ཐོག་ལ་གྲོས་བསྡུར་བྱེད་ཀྱི་ཡོད་པ་རེད། རྒྱ་ནག་ལ་བོད་དང་རྒྱ་གར་གྱི་ས་མཚམས་ཀྱི་གནད་དོན་ཐོག་ལ་གྲོས་བསྡུར་བྱ་རྒྱུའི་ཐོབ་ཐང་མེད། གལ་སྲིད་བོད་དང་རྒྱ་གར་གྱི་ས་མཚམས་རྩོད་རྙོག་དེ་སེལ་དགོས་ཀྱི་ཡོད་ན། བོད་རང་བཙན་མ་ཐོབ་བར་དུ་དཀའ་ངལ་སེལ་ཐུབ་ཀྱི་མ་རེད། བོད་རང་བཙན་ཐོབ་ན་བོད་དང་རྒྱ་གར་གྱི་ས་མཚམས་ཀྱི་དཀའ་ངལ་ཡོངས་སུ་རྫོགས་པ་སེལ་ཐུབ་ཀྱི་རེད། དགོས་འདུན་གཉིས་པ་ནི་བོད་དང་ཧོང་ཀོང་། ཐའེ་ཝན་སོགས་ལ་འགྲོ་བ་མིའི་ཐོབ་ཐང་དང་སྨྲ་བརྗོད་རང་དབང་མེད་པའི་འགན་ཆ་ཚང་རྒྱ་ནག་གཞུང་གིས་འཁུར་དགོས་པ་དང་། འགྲོ་བ་མིའི་ཐོབ་ཐང་དང་སྨྲ་བརྗོད་རང་དབང་སྤྲོད་དགོས་ཀྱི་ཡོད། དགོས་འདུན་གསུམ་པ་ནི་བོད་ནང་དུ་ཡོད་པའི་བཙོན་པ་རྣམས་ཀློད་གྲོལ་གཏོང་དགོས་ཀྱི་ཡོད། ཅེས་དང་། ད་ལྟའི་ཆར་གཞོན་ལྷན་དང་བོད་རང་བཙན་སློབ་ཕྲུག་ཚོགས་པའི་ལས་འགུལ་བ་ ༨ རྒྱ་གར་་ཉེན་རྟོག་པས་འཛིན་བཟུང་བྱས་ཡོད་འདུག

