དེ་རིང་གངས་སྐྱིད་དཔེ་མཛོད་ཁང་གི་ཚོགས་ཁང་དུ། སྲིད་སྐྱོང་སྤེན་པ་ཚེ་རིང་མཆོག་དང་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག ཡུ་རོབ་སྤྱི་འཐུས་ཚ་ཁོ་ཐུབ་བསྟན་རྒྱ་མཚོ་ལགས། ཡུ་རོབ་སྤྱི་འཐུས་ཐུབ་བསྟན་དབང་ཆེན་ལགས་བཅས་ཕེབས་ཏེ། ཏཱ་ལའི་བླ་མའི་དགེ་རྩ་ཚོགས་པའི་མཐུན་སྦྱོར་འོག་བོད་ཀྱི་སྒྲ་སྒྱུར་དང་ཉམས་ཞིབ་ལྷན་ཁང་གིས་བོད་སྒྱུར་གནང་བའི་༧རྒྱལ་བའི་གསུང་རྩོམ་དཔེ་ཚོགས་དང་པོའི་བོད་འགྱུར་པོད་བདུན་དབུ་འབྱེད་གནང་སོང་།
སྐབས་དེར་སྲིད་སྐྱོང་སྤེན་པ་ཚེ་རིང་མཆོག་གིས། དེ་རིང་༧གོང་ས་མཆོག་གི་གསུང་རྩོམ་བོད་སྐད་ནང་བསྒྱུར་བའི་དཔེ་དེབ་དབུ་འབྱེད་མཛད་སྒོའི་སྟེང་མཉམ་ཞུགས་བྱ་ཐུབ་པ་སྐལ་བ་བཟང་པོ་ཞིག་ལ་ངོས་འཛིན་ཞུ་ཡི་ཡོད། དབྱིན་སྐད་ནང་ཡོད་པའི་༧གོང་ས་མཆོག་གི་གསུང་རྩོམ་དེ་དག་བོད་སྒྱུར་དང་ཕྱོགས་སྒྲིག་བྱས་ཏེ་དབུ་འབྱེད་བྱ་རྒྱུའི་མཚམས་ལ་བསླེབས་ཡོང་དུས། བོད་ཀྱི་སྒྲ་སྒྱུར་དང་ཉམས་ཞིབ་ལྷན་ཁང་གི་འགན་འཁྱེར་མཁན་དང་ཕྱག་ལས་གནང་མཁན་གྱི་ཆོད་སེམས་བརྟན་པོ་ཡོད་པ་ནི་གྲུབ་འབྲས་དེ་ནས་མཐོང་ཐུབ་ཀྱི་ཡོད་རེད། ཕྱག་ལས་གང་གནང་བ་དེ་ཞིབ་ཚགས་པོ་དང་། ཉམས་ཞིབ་གང་བྱས་པ་དེ་ཞིབ་ཚགས་པོ་དང་སྤུས་དག་པོ་ཡོང་རྒྱུའི་ཐོག་ལ་འབད་བརྩོན་བྱ་རྒྱུ་དང་། བོད་སྤྱི་བའི་དོན་དུ་ཕྱག་ལས་གནང་བར་ཐུགས་རྗེ་ཆེ་ཞུ་རྒྱུ་ཡིན། ལས་གཞི་འདི་དང་མཉམ་དུ་ལོ་ཙཱ་བ་གསོ་སྐྱོང་བྱ་རྒྱུ་གལ་ཆེན་པོ་བརྩི་ཡི་ཡོད་ཀྱང་། ཚད་དང་ལྡན་པ་ཡོང་རྒྱུ་ཁག་པོ་འདུག