དེ་རིང་རྒྱ་གར་དང་རྒྱ་ནག་གི་ཕྱི་སྲིད་བློན་ཆེན་གཉིས་ཐུག་འཕྲད་ཀྱིས་ཆུ་ཚོད་ ༣ རིང་གླེང་མོལ་བྱས་ཡོད་པ་དང་། དེ་ཡང་རྒྱ་གར་གྱི་ཕྱི་སྲིད་བློན་ཆེན་ (Jaishankar) གྱིས། ང་ཚོས་ཆུ་ཚོད་ ༣ རིང་ཕྱོགས་གཉིས་ཀྱི་འབྲེལ་ལམ་སྐོར་དང་། དེ་སྔ་ཕྱི་ལོ་ ༢༠༢༠ ཟླ་ ༤ བའི་ནང་རྒྱ་ནག་གི་བྱ་སྤྱོད་ཀྱིས་ཕྱོགས་གཉིས་ཀྱི་ཐུན་མོང་གི་འབྲེལ་ལམ་ལ་ཟིང་འཁྲུག་བསླངས་པའི་སྐོར་གླེང་སློང་བྱས་པ་ཡིན། དེ་ཡང་གཙོ་བོ་ས་མཚམས་ཀྱི་གནས་སྟངས་སྐོར་ལ་གླེང་མོལ་དང་རྩོད་རྙོག་མཚམས་འཇོག་ཇི་ལྟར་མགོ་འཛུགས་བྱ་དགོས་པའི་སྐོར་གླེང་མོལ་བྱས་པ་ཡིན། ཞེས་དང་། ད་ལྟའི་ཆར་རྒྱ་གར་དང་རྒྱ་ནག་གི་འབྲེལ་ལམ་ཡག་པོ་མེད་པ་དང་། ས་མཚམས་ཁུལ་དུ་དམག་དཔུང་མང་པོ་ཡོད་པའི་རྐྱེན་གྱིས་ཕྱོགས་གཉིས་བར་ཕན་ཚུན་རྩོད་རྙོག་བྱུང་གི་ཡོད་པ་དང་། ད་ལྟའི་ཆར་རྒྱ་དཀར་ནག་གཉིས་ཀྱི་གྲོས་མོལ་འབྲེལ་ལམ་ཡག་པོ་འགྲོ་བཞིན་པ་དང་བསྟུན། ས་མཚམས་ཀྱི་རྩོད་རྙོག་ཞི་འགྲིག་དང་དམག་མི་འབོར་ཆེན་འགྲེམས་འཇོག་བྱེད་བཞིན་པ་ཕྱིར་འཐེན་ཡོང་བར་རེ་སྒུག་བྱེད་ཀྱི་ཡོད། ཅེས་དང་ས་མཚམས་སུ་དམག་མི་མང་པོ་འགྲེམས་འཇོག་བྱས་པ་དེ་ཕྱི་ལོ་ ༡༩༩༣ ནས་ ༡༩༩༦ བར་གྱི་གྲོས་མཐུན་དང་འགལ་གྱི་ཡོད་པ་དང་། ཐུག་འཕྲད་སྐབས་ད་དུང་རྒྱ་ནག་ནང་སློབ་སྦྱོང་སྦྱོང་བཞིན་པའི་རྒྱ་གར་གྱི་སློབ་ཕྲུག་སྐོར་ཞིག་ཏོག་དབྱིབས་གཉན་རིམས་རྐྱེན་གྱིས་ཕྱིར་རྒྱ་གར་དུ་ལོག་ཐུབ་ཀྱི་མེད་པའི་གནད་དོན་དང་། ཨབ་གྷ་ནི་སི་ཐན་དང་ཡུ་ཀེ་རེན་གཉིས་ཀྱི་རྩོད་རྙོག་སྐོར། ཡུ་ཀེ་རེན་གྱི་རྩོད་རྙོག་སོགས་ཀྱི་སྐོར་ལ་གྲོས་བསྡུར་བྱས་ཡོད་སྐོར་སོགས་བརྗོད་འདུག

ཁ་སང་རྒྱ་ནག་གི་ཕྱི་སྲིད་བློན་ཆེན་ཝང་ཡེ་ཟེར་བ་རྒྱ་གར་ལ་མ་ཡོང་གོང་། ཉིན་གསུམ་རིང་པཱ་ཀི་སི་ཐན་གྱི་རྒྱལ་ས་ཨི་སི་ལམ་བྷ་ཌ་ (Islamabad) ནང་གི་ཁ་ཆེའི་མཉམ་འབྲེལ་ཚོགས་པའི་ (Organisation of Islamic Cooperation) ཚོགས་འདུ་ཞིག་གི་སྟེང་ཞུགས་ཡོད་པ་དང་། ད་རེས་ནི་རྒྱ་ནག་གི་ཕྱི་སྲིད་བློན་ཆེན་ཝང་ཡེ་རྒྱ་གར་ནང་གཞུང་འབྲེལ་བསྐོར་སྐྱོད་དུ་ཡོང་བ་ཐོག་མ་ཆགས་ཀྱི་ཡོད་པ་དང་། ད་སྔ་བར་རྒྱ་དཀར་ནག་གཉིས་བར་ལ་དྭགས་ཁུལ་གྱི་གཙོས་མོས་མཐུན་ཡོད་པའི་ངེས་གཏན་གྱི་ས་མཚམས་ཀྱི་རྩོད་རྙོག་ཐོག་གྲོས་མོལ་ཐེངས་ ༡༥ བྱས་ཡོད་འདུག

གསར་འགོད་པ། བསྟན་འཛིན་ཕུར་བུ།