སྒྲིག་འཛུགས་འདིའི་ནང་ལོ་ཙཱ་བའི་སློབ་སྦྱོང་སྤྲད་པ་ཙམ་མ་ཟད། ལོ་ཙཱ་བ་ཚོས་འབད་བརྩོན་འཕར་མ་བྱས་ཏེ་བོད་ཡིག་ནས་དབྱིན་ཡིག་ཐོག་བསྒྱུར་ཐུབ་རྒྱུ་དང་དབྱིན་ཡིག་ནས་བོད་ཡིག་ལའང་བསྒྱུར་ཐུབ་པའི་གནས་བབ་བཟོ་ཐུབ་པ་ཡིན་ན། མིའི་ནུས་པ་དེ་རང་བཞིན་གྱིས་ཤུགས་ཆེ་རུ་འགྲོ་རྒྱུ་དང་། མ་འོངས་པར་ལས་གཞི་གང་ཞིག་སྤེལ་རུང་རྒྱ་ཆེ་བ་ཡོང་གི་རེད་བསམ་གྱི་ཡོད། མ་འོངས་པར་བོད་སྒྱུར་གནང་བའི་གསུང་རྩོམ་དེ་དག་ཉམས་ལེན་བྱ་རྒྱུའི་འབད་བརྩོན་གནང་དགོས་སྐོར་དང་། གསུང་རྩོམ་དེ་དག་ཐབས་ལམ་མི་འདྲ་བའི་ཐོག་ནས་འགྲེམ་སྤེལ་མང་པོ་བྱ་དགོས་སྐོར་གསུངས་སོང་།
དེ་ནས་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས། དེ་རིང་གི་ལས་རིམ་འདིའི་ནང་བཅར་རྒྱུ་བྱུང་བར་སྐལ་བ་བཟང་པོ་བྱུང་། ༧གོང་ས་མཆོག་གི་དགོངས་གཞི་དང་མཛད་འཕྲིན། འཛམ་གླིང་འདིའི་ཐོག་ལ་མ་འོངས་པའི་འཛུགས་སྐྲུན་གང་ཡོད་པ་དེ་དག་གཙོ་བོ་༧གོང་ས་མཆོག་གི་གསུང་གི་ཐོག་ནས་རྟོགས་ཐུབ་ཀྱི་ཡོད་པས། གསུང་དེ་དག་ཡོངས་ཁྱབ་སླད་སྒྲ་སྒྱུར་དང་འགྲེམ་སྤེལ་གནང་ཐུབ་རྒྱུ་དང་། འགྲེམ་སྤེལ་གནང་དགོས་པའི་དུས་ཚོད་གལ་ཆེན་པོ་ཆགས་ཀྱི་ཡོད་པ་རེད། དེར་བརྟེན་འབྲེལ་ཡོད་ཚང་མ་ལ་དེ་སྔ་ཕྱག་ལས་གནང་ཟིན་པ་དང་ཕྱག་ལས་གནང་མཁན་ཡོངས་ལ་བསྔགས་བརྗོད་ཞུ་རྒྱུ་དང་། སེམས་ཤུགས་མ་ཆགས་པའི་ཐོག་ནས་མུ་མཐུད་དུ་ལས་འགན་རྒྱ་ཆེ་རུ་གཏོང་དགོས་རྒྱུ་གལ་ཆེན་པོ་རེད་འདུག གཙོ་བོ་༧གོང་ས་མཆོག་གི་གསུང་བོད་སྐད་ཐོག་བསྒྱུར་བ་མ་ཟད། བསྒྱུར་ཟིན་པ་རྣམས་ཕྱོགས་སྒྲིག་བྱ་རྒྱུ་དང་། དེ་མིན་སྐད་རིགས་གཞན་རྒྱ་སྐད་དང་ཉི་ཧོང་གི་སྐད་ལ་སོགས་པར་བསྒྱུར་ཐུབ་པའི་ལས་གཞི་རྒྱ་ཆེ་རུ་གཏོང་ཐུབ་ན་ཡག་པོ་འདུག དེང་སང་འཛམ་གླིང་ནང་༧གོང་ས་མཆོག་གི་མཚན་མི་མཁྱེན་མཁན་མེད་པའི་གནས་སྟངས་འདྲ་བོ་ཆགས་ཡོད་པས། གསུང་དེ་དག་རིན་ཐང་ཆེན་པོ་ཆགས་འགྲོ་ཡི་རེད། དེར་བརྟེན་འགྲོ་བ་སྤྱི་ལ་ཕན་ཐོགས་རྒྱུ་དང་བྱེ་བྲག་ཏུ་སྒེར་སོ་སོའི་ཐོག་ནས་མི་ཚེའི་འཚོ་བ་ཤེས་པར་ཕན་ཐོགས་རྒྱུ་གལ་ཆེན་པོ་ཆགས་ཀྱི་ཡོད་པ་རེད། དེར་བརྟེན་ལས་གཞི་རྒྱ་ཆེ་རུ་གཏོང་ཐུབ་རྒྱུ་དེ་གལ་ཆེན་པོ་རེད་འདུག དེ་བཞིན་ང་ཚོའི་སྤྱི་ཚོགས་ནང་དཔེ་ཀློག་དང་བགྲོ་གླེང་བྱ་རྒྱུའི་ཐད་དོ་སྣང་བསླེབས་པར་ལས་རིམ་མང་པོ་སྤེལ་རྒྱུ་གལ་ཆེན་པོ་རེད་འདུག་ཅེས་༧གོང་ས་མཆོག་གི་གསུང་དེ་དག་སློབ་གྲྭ་ཁག་གི་ནང་སོ་སོའི་སློབ་ཚན་དང་འབྲེལ་བ་ཡོད་མེད་ལ་མ་ལྟོས་པར་དུས་ཚོད་སྟོང་པ་ག་དུས་རག་རུང་༧གོང་ས་མཆོག་གི་གསུང་རྩོམ་དེ་དག་ལ་ཐུགས་སྣང་གནང་རྒྱུ་དང་ཀློག་རྒྱུ་སོགས་གལ་ཆེན་ཡིན་སྐོར་སོགས་གསུངས་སོང་།
ཡུ་རོབ་སྤྱི་འཐུས་ཐུབ་བསྟན་དབང་ཆེན་ལགས་ཀྱིས། ༧གོང་ས་མཆོག་གི་གསུང་རྩོམ་དེ་དག་བོད་རིགས་མི་མང་ཚོར་ཕན་ཐོགས་ཡོང་བར་དགོངས་པ་བཞེས་ཏེ་སྒྲ་སྒྱུར་གནང་བཞིན་ཡོད་པ་རེད། ལོ་མང་རིང་ཕྱག་ལས་གནང་བ་ནང་བཞིན་མཐུན་རྐྱེན་རོགས་རམ་གནང་མཁན་མང་པོ་ཡོད་རེད། ༧གོང་ས་མཆོག་གི་གསུང་རྩོམ་རྣམས་བོད་སྐད་ནང་བསྒྱུར་ཐུབ་པ་དེ་ལས་སླ་པོ་མ་རེད་བསམ་གྱི་ཡོད། གསུང་རྩོམ་དེ་དག་ལ་དོ་སྣང་དང་འགན་འཁུར་བའི་ཐོག་ནས་པར་སྐྲུན་གནང་ཐུབ་པར་ང་རང་གི་ངོས་ནས་ཕྱག་ལས་གནང་མཁན་ཡོངས་ལ་བཀྲ་ཤིས་བདེ་ལེགས་དང་ཐུགས་རྗེ་ཆེ་ཞུ་རྒྱུ་ཡིན། མ་འོངས་པའི་གཞོན་སྐྱེས་ཚོས་༧གོང་ས་མཆོག་གི་གསུང་ཀློག་ཐུབ་པར་ཕན་ཐོགས་ཡོང་གི་རེད། བོད་ཀྱི་སྒྲ་སྒྱུར་དང་ཉམས་ཞིབ་ལྷན་ཁང་གིས་ཕྱག་ལས་མུ་མཐུད་དེ་གནང་རོགས་གནང་། མ་འོངས་པར་བྱ་བ་ལམ་འགྲོ་ཡོང་བའི་སྨོན་འདུན་ཡོད་སྐོར་སོགས་གསུངས་སོང་།
ཡུ་རོབ་སྤྱི་འཐུས་ཚ་ཁོ་ཐུབ་བསྟན་རྒྱ་མཚོ་ལགས་ཀྱིས། ང་རང་གི་ཕ་ཡུལ་རྒྱ་རོང་རེད། ང་རང་ཆུང་དུས་མཁས་དབང་མི་དགེ་བསམ་གཏན་ལགས་ཀྱི་དྲུང་ནས་གསུང་ཆོས་ཞུས་མྱོང། མཁས་དབང་མི་དགེ་བསམ་གཏན་གྱི་བཀའ་སློབ་གནང་བའི་ནང་། ང་ཚོ་བོད་རིགས་འདི་རང་གི་རྐང་པའི་སྒང་ལ་ལངས་དགོས་ཀྱི་འདུག རྒྱལ་ཁབ་དང་མི་རིགས་ཡར་རྒྱས་འགྲོ་དགོས་ཀྱི་ཡོད་ན། ཡིན་ཅིག་མིན་ཅིག་རྒྱ་ཡིག་དང་དབྱིན་ཡིག་སྦྱངས་དགོས་པ་ཁྱབ་ཀྱི་མ་རེད། དཔེར་ན། ཉི་ཧོང་ལྟ་བུ་ལ་མཚོན་ན། ཉི་ཧོང་གི་མི་རིགས་འདི་ཕྱིའི་རྒྱལ་ཁབ་དང་མི་རིགས་དེ་དག་གིས་རང་གི་སྐད་ཡིག་ལ་མཐོང་དང་ཡིད་ཆེས་ཆེ་བས་ཕྱིའི་སྐད་ཡིག་བེད་སྤྱོད་གཏོང་གི་མ་རེད། གཙོ་བོ་སོ་སོའི་སྐད་ཡིག་གི་རིན་ཐང་ཡོད་དགོས་པ་དང་རང་གི་རང་ལ་ཡིད་ཆེས་དགོས་ན། རང་གི་སྐད་དང་ཡི་གེ། རིག་གཞུང་དང་ཆེ་མཐོང་ལ་གདེང་ཚོད་དགོས་ན། སྐད་རིན་ཐང་ལྡན་པ་དང་རིག་གནས་སྣ་ཚོགས་ལྡན་པ་དགོས་ཀྱི་ཡོད་རེད། མདོར་ན་བོད་མི་རིགས་དེ་སླར་ཡང་རང་གི་རྐང་པའི་སྒང་ལངས་དགོས་ཀྱི་ཡོད་ན། གཙོ་བོ་རང་གི་སྐད་དང་ཡི་གེ་ལ་མཐོང་དང་ཡིད་ཆེས་བྱེད་དགོས་ཀྱི་ཡོད་རེད། ད་དུང་རང་གི་ཆོས་དང་རིག་གཞུང་དེ་དག་རྩ་ཆེན་པོ་བརྩི་དགོས་ཀྱི་ཡོད་པ་རེད། ཏཱ་ལའི་བླ་མའི་དགེ་རྩ་ཚོགས་པའི་མཐུན་འགྱུར་འོག བོད་ཀྱི་སྒྲ་སྒྱུར་དང་ཉམས་ཞིབ་ལྷན་ཁང་གིས་༧རྒྱལ་བའི་གསུང་རྩོམ་དེ་དག་བོད་བསྒྱུར་གནང་བར་ཐུགས་རྗེ་གནང་ཞུ་ཡི་ཡིན། ༧གོང་ས་མཆོག་གིས་སེམས་པ་བཟང་པོ་དང་མི་ཡག་པོ་བྱ་དགོས་པའི་བཀའ་སློབ་གནང་བ་ལྟར། ང་ཚོའི་བརྒྱུད་ལམ་འདིའི་ནང་གསན་གཟིགས་གནང་མཁན་བོད་མི་ཡོངས་ཀྱིས་སེམས་པ་བཟང་པོ་གནང་རྒྱུའི་འབད་བརྩོན་གནང་དགོས་རེད་བསམ་གྱི་ཡོད་སྐོར་སོགས་གསུངས་སོང་།
